Jipañ Ro Jet ñan Kijenmej Ium̦win Iien ko Reppen

1. Ewi wãween an Jeova uwaaki jar ko an ri-karejar ro an?

KWAAR ke jel̦ã bwe Jeova emaroñ kõjerbal eok ñan uwaake jar in akwel̦ap eo an bar juon armej? Kwõmaroñ jipañ meñe kwõj juon em̦m̦aan ej lale eklejia, juon rijjipañ ilo eklejia eo, juon bainier, ak juon ri-kwal̦o̦k naan. Kwõmaroñ bar jipañ meñe kwõj juon eo edik ak erũtto, ak kwõj juon em̦m̦aan ak kõrã. Ñe juon eo me ej yokwe Jeova ej kũr ñane kõn jipañ, ekkã an Anij eo ad kõjerbal em̦m̦aan ro rej lale eklejia im ri-karejar ro jet retiljek bwe ren ro ‘rekanooj l̦ap aer kaenõm̦m̦an’ armej in. (Kol. 4:11) Ej juon jeraam̦m̦an ñan jerbal ñan Jeova im ro jeid im jatid ilo wãween in! Jemaroñ kõm̦m̦ane men in ñe ewõr juon nañinmej me em̦õkaj an ajeeded, jorrããn ko rel̦l̦ap, ak ñe ro jet rej jum̦ae im kaeñtaan er.

JIPAÑ RO JET ÑE EWÕR JUON NAÑINMEJ ME EM̦ÕKAJ AN AJEEDED

2. Etke emaroñ pen ñan jipañ ro jet ñe ewõr juon nañinmej me em̦õkaj an ajeeded?

² Ñe ewõr juon nañinmej me em̦õkaj an ajeeded, men in emaroñ kõm̦m̦an bwe en pen ad jipañ doon. Ñan waanjoñak, jemaroñ kõn̦aan lol̦o̦k ro m̦õttad, ak emaroñ kauwõtata ñan kõm̦m̦ane men in. Jemaroñ kõn̦aan kũrtok ro ewõr aer apañ kõn jããn bwe ren m̦õñã ippãd, ijoke jejjab bar maroñ kõm̦m̦ane men in. Jemaroñ kõn̦aan jipañ ro jet ak men in emaroñ pen kõnke ro nukũd rej bar iioon apañ. Meñe ãindein, ak jekõn̦aan jipañ wõt ro jeid im jatid, im ebuñbũruon Jeova ñe jej kõm̦m̦ani men ko jemaroñe ñan jipañ er. (JK. 3:27; 19:17) Ta ko jemaroñ kõm̦m̦ani?

3. Ta eo jej katak jãn joñak eo an em̦m̦aan ro rej lale eklejia eo an Desi? (Jeremaia 23:4)

³ Men ko em̦m̦aan ro rej lale eklejia remaroñ kõm̦m̦ani. El̦aññe kwõj juon em̦m̦aan ej lale eklejia, kal̦apl̦o̦k am̦ jel̦ã kajjien jiip ro. (Riit Jeremaia 23:4.) Desi, juon jeid im jatid kõrã me kar kõnono kake ilo katak eo l̦o̦k juon, ej ba, “Em̦m̦aan ro rej lale eklejia me rej pãd ilo kumi in kwal̦o̦k naan eo aõ, rekõn kobatok ippa im ro jet ilo kwal̦o̦k naan im ilo iien iiãio ko.”b An kar em̦m̦aan rein kõm̦m̦ane men in, ear kõm̦m̦an bwe en pidodo aer jipañ Desi ke ear wal̦o̦k COVID-19 im ear jako jet iaan ro nukũn kõn nañinmej in.

4. Etke em̦m̦aan ro rej lale eklejia rar maroñ jipañ Desi, im ta eo jej katak?

⁴ Desi ej kõmel̦el̦e im ba: “Kõnke em̦õj aõ kadede watõke em̦m̦aan ro rej lale eklejia ãinwõt ro m̦õtta, ekar pidodo aõ kwal̦o̦k ñan er wãween aõ eñjake im ta ko iar inepata kaki.” Ta eo em̦m̦aan ro rej lale eklejia remaroñ katak jãn men in? Jabõte ro rej pãd ium̦win kõjparok eo am̦ m̦okta jãn an wal̦o̦k wãween ko reppen. Kwõn juon jeran ñan er. El̦aññe juon nañinmej me em̦õkaj an ajeeded ej bõbraiki eok jãn am̦ lol̦o̦k er, kwõn kajjioñ tõpar er ilo wãween ko jet. Desi ej ba: “Jet iien ekar lõñl̦o̦k jãn juon em̦m̦aan ej lale eklejia me ear call tok ak jejetok ilo juon wõt raan. Meñe el̦ap aõ kar jel̦ã kõn eoon ko rar kwal̦o̦ki, ak rar lukkuun tõpar bũruõ.”

5. Ewi wãween an em̦m̦aan ro rej lale eklejia maroñ jel̦ã ta ko ro jeier im jatier rej aikuji, im ewi wãween aer maroñ jipañ rein?

⁵ Juon wãween kwõmaroñ jel̦ã ta eo ro jeim̦ im jatũm̦ rej aikuji ej ikijjeen am̦ bwebwenato ippãer im kajjioñ kwal̦o̦k kajjitõk ko me reban kajooke er. (JK. 20:5) Ebwe ke kijeer m̦õñã, uno, im aikuj ko jet? Renaaj ke luuji jerbal eo aer ak m̦weo im̦weer? Rej aikuj ke jipañ ñan kanne peba ko bwe ren maroñ bõk jipañ jãn kien? Desi ear bõk kein jipañ ko jãn ro jein im jatin. Bõtab men eo me el̦aptata an kar jipañe ñan kijenmej ium̦win wãween ko reppen ear iiooni, ej an kar em̦m̦aan ro rej lale eklejia kwal̦o̦k yokwe ñane im kõkajoore ikijjeen aer kõjerbale eoon ko jãn Baibõl̦. Ej ba: “Em̦m̦aan rein rar jar ippa. Meñe ijjab lukkuun keememej ta ko rar ba, ak ij keememej wãween aõ kar eñjake. Ekar juon wãween Jeova ear ba ñan ña, ‘Kwõjjab make iaam̦.’”—Ais. 41:10, 13.

6. Ta ko elõñ iaan ro ilo eklejia eo remaroñ kõm̦m̦ane ñan jipañ ro jet? (Lale pija eo.)

⁶ Men ko ro jet remaroñ kõm̦m̦ani. Jej kõtmãne bwe em̦m̦aan ro rej lale eklejia ren lale im kõjparok ro jeid im jatid ilo eklejia eo. Ijoke, Jeova ej kũr kõj aolep ñan kõkajoor im jipañ ro jet. (Gal. 6:10) Meñe jemaroñ kõm̦m̦ane juon men edik ñan jipañe juon eo enañinmej, ak men in emaroñ lukkuun kõketak armej eo. Ñan waanjoñak, juon ajri emaroñ jilkinl̦o̦k juon kaat ak juon jiña ñan kõkajoore juon em̦m̦aan jeid im jatid. Juon likao ak jiroñ emaroñ kaikujkuj ak jipañe juon jeid im jatid kõrã kõn juon an aikuj. Ro jet ilo eklejia eo remaroñ kõmat kijen juon eo enañinmej im bõkl̦o̦ke m̦õñã eo ñan m̦weo im̦õn. Ejjel̦o̦k pere bwe ñe ewõr juon nañinmej me em̦õkaj an ajeeded, aolep ro ilo eklejia eo rej aikuj bõk kõketak. Kõn men in, bõlen emaroñ tol̦o̦k ad pãd ãlikin iien kweilo̦k ko bwe jen maroñ bwebwenato ippãn ro jeid im jatid, meñe ilo im̦õn kweilo̦k eo ak ilo online. Im em̦m̦aan ro rej lale eklejia rej bar aikuj bõk kõketak. Ewõr jet ro jeid im jatid em̦õj aer jejel̦o̦k ñan em̦m̦aan ro im kwal̦o̦k aer kam̦m̦oolol. Ekkã an em̦m̦aan rein l̦apl̦o̦k aer poub ñe ewõr juon nañinmej me em̦õkaj an ajeeded. Ej juon men elukkuun em̦m̦an ñe jej kõm̦m̦ane ijo kun̦aad ñan “wõnm̦aanl̦o̦k wõt im kõkajoor doon im kõketak doon”!—1 Tes. 5:11.

JIPAÑ RO JET ÑE REJ JELM̦AE JUON JORRÃÃN EL̦AP

7. Ta wãween ko reppen juon emaroñ jelm̦aiki ãlikin an wal̦o̦k juon jorrããn el̦ap?

⁷ Ñe ej wal̦o̦k juon jorrããn el̦ap, men in emaroñ lukkuun ukote mour eo an juon armej ilo jidimkij. Jet armej remaroñ luuji men ko m̦weieer, m̦õko im̦weer, ak ro rejitõnbõro ippãer. Wãween kein rekabũrom̦õjm̦õj rej bar jelõt rũttõmak ro jeid im jatid. Ta eo jemaroñ kõm̦m̦ane ñan jipañ?

8. Ta ko em̦m̦aan ro rej lale eklejia im bõran baam̦le ko remaroñ kõm̦m̦ani m̦okta jãn an wal̦o̦k juon jorrããn el̦ap?

⁸ Men ko em̦m̦aan ro rej lale eklejia remaroñ kõm̦m̦ani. Em̦m̦aan ro rej lale eklejia, jipañ ro jeim̦ im jatũm̦ ñan kõppojakl̦o̦k im̦aan m̦okta jãn an wal̦o̦k jorrããn ko rel̦l̦ap. Lukkuun lale bwe aolep ro ilo eklejia eo rejel̦ã ta buñtõn ne ko rej aikuj kõm̦m̦ani bwe ren jab jorrããn im ñan tõpare em̦m̦aan ro rej lale eklejia. Margaret, eo kar kwal̦o̦k kake ilo katak eo l̦o̦k, ej ba: “Em̦m̦aan ro rej lale eklejia rar kõm̦m̦ane juon katak kõn aikuj an eklejia, im rar kakkõl kõj bwe ejjañin jem̦l̦o̦k an wõr kijeek ilo bul̦õn wõjke ko. Rar ba bwe ñe ro ilo kien renaaj kõm̦m̦an kõjjel̦ã bwe jen etal jãn m̦õko im̦õd ak ñe el̦ap an kauwõtata ijo jej pãd ie, innem jen m̦õkaj im etal jãn ijo jikid.” Naanin tõl in ear itok ilo juon iien ejejjet kõnke l̦alem wiik tokãlik, ear wal̦o̦k juon kijeek elukkuun kauwõtata. Ilo iien kabuñ an baam̦le, bõran baam̦le ko remaroñ kõnono kõn ta ko ro kajjojo uwaan baam̦le eo renaaj kõm̦m̦ane. El̦aññe kwe im ajri ro nejũm̦ kom̦ij pojak, innem kom̦ naaj maroñ ineem̦m̦an wõt ñe ewal̦o̦k juon jorrããn el̦ap.

9. Ewi wãween an em̦m̦aan ro rej lale eklejia maroñ jerbal ippãn doon m̦okta im ãlikin an wal̦o̦k juon jorrããn el̦ap?

⁹ El̦aññe kwõj bõk eddon juon kumi in kwal̦o̦k naan, jab kõttar an wal̦o̦k juon jorrããn el̦ap ñan am̦ lale el̦aññe ejim̦we atõrej, email, im talboon nõm̦ba ko aer. Kõm̦m̦an juon laajrakin mel̦el̦e kein im jãn iien ñan iien etale ñe kwõj aikuj kõkããli. Innem ñe ewal̦o̦k juon jorrããn el̦ap, kwõnaaj maroñ tõpare kajjojo iaan ri-kwal̦o̦k ro im lale ta ko rej aikuji. M̦õkaj im lel̦o̦k mel̦el̦e kein ñan eo ej loloodjake jerbal ko an em̦m̦aan ro rej lale eklejia, im enaaj kõnnaanek em̦m̦aan eo ej lol̦o̦k eklejia. Ñe em̦m̦aan rein jeid im jatid rej jerbal ippãn doon, innem renaaj maroñ jipañ ilo wãween eo em̦m̦antata. Ãlikin an jem̦l̦o̦k kijeek eo, em̦m̦aan eo me ej lol̦o̦k eklejia eo an Margaret ear jab kiki ium̦win 36 awa kõnke ear jipañe em̦m̦aan ro rej lale eklejia ke rar kajjioñ tõpar im lale aikuj ko an enañin 450 iaan ro jeid im jatid me rar aikuj etal jãn m̦õko im̦weer. (2 Kor. 11:27) Tokjãn men in, ear maroñ wõr jikin aolep ro me rar aikuj jikin jokwe.

10. Etke em̦m̦aan ro rej lale eklejia rej watõk bwe eaorõk ñan lale im kõjparok ro jeier im jatier? (Jon 21:15)

¹⁰ Juon iaan jerbal ko an em̦m̦aan ro rej lale eklejia ej ñan lel̦o̦k ñan ro jeid im jatid naanin kõketak ko jãn Baibõl̦ im ñan jipañ ro el̦ap aer inepata im bũrom̦õj. (1 Pit. 5:2) Ilo iien eo ej wal̦o̦k juon jorrããn el̦ap, em̦m̦aan rein rej aikuj m̦okta lale el̦aññe kajjojo iaan ro jeid im jatid rejjab pãd ilo uwõta im ñe ewõr kijeer m̦õñã, aer nuknuk, im jikin jokwe. Bõtab ilo naaj allõñ ko tokãlik, rein jeid im jatid remaroñ naaj aikuj wõt bõk kõketak jãn Baibõl̦ eo im bõk kõkajoor kõn aer inepata im bũrom̦õj. (Riit Jon 21:15.) Harold, juon iaan em̦m̦aan ro rej lale juon iaan ra ko ad im em̦õj an iioon elõñ iaan ro jeid im jatid me rar jelm̦ae jorrããn ko rel̦l̦ap, ej ba: “Ebõk iien bwe en bar em̦m̦an aer mour. Emaroñ jino dikl̦o̦k aer bũrom̦õj kõn men ko rar luuji, bõtab remaroñ wõnm̦aanl̦o̦k wõt im emmel̦o̦ketok ro rejitõnbõro ippãer me em̦õj aer jako, juon menin jolõt rar kaorõke, ak wãween ko rekauwõtata rar iiooni. Aer ememejtok men kein emaroñ kõm̦m̦an bwe ren bar jino bũrom̦õj im inepata. Men in ejjab mel̦el̦ein bwe edik aer tõmak, ak ej baj jet eñjake me ekkã an kõj armej bũki ñe jej iioon wãween rot kein.”

11. Ta ko baam̦le ko remaroñ naaj wõnm̦aanl̦o̦k wõt im aikuji?

¹¹ Em̦m̦aan ro rej lale eklejia rej bõk ñan bũrueer naanin rõjañ eo ñan “jañ ippãn ro rej jañ.” (Rom 12:15) Ro jeid im jatid me rar iioon jorrããn ko rel̦l̦ap remaroñ aikuj bõk kaenõm̦m̦an ilo aer bõk kakeememej bwe Jeova ekoba rũttõmak ro jeier im jatier rej yokwe wõt er. Em̦m̦aan ro rej lale eklejia renaaj jipañ baam̦le ko ñan wõnm̦aanl̦o̦k wõt ilo aer kõm̦m̦ani men ko renaaj kõkajoor wõt jem̦jerã eo aer ippãn Jeova, ãinwõt jar, katak, pãd ilo iien kweilo̦k ko, im bõk kun̦aaer ilo jerbalin kwal̦o̦k naan. Remaroñ bareinwõt rõjañ ro jemãn im jinen baam̦le ko ñan jipañ ajri ro nejier ñan l̦õmn̦ak wõt kõn men ko me jorrããn ko rel̦l̦ap reban ko̦kkuri. Ro jemãn im jinen, kakeememej ajri ro nejũm̦ bwe aolep iien Jeova enaaj eo M̦õttaer im bwe aolep iien enaaj jipañ er. Bareinwõt, kõmel̦el̦e ñan er bwe ewõr juon aer baam̦le in ro jeid im jatid ipel̦aakin lal̦ in me aolep iien repojak in jipañ er.​—1 Pit. 2:17.

12. Ta ko ro jet remaroñ kõm̦m̦ani ñan jipañ ilo jikin ko me ear wal̦o̦k jorrããn ko rel̦l̦ap ie? (Lale pija eo.)

¹² Men ko ro jet remaroñ kõm̦m̦ani. El̦aññe ear wal̦o̦k juon jorrããn el̦ap iturin ijo kwõj jokwe ie, kajjitõk ippãn em̦m̦aan ro rej lale eklejia kõn wãween am̦ maroñ jipañ. Bõlen kwõmaroñ kõpel̦l̦o̦k m̦weo im̦õm̦ bwe ro me rar aikuj etal jãn m̦õko im̦weer ak ro rej jipañ ilo jorrããn eo el̦ap, ren jokwe ie ium̦win jidik wõt iien. Kwõmaroñ bõkl̦o̦k m̦õñã im m̦weiuk ko ñan ri-kwal̦o̦k ro rej pãd ilo aikuj. El̦aññe ear wal̦o̦k juon jorrããn el̦ap ilo juon jikin ettol̦o̦k jãn kwe, ej wõr wõt am̦ maroñ ñan jipañ. Ewi wãween? Ikijjeen am̦ jar kõn ro me jorrããn eo el̦ap ear jelõt er. (2 Kor. 1:8-11) Kwõmaroñ bareinwõt jabawõt ñan jipañ jerbal ko an doulul in ipel̦aakin lal̦ in. (2 Kor. 8:2-5) El̦aññe ewõr am̦ maroñ ñan etal im jipañ ilo ijo me ear wal̦o̦k jorrããn eo el̦ap ie, kajjitõk ippãn em̦m̦aan ro rej lale eklejia kõn ta ko kwõmaroñ kõm̦m̦ani ñan jipañ. El̦aññe kar kũr eok bwe kwõn etal im jipañ, innem kwõmaroñ nãj bõk jet kamminene ko bwe kwõn maroñ jipañ ilo wãween eo em̦m̦antata.

JIPAÑ RO JEID IM JATID ÑAN KIJENMEJ ÑE RO JET REJ JUM̦AE IM KAEÑTAAN ER

13. Ta wãween ko reppen ro jeid im jatid rej jelm̦aiki ilo jikin ko em̦õj kõmo̦ jerbal eo ad ie?

¹³ Ilo jikin ko me em̦õj kõmo̦ jerbal eo ad ie, ewõr ro rej jum̦ae im kaeñtaan ro jeid im jatid im men in ej kõm̦m̦an bwe en penl̦o̦k mour ñan er. Ro jeid im jatid ilo jikin kein rej iioon wõt apañ kõn jããn, nañinmej, ekoba aer luuji ro rejitõnbõro ippãer ilo mej. Ijoke, kõnke em̦õj kõmo̦ jerbal eo ad ilo jikin kein, emaroñ ejjel̦o̦k an em̦m̦aan ro rej lale eklejia maroñ ñan etal im lol̦o̦k rein ak ñan kõnono ippãn ro rej aikuj bõk kõketak ilo jabdewõt iien rekõn̦aan. Men in ear wal̦o̦k ñan Andrei, eo me kar kwal̦o̦k kake ilo katak eo l̦o̦k juon. Juon iaan kõrã ro jeid im jatid ilo kumi in kwal̦o̦k naan eo an ear iioon apañ kõn jããn. Tokãlik, ear pãd ilo juon ãkjitõn ikijjeen wa. Ear aikuj m̦wijm̦wij jejjo alen im ear jab maroñ jerbal. Meñe kien eo ear kõmo̦ jerbal eo ad ilo ijo rej pãd ie im ear wal̦o̦k COVID-19, ak ro jeid im jatid rar kõm̦m̦ane ijo remaroñe ñan jipañ, im Jeova ear loe men kein rar wal̦o̦k. 

14. Ewi wãween an em̦m̦aan ro rej lale eklejia maroñ likũt juon joñak em̦m̦an ilo aer atartar ioon Jeova?

¹⁴ Men ko em̦m̦aan ro rej lale eklejia remaroñ kõm̦m̦ani. Andrei ear jar im kõm̦m̦ani men ko emaroñi. Ewi wãween an kar Jeova em̦m̦akũt? Ear kõm̦akũt jet iaan ro ilo eklejia eo me el̦apl̦o̦k aer maroñ ñan jipañ. Jet rar bõkl̦o̦k kõrã eo jeid im jatid ñan jikin taktõ ko. Ro jet rar lel̦o̦k jããn in jipañ. Jeova ear kõm̦akũt rein ñan kõm̦m̦ani men ko remaroñi, im ear kõjeraam̦m̦an aer peran im bõrokuk ilo aer kate er ñan jipañ kõrã in jeid im jatid. (Hib. 13:16) Em̦m̦aan ro rej lale eklejia, ñe emo̦ jerbal eo ad, kajjitõk jipañ ippãn ro jet. (Jrm. 36:5, 6) Men eo el̦aptata, atartar ioon Jeova kõnke emaroñ jipañ eok ñan kajejjet aikuj ko an ro jeid im jatid.

15. Ewi wãween ad maroñ dãpij wõt ad bõrokuk meñe ro jet rej jum̦ae im kaeñtaan kõj?

¹⁵ Men ko ro jet remaroñ kõm̦m̦ani. Ñe emo̦ jerbal eo ad ilo jikin eo jej jokwe ie, jemaroñ aikuj kweilo̦k ippãn ro jeid im jatid ilo jet kumi ko reddik. Kõn men in, el̦apl̦o̦k an aorõk bwe en wõr aenõm̦m̦an ikõtaad im ro jeid im jatid. Tarin̦aeik Setan, im jab tarin̦aeik doon. Jab kalimjek likjab ko an ro jeim̦ im jatũm̦, ak kate eok ñan kõm̦adm̦õd apañ ko ilo m̦õkaj. (JK. 19:11; Eps. 4:26) Pojak in jipañ doon. (Tai. 3:14) Ke ro jet rar jipañ kõrã eo jeid im jatid me ear pãd ilo aikuj, men in ear jelõt aolep ro ilo kumi in kwal̦o̦k naan eo an ilo juon wãween em̦m̦an. Ear l̦apl̦o̦k aer epaake doon ãinwõt juon baam̦le.​—Sam 133:1.

16. Ekkejell̦o̦k ippãn Kolosse 4:3, 18, ewi wãween jemaroñ jipañ ro jeid im jatid me kien ko rej jum̦ae im kaeñtaan er?

¹⁶ Elukkuun lõñ to̦ujin Kũrjin ro jeid im jatid me rej karejar ñan Jeova meñe kien ko rej kõmo̦ jet iaan m̦akũtkũt ko ad. Jet iaaer em̦õj kalbuuji er kõn tõmak eo aer. Jemaroñ jar kõn er im baam̦le ko aer. Im jemaroñ bar jar kõn ro me meñe rejel̦ã kien emaroñ kalbuuji er ak rej jipañ rein jeid im jatid kõn aikuj ko aer ilo l̦oor jetõb, ilo kanniõk, im ikijjeen aer jojomare er ilo im̦õn ekajet ko.c (Riit Kolosse 4:3, 18.) Jab pere ewi joñan an jar ko am̦ maroñ jipañ rein jeid im jatid!—2 Tes. 3:1, 2; 1 Tim. 2:1, 2.

17. Ewi wãween am̦ maroñ kõppojakl̦o̦k im̦aan kiiõ ñan an ro jet naaj jum̦ae im kaeñtaan kõj?

¹⁷ Kwe im baam̦le eo am̦ kom̦ maroñ kõppojakl̦o̦k im̦aan kiiõ ñan an ro jet naaj jum̦ae im kaeñtaan kõj. (Jrb. 14:22) Kate eok ñan jab pijaikl̦o̦k aolep men ko renana remaroñ wal̦o̦k. Ijello̦kun am̦ ãindein, kõkajoore jem̦jerã eo am̦ ippãn Jeova im jipañ ajri ro nejũm̦ ñan bar kõm̦m̦ane men in. Ñe ewõr iien ko kwõj inepata, lutõkl̦o̦k bũruom̦ ñan Anij. (Sam 62:7, 8) Ãinwõt juon baam̦le, kõnono kõn aolep un ko kom̦ maroñ lõke E.d Ãinwõt an jipañ ajri ro nejũm̦ ñe kwõj kõppojakl̦o̦k im̦aan ñan juon jorrããn el̦ap, enaaj bareinwõt jipañ er el̦aññe kwõnaaj kõpooj er ñan an ro jet naaj jum̦ae im kaeñtaan kõj. Renaaj peran im ineem̦m̦an wõt kõnke kwaar katakin er ñan lõke Jeova.

18. Ta eo jej reim̦aanl̦o̦k ñane ilo ilju im jekl̦aj?

¹⁸ Aenõm̦m̦an eo jãn Anij ej kõm̦m̦an ad jokwane. (Pil. 4:6, 7) Ikijjeen men in, Jeova ej kaenõm̦m̦an bũruod meñe ewõr men ko renana rej jelõt kõj ilo raan kein, ãinwõt nañinmej ko, jorrããn ko rel̦l̦ap, im an ro jet jum̦ae im kaeñtaan kõj. Ej kõjerbal em̦m̦aan ro rej lale eklejia me el̦ap aer kate er ñan lale im kõjparok kõj. Im ej letok ñan kõj aolep jeraam̦m̦an eo ñan jipañ doon. Aenõm̦m̦an eo ewõr ippãd kiiõ ej kõpooj kõj ñan ad naaj jelm̦ae apañ ko rel̦l̦apl̦o̦k me rej pãd im̦aan, ekoba ‘eñtaan eo el̦ap.’ (Matu 24:21) Ilo naaj iien in, jenaaj aikuj dãpij wõt ad aenõm̦m̦an im jipañ ro jet ñan bar kõm̦m̦ane men in. Bõtab ãlikin eñtaan eo el̦ap, jeban iioon apañ ko rel̦l̦ap me rekõm̦m̦an ad inepata. Enaaj kiiõ wõr ippãd juon men me Jeova ear baj kõn̦aan bwe en wõr ippãd—m̦oolin aenõm̦m̦an me enaaj pãd ñan indeeo.​—Ais. 26:3, 4, UBS.