Kortokjen Peba In Ien Otemjej
1. Ta ko peba in etan Jelã Mol Eo ej jibañ kij ñan ad kõmmani?
1 Kar kõmmane peba eo naetan Kwo Kõnan ke Jelã Mol Eo? bwe en jibañ kij ijjino ad katak Baibel eo ibben armij ro. Bareinwõt ej juõn kein jerbal ñan kajeded katak ko remol. (Ekk. 11:6) Erkein jet ian wãwen ko ñan jibañ kij kalaplok ad kortokjen peba in.
2. Ewi wãwen jemaroñ kajerbal peba eo ñan jinoe ad bwebwenato ibben armij ro?
2 Ñan Jinoe Ad Bwebwenato Ibben Armij Ro: Kwomaroñ lelok peba eo ñan dri mweo im kwalok kajitõk ko jiljino ilo peba eo. Kwomaroñ ba, “Joij im kãlet juõn ian kajitõk kein me kwoj kõnan jelã uak eo.” Elikin an uak, ellõklok ñan uak eo iloan peba eo im riiti eon eo ie jen Baibel eo. Riit ak kemelele ilo tu kadu jen peij eo eliktata. Inem kwalok book eo am etan Baibel ej Katakin im ba ñan ir bwe kwoj mõnõnõ in bar jeblak im bwebwenato ibbeir kin juõn ian japter ko ilo book eo.—Matu 13:23.
3. Elañe dri mweo eboub, ta eo jemaroñ ba im kõmmane?
3 Elañe Dri Mweo Eboub: Kwomaroñ ba ñan e, “Kinke kwo boub, imaroñ lewõj peba in. Ewõr jiljino kajitõk ko ie me enañin aolep armij ro rej kajitõk kaki im ewor uak ko kajjojo jen Baibel eo. Ñe inaj bar jeblaktok, kwomaroñ kwalok ta lemnak eo am kin uak kein.”
4. Ta eo jemaroñ ba kin peba eo ñe jej kwalok nan ilo iturin ial ko?
4 Ñe Jej Kwalok Nan ilo Iturin Ial Ko: Kwomaroñ ba, “Yokwe. Kwonañin ke kar kajitõk kin jabrewõt ian kajitõk kein? [Kõtlok bwe en uak.] Peba in ej kalikar uak ko jen Baibel eo me enaj po buruõm kaki.” Elañe armij eo ejjab ekaiuriur, inem kwomaroñ bwebwenato kin juõn ian uak ko jen peba eo. Tokelik kwomaroñ kwalok book eo am etan Baibel Ej Katakin im ba bwe kwoj mõnõnõ in bwebwenato kin juõn ian japter ko.
5. Jen ien ñan ien, ewi wãwen jemaroñ kortokjen peba in ilo moko ejako armij ro ie?
5 Elañe Ejelok Armij Imweo: Ilo jet bukwon ko, ekkã an dri kwalok ro likiti peba ko iomin kejem in imoko ejako armij ro ie. Elañe komij kõmmane men in ilo congregation eo am, emmõn ñan kortokjen peba in im likiti iomin kejem in imoko ejako armij ro ie. Inem ñe kwoj bar jeblak, kwomaroñ ba, “Ke kimar bed ijin moktalok, kwar jab bed mwin. Innem, kimar likiti peba eo iomin kejem eo am. Ta ian kajitõk kein kwokõnan jelã uak eo ñan e?”
6. Etke peba eo Jelã Mol Eo ej juõn kein jerbal eo elap tokjen?
6 Peba in Jelã Mol Eo ej kalikar mol eo ilo juõn wãwen eo ebidrodro im alikar ñan melele. Armij ro jen ijoko otemjej im kabuñ otemjej remõnõnõ in ritti. Ebidrodro ñan ad kajerbale. Ajiri ro im dri kwalok ro rekãl remaroñ kajerbale ilo jerbal in kwalok nan. Kwoj ke kortokjen peba in ien otemjej?