Enaaj Ke Jem̦l̦o̦k Lal̦ In?
Bõlen em̦õj am̦ jel̦ã bwe Baibõl̦ ej kõnono kõn jem̦l̦o̦kin lal̦ in. (1 Jon 2:17) Ej ke kõnono kõn jem̦l̦o̦kin an naaj armej mour? Lal̦ in enaaj ke erom juon jikin eo me ejjel̦o̦k tokjãn ak lukkuun ko̦kkure bwe en jako?
UWAAK EO JÃN BAIBÕL̦ ÑAN KAJJITÕK KEIN EJ JAAB!
Ta eo Eban Jem̦l̦o̦k?
MOUR AN ARMEJ
Men eo Baibõl̦ ej ba: Anij “ear kõm̦anm̦an lal̦ im jab kõm̦m̦ane waan, im n̦a wãween bwe [armej] ren jokwe ie.”—AISEIA 45:18.
LAL̦ IN
Men eo Baibõl̦ ej ba: “Juon epepen ej ilo̦k, im bar juon epepen ej itok; a lal̦ ej pãdwõt ñan indeeo.”—EKKLISIASTIS 1:4.
MEL̦EL̦EIN MEN IN: Ekkar ñan Baibõl̦, lal̦ in ejjãmin jako im armej ro renaaj jokwe wõt ie. Innem, ta mel̦el̦ein an naaj jem̦l̦o̦k lal̦?
L̦ÕMN̦AK KÕN MEN IN: Baibõl̦ ej keidi jem̦l̦o̦kin lal̦ ñan men eo ear wal̦o̦k ilo raan ko an Noa. Ilo tõre eo, lal̦ ear “obrak kõn kowadoñ.” (Jenesis 6:13) Ijoke, Noa ear wãnõk. Kõn men in, Anij ear kõjparok Noa im baam̦le eo an, ak Ear ko̦kkure armej ro renana kõn juon ibwijleplep. Ilo an kõnono kõn ta eo ear wal̦o̦k ilo tõre eo, Baibõl̦ ej ba: “Lal̦ eo ilo iien eo ear jorrããn kõn ejja men kein wõt ke ear ibwijleplep im jakol̦o̦k kõn dãn.” (2 Piter 3:6) Eñin kar jem̦l̦o̦k eo an juon lal̦. Ijoke ta eo ear jako? Lal̦ in ear jab jako, ak armej ro renana ijin ioon lal̦ rar jako. Innem ñe Baibõl̦ ej kõnono kõn jem̦l̦o̦kin lal̦ in, ejjab jitõñl̦o̦k ñan an naaj ko̦kkure lal̦ in jej jokwe ie. Ak ej kõnono kõn an naaj ko̦kkure armej ro renana ijin ioon lal̦ im jukjukun pãd in me rar make ejaake.
Ta eo Enaaj Jem̦l̦o̦k?
APAÑ KO IM NANA KO
Men eo Baibõl̦ ej ba: “Bwe jidik wõt iien, im eo enana enaaj jako; aet, kwõnaaj kalimjeke jikin im enaaj ejjel̦o̦k. A ro ettã bũrueer renaaj jolõt ãne eo, im renaaj m̦õn̦õn̦õ kõn aenõm̦m̦an el̦ap.”—SAM 37:10, 11.
MEL̦EL̦EIN MEN IN: Ibwijleplep eo ilo raan ko an Noa ear jab kõjem̦l̦o̦k nana ñan indeeo. Ãlikin Ibwijleplep eo, armej ro renana rar bar kõm̦m̦an bwe en pen an armej mour. Bõtab, ejjabto jãn kiiõ, Anij enaaj kõjem̦l̦o̦k nana otemjej. Ãinwõt an ri-jeje sam eo ba: “Eo enana enaaj jako.” Anij enaaj kõjem̦l̦o̦k nana otemjej ikijjeen Aelõñ eo an—juon kien me ej tõl jãn lañ ioon armej ro me rej pokake Anij.
L̦ÕMN̦AK KÕN MEN IN: Kien ko ijin ioon lal̦ ren ke m̦õn̦õn̦õ in rejetake tõl eo an Aelõñ eo an Anij? Baibõl̦ ej kaalikkar bwe reban. Renaaj kõm̦m̦ane juon pepe ejjab mãlõtlõt ñan jum̦ae Aelõñ eo an Anij. (Sam 2:2) Ta naaj jem̦l̦o̦kin pepe in? Aelõñ eo an Anij enaaj bõk jikin aolep kien ko an armej im “enaaj jutak ñan indeeo.” (Daniel 2:44) Bõtab etke kien ko an armej rej aikuj jem̦l̦o̦k?
MEN EO JEJ AIKUJI IM ETKE—Bwe En Jem̦l̦o̦k an Kien ko an Armej Tõl
Men eo Baibõl̦ ej ba: “Ejjab an juon armej eo ej etetal bwe en jineet buñtõn neen.”—JEREMAIA 10:23.
MEL̦EL̦EIN MEN IN: Kar jab kõm̦anm̦an armej bwe ren tõl er make. Ejjab em̦m̦an aer tõl armej ro jet im kõm̦adm̦õde apañ ko aer.
L̦ÕMN̦AK KÕN MEN IN: Ekkar ñan Britannica Academic, ej kwal̦o̦k bwe kajjojo kien ko rejjab maroñ “kõm̦adm̦õd apañ ko me rej ri-kõjdat an armej ro ipel̦aakin lal̦ in ãinwõt jeram̦õl, kwõle, nañinmej, jorrããn ko jãn l̦añ ko rel̦l̦ap, im tarin̦ae ak wãween ko jet kõn lãj.” Ej wõnm̦aanl̦o̦k wõt im ba: “Jet . . . rej tõmak bwe juon wõt kien me enaaj tõl aolepen lal̦ in emaroñ jol̦o̦k aolep men kein renana.” Ijoke, jekdo̦o̦n ñe aolep kien kein renaaj koba ippãn doon, ak lal̦ in enaaj pãdwõt ium̦win tõl eo an armej ro rejjab weeppãn me rejjab maroñ anjo̦ ioon men kein reppen me em̦õj ba kaki itulõñ. Aelõñ eo an Anij ej kien eo wõt me ewõr an maroñ ñan kõm̦adm̦õdi aolep apañ kein im julo̦ki ñan indeeo.
Innem ekkar ñan Baibõl̦, jem̦l̦o̦kin lal̦ in ak jukjukun pãd in enana, ejjab juon men me armej ro rem̦m̦an rej aikuj in mijake. Ijello̦kun men in, ej juon men remaroñ reim̦aanl̦o̦k ñane kõnke Anij enaaj bõktok jukjukun pãd eo an ekããl me enaaj bõk jikin jukjukun pãd in enana im em̦or!
Ñããt men kein renaaj wal̦o̦k? Katak eo tok juon enaaj kõmel̦el̦eiki uwaak eo jãn Baibõl̦.