Lo Aenõm̦m̦an Ium̦win Juon Apañ El̦ap

1. Ta “aenõm̦m̦an eo jãn Anij,” im ewi wãween ad bõk tokjãn jãne ñe ewõr aenõm̦m̦an in ippãd? (Pilippai 4:6, 7)

EWÕR juon kain aenõm̦m̦an me lal̦ in ejaje kake. Ej “aenõm̦m̦an eo jãn Anij,” ineem̦m̦an eo me ej itok jãn an wõr juon ad jem̦jerã eaorõk ippãn eo Jemãd ilañ. Ñe ewõr ippãd aenõm̦m̦an eo jãn Anij, jej eñjake ad pãd ilo jokwane im kõjparok. (Riit Pilippai 4:6, 7.) Jej m̦õn̦õn̦õ kõn jem̦jerã ko repaak ippãn ro me rej yokwe E. Im jej m̦õn̦õn̦õ kõn an wõr juon ad make jem̦jerã epaak ippãn eo ej “Anij in aenõm̦m̦an.” (1 Tes. 5:23) Ñe jej jel̦ã kajjien, lõke, im pokake eo Jemãd ilañ, innem aenõm̦m̦an eo jãn Anij emaroñ kaenõm̦m̦an bũruod ñe jej jelm̦ae juon apañ.

2. Etke jemaroñ lõke bwe jemaroñ lo aenõm̦m̦an eo jãn Anij?

² Jemaroñ ke lukkuun lo aenõm̦m̦an eo jãn Anij ñe jej jelm̦ae juon apañ el̦ap ãinwõt, an wal̦o̦k juon nañinmej me em̦õkaj an ajeeded, an wal̦o̦k juon jorrããn el̦ap, an wõr kumi in armej ro rej jum̦ae, ak aer jum̦ae im kaeñtaan kõj? Jabdewõt iaan apañ kein rel̦l̦ap emaroñ kõm̦m̦an ad lukkuun mijak. Ijoke, Jesus ear kauwe ri-kal̦oor ro an im ba: “Bũruomi en jab inepata im kom̦win jab kõtl̦o̦k bwe en ebbweer kõn an mijak.” (Jon 14:27) Jej m̦õn̦õn̦õ bwe rũttõmak ro jeid im jatid rar l̦oore naanin kakapilõklõk in an Jesus. Ikijjeen jipañ eo an Jeova, rar maroñ lo aenõm̦m̦an ilo aer kijenmej ium̦win mãlejjoñ ko rel̦l̦ap.

LO AENÕM̦M̦AN ILO IIEN AN WAL̦O̦K JUON NAÑINMEJ ME EM̦ÕKAJ AN AJEEDED

3. Ewi wãween an juon nañinmej me em̦õkaj an ajeeded ilo juon jikin ak juon nañinmej me ejelõt aolepen lal̦ in maroñ ko̦kkure ad aenõm̦m̦an?

³ Juon nañinmej me em̦õkaj an ajeeded ilo juon jikin ak juon nañinmej me ejelõt aolepen lal̦ in emaroñ lukkuun kõm̦m̦an bwe en oktak enañin aolep wãween mour an armej. L̦õmn̦ak kõn wãween an COVID-19 lukkuun jelõt mour an elõñ. Ilo juon ekkatak ak survey, elõñl̦o̦k jãn jimattanin armej ro rar kwal̦o̦k bwe ear lukkuun pen aer kiki jãn ke ear wal̦o̦k nañinmej eo el̦ap. An kar lukkuun ajeeded nañinmej in ear kõm̦m̦an bwe en l̦apl̦o̦k nañinmejin inepata (anxiety), bũrom̦õj (depression), an armej kõjerbal dãnnin arkool̦ im uno ko rekkajjoor, an wal̦o̦k jorrããn im lãj ilowaan juon baam̦le, im an armej kajjioñ in bõk mour ko aer make. El̦aññe ewõr juon nañinmej me el̦ap an ajeeded ilo jikin eo kwõj pãd ie, ewi wãween kwõmaroñ kõm̦m̦an bwe en dikl̦o̦k am̦ inepata im bwe kwõn m̦õn̦õn̦õ kõn aenõm̦m̦an eo jãn Anij?

4. Etke ad jel̦ã kõn kanaan eo an Jesus kõn raan ko ãliktata ej letok aenõm̦m̦an?

⁴ Jesus ear kanaan bwe ilo raan ko ãliktata, enaaj wõr nañinmej ko rekapopo ak enaaj l̦ap an ajeeded nañinmej ko “ilo elõñ jikin ko.” (Luk 21:11) Ilo ad jel̦ã men in, ewi wãween an letok aenõm̦m̦an? Jejjab bwilõñ ñe ej wõr nañinmej ko me el̦ap aer ajeeded. Jej lo bwe ej wal̦o̦k men ko me Jesus ear ba bwe renãj wal̦o̦k. Kõn men in, ewõr un ko unin ad l̦oor naanin jiroñ ko Jesus ear lel̦o̦k ñan ro rej mour ilo tõre ko ãliktata. Ear ba: “Lale bwe kom̦win jab wiwijet.”—Matu 24:6.

5. (1) Ekkejell̦o̦k ippãn Pilippai 4:8, 9, ta ko jej aikuj jar kaki ñe jej jelm̦ae juon nañinmej me em̦õkaj an ajeeded? (2) Ñe kwõj roñjake ainikien rekoot in eoon ko ilo Baibõl̦, ewi wãween am̦ bõk tokjãn jãn men in?

⁵ An l̦ap an ajeeded juon nañinmej emaroñ kõm̦m̦an ad lukkuun inepata im wiwijet. Men in ear wal̦o̦k ñan juon jeid im jatid kõrã etan Desi.b Ãlikin an kar mej l̦eo jatin jemãn, l̦adik eo nejin uncle eo an, im taktõ eo an jãn COVID-19, ear mijak ñe ebõk nañinmej eo im lel̦o̦k ñan lel̦l̦ap eo jinen. Ear inepata ñe eluuji jerbal eo an kõn wõt nañinmej eo, innem ear kõl̦mãnl̦o̦kjen̦ kõn ewi wãween an maroñ kõl̦l̦ã on̦ããn m̦õñã im jikin jokwe. Inepata kein rar jino koobrak l̦õmn̦ak eo an im kõm̦m̦an an jab kiki in boñ. Ijoke, Desi ear maroñ bar lo aenõm̦m̦an. Ewi wãween? Ear jar im kajjitõk bwe Jeova en jipañe bwe en ineem̦m̦an wõt im bwe en bõk l̦õmn̦ak ko rejim̦we. (Riit Pilippai 4:8, 9.) Ear roñjake an Jeova kõnono ñane ilo kõkkar ikijjeen ainikien rekoot in eoon ko ilo Baibõl̦. Ej ba, “Ainikien ro me rej riiti eoon kein rar kaenõm̦m̦an eõ jãn aõ inepata im rar kakeememej eõ kõn tũriam̦o eo an Jeova.”—Sam 94:19.

6. Ewi wãween am̦ katak ippam̦ make im am̦ pãd ilo kweilo̦k ko naaj jipañ eok?

⁶ Ejjel̦o̦k pere bwe juon nañinmej me em̦õkaj an ajeeded emaroñ ko̦kkure jet iaan men ko jekõn kar kõm̦m̦ani m̦okta, bõtab jab kõtl̦o̦k bwe men in en ko̦kkure iien am̦ katak ippam̦ make ak iien am̦ pãd ilo kweilo̦k ko. Bwebwenatoun mour ko an ro jeid im jatid me rej pãd ilo bok ko ad im pijain alwõj ko renaaj kakeememej eok bwe rej bar dãpij wõt aer tiljek meñe rej bar iioon wãween ko reppen me rej ãinl̦o̦kwõt wãween ko kwõj iiooni. (1 Pit. 5:9) Kweilo̦k ko renaaj jipañ eok bwe kwõn koobrak l̦õmn̦ak ko am̦ kõn katak ko rekõketak jãn Baibõl̦. Renaaj bareinwõt kõpel̦l̦o̦k iien ñan am̦ kõketak ro jet im bar bõk kõketak. (Rom 1:11, 12) Ilo am̦ l̦õmn̦ak kõn wãween an Jeova rejetake ro rej kabuñ ñane ñe rej nañinmej, mijak, im make iaaer, enaaj kajoorl̦o̦k tõmak eo am̦ im enaaj kõm̦m̦an am̦ lukkuun tõmak bwe enaaj bar rejetake kwe.

7. Ta eo jemaroñ katak jãn rijjilõk Jon?

⁷ Kate eok bwe kwõn tõpar im kõm̦m̦ao ippãn ro jeim̦ im jatũm̦. Ilo iien eo me ej wal̦o̦k juon nañinmej em̦õkaj an ajeeded, emaroñ menin aikuj bwe jen dãpij wõt ad ettol̦o̦k jãn doon (physical distancing) meñe jej pãd ippãn ri-karejar ro jeid im jatid. Ilo iien rot kein, bõlen kwõmaroñ bar bõk ejja eñjake eo wõt an rijjilõk Jon. Ear kõn̦aan etal im iioone im loe l̦eo m̦õttan etan Geiõs. (3 Jon 13, 14) Ijoke, Jon ear kile bwe ium̦win jidik iien, ear jab maroñ loe Geiõs. Kõn men in, Jon ear kõm̦m̦ane juon men me ewõr an maroñ ñan kõm̦m̦ane; ear je juon lõta ñan Geiõs. El̦aññe ejjab aolep iien kwõj maroñ in etal im iioone im loe ro jeim̦ im jatũm̦, kajjioñ tõpar er ikijjeen am̦ kõjerbal talboon, video call, im message. El̦aññe kwõj keini am̦ bwebwenato im kõm̦m̦ao ippãn ro jeim̦ im jatũm̦, enaaj dikl̦o̦k am̦ eñjake am̦ make iaam̦ im enaaj l̦apl̦o̦k am̦ aenõm̦m̦an. El̦aññe kwõj eñjake am̦ lukkuun inepata, kate eok bwe kwõn tõpar em̦m̦aan ro rej lale eklejia, im bõk naanin kõkajoor jãn er.​—Ais. 32:1, 2.

LO AENÕM̦M̦AN ÑE JEJ IIOON JUON JORRÃÃN EL̦AP

8. Ewi wãween an juon jorrããn el̦ap maroñ ko̦kkure aenõm̦m̦an eo am̦?

⁸ El̦aññe em̦õj am̦ kar iioon juon ibwijleplep, juon m̦akũtkũt lal̦, ak juon jikin me ear l̦ap an jorrããn jãn kijeek, bõlen emaroñ kar lukkuun aetok kũtien am̦ inepata ãlikin an kar wal̦o̦k jorrããn eo. El̦aññe kwaar luuji ro kwõj yokwe er ak kwaar luuji m̦weo im̦õm̦ im men ko m̦weiõm̦, bõlen kwõmaroñ kar lukkuun bũrom̦õj, eñjake an ejjel̦o̦k am̦ kõjatdikdik, ak bõlen kwaar lukkuun illu. Men in ejjab mel̦el̦ein bwe kwõj juon eo em̦m̦weiukiuk ak edik tõmak eo an. Ijoke, kwaar iioon juon wãween epen, im jet remaroñ kõtmãne bwe kwõn kar em̦m̦akũt ilo juon wãween ejjab em̦m̦an. (Job 1:11) Bõtab meñe kwõj iioon wãween ko reppen, ak kwõj maroñ wõt lo aenõm̦m̦an. Ewi wãween?

9. Ewi wãween an kar Jesus kõpooj kõj ñe enaaj wal̦o̦k jorrããn ko rel̦l̦ap?

⁹ Keememej men eo Jesus ear kanaan kake. Jet armej rej l̦õmn̦ak bwe reban iioon jorrããn ko rel̦l̦ap ñan jidik. Bõtab jejel̦ã bwe enaaj l̦apl̦o̦k jorrããn ko rej wal̦o̦k ilo tõre kein ad, im jej kõtmãne bwe jemaroñ iioon jet iaan jorrããn kein. Jesus ear ba ñan ri-kal̦oor ro an bwe enaaj wõr “m̦akũtkũt lal̦ ko rel̦l̦ap” im jorrããn ko jet renaaj bar wal̦o̦k m̦okta jãn an nãj itok jem̦l̦o̦kin. (Luk 21:11) Ear bareinwõt kanaan bwe enaaj “l̦apl̦o̦k nana,” eo im ej lukkuun wal̦o̦k ilo raan kein ad. Ñan waanjoñak, jej lo an l̦ap jerbal ko renana, kowadoñ, im jerbal nana ko an ro rej kalõl̦ño̦ñ ro jet (terrorist ro). (Matu 24:12) Jesus ear jab ba bwe jorrããn kein renaaj wal̦o̦k wõt ñan ro me Jeova em̦õj an jol̦o̦k er. Ilo m̦ool, elõñ iaan ri-karejar ro retiljek an Jeova em̦õj aer jorrããn jãn men kein. (Ais. 57:1; 2 Kor. 11:25) Jeova emaroñ jab kõjparok kõj ilo kabwilõñlõñ jãn jorrããn kein, ak enaaj letok jabdewõt men eo jej aikuji bwe jen maroñ dãpij wõt ad ineem̦m̦an im aenõm̦m̦an.

10. Etke ad kõppojakl̦o̦k im̦aan ñan iien ko me emaroñ wal̦o̦k juon jorrããn el̦ap ej juon wãween me jej kwal̦o̦k ad tõmak? (Jabõn Kõnnaan 22:3)

¹⁰ Ñe jej kõm̦m̦an bũl̦ããn l̦o̦k im̦aan kõn wãween ad maroñ em̦m̦akũt ñe ewal̦o̦k juon idiñ, men in enãj kõm̦m̦an bwe en pidodo ad maroñ ineem̦m̦an wõt ñe ewal̦o̦k men in. Ak ad m̦aanjãppopo ej ke kaalikkar bwe edik ad tõmak ilo Jeova? Jaab ñan jidik. Ilo m̦ool, ad kõm̦m̦ane men in ej kaalikkar bwe jej tõmak im lõke bwe enaaj lale im kõjparok kõj. Etke jej ba men in? Kõnke Naanin Anij ej rõjañ kõj ñan kõppojakl̦o̦k im̦aan ñan jorrããn ko me remaroñ wal̦o̦k. (Riit Jabõn Kõnnaan 22:3.) Im ikijjeen katak ko ilo magazine ko ad, kweilo̦k ko an eklejia, im kõjjel̦ã ko me rej itok ilo iien ko rejejjet, doulul in an Anij ej pãddo ãliji im rõjañ kõj ñan pojakl̦o̦k im̦aan ñan iien ko reidiñ.c Jej ke lõke Jeova? El̦aññe aet, innem jenaaj l̦oore naanin rõjañ in an kiiõ—m̦okta jãn an wal̦o̦k juon jorrããn el̦ap.

11. Ta eo kwõj katak jãn joñak eo an Margaret?

¹¹ L̦õmn̦ak kõn men eo juon jeid im jatid kõrã etan Margaret ear iioone. Kar ba bwe ej aikuj etal jãn m̦weo im̦õn kõn wõt an kar wal̦o̦k juon kijeek ilo bukwõn eo ej jokwe ie. Kõnke elõñ armej rar kajjioñ ko ilo juon wõt iien, ear bũl̦ak ial̦ eo im l̦ap an traffic im ejjel̦o̦k ial̦an aer wõnm̦aanl̦o̦k. Ak kiiõ ear jino tab mejatoto kõn ettoonon in baat kilmeej, im Margaret ear jab maroñ diwõjl̦o̦k jãn wa eo waan. Ijoke ear maroñ el̦l̦ã im mour kõnke ear pojakl̦o̦k im̦aan. Ilowaan iep eo an, ear wõr juon mab me ear kwal̦o̦k ñane juon ial̦ ñan an ko. Im em̦õj an kar ettõr m̦oktal̦o̦k ilo ial̦ in bwe en pidodo an nãj kar l̦oore ñe ewõr juon idiñ ewal̦o̦k. Kõnke Margaret ear pojakl̦o̦k im̦aan, ear maroñ el̦l̦ã im mour jãn wãween in ear iioone.

12. Etke jej l̦oori naanin tõl ko me rej litok ikijjeen kõjparok?

¹² Ñan kõjparok kõj im ro jet, ro rej jerbal ilo kien remaroñ kajjitõk ippãd ñan l̦oore jet kakien ko kõn awa in ad aikuj kon̦ ilowaan m̦õko im̦õd, em̦m̦akũt, ak bar bõk jet buñtõn ne ko me raorõk ñan ad kõm̦m̦ani. Jet armej rej rum̦wij in em̦m̦akũt ak pokake kakien ko kõnke rejjab kõn̦aan etal jãn men ko m̦weieer. Ak ewi wãween an Kũrjin ro em̦m̦akũt kõn naanin jiroñ kein? Baibõl̦ eo ej jiroñ kõj im ba: “Kom̦win l̦oor kõn̦aan eo an Irooj ilo ami kõttãik kom̦ ñan men otemjej kõm̦m̦anin armej, meñe ej ñan juon kiiñ eo eutiej ak ñan kom̦ja ro ear jitõñ er.” (1 Pit. 2:13, 14) Doulul eo an Anij ej bar letok naanin tõl ko ñan kõjparok kõj. Aolep iien rej kakeememej kõj ñan lel̦o̦k atõrej, email, im talboon nõm̦ba ko ad rekããltata ñan em̦m̦aan ro rej lale eklejia bwe ren maroñ tõpar kõj ñe ewõr idiñ ewal̦o̦k. Em̦õj ke am̦ kõm̦m̦ane men in? Ewõr iien remaroñ bar letok naanin tõl ko ñan ad pãdwõt ilo m̦õko, em̦m̦akũt, ak ebbõk kein jipañ ko ak kõn wãween im ñããt ko jen jipañl̦o̦k im lale ro jet. Ñe jenaaj likjab jãn ad pokake, jemaroñ likũt mour ko ad ilo kauwõtata im mour ko an em̦m̦aan ro rej lale eklejia. Keememej bwe em̦m̦aan rein rej lale im kõjparok kõj. (Hib. 13:17) Margaret ej ba, “Ij lukkuun tõmak bwe aõ kar l̦oor naanin tõl ko jãn em̦m̦aan ro rej lale eklejia im doulul eo ear lo̦mo̦o̦ren mour e aõ.”

13. Ta eo ear kõm̦m̦an bwe elõñ Kũrjin ro me rar aikuj em̦m̦akũt jãn m̦õko im̦weer ren maroñ lo wõt lañlõñ im aenõm̦m̦an?

¹³ Elukkuun lõñ rũttõmak ro jeid im jatid rar aikuj em̦m̦akũt jãn m̦õko m̦weer kõn wõt juon jorrããn el̦ap, juon tarin̦ae, ak an wõr kumi in armej ro me rej ikittõltõl im kõm̦m̦an jum̦ae. Bõtab rein jeid im jatid rar kate er joñan wõt aer maroñ ñan m̦õkaj im kajjioñ mour ekkar ñan wãween eo repãd ie im m̦õkaj im jino bõk kun̦aaer ilo m̦akũtkũt ko an doulul eo an Jeova. Ãinwõt Kũrjin ro ilo kar iien ko m̦okta me rar ejjeplõklõk kõn wõt aer iioon matõrtõr im jum̦ae, rej wõnm̦aanl̦o̦k wõt im “kwal̦o̦k kõn ennaan eo em̦m̦an kõn naanin Anij.” (Jrb. 8:4) Aer kwal̦o̦k naan ej jipañ er ñan l̦õmn̦ak wõt kõn Aelõñ eo ijello̦kun aer l̦õmn̦ak kõn wãween ko reppen rej iiooni. Kõn aer ãindein, ekõm̦m̦an bwe ren maroñ dãpij wõt aer lañlõñ im aenõm̦m̦an.

LO AENÕM̦M̦AN MEÑE REJ JUM̦AE IM KAEÑTAAN KÕJ

14. Ñe rej jum̦ae im kaeñtaan kõj, ewi wãween an men in maroñ ko̦kkure ad aenõm̦m̦an?

¹⁴ Ñe rej jum̦ae im kaeñtaan kõj, emaroñ kõm̦m̦an bwe en jako elõñ iaan men ko me ekkã aer kõm̦m̦an bwe jen aenõm̦m̦an. El̦ap ad m̦õn̦õn̦õ ñe jej pãd ilo anemkwõj im jemaroñ koba ippãn doon, kwal̦o̦k naan ilo anemkwõj, im kõm̦m̦ani m̦akũtkũt ko ad kajjojo raan ilo ad jab uwõta ñe rekalbuuji kõj. Bõtab ñe ej jako anemkwõj eo ad ñan kõm̦m̦ani men kein, emaroñ kõm̦m̦an bwe jen jino inepata im mijak kõn ta ko jet me remaroñ wal̦o̦k ñan kõj. Ejjab bõd ñe ewal̦o̦k kain eñjake rot kein ippãd. Ijoke, jej aikuj kõjparok. Jesus ear kaalikkar bwe men kein me ro jet rej kõm̦m̦ani ñan jum̦ae im kaeñtaan ri-kal̦oor ro an emaroñ kõm̦m̦an bwe jet iaan ro rej l̦oore ren tipñõl ak buñ jãn tõmak. (Jon 16:1, 2) Innem ewi wãween jemaroñ dãpij wõt ad aenõm̦m̦an ñe rej jum̦ae im kaeñtaan kõj?

15. Etke jejjab aikuj mijak ñe renaaj jum̦ae im kaeñtaan kõj? (Jon 15:20; 16:33)

¹⁵ Naanin Anij ej jiroñ kõj men in: “Aolep ro rekõn̦aan mour ilo aer tiljek ñan Anij im aer juon wõt ippãn Christ Jesus, naaj bareinwõt kaeñtaan er.” (2 Tim. 3:12) Juon jeid im jatid em̦m̦aan etan Andrei ear pen an tõmak bwe enaaj wal̦o̦k men in ãlikin aer kar kõmo̦ jerbal eo ad ilo aelõñ eo an. Ear l̦õmn̦ak im ba: ‘El̦ap an baj lõñ Ri-Kõnnaan ro an Jeova ijin, elemen an nãj ro ilo kien kalbuuji kõm aolep?’ Bõtab ijello̦kun an kar men in kõm̦m̦an bwe Andrei en maroñ lo aenõm̦m̦an, l̦õmn̦ak in an ear kõm̦m̦an bwe en ikkutkut an inepata. Rũttõmak ro jet jeid im jatid rar likũt aolep men ilo pein Jeova im jab kajjioñ bõk l̦õmn̦ak eo bwe reban kalbuuji er. Rar kwal̦o̦k aer kile bwe remaroñ bar kalbuuji er, ijo wõt ke ear dikl̦o̦k aer inepata jãn Andrei. Kõn men in, Andrei ear pepe ñan bõk ejja l̦õmn̦ak in wõt aer, im lukkuun likũt an lõke ilo Jeova. Ejjabto ear maroñ lo aenõm̦m̦an, im kiiõ ej lo lañlõñ meñe ej lõñ wõt wãween ko reppen rej wal̦o̦k. Men in emaroñ bar wal̦o̦k ñan kõj. Meñe Jesus ear jiroñ kõj ñan jel̦ã bwe jenaaj iioon eñtaan jãn ro jet, ak ear bareinwõt kaalikkar bwe jemaroñ dãpij wõt ad tiljek.​—Riit Jon 15:20; 16:33.

16. Ta naanin tõl ko jej aikuj pokaki ñe rej jum̦ae im kaeñtaan kõj?

¹⁶ Ñe rej kõmo̦ik jerbal eo ad ak lukkuun kõm̦m̦an an pen ad kõm̦m̦ane, emaroñ wõr naanin tõl ko me rej itok jãn ra eo ad im em̦m̦aan ro rej lale eklejia. Naanin tõl kein rej ñan kõjparok kõj, im ñan lukkuun lale bwe jen maroñ bõk ekkan ko ilo jetõb, im ñan jipañ kõj bwe jen wõnm̦aanl̦o̦k wõt im kwal̦o̦k naan joñan wõt ad maroñ. Kate eok joñan wõt am̦ maroñ ñan pokake naanin tõl ko kwõj bũki, meñe kwõmaroñ jab lukkuun mel̦el̦e etke rej litoki. (Jem. 3:17) Bareinwõt, jab kwal̦o̦k mel̦el̦e ko kõn rũttõmak ro jeid im jatid ak kõn m̦akũtkũt ko an eklejia eo ñan ro me ejjab tõllo̦kũn ñan aer jel̦ã.​—Ekl. 3:7.

17. Ta eo jej jek ilo bũruod ñan ad kõm̦m̦ane ãinwõt kar rijjilõk ro?

¹⁷ Juon iaan un ko rel̦l̦ap unin an Setan tarin̦aeik armej ro an Anij ej kõnke “epãd ippãer jerbal eo ñan kwal̦o̦k kõn Jesus.” (Rev. 12:17) Jab kõtl̦o̦k bwe Setan im lal̦ in an ren kaamijak eok. Ad kwal̦o̦k naan im katakin meñe jej iioon jum̦ae rej bõktok ñan kõj lañlõñ im aenõm̦m̦an. Ilo tõre ko an rijjilõk ro, ri-Ju ro me reutiej ilo kien eo rar kõm̦m̦an kakien bwe rijjilõk ro ren bõjrak jãn aer kwal̦o̦k naan, ak em̦m̦aan rein retiljek rar kããlõt ñan pokake Anij. Rar wõnm̦aanl̦o̦k wõt im kwal̦o̦k naan, im jerbal in ear kõm̦m̦an bwe ren m̦õn̦õn̦õ. (Jrb. 5:27-29, 41, 42) Ejjel̦o̦k pere bwe ñe rej kõmo̦ik jerbal eo ad, jenãj aikuj in kõjparok ilo ad kwal̦o̦k naan. (Matu 10:16) Bõtab ñe jenãj lukkuun kate kõj joñan wõt ad maroñ, enaaj wõr ippãd aenõm̦m̦an eo me ej itok jãn ad jel̦ã bwe jej kabuñbũruon Jeova im jãn ad kwal̦o̦k kõn ennaan eo me enaaj lo̦mo̦o̦ren mour ko an armej.

“ANIJ IN AENÕM̦M̦AN ENAAJ PÃD IPPEMI”

18. Ta eo jej aikuj keememej kõn eo me ej Wũnjãn aenõm̦m̦an eo me jej aikuji?

¹⁸ Kwõn lõke bwe meñe ilo naaj iien ko me rej make wõt eppen, ak jemaroñ lo wõt aenõm̦m̦an. Ilo iien rot kein, jej aikuj keememej bwe aenõm̦m̦an eo me jej aikuji ej aenõm̦m̦an eo jãn Anij, aet, aenõm̦m̦an eo me Jeova wõt emaroñ letoke. Kwõn atartar wõt ioon ñe kwõj jelm̦ae an lukkuun ajeeded juon nañinmej, an wal̦o̦k juon jorrããn el̦ap, ak ñe rej jum̦ae im kaeñtaan eok. Pãd epaake wõt doulul eo An. Im reim̦aanl̦o̦k ñan ilju im jekl̦aj eo eaiboojoj me ej pãdwõt im̦aam̦. Ilo am̦ ãindein, “Anij in aenõm̦m̦an enaaj pãd [ippam̦].” (Pil. 4:9, WGM) Ilo katak eo tok juon, jenaaj etale wãween jemaroñ jipañ rũttõmak ro m̦õttad me rej jelm̦ae eñtaan bwe ren maroñ lo aenõm̦m̦an eo jãn Anij.