Kõn Wõt Juon Ettõñdikdik!

RUO jiroñ rar etetal ippãn doon ilo juon jikin elõñ peejnej ko ie, ilo juon bukwõn etan Baguio City ilo Philippines. Ilo iien in, erro ear lo juon iaan wa bwilbwil ko ad, ak rar jab bõjrakl̦o̦k. Helen, kõrã eo jeid im jatid me ej jutak iturin wa bwilbwil eo, ear lukkuun ettõñdikdikl̦o̦k ñan erro. Jiroñ ro rar etal wõt ilo ial̦ eo aerro, ak ekar lukkuun em̦m̦an ippãerro wãween an kar Helen mejãn ettõñdikdikl̦o̦k ñan erro.

Tokãlik, ke jiroñ ro rej bus l̦o̦k ñan m̦weo im̦weerro, erro ear lo juon jain killep ej ba jw.org ilo juon Im̦õn Kweilo̦k. Erro ear keememej bwe lõta kein rar ejja lõta ko wõt erro ear loi ilo wa bwilbwil eo, m̦oktal̦o̦k ilo raan eo. Erro ear to jãn bus eo im lale jikejuul̦in iien kweilo̦k ko an kajjojo iaan eklejia ko, me ej pãd ilo wõrwõrin Im̦õn Kweilo̦k eo.

Jiroñ rein ruo rar etal ñan juon iaan kweilo̦k kein. Im wõn eo erro ear loe ke rej del̦o̦ñel̦o̦k Im̦õn Kweilo̦k eo? Helen! Ear m̦õkaj aerro kile kõnke eñin armej eo ear lukkuun ettõñdikdikl̦o̦k ñan erro. Helen ej ba, “Ke erro ej kepaak eõ, iar jaadin ikkũm̦kũm̦ jidik. Iar l̦õmn̦ak bwe bõlen ewõr men en̦ iar kõm̦m̦ane.” Bõtab jiroñ ro rar kõmel̦el̦e ñan Helen kõn ta eo ear wal̦o̦k.

Ear lukkuun em̦m̦an ippãn jiroñ ro kweilo̦k eo im erro ear eñjake aerro ruwainene ippãn ro jeid im jatid. Ke erro ear lo an jet karreoiki Im̦õn Kweilo̦k eo ãlikin kweilo̦k, rar kajjitõk ñe remaroñ jipañ. Kiiõ, em̦õj an juon iaan jiroñ rein em̦m̦akũt jãn Philippines, ak jiroñ eo juon ear jino etal ñan iien kweilo̦k ko im jino katak Baibõl̦​—kõn wõt juon ettõñdikdik!