Ad Yokwe im Kam̦m̦oolol Jeova Ej Kõm̦akũt Kõj ñan Peptaij

1-2. Ãinwõt an Jerbal 8:27-31, 35-38 kwal̦o̦k, ta eo ear kõm̦akũt eunõk in Itiopia eo ñan peptaij?

KOKÕN̦AAN ke peptaij ãinwõt juon ri-kal̦ooran Christ? Yokwe im kam̦m̦oolol ear kõm̦akũt elõñ ñan kõm̦m̦ane jokãlõt in. L̦õmn̦ak kõn waanjoñak eo an juon ri-utiej me ear jerbal ñan lerooj eo an Itiopia.

² Ri-Itiopia in ear m̦õkaj in jerbali men ko ear katak kaki jãn Jeje ko. (Riit Jerbal 8:27-31, 35-38.) Ta eo ear kõm̦akũt e? Alikkar bwe ear kaorõk Naanin Anij kõnke ear riiti jet eoon ko ilo bokin Aiseia ke ear uwe ioon juon jariot. Im ke Pilip ear kõnono ippãn, l̦eo ear jino wõr an kam̦m̦oolol kõn ta eo Jesus ear kõm̦m̦ane ñane. Bõtab etke ri-utiej in ear etal ñan Jerusalem? Kõnke em̦õj an ejaak yokwe eo an ñan Jeova kadede. Ewi wãween ad jel̦ã? Ej kab m̦õj an kabuñ ñan Jeova ilo kar Jerusalem. Alikkar bwe l̦ein ear etal jãn kabuñ eo ear dik im rũttol̦o̦k ie im ear kobal̦o̦k ippãn aelõñ eo wõt me kar ajel̦o̦k ñan Anij eo em̦ool. Yokwe in an ñan Jeova ear kõm̦m̦akũt e ñan bar bõk juon buñtõn ne eaorõk, eñin ej bwe en peptaij im erom juon iaan ri-kal̦oor ro an Christ.​—Matu 28:19.

3. Ta eo emaroñ bõbraik juon armej jãn an peptaij? (Lale bo̦o̦k eo “Ta eo Ilo Bũruom̦?”)

³ Yokwe eo am̦ ñan Jeova emaroñ kõm̦akũt eok ñan am̦ peptaij. Bõtab, yokwe emaroñ bar bõbraik eok jãn am̦ kõm̦m̦ane men in. Ewi wãween? L̦õmn̦ak kõn jet wõt iaan waanjoñak ko. Kwõmaroñ lukkuun yokwe baam̦le eo am̦ im ro m̦õttam me rejjab ri-tõmak, im kwõmaroñ inepata bwe ñe kwõnaaj peptaij, renaaj dike eok. (Matu 10:37) Ak kwõmaroñ yokwe ak kaorõk m̦anit ko me kwõjel̦ã Anij ediki, im kwõmaroñ lo bwe epen ñan am̦ julo̦k m̦anit kein. (Sam 97:10) Ak kwõmaroñ kar dik im rũttol̦o̦k im keememe m̦anit ko me rej ekkejell̦o̦k ippãn kabuñ ko reriab. Kwõmaroñ kaorõk iien ko rekam̦õn̦õn̦õ ilo kar iien keemem kein. Kõn men in, kwõmaroñ lo bwe epen ñan bõjrak jãn am̦ kõm̦m̦ani m̦anit ko me Jeova ejjab m̦õn̦õn̦õ kaki. (1 Kor. 10:20, 21) Innem kwõj aikuj kããlõt, “Ta ak wõn eo el̦aptata aõ yokwe?”

YOKWE EO EAORÕKTATA

4. Ta men eo el̦aptata enaaj kõm̦akũt eok ñan peptaij?

⁴ Elukkuun lõñ men ko rem̦m̦an ñan am̦ yokwe im kam̦m̦oolol kaki. Ñan waanjoñak, m̦okta jãn am̦ kar katak ippãn Ri-Kõnnaan ro an Jeova, kwõmaroñ kar juon ej kaorõk Baibõl̦. Im kwõmaroñ kar juon eo me ej yokwe Jesus kadede. Kiiõ ke kwõjel̦ã kajjien Ri-Kõnnaan ro an Jeova, kwõmaroñ kaorõk am̦ iiãio ippãer. Bõtab am̦ yokwe im kaorõk men kein rem̦m̦an ejjab mel̦el̦ein bwe renaaj kõm̦m̦an am̦ kõn̦aan ajel̦o̦k mour eo am̦ ñan Jeova im peptaij. Men eo el̦aptata enaaj kõm̦akũt eok ñan am̦ peptaij ej yokwe eo am̦ ñan Jeova. Ñe kwõj yokwe Jeova el̦apl̦o̦k jãn jabdewõt men, kwoban kõtl̦o̦k bwe jabdewõt men ak armej en bõbraik eok jãn am̦ karejar ñane. Yokwe eo am̦ ñan Jeova enaaj kõm̦akũt eok ñan peptaij im enaaj bar jipañ eok ñan dãpij wõt am̦ tiljek ñan e ãlikin am̦ peptaij.

5. Ta kajjitõk ko jenaaj etali?

⁵ Jesus ear ba bwe jej aikuj yokwe Jeova kõn aolepen bũruod, aolepen ad, l̦õmn̦ak, im kajoor. (Mark 12:30) Ewi wãween am̦ maroñ katak ñan am̦ lukkuun yokwe im kautiej Jeova ilo wãween in? Ilo ad kõl̦mãnl̦o̦kjen̦ kõn yokwe eo an Jeova ñan kõj, men in enaaj kõm̦akũt kõj ñan bar yokwe e. (1 Jon 4:19) Ñe em̦õj am̦ jino ejaake yokwe in me el̦aptata an aorõk, innem ta eñjake im kõm̦m̦an ko jet renaaj wal̦o̦k tokãlik?b

6. Ekkar ñan Rom 1:20, ta juon iaan wãween ko bwe kwõn maroñ katak kõn Jeova?

⁶ Katak kõn Jeova ikijjeen menin kõm̦anm̦an ko an. (Riit Rom 1:20; Rev. 4:11) Kõl̦mãnl̦o̦kjen̦ kõn mãlõtlõt eo an me ej alikkar ilo wãween kar kõm̦anm̦ani menin eddek ko im menninmour ko. Katak jidik kõn wãween an em̦m̦an kar kõm̦anm̦an ãnbwinnum. (Sam 139:14) Im l̦õmn̦ak kõn joñan kajoor eo Jeova ear likũti ilo al̦. Im al̦ ej juon wõt iaan pilien iju ko.c (Ais. 40:26) Ilo am̦ ãindein, enaaj l̦apl̦o̦k am̦ kautieje Jeova. Eaorõk ñan jel̦ã bwe Jeova emãlõtlõt im kajoor. Ak ñan kõkajoor yokwe eo am̦ ñan Jeova im bwe kwõn juon jeran epaak, kwõj aikuj kal̦apl̦o̦k am̦ jel̦ã kõn e.

7. Bwe en m̦wilal̦ yokwe eo am̦ ñan Jeova, ta eo kwõj aikuj tõmake?

⁷ Kwõj aikuj tõmak bwe Jeova ej kea kõn kwe. Kwõj ke kile bwe epen am̦ tõmak bwe eo ear Kõm̦anm̦an lañ im lal̦ ejel̦ã bwe kwõj pãd im mour im ej kea kõn kwe? El̦aññe aet, keememej bwe Jeova “ejjab ettol̦o̦k jãn kõj kajjojo.” (Jrb. 17:26-28) “Jeova ej tuur bõro otemjej,” im ej kallim̦ur ñan kwe, ãinwõt an Devid kar ba ñan Solomon bwe “el̦aññe kwõj pukot E, kwõnaaj lo E.” (1 Kro. 28:9) Ilo m̦ool, unin am̦ katak Baibõl̦ kiiõ ej kõnke, ãinwõt an Jeova ba: “Iar ipertok [ak karuwaaktok, NW] eok.” (Jrm. 31:3) Ñe el̦apl̦o̦k am̦ kam̦m̦oolole Jeova kõn aolep men ko ear kõm̦m̦ani ñan kwe, enaaj m̦wilal̦l̦o̦k yokwe eo am̦ ñan e.

8. Ewi wãween am̦ maroñ em̦m̦akũt ñan yokwe eo an Jeova?

⁸ Juon wãween kwõmaroñ em̦m̦akũt ñan yokwe eo an Jeova ej ilo am̦ kõnono ñane ilo jar. Yokwe eo am̦ ñan Anij enaaj eddekl̦o̦k ilo am̦ ba ñane kõn men ko kwõj inepata kaki im kam̦m̦oolole kõn aolepen me ko ear kõm̦m̦ani ñan kwe. Im kõtaan eo am̦ ippãn Jeova enaaj kajoorl̦o̦k ilo am̦ loi wãween an uwaaki jar ko am̦. (Sam 116:1) Kwõnaaj tõmak bwe emel̦el̦e kõn kwe. Bõtab, bwe kwõn epaakel̦o̦k Jeova, kwõj aikuj mel̦el̦e kõn wãween an l̦õmn̦ak. Im kwõj aikuj jel̦ã kõn ta eo ekõn̦aan jãn kwe. Wãween eo wõt bwe kwõn jel̦ã kõn men kein ej ilo am̦ katak kõn Naan eo an, Baibõl̦ eo.

9. Ewi wãween am̦ maroñ kwal̦o̦k bwe kwõj kaorõk Baibõl̦ eo?

⁹ Katak ñan kaorõk Naanin Anij, Baibõl̦ eo. Baibõl̦ eo wõt ej kwal̦o̦k kõn m̦ool eo kõn Jeova im ta ankilaan ñan eok. Kwõj kwal̦o̦k am̦ kaorõk Baibõl̦ eo ilo am riiti kajjojo raan, kõpooji katak ko am̦ ippãn eo ej katak ippam̦, im ilo am̦ jerbali men ko kwõj katak kaki. (Sam 119:97, 99; Jon 17:17) Ewõr ke am̦ jikejuul̦ in riit Baibõl̦? Kwõj ke l̦oore jikejuul̦ eo am̦ im lukkuun lale bwe kwõn riiti Baibõl̦ eo kajjojo raan?

10. Ta juon iaan men ko ejejuwaan kõn Baibõl̦ eo?

¹⁰ Juon iaan men ko ejejuwaan kõn Baibõl̦ eo ej bwe ewõr mel̦el̦e ko ie kõn Jesus jãn armej ro me rar loe. Ej bok eo wõt ejim̦we me ej kõmel̦el̦e kõn ta eo Jesus ear kõm̦m̦ane ñan kwe. Ilo am̦ katak kõn ta eo Jesus ear ba im kõm̦m̦ani, men in emaroñ kõm̦akũt eok ñan ejaake juon jem̦jerã ippãn.

11. Ewi wãween am̦ maroñ katak ñan yokwe Jeova?

¹¹ Katak ñan yokwe Jesus, im yokwe eo am̦ ñan Jeova enaaj eddekl̦o̦k. Etke? Kõnke ear jejjet wãween an Jesus anõke kadkad ko kadkadin Jemãn. (Jon 14:9) Innem, ilo am̦ kal̦apl̦o̦k am̦ jel̦ã kõn Jesus, enaaj l̦apl̦o̦k am̦ mel̦el̦e im kaorõke Jeova. L̦õmn̦ak kõn an Jesus kar kwal̦o̦k tũriam̦o ñan armej ro me ro jet rar reilal̦l̦o̦k ñan er, ãinwõt ro rejeram̦õl, renañinmej, im ro rem̦õjn̦o̦. Bar l̦õmn̦ak kõn naanin kakapilõk ko ej liwaj ñan kwe im wãween an em̦m̦anl̦o̦k mour eo am̦ ñe kwõj roñjake e.​—Matu 5:1-11; 7:24-27.

12. Ilo am̦ katak kõn Jesus, ta eo men in emaroñ kõm̦akũt eok ñan kõm̦m̦ane?

¹² Yokwe eo am̦ ñan Jesus emaroñ naaj kajoorl̦o̦k ilo am̦ lukkuun kõl̦mãnl̦o̦kjen̦ kõn katok in mour eo an ñan jeorl̦o̦k jerawiwi ko ad. (Matu 20:28) Ñe kwõj mel̦el̦e bwe Jesus ear m̦õn̦õn̦õ in mej kõn kwe, men in emaroñ kõm̦akũt eok ñan ukel̦o̦k im kajjitõk bwe Jeova en jol̦o̦k am̦ bõd. (Jrb. 3:19, 20; 1 Jon 1:9) Im ilo an l̦apl̦o̦k am̦ yokwe Jesus im Jeova, kwõnaaj bar kõn̦aan epaake wõt armej ro rej bõk ejja eñjake rot in.

13. Ta eo em̦õj an Jeova lewaj ñan kwe?

¹³ Katak ñan yokwe baam̦le eo an Jeova. Baam̦le eo am̦ me ejjab rũttõmak im ro kar m̦õttam̦ remaroñ jab mel̦el̦e kõn unin am̦ kõn̦aan ajel̦o̦k mour eo am̦ ñan Jeova. Remaroñ bar jum̦aiki eok. Jeova enaaj jipañ eok ikijjeen an lewaj juon am̦ baam̦le ilo tõmak. El̦aññe kwõnaaj epaake wõt baam̦le in am̦ ilo tõmak, kwõnaaj maroñ bõk kõketak im yokwe eo kwõj aikuji. (Mark 10:29, 30; Hib. 10:24, 25) Jidik kõn jidik, ro ilo baam̦le eo am̦ me rejjab pãd ilo tõmak remaroñ kobawaj ippam̦ im karejar ñan Jeova im mour ekkar ñan kien ko an.​—1 Pit. 2:12.

14. Ãinwõt an 1 Jon 5:3 kwal̦o̦k, ta eo em̦õj am̦ loe ikijjeen l̦õmn̦ak eo an Jeova kõn men ko rejim̦we im rebõd?

¹⁴ Katak ñan kaorõk im jerbali men ko me rej ekkar ñan l̦õmn̦ak ko an Jeova. M̦okta jãn am̦ kar jel̦ã kajjien Jeova, kwõmaroñ kar kõm̦m̦an am̦ make pepe kõn ta eo ejim̦we im ta eo ebõd, bõtab kiiõ kwõj lo bwe l̦õmn̦ak eo an Jeova ikijjeen men ko rejim̦we im rebõd, em̦m̦anl̦o̦k. (Sam 1:1-3; riit 1 Jon 5:3.) L̦õmn̦ak kõn naanin kakapilõk ko ilo Baibõl̦ ñan l̦eo im lio me rej rippãlele, jemãn im jinen ajri ro, im ajri ro. (Eps. 5:22–6:4) Ilo am̦ jerbali naanin kakapilõk ko jãn Jeova, kwõj ke lo an em̦m̦anl̦o̦k mourin baam̦le eo am̦? Ilo am̦ pokake naanin tõl ko an Jeova ikijjeen am̦ kããlõt ro kwõj aetõl er ilo mãlõtlõt, em̦m̦anl̦o̦k ke kõm̦m̦an ko am̦? El̦apl̦o̦k ke am̦ m̦õn̦õn̦õ? (JK. 13:20; 1 Kor. 15:33) Kwõmaroñ uwaake kajjitõk kein im ba aet.

15. Ta eo kwõmaroñ kõm̦m̦ane ñe kwõj aikuj jipañ ñan jerbali naanin kakapilõk ko ilo Baibõl̦?

¹⁵ Ewõr iien, kwõmaroñ lo bwe epen ñan jel̦ã ewi wãween am̦ maroñ jerbali naanin kakapilõk ko kwõj katak kaki jãn Baibõl̦. Eñin unin Jeova ej kõjerbale doulul eo an ñan litok bok ko rej pedped ioon Baibõl̦ me remaroñ jipañ eok kile men ko rejim̦we im rebõd. (Hib. 5:13, 14) Ilo am̦ riiti im katak kõn katak kein, kwõnaaj lo wãween aer maroñ jipañ eok im aer alikkar, im kwõmaroñ naaj kõn̦aan bwe kwõn m̦õttan doulul eo an Jeova.

16. Ewi wãween an kar Jeova karõke armej ro an?

¹⁶ Katak ñan yokwe im rejetake doulul eo an Jeova. Em̦õj an Jeova karõk im likũt armej ro an ilo kajjojo eklejia ko, im eo Nejin, Jesus, ej bõran aolep eklejia ko. (Eps. 1:22; 5:23) Jesus ear jitõñ juon kumi in em̦m̦aan ro rej rũkkapit me jejjo uwaaer ñan tõl im karõke jerbal eo ekõn̦aan bwe en dedel̦o̦k rainin. Jesus ear ba bwe kumi in ej “ri-karejar eo etiljek im mãlõtlõt,” im rej lukkuun kaorõk jerbal eo aer ñan naajdik eok im kõjparok bwe en em̦m̦an kõtaan eo am̦ ippãn Jeova. (Matu 24:45-47) Juon iaan wãween ko ri-karejar eo etiljek im mãlõtlõt ej lale eok ej ilo aer lukkuun lale bwe em̦m̦aan ro kar kããlõt er ej tõllo̦kier ñan jabõte eok. (Ais. 32:1, 2; Hib. 13:17; 1 Pit. 5:2, 3) Em̦m̦aan ro rej lale eklejia rem̦õn̦õn̦õ in kõmaat joñan aer maroñ ñan eok, kaenõm̦m̦an eok, im jipañ eok ruwaakl̦o̦k ñan Jeova. Bõtab, juon iaan men ko raorõktata me remaroñ kõm̦m̦ane ñan eok ej jipañ eok katakin ro jet kõn Jeova.​—Eps. 4:11-13.

17. Ekkar ñan Rom 10:10, 13, 14, etke jej kõnono ñan ro jet kõn Jeova?

¹⁷ Jipañ ro jet ñan yokwe Jeova. Jesus ear ba ñan ri-kal̦oor ro an bwe ren katakin ro jet kõn Jeova. (Matu 28:19, 20) Jemaroñ pokake kien in kõnke jejel̦ã bwe jej aikuj pokake. Bõtab ilo an eddekl̦o̦k yokwe eo am̦ ñan Jeova, kwõnaaj bõk ejja eñjake eo an kar rijjilõk Piter im Jon, ke rar ba: “Kõmij jab maroñ bõjrak jãn am kõnono kõn men ko kõmar loi im roñ.” (Jrb. 4:20) Ñe jemaroñ jipañ juon armej ñan yokwe Jeova, men in enaaj kõm̦m̦an bwe jen lukkuun m̦õn̦õn̦õ. L̦õmn̦ak m̦õk kõn joñan an kar ri-kwal̦o̦k naan eo Pilip lañlõñ ke ear jipañ ri-Itiopia eo katak kõn m̦ool eo jãn Baibõl̦ im ñan an peptaij! Ñe kwõj anõke Pilip im pokake kien eo an Jesus ñan kwal̦o̦k naan, kwõj kaalikkar bwe kokõn̦aan bwe kwõn juon iaan Ri-Kõnnaan ro an Jeova. (Riit Rom 10:10, 13, 14.) Ilo iien eo kwõj bõk eñjake in, kwõmaroñ naaj kwal̦o̦k ejja kajjitõk eo wõt ri-Itiopia eo ear kajjitõk kake ke ear ba: “Ta eo ej bõbraik eõ jãn aõ peptaij?”​—Jrb. 8:36.

18. Ta ko jenaaj etali ilo katak eo tok juon?

¹⁸ Ilo iien eo kwõj pepe in peptaij, iien eo in kwõnaaj bõk buñtõn ne eo eaorõktata ilo mour eo am̦. Kõnke ej juon buñtõn ne eaorõk, kwõj aikuj lukkuun kõl̦mãnl̦o̦kjen̦ kõn ta mel̦el̦ein ad peptaij. Ta eo kwõj aikuj jel̦ã kõn peptaij? Ta eo kwõj aikuj in kõm̦m̦ane m̦okta jãn im ãlikin am̦ peptaij? Uwaakin kajjitõk kein jenaaj etale ilo katak eo tok juon.