Yokwe Wãween eo Eaorõktata

JEOVA ear kõm̦akũt rijjilõk Paul bwe en jeje kõn wãween ko ratimjuon me rej wal̦o̦k jãn kajoor ak jetõb kwõjarjar eo an Anij. (Ga. 5:22, 23) Ear kõmel̦el̦e im ba bwe aolep wãween kein rem̦m̦an rej ‘leen jetõb kwõjarjar’ eo an Anij.’a (Lale kõmel̦el̦e eo itulal̦.) Leen jetõb kwõjarjar in ej kwal̦o̦k “armej eo ekããl.” (Kol. 3:10, UBS) Ãinwõt an juon wõjke maroñ kalle ñe ej ikkutkut ad utdikdiki, ãindein enaaj wõr wãween kein rem̦m̦an ippãn juon armej ñe ej kõtl̦o̦k bwe jetõb kwõjarjar eo an Anij en tõle ilo mour eo an.​—Sam 1:1-3.

Wãween eo m̦oktata me Paul ear kwal̦o̦k bwe ej m̦õttan leen jetõb kwõjarjar eo an Anij, ej yokwe. Ewi joñan an aorõk yokwe? Paul ear ba bwe ñe ejjel̦o̦k yokwe ippãn, innem ‘ejjel̦o̦k tokjãn.’ (1 Kor. 13:2, UBS) Bõtab ta in yokwe, im ewi wãween bwe en wõr ippãd im bwe jen kwal̦o̦ke aolep raan?

TA IN YOKWE?

Meñe epen ñan kõmel̦el̦eiki ilo naan kõn ta in yokwe, ak Baibõl̦ ej kwal̦o̦k kõn wãween an juon eo me ewõr yokwe ippãn l̦õmn̦ak im kõm̦m̦an. Ñan waanjoñak, juon eo ewõr yokwe ippãn ej ‘meanwõd im jouj,’ im ej ‘m̦õn̦õn̦õ kake m̦ool.’ Bareinwõt juon eo ewõr yokwe ippãn ej ‘kijenmej ilo men otemjej, tõmak men otemjej, kõjatdikdik e kõn men otemjej, im niknik ilo men otemjej.’ Ej bar kwal̦o̦k an lukkuun yokwe ro jet, kea kake er, im ej juon eo em̦ool an m̦õttãik ro jet. Bõtab, juon eo ejjel̦o̦k yokwe ippãn enaaj alikkar ilo an ebbanban, utiej bũruon, enana kõm̦m̦an ko an, ej l̦õmn̦ak wõt kõn e make, im ejaje jol̦o̦k an ro jet bõd. Innem ijello̦kun ad kwal̦o̦k wãween kein rejjab em̦m̦an, jekõn̦aan kwal̦o̦k yokwe eo ñan ro jet me “ejjab kappukot men ko an” wõt.​—1 Ko. 13:4-8.

JEOVA IM JIJEJ RAR LIKŨT JOÑAK EO EM̦M̦ANTATA KÕN YOKWE

“Anij yokwe.” Em̦ool bwe Jeova ej wũnjãn yokwe. (1 Jon 4:8) Aolep jerbal im kõm̦m̦an ko an rej kam̦ool men in. Wãween eo el̦aptata ear kwal̦o̦k an yokwe aolep armej ej ikijjeen an kar jilkintok Jijej ñan lal̦ in bwe en eñtaan im mej kõn kõj. Rijjilõk Jon ear ba: “Wãween dein an Anij kar kwal̦o̦k yokwe eo an ñan kõj: ear jilkintok Nejin eo ej make wõt ñan lal̦, bwe jen maroñ mour kõn e. Eñin yokwe eo: ejjab bwe jaar yokwe Anij, ak bwe ear yokwe kõj im jilkintok Nejin bwe en ial̦in jeorl̦o̦k jerawiwi ko ad.” (1 Jon 4:9, 10, UBS) Kõn an Anij yokwe kõj, emaroñ jol̦o̦k ad bõd, im ewõr ad kõjatdikdik ñan bõk mour.

Jijej ear kwal̦o̦k an yokwe aolep armej ilo an kar ajel̦o̦k mour eo an kõn kõj ñan kajejjet ankilaan Anij. Paul ear je: “[Jijej] ej ba: ‘O Anij, ña e bwe in kõm̦m̦an ankilaam̦.’ . . . Innem kõn an Jijej Kũraij kõm̦m̦an ankilaan Anij, em̦õj karreoik kõj otemjej jãn jerawiwi, kõn an aje make ãnbwinnin, juon wõt alen.” (Hi. 10:9, 10, UBS) Ejjel̦o̦k juon armej ear kwal̦o̦k yokwe el̦apl̦o̦k jãn yokwe rot in. Jijej ear ba: “Ejjel̦o̦k yokwe ippãn armej el̦ap jãn yokwe in, bwe armej en lel̦o̦k an mour kõn ro jeran.” (Jon 15:13) Kõj eo me jejjab weeppãn, jemaroñ ke bar anõke wãween an kar Jeova im Jijej kwal̦o̦k yokwe ñan kõj? Aet! Jen lale ewi wãween jemaroñ kõm̦m̦ane men in.

“ETETAL ILO YOKWE”

Paul ej rõjañ kõj ilo an ba: “Kom̦win rikajjioñe Anij, ãinwõt ajri rejitõnbõro; Im etetal ilo yokwe, ãinwõt Kũraij ear yokwe kom̦, im Ear make ketak E kõn kõj.” (Ep. 5:1, 2) Ta mel̦el̦ein an ba jen “etetal ilo yokwe”? Ej mel̦el̦ein bwe jej aikuj kwal̦o̦k yokwe aolep iien. Jejjab baj ba wõt bwe jej yokwe ro jet, ak jej kwal̦o̦k bwe jej yokwe er ilo kõm̦m̦an ko ad. Jon ear je: “Ro nejũ! Ad yokwe en jab ilo naan im kõnono wõt; ak en juon yokwe eo em̦ool, eo ej wal̦o̦k ilo kõm̦m̦an ko ad.” (1 Jon 3:18, UBS) Ñan waanjoñak, ñe jej yokwe Anij im ro rũturid, men in enaaj kõm̦akũt kõj bwe jen kwal̦o̦k ‘ennaan eo em̦m̦an kõn Aelõñ eo’ ñan er. (Matu 24:14, UBS; Luk 10:27) Jej bar “etetal ilo yokwe” ñe jej kijenmej, jouj, im jol̦o̦k an ro jet bõd. Innem, Baibõl̦ ej rõjañ kõj im ba: “Kom̦win jol̦o̦k an doon bõd ãinwõt Anij ear jol̦o̦k ami bõd ilo Kũraij.”​—Ep. 4:32, UBS.

Ñe jej kauwe ak kajim̦we ro jet, ejjab mel̦el̦ein bwe jejjab yokwe er. Ñan waanjoñak, ñe juon ajri ej jañ, jet jemãn im jinen rej kõm̦m̦an ak lel̦o̦k jabdewõt men ko ajri eo ekõn̦aan bwe en jako an jañ. Bõtab ro jemãn im jinen me rej lukkuun yokwe ajri eo nejier, renaaj kauwe ajri eo ñe emenin aikuj. Ãindeinl̦o̦k wõt, Anij ej juon Anij in yokwe, ak “ej kajeik aolep ro ej yokwe er.” (Hi. 12:6, UBS) Kõn men in, ñe jej lukkuun yokwe ro jet jenaaj kauweik ak kajim̦weik er ilo wãween eo ejim̦we ñe emenin aikuj. (JK. 3:11, 12) Bõtab jen keememej bwe kõj aolep jejjab weeppãn im ewõr iien epen ad kwal̦o̦k yokwe. Kõn men in, ewõr jet wãween ko me kõj aolep jemaroñ kakõm̦anm̦anil̦o̦k ilo ad kwal̦o̦k yokwe. Ewi wãween jemaroñ kõm̦m̦ane men in? Jen lale jilu wãween ko.

EWI WÃWEEN JEMAROÑ KWAL̦O̦K YOKWE?

M̦oktata, kajjitõk bwe Anij en lewaj jetõb kwõjarjar eo an me enaaj jipañ eok ñan kwal̦o̦k yokwe. Jijej ear ba bwe Jeova ej lel̦o̦k “jetõb kwõjarjar ñan ro rej kajjitõk ippãn.” (Luk 11:13, UBS) Innem jemaroñ lukkuun lõke bwe ñe jej jar kõn jetõb kwõjarjar eo an Anij im kõtl̦o̦k bwe en jipañ kõj, enaaj l̦apl̦o̦k wõt ad kwal̦o̦k yokwe. (Ga. 5:16, UBS) Ñan waanjoñak, ñe kwõj juon iaan em̦m̦aan ro rej lale eklejia, kwõmaroñ jar bwe jetõb kwõjarjar en jipañ eok ñan kwal̦o̦k yokwe ñe kwõj aikuj lel̦o̦k naanin kakapilõklõk ko jãn Baibõl̦ ñan ro jet. Bareinwõt ñe kwõj juon jemãn ak jinen, kwõmaroñ jar bwe jetõb kwõjarjar en jipañ eok bwe kwõn kauwe ro nejũm̦ ilo yokwe im jab ilo illu.

Kein karuo, l̦õmn̦ak kõn wãween an kar Jijej kwal̦o̦k yokwe meñe ro jet rar matõrtõre. (1 Pi. 2:21, 23) Emaroñ l̦ap ad aikuj kõl̦mãnl̦o̦kjen̦ kõn joñak eo an Jijej ñe juon ear kainepataik kõj, ak jaar iiooni wãween ko rejjab jim̦we. Ilo iien rot kein, jemaroñ kajjitõk ippãd make kajjitõk in, ‘Ta eo Jijej enaaj kar kõm̦m̦ane?’ Juon jeid im jatid kõrã etan Leigh ear lo bwe ilo an l̦õmn̦ak kõn kajjitõk in, ear jipañe bwe en l̦õmn̦ak m̦okta jãn an kar kõm̦m̦ane juon men. Ej ba: “Juon iien, juon iaan ro ij jerbal ippãer ear jilkinl̦o̦k juon e-mail ñan rijerbal ro jet, im kwal̦o̦k jet naan ko rejjab em̦m̦an kõn ña im kõn aõ jerbal. Men in ear lukkuun kõmetak eõ. Ak iar kajjitõk ippa make, ‘Ewi wãween imaroñ anõke Jijej ilo aõ kõm̦m̦an ñan armej in?’ Ãlikin aõ kar l̦õmn̦ak kõn ta eo Jijej enaaj kar kõm̦m̦ane, iar pepe in jab l̦õmn̦ake apañ eo im jab illu kake. Tokãlik, ij kab jel̦ã bwe eto an rijerbal eo m̦õtta kijenmej kõn juon an nañinmej ekauwõtata im el̦ap an inepata kake. Iar kile bwe kõn an inepata, bõlen ear jab l̦õmn̦ak in je men ko rejjab em̦m̦an kõn ña. Ilo aõ kar kõl̦mãnl̦o̦kjen̦ kõn joñak eo an Jijej ke ear kwal̦o̦k wõt yokwe meñe ear iioon matõrtõr, men in ear jipañ eõ ñan bar kwal̦o̦k yokwe ñan rijerbal eo m̦õtta.” Alikkar bwe ñe jej anõke Jijej, aolep iien jenaaj kwal̦o̦k yokwe ñan ro jet.

Kein kajilu, kwal̦o̦k am̦ yokwe ro jet ilo am̦ likũt kõn̦aan ko aer m̦okta im jab l̦õmn̦ak kõn kwe make. Kain yokwe rot in ej kõkal̦l̦en Kũrjin ro rem̦ool. (Jon 13:34, 35) Jijej make ear kwal̦o̦k kain yokwe rot in im ear likũt joñak eo em̦m̦antata ñan kõj. Ewi wãween? Ilo an kar em̦m̦akũt jãn lañ im kõjekdo̦o̦ne mour eo an bwe en itok im mej kõn kõj, im “ear kõttãik e make im pokake ñan mej.” (Pil. 2:5-8, UBS) Ilo ad anõke wãween an kar Jijej kwal̦o̦k an yokwe kõj im kaarmejjeteik e make, jenaaj bar bõk l̦õmn̦ak im eñjake ko an. Men in enaaj kõm̦akũt kõj bwe jen likũt kõn̦aan im aikuj ko an ro jet m̦okta jãn kõn̦aan ko ad. Innem, ta tokjãn ko jenaaj loi jãn ad kwal̦o̦k yokwe?

TOKJÃN KO RENAAJ WAL̦O̦K JÃN AD KWAL̦O̦K YOKWE

Ñe jej kwal̦o̦k yokwe, elukkuun lõñ tokjãn ko jenaaj loi. Jen lale ruo iaaer:

• DOULUL IN JEMJEIN JEMJATI EO AD IPEL̦AAKIN LAL̦ IN: Kõn ad kwal̦o̦k ad yokwe doon, jejel̦ã bwe jekdo̦o̦n eklejia ta eo ipel̦aakin lal̦ in jenaaj etal ñane, ak ro jeid im jatid renaaj lukkuun karwaineneik kõj. El̦ap ad jeraam̦m̦an kõnke ‘ro jeid im jatid ipel̦aakin lal̦ in’ rej yokwe kõj! (1 Pi. 5:9) Ewõr ke bar juon jikin ijello̦kun doulul eo an Anij me jemaroñ lo yokwe rot in ie?

• AENÕM̦M̦AN: Ad ‘kwal̦o̦k ad yokwe doon im jipañ doon’ ej kõm̦m̦an bwe jen m̦õn̦õn̦õ im ‘aenõm̦m̦an ippãn doon.’ (Ep. 4:2, 3, UBS) Jej lo aenõm̦m̦an in ilo iien kweilo̦k ko ad, im ilo iien kweilo̦k ko ad rel̦l̦ap. Kwõjjab ke errã bwe ej juon men ekabwilõñlõñ kõn an wõr aenõm̦m̦an rot in ibwiljid ilo lal̦ in me ejjel̦o̦k aenõm̦m̦an ie? (Sam 119:165, UBS; Ais. 54:13) Ñe jej kate kõj im kõm̦m̦an aenõm̦m̦an ippãn ro jet, jej kwal̦o̦k bwe jej lukkuun yokwe er, im men in el̦ap an kam̦õn̦õn̦õik bũruon Jemãd ilañ.​—Sam 133:1-3; Matu 5:9, UBS.

“YOKWE EJ KALÕK”

Paul ear je: “Yokwe ej kalõk.” (1 Ko. 8:1, UBS) Ta mel̦el̦ein men in? Ilo 1 Korint jebta 13, eo im ro jet rej n̦aetan “Sam in Yokwe,” Paul ear kõmel̦el̦e kõn ewi wãween an yokwe kalõk. Juon wãween, yokwe ekitibuj ad lale im kappukot m̦okta aikuj ko an ro jet. (1 Ko. 10:24, UBS; 13:5, UBS) Bareinwõt, kõnke yokwe ekitibuj ad l̦õmn̦ak kake ro jet, kwal̦o̦k jouj, im meanwõd, men kein rej kõm̦m̦an bwe en wõr yokwe ilowaan baam̦le ko ad im bwe eklejia ko ad ren bõrokuk ippãn doon.​—Kol. 3:14.

Yokwe eo ad ñan Anij ej yokwe eo eaorõktata im el̦aptata an kõkajoor kõj. Etke? Kõnke yokwe eo ad ñane ej kõm̦m̦an bwe jen bõrokuk ippãn doon! Aolep armej jãn elõñ aelõñ im kajin ko remaroñ kabuñ ñan Jeova ippãn doon im “karejar ñan E kõn juon wõt bõro.” (Zp. 3:9) Innem, jen kate kõj ñan kwal̦o̦k wãween in eaorõk me ej leen jetõb kwõjarjar eo an Anij aolep raan.