MOURIN KŨRJIN
Dãpij Wõt Kien ko An Jeova kõn Mour Erreo
Em̦õj an Jeova Anij letok kien ko an kõn mour erreo im mour jim̦we ñan aolep armej. Ñan waanjoñak, ej kakien bwe mour in m̦are en men eo l̦eo im lio rej aikuj kaorõke toon wõt aerro mour. (Mt 19:4-6, 9, UBS) Edike jabdewõt kain mour ettoon. (1Ko 6:9, 10, UBS) Em̦õj an bar letok naanin kakapilõklõk ko kõn wãween nuknuk im tõrejab ñan kõjenolo̦k armej ro an jãn ro jet.—Dt 22:5; 1Ti 2:9, 10.
Ilo lal̦ in rainin, elõñ armej rej kõjekdo̦o̦n kien ko an Jeova. (Rom 1:18-32, UBS) Rej kõtl̦o̦k bwe l̦õmn̦ak ko rebuñbuñ an armej ro jet ren jelõt jokãlõt ko aer kõn nuknuk ko rej kõn̦aki, wãween aer tõrejab, im m̦wilier. Elõñ rej kõm̦m̦ani m̦anit ko rekajjõjõ im rej kareel ro jet ñan bar kõm̦m̦ani im rej kananaik armej ro eoktak wãween mour ko aer jãn er.—1Pi 4:3, 4, UBS.
Ãinwõt Ri Kõnnaan ro an Jeova, jej aikuj peran ilo ad dãpij wõt kien ko an Anij kõn mour erreo. (Rom 12:9) Ewi wãween? Ilo ad kaalikkar ñan ro jet ke jej mour ilo wãween eo ej kabuñbũruon Anij ak en alikkar ilo wãween eo eban l̦õkatipi er. Jej aikuj bareinwõt kõm̦m̦an kien ko ñan kõj make. Ñan waanjoñak, ñe jej kããlõt jitael̦ in nuknuk ko jekõn̦aan im wãween ad tõrejab, jemaroñ kajjitõk ippãd make im ba: ‘Jokãlõt ko aõ rekkar ke ñan kien ko an Jeova ak rej ke kaalikkar l̦õmn̦ak ko an lal̦ in? Nuknuk ko aõ im wãween aõ tõrejab rej ke kaalikkar bwe ij mour ãinwõt juon Kũrjin eo em̦ool me ej mijak Anij?’ Ak ñe jej kããlõt ta ko jej roñjaki ak alwõji, jemaroñ kajjitõk ippãd make im ba: ‘Jeova enaaj ke m̦õn̦õn̦õ kõn men in? An wõn l̦õmn̦ak eo ij rejetake ilo aõ roñjake ak alwõje men in? Men in kam̦õn̦õn̦õ ko ij kããlõti remaroñ ke jelõt pepe eo aõ ñan dãpij wõt aõ mour erreo? (Sam 101:3, UBS) Emaroñ ke juon men ej kal̦õkatip ro uwaan baam̦le eo aõ ak ro jet?’—1Ko 10:31-33.
Etke elukkuun aorõk ñan ad dãpij wõt kien ko an Jeova kõn mour erreo? M̦õttan jidik Kũraij Jijej enaaj ko̦kkure aelõñ ko im jol̦o̦k aolep nana. (Ezk 9:4-7) Armej ro wõt me rej kõm̦anm̦an ankilaan Anij renaaj mour. (1Jo 2:15-17) Innem jekdo̦o̦n ta enaaj wal̦o̦k ak jen dãpij wõt kien ko an Jeova kõn mour erreo, ineem armej ro renaaj kile an em̦m̦an m̦wilid im menin ej bõktok nõbar Anij.—1Pi 2:11, 12.
ALWÕJE PIJA EO, BECOME JEHOVAH’S FRIEND—ONE MAN, ONE WOMAN, IM ETALE KAJJITÕK KEIN:
Etke ej men in mãlõtlõt ñan mour ekkar ñan kien ko an Jeova?
Etke ro ewõr nejier rej aikuj katakin ajri ro jãn ke rej dik wõt kõn kien ko an Jeova kõn mour erreo?
Ewi wãween an jo̦dikdik ro im rũtto ro maroñ jipañ ro jet ñan bõk tokjãn jãn em̦m̦an eo an Anij?