2 | “Naanin Kaenõm̦m̦an ko jãn Jeje Ko”

BAIBÕL̦ EO EJ BA: “Aolep men ko kar jei m̦oktal̦o̦k kar jei ñan katakin kõj, kõnke en maroñ wõr ad kõjatdikdik ikijjeen ad kijenmej im ikijjeen naanin kaenõm̦m̦an ko jãn Jeje ko.”—ROM 15:4.

Mel̦el̦ein Men In

Baibõl̦ eo ej kõkajoore kõj kõn naanin kaenõm̦m̦an ko me remaroñ jipañ kõj ñe jej bõk l̦õmn̦ak ko rekabbweerer. Naan ko ilo Baibõl̦ rej bar letok kõjatdikdik bwe m̦õttan jidik jeban bar metak ak bũrom̦õj.

Wãween an Men in Maroñ Jipañ

Kõj aolep ewõr iien ko el̦ap ad inepata; bõtab ro me ewõr aer nañinmejin bũrom̦õj (depression) ak nañinmejin inepata (anxiety) remaroñ eñtaan kõn eñjake ko rekõmmetak aolep raan. Ewi wãween an Baibõl̦ eo maroñ jipañ?

Baibõl̦ eo ej letok elõñ kain naan ko rekõketak me remaroñ bõk jikin l̦õmn̦ak ko rekabbweerer. (Pilippai 4:8) Emaroñ koobrak l̦õmn̦ak ko ad kõn naan ko rekaenõm̦m̦an me remaroñ jipañ kõj ñan anjo̦ ioon eñjake ko ad rekõmmetak im rekabbweerer.—Sam 94:18, 19.
Baibõl̦ eo emaroñ jipañ kõj ñan anjo̦ ioon l̦õmn̦ak eo bwe ejjel̦o̦k tokjãd.—Luk 12:6, 7.
Elukkuun lõñ bwebwenato ko ilo Baibõl̦ rej kaalikkar ñan kõj bwe jejjab make iaad im bwe Anij, ri-Kõm̦anm̦an eo ad, el̦ap an mel̦el̦e kõn eñjake ko ad.—Sam 34:18; 1 Jon 3:19, 20.
Baibõl̦ eo ej kallim̦ur bwe Anij enaaj kõm̦m̦an bwe jen jab bar keememeji wãween kein rekabũrom̦õjm̦õj im rekõmmetak. (Aiseia 65:17; Revelesõn 21:4) Ñe ewõr ippãd l̦õmn̦ak ko im eñjake ko rekabbweerer ak rekõmmetak, jemaroñ lo bwe kallim̦ur in ej kõkajoore kõj bwe jen maroñ wõnm̦aanl̦o̦k wõt.

Wãween an Baibõl̦ eo Jipañ Jessica

Wãween an Nañinmejin Bũrom̦õj Jelõt Eõ

“Ke ear 25 aõ iiõ, ekar l̦ap aõ inepata kõn elõñ men innem ear lukkuun jelõt kõl̦mãnl̦o̦kjen̦ e aõ (nervous breakdown), im tokãlik iar bõk nañinmejin bũrom̦õj (depression). Ekkã aõ kar eñtaan kõn aõ ememejtok ilo jidimkij men ko rekõmmetak me rar wal̦o̦k m̦oktal̦o̦k ilo mour e aõ. Taktõ ro rar jipañ eõ ñan mel̦el̦e bwe nañinmej e aõ ear itok jãn l̦õmn̦ak ko rekabbweerer me ikõn bũki itok wõt jãn wãween ko rekabũrom̦õjm̦õj rar wal̦o̦k ilo mour e aõ. Kobal̦o̦k ippãn uno ko iar aikuj in bũki, iar aikuj kõnono ippãn juon taktõ ñan jipañ eõ kile l̦õmn̦ak ko rekabbweerer ikõn bũki im kajim̦we l̦õmn̦ak kein.”

Wãween an Baibõl̦ Jipañ Eõ

“Ilo iien ko el̦aptata an kar nañinmej in jelõt eõ, ekkã an kar wõr iien ko iar lukkuun wiwijet im joñan ejelõt aõ menono (panic attack), elukkuun l̦ap aõ kar inepata, im iar jaje kiki. Ilo boñ ekkã aõ eddodo kõn an obrak kõmãlij eo aõ kõn l̦õmn̦ak ko rekabbweerer. Ãinwõt an Sam 94:19 kõmel̦el̦e, Anij emaroñ kaenõm̦m̦an im kõmeraikl̦o̦k bũruod ñe jej eddodo kõn inepata ko ad. Kõn men in, iar likũti Baibõl̦ eo im juon aõ bok me iar jeiki aolep eoon ko rekaenõm̦m̦an ie iturin peet eo aõ. Ñe ijaje kiki, ekkã aõ riiti jet eoon ko bwe in kõtl̦o̦k bwe l̦õmn̦ak ko an Anij ren kaenõm̦m̦an eõ.

“Baibõl̦ eo ej rõjañ kõj ñan julo̦k l̦õmn̦ak ko me rejjab errã ippãn men ko jejel̦ã kõn Anij. Ilo m̦okta, iar lukkuun tõmak bwe ejjel̦o̦k tokja im bwe ejjel̦o̦k en̦ emaroñ yokwe eõ. Bõtab iar katak bwe l̦õmn̦ak rot kein rejjab errã ippãn Baibõl̦ eo kõnke ej kwal̦o̦k bwe Anij ej juon Jemãn el̦ap an yokwe, etũriam̦okake, im ej kea kõn kõj kajjojo. Jidik kõn jidik iar jino anjo̦ ioon l̦õmn̦ak ko aõ ijello̦kun aõ kõtl̦o̦k bwe l̦õmn̦ak kein ren anjo̦ ioõ. Iar katak ñan watõk eõ ãinwõt an Anij watõk eõ. Buñtõn ne in eaorõk ear jipañ eõ ñan jidik kõn jidik julo̦k l̦õmn̦ak ko renana kõn ña make.”

“Ij reim̦aanl̦o̦k ñan iien eo me men ko rekõmmetak im rekabũrom̦õjm̦õj jej keememeji, ekoba l̦õmn̦ak ko rekabbweerer renaaj aolep jako. Ilo aõ jel̦ã bwe aolep nañinmej ko ilo kõl̦mãnl̦o̦kjen̦ renaaj jako, men in ej kõkajoore eõ bwe in kijenmej wõt kõn nañinmej in aõ kiiõ. Ej bar letok juon aõ kõjatdikdik em̦m̦an kõn ilju im jekl̦aj ñe enaaj jako aõ eñtaan kõn nañinmejin bũrom̦õj.”