Ewõr Juõn Kein Jerbal Ekãl ñan Jino Katak ko!
1 Kõrã in America eo ear juõn eo ear lukkun tõmak ilo kabuñ in Roman Catholic. Ear tiljek ilo an jojomare katak ko an kabuñ eo. Ear bareinwõt kõmman juõn trip ñan Vatican eo. Ak, ke juõn ian Ri Kennan ro an Jehovah ear lolok e ilo mweo imõn, ear mõnõnõ in bõk juõn katak Bible. Etke? Kinke ear kõnan katak kin ta eo Bible ej ba im kabuñ eo an ejjab katakin armij Bible ilo moko imwiir. Ta eo experience in ej katakin kij kake? Eñin bwe jejjab jelã wõn eo enaj mõnõnõ in bõk juõn katak Bible ilo ejelok wõnãn.—Ekkl. 11:6.
2 Kwo nañin ke kar jenliklik in jiroñ armij bwe jej mõnõnõ in katak Bible ibben jabdewõt eo ej itoklimo? Aolep ro ilo bukwon eo am rej jelã ke bwe jej tilmaake karõk in ilo ejelok wõnãn? Ewi wãwen jemaroñ kõmman bwe ren jelã? Ej ikijen ad kajerbal juõn kein jerbal ekãl! Ej juõn tract emejaja im ej jiljino peij aetokin etan Kwokõnan Ke Kalaplok Am Melele Kin Bible eo? En let ad jelã kin tract in, ikijen kajjojo unin tel ko redik.
3 “Etke Konono Bible eo?” Tract in ej letok un ko rekaitoktoklimo. Ej kamelele bwe ewõr ilo Bible “katak ko in yokwe jen Anij,” eo ej kwalok kin ewi wãwen jemaroñ kebak e ilo jar ñan kajitõk kin jibañ im ewi wãwen jemaroñ bõk men in letok eo an kin mour indio. (1 Tess. 2:13) Tract eo ej kwalok bwe ilo Bible ewõr “mol ko ie ko rej letok jelãlokjen,” einwõt kin ta eo ej walok elikin jej mij im etke lal in eobrak kin abañ ko. Ej kwalok kin “nan in kaiñi ko an Anij ilo Bible” im ñe jej jerbali rej bõktok tokjen ko lor kanniek im rej kalaplok mõnõnõ, kejatdikdik, im kadkad ko jet remõn. Tract eo ej jitõñlok ñan bar juõn un ñan read Bible—kanan ko kin ilju im jeklaj me rej kwalok kin ta eo ej bed imad.—Rev. 21:3, 4.
4 “Jibañ ñan Melele Bible eo”: Tract eo ej ba: “Kij aolep jej aikwij bõk jibañ bwe jen melele Nan in Anij.” Inem ej kwalok kin wãwen eo ñan ad katak Bible: “Juõn wãwen emõntata ñan katak Bible ej ilo jidik kin jidik, jino ibben katak ko re bidodo.” Ke ej kwalok ilo alikar bwe “Bible eo ej beek men otemjej,” tract eo ej kwalok kin Jen Kõmmõne brochure eo einwõt juõn men me enaj jibañ ri katak eo ñan “melele Jeje ko rej walok kin katak ko rekajju wãweid.” Unin tel eo tok juõn edik ej bõkmantak juõn kajitõk eaorõk.
5 “Kwoj Mõnõnõ ke in Karõk Ien Kajjojo Week ñan Melele Bible eo?” Tract eo ej kamelele bwe jemaroñ karõk katak Bible eo ilo juõn ien im juõn jikin eo emõn ñan ri katak eo, ilo mweo imõn make ak ikijen telephone eo. Wõn ro remaroñ koba ilo katak in? Tract eo ej uak: “Aolep ilo family eo am. Jabdewõt ro jeram im kwoj kãlet in kir ir remaroñ itok. Ak elañe kwokõnan, katak in emaroñ ibbam wõt.” Ewi aetokin ien katak eo? Ej kamelele: “Elõñ rej karõk juõn awa kajjojo week ñan katak Bible eo. Elañe kwomaroñ kalaplok am ien ak kwoj aikwij kaeietlok ien kajjojo week, Ri Kennan ro renaj mõnõnõ in karõke ñan jibañ yuk.” Eñin ej men eo eaorõk! Kimij mõnõnõ in kõmman oktak ko ekkar ñan wãwen ko ibben kajjojo ri katak.
6 “Juõn Kir ñan Katak”: Ewõr juõn coupon me eo ej bõk tract eo emaroñ kajerbale ñan order Jen Kõmmõne brochure eo ak ñan kajitõk bwe juõn en lolok e ñan kameleleik e kin program in katak Bible ilo ejelok wõnãn. Kilin Jen Kõmmõne brochure eo ej walok ilo aolep uno ko unokan. Kwojjab lo ke kin ta unin tract in enaj rejañ elõñ ro emol burueir ñan bõk jibañ eo ad? Kiõ, ewi wãwen jemaroñ kortokjen kein jerbal in ekãl?
7 Wõn Ro Jemaroñ Lelok Tract in ñane? Kwomaroñ lelok tract in ñan armij ro make ak doori ilo moko ejako armij ro ie. Jemaroñ leto-letak jen em ñan em, iturin ial, im ilo jikin business ko. Leloke ñan armij meñe rej bõk book ko ad ak rejjab. Kadeloñe ilo magazine ko ak book ko jet jej liloki. Kobaiki ñe kwoj jeje letter ko. Ba bwe kwonaj mõnõnõ in mail e ñan jabdewõt ian ro kwoj iion ir ikijen kajerbal telephone. Ien otemjej en wõr jet ibbam ñan lelok ñe kwoj kaikujkuj, ñe kwoj uwe ilo taxi ak bus, im ñe kwoj kwalok nan ilo jabdewõt ien emõn tok. Lelok ñan jabdewõt eo ej itok ñan mweo imõm. Lelok ñan ro nukõm, ri turõm, ri school ro mõttam, im armij ro jet kwo jelã kajjiir. Kate yuk bwe kwon lelok tract in ñan aolep armij ro kwoj iion ir. Inem ta?
8 Elañe Rej Uak ilo Mõkaj: Jet armij renaj uak ilo mõkaj ilo air ba bwe rekõnan katak Bible. Kin men in, ilo jabdewõt ien kwoj kwalok nan, ien otemjej en wõr ruo copy in Jen Kõmmõne brochure eo—juõn ñan ri katak eo im juõn am copy. Elañe armij eo ej mõnõnõ, jino katak eo ilo ien eo wõt. Kabelloke ñan peij eo iloan kilin brochure eo, im konono “Ewi Wãwen Jemaroñ Kajerbal Brochure In.” Inem jinoe ilo katak 1, im kwalok kilen katak eo. Wãwen in ejjab bidodo ke?
9 Elañe Eo Ej Roñjake Ej Aikwij Ien ñan Lemnak Kake: Mokta jen an ele elap ien, kate yuk ñan am bar kebak e. Ñe kwoj etal, kwon kõmman bwe en wõr Jen Kõmmõne brochure eo ibbam. Kwalok ñan e title in katak ko ilo peij eo iloan kilin brochure eo. Kõtlok bwe en kãlet katak eo elap an kaitoklimoen. Eliklok ñan katak eo, im jino etale katak eo ear kãlete.
10 Bar Jeblak Ibben Ro Rar Bõk Magazine ko: Elañe kwar door juõn tract ibben magazine ko, kwomaroñ kajerbal ennan in: “Ien eo eliktata iar itok, iar mõnõnõ in door ibbam juõn copy in magazine in Imõniaroñroñ. Bõlen kwar lo bwe title in magazine in ej Imõniaroñroñ Ej Kwalok kin Ailiñ eo an Jehovah. Rainin I kõnan kamelele kin ta in Ailiñ eo im ta naj melelen ñan kwe im family eo am.” Inem kabellok Jen Kõmmõne brochure eo ñan katak 6. Jino jen paragraph eo mokta, kwon read im bwebwenato ibben ri mweo ekkar ñan joñan ien eo ewõr ibben. Inem kõmman karõk ñan bar jeblak ilo bar juõn ran ñan kajemlok katak eo.
11 En Jab Maat Tract ko: Service overseer eo im brother ro rej lolorjake book im magazine ko ren lale bwe ien otemjej en wõr ilo congregation eo tract in Melele Kin Bible eo. En wõr jet ilo bõjo ak ieb eo am, ilo wa eo waam, ilo jikin jerbal eo am, ilo school eo, ijo ebak ñan jikin deloñ eo ilo mweo imõm—ilo jabdewõt jikin enaj bidodo bõke. Emol, en wõr jet ilo ieb in kwalok nan eo am bwe ilo ien ko ñe kwoj iion armij ro kwomaroñ bwebwenato ibbeir kin Bible eo.
12 Kimij Kejatdikdik Bwe Jehovah Enaj Kajerammõn Jibadbad ko Ad: Juõn mejenkajjik emõn ñan aolep Ri Christian ro ej ñan katakin bar juõn armij kin mol eo. (Mat. 28:19, 20) Kwoj kõmman ke juõn katak Bible kiõ? Elañe kwoj, kwomaroñ ke kabuk ien ilo schedule eo am kajjojo week ñan kõmman bar juõn? Elañe kwojjab kõmman juõn katak kiõ, bõlen kwo kõnan. Jar ñan Jehovah bwe en kajerammõn jibadbad ko am ñan lo juõn armij kwomaroñ katak ibben. Inem jerbal ekkar ñan jar kein.—1 Jon 5:14, 15.
13 Ewõr juõn kein jerbal ekãl ñan ijjino katak ko! Jen jelã kake. En lap ad jaketo-jaketake. Kõmman joñan wõt ami maroñ ñan “kõmõnmõn emõn, bwe [komin] mweie kin jerbal ko remõn, im [komin] mol kab pojõk in lelok” ta eo kom ar katak kaki kin Nan in Anij.—1 Tim. 6:18.
[Box eo ilo peij 4]
IEN KO REMÕN ÑAN JAKETO-JAKETAK TRACT EO
◼ Bwebwenato ko jen ran ñan ran
◼ Ñe juõn armij ej mõnõnõ in bõk book ko ad
◼ Ñe ejako armij ilo mweo
◼ Ñe jej bar jeblak
◼ Ñe jej iion armij ilo ad kwalok nan iturin ial
◼ Ñe jej kwalok nan ilo jikin business
◼ Ñe jej kwalok nan ilo jabdewõt ien emõn tok
◼ Ñe jej jeje letter ko
◼ Ñe jej uwe ilo taxi ak bus ko
◼ Ñe juõn armij ej itok ñan mweo imweid
◼ Ñe jej bwebwenato ibben ro nukid, ri turid, ri jerbal ro mõttad, ri school ro mõttad, im ro jet jej jelã kajjiir