Kwo Bojak Ke ñan Jelmae juõn Jorrãn Elap?
1. Etke ej menin meletlet ñan kebojak lok iman kin jorrãn ko relap?
1 Kajjojo yiõ, million armij ro ibelakin lal, ekoba elõñ ian lõmaro im limaro jeid im jatid, rej iion ak jorrãn jen makitkit lal, tsunami (no ko relap) ko, wõt ko relap, lañ ko relap, tornado (aire) ko, im ibwijleplep ko. Kinke jorrãn ko relap rej walok ilo jidimkij im remaroñ jelet kij aolep, ej menin meletlet ñan kebojak lok iman.—Ken. 21:5.
2. Etke jej aikwij lelok address im number in telephone ko ad rekãl ñan elder ro?
2 Moktalok: Jet ien ri utiej ro an kien remaroñ letok kakkõl kin jorrãn ko rej bojak in walok. Elap an aorõk ñan ad lukkun bokake nan in kakkõl kein. (Ken. 22:3) Ilo ien rot kein elder ro renaj kajeoñ in kebak aolep ro uan congregation eo ñan jibañ ir ñan air kebojak kin men in aikwij ko. Elikin juõn jorrãn, elder ro renaj bareinwõt kajeoñ in kebak aolep ro me rej kobatok ibben congregation eo ñan lale elañe jorrãn eo ear jelet ir im ñan lale aikwij ko air. Ien kein raorõk emaroñ ejelok tokjeir elañe ejelok address im number in telephone ko rekãl im jimwe ñan an elder ro telephone lok ak etal im konono ibben rein kajjojo. Kin men in, elap an aorõk bwe ri kwalok ro ren lelok ñan secretary eo im eo ej bõk eddon book study eo address im number in telephone ko air rekãl.
3. Ewi wãwen ad maroñ bokake ak jerbal ibben elder ro ñe jej jokwe ilo juõn jikin ejorrãn?
3 Elañe congregation eo ej bed ilo juõn jikin ejorrãn, elder ro remaroñ kajitõk ibben ri kwalok ro ñan air lelok etan im number in telephone eo an juõn ian ro nukin ak jeran me ejjab jokwe ilo jikin eo me rej aikwij kebak e ñe enaj walok juõn jorrãn ilo jidimkij. Men in enaj kõmman bwe en bidodo an elder ro lo ak bukõt ro rar ko jen jikin eo ejorrãn. Elder ro remaroñ bareinwõt aikwij in kõmmane juõn karõk kin ta ko congregation eo enaj kõmmani ñe enaj walok juõn jorrãn ilo jidimkij. Men kein rekoba juõn lajrak edik kin men ko ej aikwij wõr ibben armij ro kajjojo, karõk kin ia eo renaj ko ñane, im karõk ko ñan jibañ ro me elaplok air aikwij jibañ. Bokake aolep karõk kein elap an aorõk.—Hib. 13:17.
4. Ta eo jej aikwij kõmmane elañe juõn jorrãn ewalok ilo jikin eo jej jokwe ie?
4 Elikin Juõn Jorrãn: Ta eo kwon kõmmane elañe juõn jorrãn ewalok ilo jikin eo kwoj jokwe ie? Kwoj aikwij lale im kabwe aikwij ko an family eo am. Elañe kwomaroñ, jibañ ro jet me jorrãn eo ear jelet ir. Kajeoñ in kebak eo ej bõk eddon book study eo am ak bar juõn elder ilo ien eo emõkaj tata. Kwoj aikwij kõmmane men in meñe kwojjab jorrãn ak jab aikwij jibañ. Elañe kwoj aikwij jibañ, kwon liki wõt bwe ro jeõm im jatõm rej kate ir joñan wõt air maroñ ñan jibañ yuk. (1 Kor. 13:4, 7) Kememej bwe Jehovah ejelã kin wãwen eo ibbam; atartar ion ñan an jibañ yuk. (Sam. 37:39; 62:8) Kwon bojak wõt ñan ien ko kwomaroñ lelok jibañ ko ilo jitõb im eñjake ñan ro jet. (2 Kor. 1:3, 4) Bar jino manit ko am kin men ko lor jitõb ilo ien eo emõkaj tata.—Mat. 6:33.
5. Ewi wãwen an kamijak eo kin jorrãn ko relap jelet kij Ri Christian ro?
5 Ke kamijak eo kin jorrãn ko rej kõmman bwe armij ro ilo lal in ren inebata, jemaroñ reimanlok ñan ilju im jeklaj kin liki. Mõttan jidik aolep jorrãn ko relap renaj men ko an ien ko remotlok. (Rev. 21:4) Ilo kõtan ien in, jemaroñ ilo kõmmanwa bõk buñten nee ko ñan bojak kin ien jorrãn ko rebin ke jej debij wõt kijejeto eo ad ilo ad kwalok kin news eo emõn ñan ro jet.