Kwon Kalek Yuk Kin Yokwe
“Kwon yokwe Iroij [Jehovah] am Anij kin aolepen buruõm im kin aolepen am, im kin am lemnok otemjej.”—MATU 22:37.
1. (a) Ta jet ian men ko juõn ri Christian ej aikwij kaddeki? (b) Ta kadkad eo eaorõktata ibben juõn ri Christian, im etke?
JUÕN RI CHRISTIAN ej kaddek elõñ men ko bwe en juõn ri karejar ekeie. Book in Jabõn Kennan Ko ej kalikar aorõkin jelãlokjen, melele, im meletlet. (Jabõn Kennan Ko 2:1-10) Ri jilek Paul ej konono kin aikwij eo kin juõn tõmak ebin im juõn kejatdikdik ekajur. (Dri Rom 1:16, 17; Dri Kolosse 1:5; Dri Hibru 10:39) Kijenmij im jatõr raorõk bareinwõt. (Jerbal 24:25; Dri Hibru 10:36) Bõtab, ewõr juõn kadkad me, elañe ejako, ej bõk jen aolep kadkad ko jet im emaroñ kõmman bwe ren jettokjeir. Kadkad eo ej yokwe.—1 Dri Korint 13:1-3, 13.
2. Ewi wãwen Jesus ear kwalok kin aorõkin yokwe, im men in ej bõkmantak kajitõk ta ko?
2 Jesus ear kwalok kin aorõkin yokwe ke ear ba: “Ilo men in armij otemjej re naj jela bwe komij dri kalora, elañe komij yokwe dron.” (Jon 13:35) Elañe yokwe—elaptata kin Christian ro jeid im jatid—ej kakõlleik juõn ri Christian emol, jej aikwij kwalok kajitõk ko einwõt, Ta in yokwe? Etke elap aorõkin bwe Jesus ear ba bwe, ilañ in men otemjej, ej kwalok kajjen ri kalor ro an? Ewi wãwen jemaroñ kaddek yokwe? Wõn ro jen yokwe? Jen etale kajitõk kein.
Ta In Yokwe?
3. Ewi wãwen jemaroñ kamelele kin yokwe, im etke ej jelet bõrad im buruõd jimor?
3 Juõn kamelele kin yokwe ej ‘juõn eñjake in jimjera emãnãn ak juõn eñjake emũlal kin bar juõn.’ Ej juõn kadkad me ej kamakit armij ñan jerbal ñan emõn eo an ro jet, jet ien meñe e make naj jorrãn. Yokwe, einwõt Bible ej kwalok kake, ej kitibuj lolãtãt im buru jimor. Lolãtãt, ak bõklikit eo, ej jerbal kinke juõn armij eo ej yokwe ej kõmmane ilo an jelã, im kile bwe e im ro ej yokwe, ir aolep ewõr mõjno ko air im bareinwõt kadkad ko raibujuij. Ebar jelete lolãtãt eo ke ewõr ro ri Christian eo ej yokwe—bõlen, jet ien, nae kõnan ko an—kinke ej jelã jen an read Bible bwe Anij ekõnan bwe en kõmmane. (Matu 5:44; 1 Dri Korint 16:14) Ak, ekkã an yokwe itok jen buru eo. Yokwe eo emol einwõt Bible ej kwalok kake eban itok jen lolãtãt eo wõt. Ej kitibuj eñjake in mol eo emũlal im kwoj kõmman kallimur kin aolepen buruõm.—1 Piter 1:22.
4. Ilo wãwen et eo yokwe ej juõn kein lukluk ekajur?
4 Armij ro rekibbon ejeja air maroñ kaddek juõn kõtan eo ej mol an yokwe kinke juõn armij eo ej yokwe ej bojak in likit men ko an ro jet iman men ko an make. (Dri Pilippai 2:2-4) Nan ko an Jesus “mõnõnõ in lelok elap jen bõk” elaptata an mol ñe lelok ej juõn jerbal in yokwe. (Jerbal 20:35) Yokwe ej juõn kein lukwõj elap an kajur. (Dri Kolosse 3:14) Ekkã an koba jimjera, ak kein lukwõj in yokwe elaplok an kajur jen ko an jimjera. Kõtan yokwe ikõtan leo im lio ri belele rej kwaloke einwõt yokwe; bõtab, yokwe eo me Bible ej rejañ kij ñan ad kaddeke etto lok an bed jen kõnan an kanniek. Ñe ruo ri belele ro emol air yokwe don, rej bed wõt ibben don meñe ejako air maroñ babu ibben don kin mõjno ko kin air ritto ak kinke juõn iair ejorrãn enbwinin.
Yokwe—Kadkad eo Eaorõk
5. Etke yokwe ej juõn kadkad eaorõk kadkadin juõn ri Christian?
5 Etke yokwe ej juõn kadkad eaorõk ñan juõn ri Christian? Mokta, kinke Jesus ear kakien ri kalor ro an bwe ren yokwe don. Ear ba: “Kom ro jera, elañe komij kõmõn men ko Ij jiroñ kom. Men kein Ij jiroñ kom, bwe komin yokwe dron.” (Jon 15:14, 17) Kein karuo, kinke Jehovah ej jutak kin yokwe, im einwõt ri kabuñ ro an jej aikwij kajeoñe e. (Dri Epesõs 5:1; 1 Jon 4:16) Bible ej ba bwe ilo ad bõk jelãlokjen kin Jehovah im Jesus men in ej tellok ñan mour indio. Ewi wãwen jemaroñ ba bwe jej jelã Anij elañe jejjab kate kij bwe jen einwõt e? Ri jilek John ear kõmmanwa: “Eo e jab yokwe e jab jela Anij; bwe Anij yokwe.”—1 Jon 4:8.
6. Ewi wãwen yokwe emaroñ kõmman bwe wãwen ko reinjuõn ilo ad mour ren jokkin wõt juõn?
6 Un eo kein kajilu eaorõk yokwe: Ej jibañ kij ñan kõmman bwe wãwen ko reinjuõn ilo mour eo ad ren jokkin wõt juõn im ej kõmman bwe men ko jej kõmmani en kin juõn un emõn. Ñan wanjoñok, eaorõk bwe juõn ri Christian en wõnmanlok im bõk jelãlokjen kin Nan eo an Anij. Ñan juõn ri Christian, jelãlokjen rot in ej einwõt mõñã. Ej jibañ e ñan rittolok im ñan jerbal ekkar ñan ankil an Anij. (Sam 119:105; Matu 4:4; 2 Timote 3:15, 16) Bõtab, Paul ear kakkõl: “Jela ej koutiej buru, a yokwe ej kalek.” (1 Dri Korint 8:1) Jaab, ejelok nana ilo jelãlokjen eo ejimwe. Abañ eo ej ilo kij make—ekkã ad jerawiwi. (Jenesis 8:21) Elañe ejako jokkin wõt juõn eo ilo yokwe, jelãlokjen emaroñ kõmman bwe armij eo en utiej buruen, ilo an lemnak bwe ej emõnlok jen ro jet. Men in ejamin walok elañe ej emmakit kin yokwe. “Yokwe . . . e jab kimjãje, e jab jua.” (1 Dri Korint 13:4) Juõn ri Christian eo ej emmakit kin yokwe ejamin kemjãje meñe ej bõk jelãlokjen eo emũlal. Yokwe ej kõmman an ettã buruen im ej kejbãrok e jen an kõnan bwe en buñbuñ.—Sam 138:6; Jemes 4:6.
7, 8. Ewi wãwen yokwe ej jibañ kij ñan ad kalimjeklok men ko relijiklok?
7 Paul ear je ñan ro ilo Philippi: “Ij jare men in, bwe ami yokwe en ke im õkekelok wõt ilo jela im ilo kili otemjej; Bwe komin melejoñ men ko re lijiklok.” (Dri Pilippai 1:9, 10) Yokwe in Christian enaj jibañ kij ñan lor nan in rejañ in ñan ad melejoñe men ko re lijiklok. Einwõt juõn wanjoñok, lemnak kin nan ko an Paul ñan Timothy: “Elañe armij ej bukõt bwe en juõn overseer, ej kõnan juõn jerbal emõn.” (1 Timothy 3:1, New World Translation) Ilo yiõ in jerbal eo 2000, kar wõr juõn laplok in 1,502 oran congregation ko, im kõmman juõn laplok kããl in 91,487. Kin men in, ewõr juõn aikwij elap bwe en lõñlok elder ro, im jej aikwij nebar ro rej bukõt jerammõn in.
8 Bõtab, ro rej bukõt jerammõn in lolorjake ko remaroñ kejbãrok air jokkin wõt juõn elañe rej kememej un eo unin jerammõn rot kein. Air baj bõk maroñ ak buñbuñ rejjab men ko raorõk. Elder ro me rej kabuñburuen Jehovah rej emmakit kin air yokwe e im ro jeiir im jatiir. Rejjab bukõt maroñ ak air buñbuñ. Ri jilek Peter, elikin an kakabilek elder ro ilo congregation eo ñan kejbãrok juõn lemnak emõn, ear kalikar aikwij eo kin “eta buru.” Ear kakabilek aolep ilo congregation eo: “Komin kõtãik kom iomin pein Anij ekajur.” (1 Piter 5:1-6) Ej emõn bwe jabdewõt eo ej bukõt jerammõn eo ren lemnak kin joñok eo an elõñ elder ro ibelakin lal me rej kate ir jerbal, rettã burueir, im kin men in rej juõn jerammõn ñan congregation eo air.—Dri Hibru 13:7.
Un Emõn Ej Jibañ Kij ñan Kijenmij
9. Etke ri Christian ro rej lemnak wõt kin jerammõn ko Jehovah ear kallimur kaki?
9 Aorõkin ad emmakit ilo yokwe ej alikar ilo bar juõn wãwen. Ñan ro rej jibadõk tiljek ekwojarjar ilo yokwe, Bible eo ej kallimur jerammõn ko relap kiõ im jerammõn ko rej make wõt aibujuij ilo ran ko renaj itok. (1 Timote 4:8) Juõn ri Christian eo elap an tõmak kin kallimur kein im ej liki bwe Jehovah ej “lelok jinekjij ñõn ro rej kabukot E” men kein rej jibañ e ñan bin wõt ilo tõmak. (Dri Hibru 11:6) Elõñ iad jej kijororetok jejjet in kitien kin kallimur kein an Anij im jej bõk ejja lemnak eo an ri jilek John: “Amen: Kwon itok, Iroij Jisõs.” (Reveles̃õn 22:20) Aet, kalmenlokjen kin jerammõn ko rej kõttar kij elañe jej tiljek ej kakajur kij ñan kijenmij, eindein lok wõt an kar Jesus lemnak kin “lõñliñ ar likit e iman” ear jibañ e ñan kijenmij.—Dri Hibru 12:1, 2.
10, 11. Ewi wãwen ad emmakit ilo yokwe ej jibañ kij ñan kijenmij?
10 Ak, ta elañe kõnan eo ad ñan mour ilo lal eo ekãl ej un eo elaptata ad karejar ñan Jehovah? Inem emaroñ bidodo ad buru kadu ak jab juburu ñe ej walok abañ ko ak ñe men ko rejjab walok ilo ien eo jej kõtmene kake. Jemaroñ bed ilo kauwatata ñan ad belok. (Dri Hibru 2:1; 3:12) Paul ear konono kin juõn eo kar mõttan etan Demas, eo ear ilok jen e. Etke? Kinke ear “yokwe lõl in.” (2 Timote 4:10) Jabdewõt eo ej karejar kin un ko rekibbon rej bed ilo ejja kauwatata eo wõt. Remaroñ reel kin jerammõn ko rej bellok kiõ ilo lal in, im rej makoko in karmijete kõnan ko air make kiõ ilo kejatdikdik in bõk jerammõn ko rej itok.
11 Ke ekkar ñan ad kõnan bõk jerammõn ko rej itok ak kakije eo me jej kejatdikdik kake jen melejoñ ko, yokwe ej kalaplok kamolol eo ad kin men eo en kar laptata ilo ad mour. Ej ankil an Jehovah, im jab ankil ad, me ej men eo eaorõktata. (Luk 22:41, 42) Aet, yokwe ej kõketak kij. Ej kõmman ad jokane in kõttar Anij ilo meanwõd, juburu kin jabdewõt jerammõn ko ej letok ñan kij im liki bwe ilo ien eo ear karõke jenaj bõk aolep men ko ear kallimur kaki—im elaplok. (Sam 145:16; 2 Dri Korint 12:8, 9) Ilo kõtan ien eo, yokwe ej jibañ kij ñan karejar wõt ilo ejelok kibbon kinke “yokwe . . . e jab kabukot men ko an.”—1 Dri Korint 13:4, 5.
Ri Christian ro Ren Yokwe Wõn?
12. Ekkar ñan Jesus, wõn eo jej aikwij yokwe?
12 Jesus ear letok juõn rule kin wõn ro jen yokwe ke ear eliji ruo nan ko jen Kien eo Ikijen Moses. Ear ba: “Kwon yokwe Iroij [Jehovah] am Anij kin aolepen buruõm im kin aolepen am, im kin am lemnok otemjej” im, “Kwon yokwe dri turõm im einwõt kwe.”—Matu 22:37-39.
13. Ewi wãwen jemaroñ katak ñan ad yokwe Jehovah, meñe jejjab maroñ loe?
13 Jen nan ko an Jesus, ej alikar bwe men eo eaorõktata ej bwe jen yokwe Jehovah. Bõtab, jejjab lotak im wõr ad yokwe Jehovah. Ej juõn men jej aikwij kaddeke. Ke jaar jino roñ kin e, jaar reel ibben kin men eo jaar roñjake. Jidik kin jidik, jaar katak kin ewi wãwen ear keboj lal in ñan armij. (Jenesis 2:5-23) Jaar katak kin ewi wãwen ear jerbal ibben armij, im jab jolok kij ke jerawiwi ear itok ion armij, ak ear bõk buñten nee ko ñan lomoren kij. (Jenesis 3:1-5, 15) Ear jerbal ilo joij ibben ro rar tiljek, im eliktata ear letok Nejin ej make wõt ear keotak ñan jeorlok jerawiwi ko ad. (Jon 3:16, 36) Jelãlokjen in elaplok ear kõmman bwe en eddeklok kamolol eo ad kin Jehovah. (Aiseia 25:1) King David ear ba bwe ear yokwe Jehovah kin kejbãrok eo An ej yokwe. (Sam 116:1-9) Rainin, Jehovah ej kejbãrok kij, tel kij, kakajur kij, im rejañ kij. Elaplok ad katak kin e, enaj mũlallok yokwe eo ad.—Sam 31:23; Zephaniah 3:17, NW; Dri Rom 8:28.
Ewi Wãwen Jemaroñ Kwalok Yokwe eo Ad?
14. Ilo wãwen ta eo jemaroñ kwalok bwe ej mol ad yokwe Anij?
14 Emol, elõñ ibelakin lal rej ba bwe rej yokwe Anij, ak wãwen air emmakit ej idaptõk ibben men eo rej ba. Ewi wãwen jemaroñ jelã elañe ej mol ad yokwe Jehovah? Jemaroñ konono ibben ilo jar im jiroñ e kin ta eñjake eo ad. Im jemaroñ emmakit ilo juõn wãwen me ej kwalok yokwe eo ad. Ri jilek John ear ba: “A jabrewõt eo ej kejbãrok An [Anij] in nan, emol ar kowãppen yokwe Anij ilo e. Ilo men in je jela bwe jej ilo E.” (1 Jon 2:5; 5:3) Ibwiljin men ko jet, Nan in Anij ej jiroñ kij bwe jen koba ibben don im en erreo im jimwe mour eo ad. Jej bõprae ad ri jelã mon, jej konono mol, im ej erreo wãwen ad lemnak. (2 Dri Korint 7:1; Dri Epesõs 4:15; 1 Timote 1:5; Dri Hibru 10:23-25) Jej kwalok yokwe ilo ad lelok jibañ ikijen mweiuk ñan ro rej aikwiji. (1 Jon 3:17, 18) Im jejjab ãliklik in jiroñ ro jet kin Jehovah. Men in ekoba ad bõk kunad ilo jerbal in kwalok kin news eo emõn kin Ailiñ eo ibelakin lal. (Matu 24:14; Dri Rom 10:10) Bokake Nan eo an Anij kin men rot kein ej kein kamol bwe ej mol ad yokwe Jehovah.
15, 16. Ewi wãwen yokwe ñan Jehovah ear jelet mour an elõñ armij ilo yiõ eo lok?
15 Yokwe Jehovah ej jibañ armij ñan kõmman bebe ko remõn. Ilo yiõ eo lok, yokwe rot in ear kamakit 288,907 armij ro ñan wujleplok air mour ñan e im ñan kalikar bebe in ilo air baptais ilo den. (Matu 28:19, 20) Wujleplok eo air ear aorõk. Ear kakõlleik juõn oktak ilo mour ko air. Ñan wanjoñok, Gazmend kar juõn ian ri ikkure basketball elaptata ilo Albania. Iumin elõñ yiõ ko, e im lio belen rar katak im meñe rar jelmae jet abañ ko eliktata rar maroñ jet iuan ri kwalok ro. Yiõ eo lok, Gazmend ear baptais, juõn ian 366 ro rar baptais ilo Albania ilo yiõ in jerbal eo 2000. Juõn newspaper ear je juõn bwebwenato kin e im ba: “Ewõr un ko ilo mour eo an, im kin men in, e im family eo an rej lañliñ kin ran ko remõnõnõ tata ilo air mour. Ñan e, ejako an aorõk in lo ewi tokjen emaroñ bõk ñan e make, ak, jen men in, ewi joñan emaroñ lelok ñan jibañ armij ro jet.”
16 Eindein lok, juõn sister ej kab baptais eo ear jerbal ilo juõn oil company ilo Guam ear bõk juõn jerammõn elap an kareelel. Elikin an kate e iumin elõñ yiõ ko bwe en wanliñ im utiejlok, eliktata company eo ear lelok ñan e maroñ eo bwe en kõrã eo moktata ej vice president ilo bwebwenato in company eo. Bõtab, emwij kiõ an wujleplok an mour ñan Jehovah. Inem elikin an bwebwenato kin men in ibben leo belen, sister in ekãl ear jab bõk jerammõn eo ak jen men in ear karõk ñan an jerbal part-time bwe en maroñ wõnmanlok ñan an juõn ri kwalok nan full-time, juõn pioneer. Yokwe eo an ñan Jehovah ear kamakit e bwe en kõnan karejar ñan e einwõt juõn pioneer jen an jibadõk mweiuk ko an lal in. Ilo mol, yokwe rot in ear kamakit 805,205 ibelakin lal ñan air bõk kunair ilo wãwen ko reinjuõn ilo jerbal in pioneer ilo yiõ in jerbal eo 2000. Elap an kar pioneer rein kwalok air yokwe im tõmak!
Kar Emmakit ñan Yokwe Jesus
17. Joñok ta eo emõn kin yokwe jej lo ilo Jesus?
17 Jesus ej juõn joñok eaibujuij kin juõn eo ear emmakit kin yokwe. Ilo mour eo an mokta jen an kar erom juõn armij, ear yokwe Jemen im ear yokwe armij. Einwõt kõkkar eo kin meletlet, ear ba: “Ien eo I ar ber iturin [Jehovah], einwõt juõn dri mejerik; im I ar jitenburu iben ran otemjej, im I ar mõnõnõ ien otemjej iman, Im mõnõnõ kin lõl, jikin jokwe; im aõ lõñliñ e ar iben ro nejin armij. (Jabõn Kennan Ko 8:30, 31) Yokwe eo an Jesus ear kamakit e ñan ilok jen jikin ilañ im lotak einwõt juõn niñniñ emõjno. Ear jerbal ilo meanwõd im joij ibben ro rettã burueir im ear eñtan ilo pein ri kijirãt ro an Jehovah. Eliktata, ear mij kin armij otemjej ion alal in kaeñtan eo. (Jon 3:35; 14:30, 31; 15:12, 13; Dri Pilippai 2:5-11) Ej juõn joñok emõn kin unin emmakit ejimwe!
18. (a) Ewi wãwen jej kaddek juõn yokwe ñan Jesus? (b) Ilo wãwen ta eo jej kwalok bwe jej yokwe Jesus?
18 Ñe ro emõn burueir rej read bwebwenato eo kin mour eo an Jesus ilo Gospel ko im kalmenlokjen kin aolep jerammõn ko ial in tiljek eo an ear bõktok ñan ir, men in ej kõmman bwe juõn yokwe emũlal kin e en eddeklok ilo burueir. Kij rainin jej einwõt ro Peter ear konono kake ke ear ba: “Meñe kom ar jab lo [Jesus], kom ar yokwe.” (1 Peter 1:8, NW) Jej kwalok yokwe eo ad ñe jej jerbale tõmak ilo e im anõk mour eo an ilo an kar karmijeteik kõnan ko an make. (1 Dri Korint 11:1; 1 Dri Tessalonika 1:6; 1 Piter 2:21-25) Ilo April 19, 2000, kar kakememej 14,872,086 armij kin un ko unin air yokwe Jesus ke rar bed ilo Kwojkwoj kin mij eo an kajjojo yiõ. Kar juõn oran elap an lap! Im elap an kakajur kij ñan jelã bwe elõñ wõt rej itoklimo kin lomor ikijen binmour eo an Jesus! Emol, jej bõk kõketak jen yokwe eo an Jehovah im Jesus ñan kij im yokwe eo ad ñan ir.
19. Kajitõk ta ko kin yokwe jenaj etali ilo katak in tok?
19 Jesus ear ba bwe jej aikwij yokwe Jehovah kin aolepen buruõd, aad, ad lolãtãt, im ad kajur. Ak ear bareinwõt ba bwe jej aikwij yokwe ri turid im einwõt kij. (Mark 12:29-31) Men in ej kitibuj wõn? Im ewi wãwen yokwe ri turid ej jibañ kij ñan kejbãrok ad jokkin wõt juõn im juõn un emõn ñan ad kõmman men ko? Jenaj etale kajitõk kein ilo katak in tok.
Kwoj Kememej Ke?
• Etke kadkadin yokwe ej juõn kadkad eaorõk?
• Ewi wãwen jemaroñ katak ñan ad yokwe Jehovah?
• Ewi wãwen mwilid ej kamol ad yokwe Jehovah?
• Ewi wãwen jej kwalok ad yokwe Jesus?
[Pija]
Yokwe ej jibañ kij ñan kõttar ilo meanwõd ñan ad rõllok jen abañ ko ad
[Pija]
Katok eo elap an Jesus ej kamakit kij ñan yokwe e