3 | Bõk Tokjãn jãn Waanjoñak ko ilo Baibõl̦

BAIBÕL̦ EO EJ KWAL̦O̦K KÕN . . . Em̦m̦aan im kõrã ro retiljek me ‘eñjake ko aer rar ãinwõt eñjake ko ad.’—JEMES 5:17.

Mel̦el̦ein Men In

Baibõl̦ eo eobrak kõn m̦oolin bwebwenato ko an em̦m̦aan im kõrã ro me rar bõk elõñ kain eñjake ko reoktak jãn doon. Ilo ad riiti bwebwenato ko aer, jemaroñ lo juon eo me jej bar bõk ejja eñjake eo wõt an.

Wãween an Men in Maroñ Jipañ

Kõj aolep jej aikuj bwe ro jet ren jel̦ã im mel̦el̦e kõn eñjake ko ad. Ak el̦aptata an m̦ool men in ñe ej wõr ad nañinmej ilo kõl̦mãnl̦o̦kjen̦ ko ad. Ñe jej riiti m̦oolin bwebwenato ko an armej ro ilo Baibõl̦, jemaroñ bar mel̦el̦e kõn ejja l̦õmn̦ak im eñjake ko aer wõt. Kõn men in, jejjab make iaad ñe jej kõm̦adm̦õd inepata ko ad im eñjake ko me reko̦kkure kõl̦mãnl̦o̦kjen̦ ko ad, kõnke jejel̦ã bwe em̦õj an kar ro jet metak im eñtaan ãinwõt kõj.

Baibõl̦ eo ej kwal̦o̦k elõñ naan ko an ro me rar eñjake bwe rejjab maroñ bõk jipañ im rej l̦õmn̦ak bwe rejjab maroñ kõm̦adm̦õdi apañ ko aer. Kwõnañin ke kar bõk eñjake in im ba, ‘Ijjab maroñ wõnm̦aanl̦o̦k wõt im mour ilo wãween in’? Eokwe kar bar ãindein eñjake eo an Moses, Ilaija im Devid.—Bõnbõn 11:14; 1 Kiiñ 19:4; Sam 55:4.
Baibõl̦ eo ej kwal̦o̦k kõn juon kõrã etan Hanna me ear “kanooj in inepata” kõnke ejjab maroñ wõr nejin ajri im kõnke lio juon pãleen l̦eo ippãn ear kajjirere kake im kakũtõtõiki.—1 Samuel 1:6, 10, UBS.
Baibõl̦ eo ej bar kwal̦o̦k kõn juon em̦m̦aan etan Job me jemaroñ bar bõk ejja eñjake eo wõt an. Meñe ear juon em̦m̦aan el̦ap tõmak eo an, ak ekar eñtaan kõn an lukkuun l̦ap an inepata im juon iien ear ba: “Ij dike aõ mour; Ijjab kõn̦aan mour.”—Job 7:16.

Ilo ad katak kõn wãween an armej rein ilo Baibõl̦ kar lo tõprak ilo aer kar kõm̦adm̦õdi l̦õmn̦ak ko rejjab jim̦we, kõj bareinwõt jemaroñ bar bõk kõkajoor eo jej aikuji bwe jen maroñ kijenmej ium̦win inepata ko ad.

Wãween an Baibõl̦ eo Jipañ Kevin

Wãween an Bipolar Disorder Jelõt Eõ

“Ke ekar epaak an lemñoul aõ iiõ iar bõk nañinmejin bipolar disorder. Ewõr jet iien ko me ij bõk eñjake eo bwe imaroñ kijenmej ium̦win jabdewõt apañ ko ilo mour e aõ. Ak ilo iien ko jet, ij bõk eñjake eo bwe ejjel̦o̦k tokjãn aõ mour.”

Wãween an Baibõl̦ Jipañ Eõ

“Juon armej ilo Baibõl̦ me imaroñ bar bõk ejja eñjake eo wõt an ej rijjilõk Piter. Ekar kõm̦m̦ani likjab ko me rar kõm̦m̦an bwe en l̦õmn̦ak bwe ejjel̦o̦k tokjãn. Ak ijello̦kun an kar bõk wõt kain l̦õmn̦ak rot kein, Piter ekar bõk jipañ ikijjeen an kar aetõl ro m̦õttan me rar kea kõn e. Ñe ej nana aõ mour juon raan kõn nañinmejin bipolar disorder e aõ, likjab ko aõ make remaroñ kaddouk eõ im kõm̦m̦an bwe in bõk eñjake eo bwe ejjel̦o̦k tokja. Ak ãinwõt Piter, em̦õj aõ katak ñan kajjioñ in pãd epaake wõt ro m̦õtta, ro me rej kõn̦aan jipañ eõ bwe in maroñ wõnm̦aanl̦o̦k wõt ilo mour e aõ.

“Bar juon armej ilo Baibõl̦ me joñak eo an ekaenõm̦m̦an ñan ña ej Kiiñ Devid. Ekkã an inepata kõn men ko ear iiooni im kõn bõd ko ekar kõm̦m̦ani m̦okta. Imaroñ bar bõk ejja eñjake kein an wõt kõnke jet iien ij ba im kõm̦m̦ani men ko me ij ajl̦o̦k kaki tokãlik. Ij loe bwe naan ko an Devid ilo Sam 51 rekaenõm̦m̦an ñan ña. Ilo eoon 3 (UBS) Devid ekar ba: ‘Ij kile bõd ko aõ, im ij ememej jerawiwi ko aõ iien otemjej.’ Men in ej lukkuun kwal̦o̦k kõn wãween aõ eñjake ilo iien ko ij lukkuun inepata, kõnke emaroñ pen ñan aõ bõk l̦õmn̦ak ko rejim̦we kõn ña make. Ak ibar mel̦el̦e kõn naan ko an Devid ilo eoon 10 me ej ba: ‘Kwõn kõm̦anm̦an bũruõ erreo ilo ña, O Anij, im kõkããl l̦õmn̦ak ko aõ bwe ren jim̦we.’ Ij bar kwal̦o̦k ejja kain kajjitõk rot kein wõt ñan Anij bwe en jipañ eõ ñan bõk l̦õmn̦ak ko rejim̦we kõn ña make. Innem ãliktata, eoon 17 ej bar kaenõm̦m̦an eõ. Ej ba: ‘Bõro erup im ettã O Anij, Kwõjjãmin kõjekdo̦o̦n.’ Eoon in ej kõkajoor eõ bwe Anij ej yokwe eõ.

“Ilo aõ l̦õmn̦ak wõt kõn waanjoñak ko ilo Baibõl̦ im men ko me Jeova ej litok ñan ña kiiõ, ij kõkajoor kõjatdikdik eo aõ kõn ilju im jekl̦aj. Kallim̦ur ko ilo Baibõl̦ relukkuun m̦ool ñan ña im rej lukkuun jipañ eõ bwe in jab ebbweer ak in wõnm̦aanl̦o̦k wõt ilo mour e aõ.”