Pojõk Ien Otemjej ñõn Ijjino Baibel Study
1. Ta eo jej aikwij kõmõne ñõn kajejit erro eo Jisõs ear letoke ilo Matu 28:19, 20?
1 Jisõs ear letok erro eo ñõn ar ‘kõmõn dri kalor, im katakin ir.’ (Matu 28:19, 20) Kin men in, jej aikwij pojõk ien otemjej ñõn ijjino Baibel study ko, im jab ilo Jãdede eo wõt me kar kajenolok ñõn ar kõmõn Baibel study. Nan in ijjino kein tok ilõl remaroñ jibõñ kij kõmõne men in.
2. Wõn ro jemaroñ kajitõk ibeir elañe rekõnan katak Baibel eo?
2 Kajitõk Elañe Rekõnan: Elañe elõñlok armij jej kajitõk ibeir ñõn katak Baibel, enaj birurulok an or ar dri katak. (Ekk. 11:6) Kwonañin ke kar kajju im kajitõk iben armij ro elañe rekõnan katak Baibel eo? Ilo juõn congregation ilo Amerika, dri kwalok ro rar kate ir ñõn kõmõne men in iomin juõn aliñ. Rar lukkun mõnõnõ kinke rar maroñ lo 42 Baibel study ko rekãl. Jab mõkõj in lemnok bwe ro rej itoklimo rejela bwe kwokõnan katak Baibel ibeir. Elañe kwoj bar jeblaklok ibeir, etke kwojjab kajitõk elañe rekõnan katak Baibel eo ibõm? Ejelok jorran elañe rejjab kõnan jino katak ilo ien eo. Wõnmanlok wõt im kalaplok itoklimo ko air. Emwij ke am kajitõk iben ro dri turum, ro nukim, dri jerbal ro mõtõm, im dri jikuul ro mõtõm elañe rekõnan katak Baibel? Kwomaroñ kajitõk iben dri katak ro am elañe eor nukiir ak mõtair me eor air itoklimo ñõn katak Baibel eo.
3. Ta kein jibõñ eo eor iber ñõn ijjino Baibel study ko, im ñãt eo jemaroñ kajerbale?
3 Juõn Kein Jibõñ Eaurõk: Tract eo Kwo Kõnan ke Jelã Mol Eo? ej juõn kein jibõñ elap tokjen. Meñe dri mweo ej kõnan bõk buk ko jet ak jaab, kwoj maroñ wõt dror tract in iben. Jemaroñ kajerbale ñe jej kwalok nan ilo business territory ko, iturin ial ko, ilo letter ko, im elañe jej jeblaklok iben ro rej itoklimo. Jemaroñ bar dror tract eo elañe ejelok armij ilo moko. Etke kwojjab bõke tract in ibõm ilo ien am iuwe ilo bus ak taxi ko, im ñe kwoj kaikujkuj ak jerbal? Itulikin tract in ej kemelele kin karõk eo kin katak Baibel, im ej kwalok buk eo Baibel Ej Katakin.
4. Ewi wãwen jemaroñ kajerbale tract eo Jelã Mol Eo ñõn ijjino Baibel study ko?
4 Elikin am lelok tract eo ñõn armij eo, kwomaroñ jitõñlok ñõn kajitõk eo ituman in tract eo, im kajitõk iben, “Ta ian kajitõk kein kwoj lukkun itoklimo kake?” Elikin, komro maroñ bukot uak eo ilo tract eo, im riiti ak kemelele kin peij eo itulik, eo ej kwalok kin karõk eo kin Baibel study. Elikin men in, kwomaroñ kwalok ñõn e ia eo emaroñ bõk melele ko relaplok ilo buk eo Baibel Ej Katakin, inem dror buk in iben, im kõmõn karõk ñõn bar jeblak im bwebwenato iben.
5. Etke jej aikwij pojõk ien otemjej ñõn ijjino Baibel study ko?
5 Ej lõñ wõt armij ro ilo territory ko ar im rekõnan katak Baibel eo. Elañe jej pojõk ien otemjej ñõn ijjino Baibel study ko, enaj laplok ijo kwonad ilo ar lõñliñ im jibõñ ro jet bwe ren maroñ etetal ilo ial eo ej tellok ñõn mour.—Matu 7:13, 14.