Wãween Ad Maroñ Anjo̦ Ioon Kõn̦aan ko Renana

1. Ta eo kõj aolep jej tarin̦aeiki?

ENAÑIN ke kar wõr am̦ juon kõn̦aan ekajoor ñan kõm̦m̦ane juon men Jeova ejjab buñbũruon kake? El̦aññe aet, jab l̦õmn̦ak bwe kwõj iioon juon apañ me el̦apl̦o̦k jãn ro jet. Baibõl̦ ej ba: “Menin kapo ko kom̦ij iiooni rej bar wal̦o̦k ñan aolep armej.” (1 Kor. 10:13) Men in ej mel̦el̦ein bwe jabdewõt kõn̦aan ko renana kwõj tarin̦aeiki, ro jet rej bareinwõt iioone wãween in. Kwõjjab make iaam̦, im kõn jipañ eo an Jeova, kwõmaroñ anjo̦ ioon tarin̦ae in.

2. Kain rot menin kapo ko jet Kũrjin im rũkkatak Baibõl̦ ro remaroñ tarin̦aeiki? (Bar lale pija ko.)

² Baibõl̦ eo ej bar ba: “Kajjojo armej ej iioon mãlejjoñ ko itok wõt jãn an kõn̦aan ko an make kaale im kapoe.” (Jem. 1:14) Eoon in ej jipañ kõj ñan mel̦el̦e bwe elõñ kain menin kapo ko reoktak jãn doon me armej ro remaroñ po ie. Ñan waanjoñak, jet Kũrjin remaroñ po im kõn̦aan kõm̦m̦ani m̦anit ko rettoon ikõtaan juon em̦m̦aan im juon kõrã. Ak ro jet, remaroñ kõn̦aan kõm̦m̦ani m̦anit kein ikõtaan em̦m̦aan ñan em̦m̦aan ak kõrã ñan kõrã. Bareinwõt, ro me em̦õj aer bõjrak jãn aer alwõj pijain keelwaan ko, remaroñ lukkuun kõn̦aan bar alwõji pija kein. Im ro me em̦õj aer bõjrak jãn aer kõjerbale uno ko rekkajjoor ak arkool̦, remaroñ bareinwõt iioon ejja wãween in wõt. Erkein jet iaan kõn̦aan ko jet Kũrjin im rũkkatak Baibõl̦ rej tarin̦aeiki. Ejjel̦o̦k pere bwe emaroñ kar wõr juon iien kõj aolep jaar bõk ejja eñjake eo an rijjilõk Paul me ear ba: “El̦aññe ikõn̦aan kõm̦m̦ane men eo ejim̦we, eitok wõt bwe in kõm̦m̦ane men eo enana.”—Rom 7:21.

3. Ñe eokkutkut an juon armej tarin̦aeik juon kõn̦aan enana, ewi wãween an men in maroñ jelõte?

³ El̦aññe eokkutkut am̦ tarin̦aeik juon kõn̦aan enana, kwõmaroñ l̦õmn̦ak bwe ejjel̦o̦k am̦ maroñ ak kajoor ñan kõm̦m̦ane men eo ejim̦we. Kwõmaroñ bareinwõt lukkuun ebbweer im l̦õmn̦ak bwe Jeova eban buñbũruon ippam̦ kõnke ewõr am̦ juon kõn̦aan ejekkar. Bõtab, kwõmaroñ bõk kaenõm̦m̦an bwe l̦õmn̦ak kein rejjab m̦ool! Ñan kõmel̦el̦eik etke, katak in enaaj uwaake ruo kajjitõk ko: (1) Wõn eo ekõn̦aan bwe kwõn bõk l̦õmn̦ak kein ak eñjake kein? (2) Ewi wãween am̦ maroñ anjo̦ ioon kõn̦aan ko renana?

L̦ÕMN̦AK IM EÑJAKE EO “RI-NANA EO” EKÕN̦AAN BWE JEN BÕKE

4. (1) Etke Setan ekõn̦aan bwe jen l̦õmn̦ak bwe ejjel̦o̦k ad maroñ ak kajoor ñan tarin̦aeik kõn̦aan ko renana? (2) Etke jemaroñ lukkuun tõmak bwe jemaroñ tarin̦aeik kõn̦aan ko renana?

⁴ Setan ekõn̦aan bwe jen tõmak bwe ejjel̦o̦k ad kajoor ak maroñ ñan jum̦aik juon kõn̦aan enana. Jesus ear kaalikkar bwe Setan enaaj kajjioñ in kapoik kõj ke ear katakin ri-kal̦oor ro an ñan jar: “Jipañ kõm bwe kõmin jab po ilo menin kapo ko im lo̦mo̦o̦ren kõm jãn ri-nana eo.” (Matu 6:13) Setan ej ba bwe armej ro reban pokake Jeova ñe rej iioon menin kapo ko ñan kõm̦m̦ani men ko renana. (Job 2:​4, 5) L̦õmn̦ak kõn joñan an kõjak men in. Kar Setan eo m̦oktata me ear po kõn kõn̦aan ko an renana, im ear jab kõn̦aan dãpij an tiljek ñan Jeova. Setan ej tõmak bwe jej ãinwõt e im enaaj m̦õkaj ad jab pokake Jeova el̦aññe jej iioon menin kapo ko. Joñan, ear l̦õmn̦ak bwe emaroñ bar kapoik eo Nejin Anij me eweeppãn ñan kõm̦m̦ani men ko renana! (Matu 4:​8, 9) Ak m̦ool ke bwe ejjel̦o̦k ad maroñ ak kajoor ñan tarin̦aeik kõn̦aan ko renana? Jaab ñan jidik! Jej errã ippãn rijjilõk Paul, me ear je: “Unin ej kõnke imaroñ in kõm̦m̦an men otemjej ikijjeen eo ej letok kajoor ñan ña.”—Pil. 4:13.

5. Etke jejel̦ã bwe Jeova ej lukkuun lõke bwe jemaroñ anjo̦ ioon kõn̦aan ko renana?

⁵ Ijoke, Jeova elukkuun oktak jãn Setan, ej lukkuun lõke bwe jemaroñ jum̦ae kõn̦aan ko renana. Etke jejel̦ã men in? Kõnke Jeova ear kanaan bwe juon jar el̦ap me rej dãpij wõt aer tiljek ñane, renaaj el̦l̦ã im mour jãn eñtaan eo el̦ap. L̦õmn̦ak kõn mel̦el̦ein men in. Jeova, eo ejjab maroñ riab, ej ba bwe juon kumi el̦ap—ejjab jejjo wõt armej—renaaj del̦o̦ñ ilo lal̦ eo ekããl ilo aer erreo im̦aan mejãn Anij, im em̦õj aer “kwal̦i nuknuk ko aer im kõmouji kõn bõtõktõkin L̦aam̦ eo.” (Rev. 7:​9, 13, 14) Alikkar bwe Jeova ejel̦ã bwe ewõr ad kajoor im maroñ ñan tarin̦aeik kõn̦aan ko renana.

6-7. Etke Setan ekõn̦aan bwe jen ebbweer ilo ad tarin̦aeik kõn̦aan ko renana?

⁶ Setan ej bareinwõt kõn̦aan bwe jen tõmak bwe kõnke ewõr ippãd kõn̦aan ko renana, men in ej mel̦el̦ein bwe Jeova eban buñbũruon ippãd im eban kõtl̦o̦k ad mour ñan indeeo. Bõtab, bar l̦õmn̦ak kõn an kõjak men in. Setan ej eo Jeova eban buñbũruon ippãn, eban mour ñan indeeo, im naaj lukkuun ko̦kkure. (Jen. 3:15; Rev. 20:10) Ejjel̦o̦k pere bwe Setan ej lukkuun illu kõnke ewõr ad kõjatdikdik ñan mour ñan indeeo. Juon jeraam̦m̦an eban wal̦o̦k ñane. Kõn men in, ej lukkuun kate ñan kõm̦m̦an bwe jen l̦õmn̦ak bwe jej ãinwõt e im ejjel̦o̦k ad kõjatdikdik ñan ilju im jekl̦aj. Ijoke, jejjab ãinwõt e ñan jidik. Ilo m̦ool, Baibõl̦ eo ej kaenõm̦m̦an kõj bwe Jeova ekõn̦aan jipañ kõj im jab kõjekdo̦o̦n kõj. “Ejjab kõn̦aan bwe jabdewõt en jako, ak ekõn̦aan bwe aolep ren ukel̦o̦k.”—2 Pit. 3:9.

⁷ Ilo m̦ool, el̦aññe jej ebbweer im tõmak bwe ejjel̦o̦k ad kajoor ak maroñ ñan anjo̦ ioon kõn̦aan ko ad renana, jej bõk l̦õmn̦ak eo Setan ekõn̦aan bwe jen bõke. Ad kile men in enaaj lukkuun jipañ kõj ñan jutak pen n̦ae Setan.—1 Pit. 5:​8, 9.

WÃWEEN AD MAROÑ EÑJAKE KÕN AD JERAWIWI IM JAB WEEPPÃN

8. Ijello̦kun ad kõm̦m̦ane men ko renana, jerawiwi ej bar kitibuj ta? (Sam 51:5) (Bar lale “Mel̦el̦ein Naan Ko.”)

⁸ Ijello̦kun Setan, ewõr bar juon men me emaroñ kõm̦m̦an bwe jen ebbweer im l̦õmn̦ak bwe ejjel̦o̦k ad kajoor im maroñ ñan tarin̦aeik kõn̦aan ko renana. Ta in? Ad jerawiwi im jab weeppãn, juon men jaar jolõte jãn ro jined im jemãd jinointata.a—Job 14:4; riit Sam 51:5.

9-10. (1) Ewi wãween an kar jerawiwi jelõte Adam im Iv? (Bar lale pija eo.) (2) Ewi wãween an jerawiwi jelõt kõj?

⁹ L̦õmn̦ak kõn wãween an kar jerawiwi jelõte Adam im Iv. Ãlikin aerro jab pokake Jeova, erro ar kũttiliek erro make im kajjioñ in kalbubuuk ãnbwinnierro. Kõn men in, bok eo etan Insight on the Scriptures ej ba: “Jerawiwi ear kõm̦m̦an bwe en nana aer mour, inepata, jab jokwane im aenõm̦m̦an, im jook.” Ear ãinwõt ñe Adam im Iv rar kalbuuj ilowaan juon em̦ me ewõr ruum̦ kein emãn wõt ie. Adam im Iv rar maroñ em̦m̦akũt jãn juon ruum̦ ñan bar juon, bõtab rar jab maroñ diwõj jãn m̦weo. Rar jab maroñ ko jãn aer jerawiwi.

¹⁰ Em̦ool bwe jejjab pãd ilo ejja wãween eo wõt Adam im Iv rar pãd ie. Katok in pinmuur eo me ejjab jerbal ñan rippãlele ro m̦oktata, emaroñ karreoik kõj jãn jerawiwi im letok juon bõklõkõt erreo. (1 Kor. 6:11) Meñe ãindein, ak jaar jolõt wõt jerawiwi im jab weeppãn. Kõn men in, jejjab bwilõñ bwe kõj bareinwõt jej bar nana ad mour, inepata, jab jokwane im aenõm̦m̦an, im jook. Ilo m̦ool, Baibõl̦ eo ej ba bwe jerawiwi ej wõnm̦aanl̦o̦k wõt im lukkuun jelõte armej. Im em̦õj an men in wal̦o̦k ekoba ñan “ro [rejjab] jerawiwi ilo ejja wãween eo wõt Adam ear jerawiwi.” (Rom 5:14) Bõtab, jejjab aikuj l̦õmn̦ak bwe kõnke jaar l̦otaktok kõn jerawiwi, jeban maroñ kõm̦m̦ane men eo ejim̦we ak bwe eban wõr ad kõjatdikdik ñan ilju im jekl̦aj. Jemaroñ jum̦aik l̦õmn̦ak kein rekabbweerer. Ewi wãween?

11. Ñe jej eñjake bwe ejjel̦o̦k ad kajoor im maroñ, ewi wãween ad aikuj em̦m̦akũt im etke? (Rom 6:12)

¹¹ Ñe jej l̦õmn̦ak bwe ejjel̦o̦k ad kajoor im maroñ, im bwe jejjab maroñ anjo̦ ioon kõn̦aan ko ad renana, jemaroñ watõke ãinwõt ñe ad jab weeppãn im jerawiwi ej “kõnnaan tok,” ak jejjab aikuj roñjake. Etke? Kõnke Baibõl̦ eo ej katakin kõj bwe jejjab aikuj kõtl̦o̦k an jerawiwi wõnm̦aanl̦o̦k wõt im “irooj [iood] ãinwõt juon kiiñ.” (Riit Rom 6:12.) Men in ej mel̦el̦ein bwe jemaroñ kããlõt ñan jab em̦m̦akũt kõn kõn̦aan ko ad renana. (Gal. 5:16) Jeova ej lõke bwe jemaroñ jum̦ae menin kapo ko. Ñe en kar jab, eban kar ba bwe jen kõm̦m̦ane men in. (Dut. 30:​11-14; Rom 6:6; 1 Tes. 4:3) Alikkar ewõr ad kajoor im maroñ ñan jum̦aik kõn̦aan ko renana.

12. Ewi wãween ad aikuj em̦m̦akũt ñe jej eñjake ad ebbweer, im etke?

¹² Ejja ãindeinl̦o̦k wõt, ñe jej eñjake ad ebbweer im l̦õmn̦ak bwe Jeova enaaj kõjekdo̦o̦n kõj kõnke ewõr ippãd kõn̦aan ko renana, jemaroñ watõke ãinwõt ñe ad jerawiwi im jab weeppãn ej “kõnnaan tok.” Bõtab, jejjab aikuj roñjake. Etke? Kõnke Baibõl̦ eo ej katakin bwe Jeova emel̦el̦e kõn ad jerawiwi im jab weeppãn. (Sam 103:​13, 14) “Ejel̦ã men otemjej” kõn kõj, ekoba wãween an jerawiwi jelõt kõj kajjojo. (1 Jon 3:​19, 20) Jemaroñ erreo im̦aan mejãn Jeova toon wõt ad jab po ilo kõn̦aan ko ad renana im kõm̦m̦ani. Etke jemaroñ tõmak men in?

13-14. El̦aññe ewõr ippãd kõn̦aan ko renana, men in ej ke mel̦el̦ein bwe jejjab maroñ kabuñbũruon Jeova? Jouj im kõmel̦el̦e.

¹³ Baibõl̦ ej kwal̦o̦k bwe ewõr juon oktak el̦ap ikõtaan an wõr an juon armej kõn̦aan enana, im an juon armej kõm̦m̦ane juon kõn̦aan enana. Ejjab aolep iien jemaroñ kabõjrak kõj jãn an wõr ippãd juon kõn̦aan enana, bõtab jemaroñ kabõjrak kõj jãn ad kõm̦m̦ane juon kõn̦aan enana. Ñan waanjoñak, jet iaan Kũrjin ro ilo tõre ko an rijjilõk ro ilo Korint, rar kõm̦m̦ani m̦anit ko an em̦m̦aan ñan em̦m̦aan im kõrã ñan kõrã. Paul ear je: “Kar ãindein jet iaami.” Men in ear ke mel̦el̦ein bwe ear jab bar wõr ippãn rein kõn̦aan ko ñan kõm̦m̦ani m̦anit kein? Emaroñ jab, kõnke ekkã an lukkuun pen ñan jol̦o̦k kõn̦aan kein. Bõtab, Kũrjin ro me rar kwal̦o̦k aer jel̦ã irooj ioer make im rar jab kõm̦m̦ani kõn̦aan ko aer renana, rar kabuñbũruon Jeova. Ear watõk er bwe “em̦õj karreoik” er. (1 Kor. 6:​9-11) Men in emaroñ bar m̦ool kõn kwe.

¹⁴ Jekdo̦o̦n kain rot kõn̦aan ko renana kwõj tarin̦aeiki, kwõmaroñ lo tõprak im anjo̦ ioer. Meñe kwõjjab maroñ lukkuun jol̦o̦k kõn̦aan kein, ak kwõmaroñ irooj ioom̦ make im kõjparok jãn am̦ “katõprak kõn̦aan ko an kanniõk im l̦õmn̦ak ko [am̦].” (Eps. 2:3) Ewi wãween am̦ maroñ kõm̦m̦ane men in im anjo̦ ioon kõn̦aan ko renana?

WÃWEEN AM̦ MAROÑ ANJO̦

15. El̦aññe jekõn̦aan anjo̦ ioon kõn̦aan ko ad renana, etke jej aikuj kwal̦o̦k m̦ool ñan kõj make?

¹⁵ Ñan anjo̦ ioon kõn̦aan ko am̦ renana, kwõnaaj aikuj kwal̦o̦k m̦ool ñan kwe make kõn m̦õjn̦o̦ ko am̦. Lukkuun kõjparok bwe kwõn jab m̦on̦e eok make kõn “l̦õmn̦ak ko rebõd.” (Jem. 1:22) Ñan waanjoñak, juon eo me ewõr an m̦õjn̦o̦ kõn arkool̦, emaroñ m̦on̦e e make im l̦õmn̦ak bwe m̦õjn̦o̦ in ejjab lukkuun nana kõnke el̦apl̦o̦k an ro jet idaak jãn e. Ak juon eo me ewõr an m̦õjn̦o̦ kõn an alwõj pijain keelwaan ko emaroñ kajjioñ n̦aruon ro jet im ba: “Iban kar kõn̦aan alwõj pija kein el̦aññe en kar l̦apl̦o̦k an lio pãleõ kwal̦o̦k yokwe ñan ña.” El̦aññe kwõj jino l̦õmn̦ak ilo wãween in, enaaj kõm̦m̦an bwe en pidodol̦o̦k am̦ po kõn menin kapo ko. Innem kajjioñ in jab jojomare kwe make kõn juon men enana, ekoba ilo l̦õmn̦ak eo am̦. Kwõj aikuj bõk eddon kõm̦m̦an ko am̦.—Gal. 6:7.

16. Ewi wãween am̦ maroñ lukkuun kate eok im jek ippam̦ make ñan kõm̦m̦ane men eo ejim̦we?

¹⁶ Kobal̦o̦k ippãn am̦ kwal̦o̦k m̦ool ñan kwe make kõn m̦õjn̦o̦ ko am̦, kwõnaaj aikuj lukkuun kate eok im jek ippam̦ make ñan anjo̦ ioer. (1 Kor. 9:​26, 27; 1 Tes. 4:4; 1 Pit. 1:​15, 16) L̦õmn̦ak kõn menin kapo eo epentata ñan kwe im ñããt eo ej wal̦o̦k. Emaroñ juon kain menin kapo, ak emaroñ wal̦o̦k ilo iien ko epidodol̦o̦k ñan am̦ po. Ñan waanjoñak, epidodol̦o̦k ke am̦ po ñe kwõm̦õk ak ñe elukkuun boñ? Kõn men in, kõpooj l̦o̦k kwe make im pepe kõn wãween am̦ nãj kõjparok kwe make ñe ewal̦o̦k menin kapo in. Iien eo em̦m̦antata ñan kõm̦m̦ane men in ej m̦okta jãn an menin kapo eo wal̦o̦k.—JK. 22:3.

17. Ta eo jemaroñ katak jãn joñak eo an Josep? (Jenesis 39:​7-9) (Bar lale pija ko.)

¹⁷ L̦õmn̦ak kõn wãween an kar Josep em̦m̦akũt ke lio ippãn Potipar ear kajjioñ in kapoiki. Ear m̦õkaj im kajju ba jaab ñane. (Riit Jenesis 39:​7-9.) Ta eo jemaroñ katak jãn men in? Em̦õj an Josep jek ippãn make ñan kõm̦m̦ane men eo ejim̦we m̦okta jãn an kar lio ippãn Potipar kajjioñ in kapoiki. Ilo ejja wãween in wõt, kwõmaroñ lukkuun kate eok im jek ippam̦ make ñan kõm̦m̦ane men eo ejim̦we m̦okta jãn an juon menin kapo wal̦o̦k. Ilo wãween in, ñe kwõj iioon juon menin kapo, enaaj pidodol̦o̦k am̦ kõm̦m̦ane men eo ejim̦we kõnke em̦õj am̦ pepe kadede kõn ta eo kwõnaaj kõm̦m̦ane.

EKKEINI AM̦ ETALE EOK MAKE

18. Ewi wãween am̦ maroñ anjo̦ ioon kõn̦aan ko renana? (2 Korint 13:5)

¹⁸ Ñan anjo̦ ioon kõn̦aan ko am̦ renana, kwõnaaj aikuj “wõnm̦aanl̦o̦k wõt im lale” eok make. Mel̦el̦ein bwe kwõnaaj aikuj ekkeini am̦ etale eok make ñan lale wãween am̦ pãd. (Riit 2 Korint 13:5.) Jãn iien ñan iien, bar etale l̦õmn̦ak im kõm̦m̦an ko am̦ im kõm̦m̦an oktak ko ñe emenin aikuj. Ñan waanjoñak, meñe kwaar lo tõprak ilo am̦ jum̦ae menin kapo eo, kwõmaroñ kajjitõk ippam̦ make: ‘Ear ke m̦õkaj aõ ba jaab?’ El̦aññe kwaar jab kajju ba jaab, en jab l̦e jãn joñan am̦ illu ippam̦ make. Ijoke, l̦õmn̦ak kõn ta eo kwõmaroñ kõm̦m̦ane bwe en em̦m̦anl̦o̦k am̦ kõjparok eok ñe ebar wal̦o̦k menin kapo eo. Kajjitõk ippam̦ make kajjitõk kein: ‘Ñe ewal̦o̦k juon kõn̦aan enana, emaroñ ke m̦õkajl̦o̦k aõ jol̦o̦ke jãn l̦õmn̦ak eo aõ? Kein kam̦õn̦õn̦õ ko ij kããlõti, rej ke kõm̦m̦an bwe en penl̦o̦k aõ jum̦ae menin kapo ko? Em̦õkaj ke aõ kajeer meja jãn pija ko rettoon? Ij ke mel̦el̦e bwe aolep iien kien ko an Jeova rem̦m̦antata meñe ej mel̦el̦ein bwe ij aikuj in jel̦ã irooj ioõ make?’—Sam 101:3.

19. Ewi wãween pepe ko rejjab mãlõtlõt im reddik remaroñ kõm̦m̦an bwe en penl̦o̦k ad tarin̦aeik kõn̦aan ko renana?

¹⁹ Kwõj aikuj kõjparok jãn am̦ kõm̦m̦an jekpen kõn kõm̦m̦an ko renana. Baibõl̦ ej ba: “Bõro ejel̦ã m̦on̦ jãn men otemjej, im ewõr an nañinmej reban kõmoure.” (Jrm. 17:9) Jesus ear ba bwe bõro ej kõm̦m̦an “l̦õmn̦ak ko renana.” (Matu 15:19) Ñan waanjoñak, juon armej me em̦õj an bõjrak jãn an alwõj pijain keelwaan ko, ãlikin jet iien emaroñ l̦õmn̦ak bwe ejjab kauwõtata ñan lale pija ko me remaroñ kairuj kõn̦aan ko renana kõnke rejjab kwal̦o̦k kõn armej ro rekeelwaan. Ak emaroñ l̦õmn̦ak im ba, ‘Ejjel̦o̦k jorrããn ilo aõ l̦õmn̦ak kõn men ko renana toon wõt aõ jab kõm̦m̦ani.’ El̦aññe juon armej ej bõk l̦õmn̦ak rot in, ej ãinwõt ñe bũruon me ejel̦ã m̦on̦ ej kajjioñ “katõprak kõn̦aan ko an kanniõk.” (Rom 13:14) Ewi wãween am̦ maroñ kõjparok eok jãn am̦ kõm̦m̦ane men in? Lukkuun kõjparok eok jãn am̦ kõm̦m̦ani pepe ko reddik me rejjab mãlõtlõt im renaaj tõll̦o̦k eok ñan kõm̦m̦ani pepe ko rel̦l̦apl̦o̦k me rejjab mãlõtlõt, ãinwõt am̦ kõm̦m̦ani men ko renana.b Bareinwõt, jum̦ae jabdewõt “l̦õmn̦ak ko renana” me remaroñ kõm̦m̦an am̦ jekpen ñan kõm̦m̦ani men ko renana.

20. Ta eo jej reim̦aanl̦o̦k ñane ilju im jekl̦aj, im jipañ ta eo jemaroñ bõk kiiõ?

²⁰ Ãinwõt ad kar katak, ikijjeen jipañ eo an Jeova, ewõr ad kajoor im maroñ ñan jum̦ae menin kapo ko. Bareinwõt, ikijjeen katok in pinmuur eo an Jesus, Anij emaroñ jeorl̦o̦k jerawiwi ko ad im ewõr ad kõjatdikdik ñan mour indeeo ilo lal̦ eo ekããl. Jenaaj lukkuun m̦õn̦õn̦õ ñe jemaroñ karejar ñan Jeova im jab aikuj tarin̦aeik kõn̦aan ko renana! Bõtab m̦ae tõre in, jemaroñ lukkuun tõmak bwe ewõr ad kajoor im maroñ ñan tarin̦aeik kõn̦aan ko renana im jejjab aikuj ebbweer. Kõn kõjeraam̦m̦an ko jãn Jeova kõn ad kate kõj, jemaroñ bõk anjo̦!