Ta Mel̦el̦ein Iien Eo Ãliktata ak “Jem̦l̦o̦kin”?

Ñe kwõj roñ naan kein, “Jem̦l̦o̦kin epaak!” ta eo ejiktok ilo l̦õmn̦ak eo am̦? Kwõj ke l̦õmn̦ak kõn an dekã killep ko wõtlo̦k im ko̦kkure lal̦ in im kõm̦m̦an bwe aolep armej ren mej? Ak kwõj ke l̦õmn̦ake an wal̦o̦k juon jorrããn el̦ap ak juon bar pata an lal̦ kein kajilu? Ñe jet armej rej l̦õmn̦ak kõn men kein, ekkã aer inepata, ak ro jet rej pere im kajjirere.

Baibõl̦ ej ba: “Enaaj itok jem̦l̦o̦kin.” (Matu 24:14) Baibõl̦ ej bar n̦aetan iien in “raan in Anij ekajoor otem kajoor” ak “Armagedon.” (Revelesõn 16:14, 16) M̦ool bwe elukkuun lõñ kain katak ko an kabuñ ko kõn men in im rej kõm̦m̦an an armej ro pok. Elõñ bar mel̦el̦e ko rekõjak im kabũrom̦õjm̦õj rej kwal̦o̦ki. Bõtab, Baibõl̦ ej kaalikkar ta lukkuun mel̦el̦ein iien eo ãliktata ak jem̦l̦o̦kin. Naan ko an Anij ilo Baibõl̦ rej bareinwõt jipañ kõj ñan kile el̦aññe epaak jem̦l̦o̦kin. Men eo em̦m̦antata ej bwe Baibõl̦ ej katakin kõj wãween ñan el̦l̦ã im mour! Ak m̦oktata, jen lale ta l̦õmn̦ak ko rejjab jim̦we an armej kõn mel̦el̦ein jem̦l̦o̦kin im lale ta lukkuun mel̦el̦ein. Ta lukkuun mel̦el̦ein “jem̦l̦o̦kin” ekkar ñan Baibõl̦?

JEM̦L̦O̦KIN EJJAB MEL̦EL̦EIN

1. JUON IIEN ME ENAAJ BWIL LAL̦ IN KÕN KIJEEK.

   Baibõl̦ ej ba: “[Anij] ear likũt l̦oñtak ko an lal̦ bwe en jab m̦akũtkũt ñan indeeo.” (Sam 104:5) Eoon in im eoon ko jet rej kaalikkar bwe Anij ejãmin ko̦kkure lal̦ in im ejãmin kõtl̦o̦k bwe ro jet ren ko̦kkure!—Ekklisiastis 1:4; Aiseia 45:18, UBS.

2. JUON IIEN ME ENAAJ JIDE IM WAL̦O̦K IM KAR JAB KARÕKL̦O̦K IM̦AAN.

   Baibõl̦ ej kwal̦o̦k bwe em̦õj an Anij karõke iien eo enaaj itok jem̦l̦o̦kin. Baibõl̦ ej ba: “A raan eo im awa eo ejjel̦o̦k en̦ ejel̦ã kake, jab enjel̦ ro rej pãd ilañ, jab Nejin, a Jema wõt. Kom̦win kõjparok kom̦, kom̦win ekkõl im jar; bwe kom̦ jaje ñããt iien eo.” (Mark 13:32, 33) Ealikkar bwe em̦õj an Anij karõke “iien eo” me enaaj itok jem̦l̦o̦kin.

3. JUON IIEN ME ARMEJ RENAAJ JINOE AK JUON IIEN ME ENAAJ WÕTLO̦K DEKÃ JÃN LAÑ.

   Ewi wãween an naaj jino iien eo ãliktata ak jem̦l̦o̦kin? Revelesõn 19:11 ej ba: “Iar lo lañ epel̦l̦o̦k, im lo, juon kidia emouj, im Eo ej jijet ioon, n̦aetan Etiljek im Em̦ool.” Revelesõn 19:19 ej wõnm̦aanl̦o̦k im ba: “Im iar lo kidu eo, im kiiñ ro an lal̦, im jarin tarin̦ae ko aer, em̦õj ko̦kweilo̦ktok er bwe ren tarin̦aeik Eo ej jijet ioon kidia eo, im jarin tarin̦ae eo An.” (Revelesõn 19:11-21) Meñe enañin aolep naan kein ilo eoon kein rej naanin kõkkar, ak jemel̦el̦e bwe Anij enaaj jilkintok juon jarin tarin̦ae in enjel̦ ro ñan jol̦o̦k aolep rũkõjdat ro an.

JEM̦L̦O̦KIN EJ MEL̦EL̦EIN

1. ENAAJ JEM̦L̦O̦K AOLEP KIEN KO AN ARMEJ.

   Baibõl̦ ej ba: “Anij in lañ enaaj kajutak juon aelõñ [kien] eo eban jako indeeo, im aelõñ in reban lel̦o̦k ñan armej ro jet. Enaaj kapedakilkil im ko̦kkure aolep aelõñ kein, im enaaj jutak ñan indeeo.” (Daniel 2:44) Ãinwõt an kar alikkar m̦oktal̦o̦k, naaj jol̦o̦k “kiiñ ro an lal̦, im jarin tarin̦ae ko aer,” ro im renaaj kweilo̦ktok “bwe ren tarin̦aeik Eo ej jijet ioon kidia eo, im jarin tarin̦ae eo An.”—Revelesõn 19:19.

2. ENAAJ JEM̦L̦O̦K TARIN̦AE, KOWADOÑ, IM KALIJEKL̦O̦K.

   Baibõl̦ ej ba: “[Anij] ej kabõjrak tarin̦ae ko ioon aolepen lal̦.” (Sam 46:9, UBS) Ej bar ba bwe “ro rejim̦we renaaj jokwe ilo lal̦, im ro reweeppãn renaaj pãdwõt ie. A ro renana, renaaj jako jãn ãneo, im renaaj tũm̦wi jãne ro rej m̦on̦e armej.” (Jabõn Kõnnaan 2:21, 22) Bareinwõt, ej ba bwe Anij enaaj ‘kõm̦m̦an men otemjej bwe ren kããl.’—Revelesõn 21:4, 5.

3. ENAAJ JAKO KABUÑ KO REJJAB KABUÑBŨRUON ANIJ IM JIPAÑ ARMEJ.

   Baibõl̦ ej ba: “Rũkanaan ro rejjab kõnono m̦ool im bũrij ro rej l̦oor rũkanaan ro ilo aer tõl armej ro. . . . Ak renaaj et ñe ejem̦l̦o̦k men kein?” (Jeremaia 5:31, UBS) Ej bar ba: “Elõñ renaaj ba ñan Eõ ilo raan eo, ‘Irooj, Irooj kõmar jab rũkaanij kõn Etam̦ ke, im kajutakl̦o̦k tim̦on̦ ro kõn Etam̦ ke, im kõm̦anm̦an elõñ menin bwilõñ kõn Etam̦ ke?’ Innem Inaaj ba ñan er, ‘Iar jaje kom̦; kom̦win ilo̦k jãn Eõ, kom̦ rej kõm̦m̦an nana.’”—Matu 7:21-23.

4. ENAAJ JAKO ARMEJ RO REJ WÕNM̦AANL̦O̦K WÕT IM REJETAKE MEN KO AN LAL̦ IN.

   Jijej Kũraij ear ba: “Im men in ekajet eo, bwe meram emoottok ñan lal̦, im armej rej yokwe marok el̦ap jãn meram, bwe jerbal ko aer renana.” (Jon 3:19) Baibõl̦ ej kwal̦o̦k kõn tõre ko an em̦m̦aan eo etiljek etan Noa, ke ear ibwijleplep aolepen lal̦ in. Ej ba: “Lal̦ eo ilo kar iien eo ear jako kõn an dãn kalbubuuki. A kõn ejja naan eo wõt, Ej kakon̦i lañ ko im lal̦ ñan kijeek, im Ej kõjparoki ñan raanin ekajet im ko̦kkure an armej renana.”—2 Piter 3:5-7.

Kwõj ke kile bwe kar keidi “raanin ekajet im ko̦kkure” eo ñan iien eo ear jako “lal̦ eo” ilo tõre ko an Noa? Ta lal̦ eo me ear jako ilo tõre eo? Eokwe, jejel̦ã bwe ear jab jako lal̦ in kõnke ekabde pãdwõt ñan kiiõ. “Lal̦ eo” me ear “jako” ilo tõre eo ej ‘armej ro renana’ ak rũkõjdat ro an Anij. Ilo naaj “raanin ekajet” eo an Anij me m̦õttan jidik enaaj wal̦o̦k, ro rej kããlõt bwe ren rũkõjdat an Anij renaaj bar jako ãinwõt kar armej ro ilo tõre eo. Bõtab, ro jeran Anij renaaj el̦l̦ã im mour, ãinwõt kar Noa im baam̦le eo an.​—Matu 24:37-42.

L̦õmn̦ak m̦õk kõn joñan an naaj em̦m̦an lal̦ in ãlikin an Anij jol̦o̦k aolep men ko renana im armej ro renana! Ealikkar bwe ennaan eo ilo Baibõl̦ kõn iien eo ãliktata ak jem̦l̦o̦kin ejjab juon ennaan enana ak ej juon ennaan em̦m̦an. Bõtab, kwõmaroñ l̦õmn̦ak im ba: ‘Baibõl̦ ej ke kwal̦o̦k ñan kõj kõn ñããt eo enaaj itok jem̦l̦o̦kin? Epaak ke? Ewi wãween bwe in maroñ el̦l̦ã im mour?’