Wãween Am̦ Maroñ Kakõm̦anm̦anl̦ok Jar ko Am̦

1-2. (1) Ta eo emaroñ kõm̦m̦an bwe en pen ad kwal̦o̦k bũruod ñan Jeova? (2) Etke jejel̦ã bwe Jeova ej lukkuun roñjake jar ko ad?

EWÕR ke iien kwõj kile bwe ñe kwõj jar, kwõj ãliji ejja naan ko wõt, rejjab itok jãn bũruom̦, ak kwõj kõm̦m̦ane ãinwõt juon imminene? El̦aññe aet, eokwe kwõjjab make iaam̦. Kõn an l̦ap wõt ad poub, jet iien jej ekkaiuriur ñe jej jar. Ak jemaroñ lo bwe epen ad kwal̦o̦k bũruod ñan Jeova kõnke jej l̦õmn̦ak bwe ejjel̦o̦k tokjãd ak ejjab tõllo̦kid ñan kepaake.

² Baibõl̦ ej kaalikkar ñan kõj bwe men eo eaorõk ippãn Jeova, ejjab bwe jar ko ad ren wãjepdik, ak ej bwe jen kwal̦o̦k ettã bõro im jar jãn bũruod. Ej “roñjake jar ko an ro rettã” bũrueer. (Sam 10:​17, UBS) Ej lukkuun roñjake aolep naan ko jej ba kõnke el̦ap an kea kõn kõj.—Sam 139:​1-3.

3. Ta kajjitõk ko jenaaj etali ilo katak in?

³ Innem jemaroñ kajjitõk ippãd make: Etke jejjab aikuj jenliklik in kwal̦o̦k bũruod ñan Jeova ñe jej jar ñane? Ta ko jemaroñ kõm̦m̦ani bwe jar ko ad ren itok jãn bũruod? Ñe jej kõl̦mãnl̦o̦kjen̦ kõn jar ko an ri-karejar ro an Jeova ilo Baibõl̦, ewi wãween an men in maroñ jipañ kõj ñan kakõm̦anm̦anl̦o̦k wãween ad jar? Im ta ko jemaroñ kõm̦m̦ani ñe el̦ap ad inepata im jejjab maroñ kõmel̦el̦e eñjake ko ad ñan Jeova ñe jej jar ñane? Jen etale uwaak ko ñan kajjitõk kein.

JAB JENLIKLIK IN JAR ÑAN JEOVA

4. Ta eo emaroñ jipañ kõj bwe jen jab jenliklik in jar ñan Jeova? (Sam 119:145)

⁴ Ñe jemel̦el̦e bwe Jeova ej juon m̦õttad etiljek me ekõn̦aan bwe jen lo m̦õn̦õn̦õ, jeban jenliklik in jar ñane. Ri-jeje eo an Sam 119 ear kate bwe en watõk Jeova ilo wãween in. Elõñ apañ ko ear iiooni ilo mour eo an. Ñan waanjoñak, ro renana rar riab n̦ae e. (Sam 119:​23, 69, 78) Bareinwõt, ewõr iien ko ear ebbweer kõn bõd ko ear kõm̦m̦ani. (Sam 119:​5, UBS) Meñe ãindein, ak ear jab jenliklik in kwal̦o̦k bũruon ñan Jeova.—Riit Sam 119:145.

5. Etke jejjab aikuj kõtl̦o̦k bwe eñjake ko ad rekabbweerer ren kõm̦m̦an ad jenliklik in jar? Kwal̦o̦k juon waanjoñak.

⁵ Jeova ekõn̦aan bwe ro rar kõm̦m̦ani jerawiwi ko rel̦l̦ap ren jar ñane. (Ais. 55:​6, 7) Kõn men in, jen jab kõtl̦o̦k bwe eñjake ko ad rekabbweerer ren kõm̦m̦an ad jenliklik in jar. Ñan waanjoñak, juon bail̦at me ej kattõre juon bal̦uun ejel̦ã bwe emaroñ kajjitõk jipañ ippãn armej ro ilo jikin eo rej jipañ bail̦at ko ilo bal̦uun ko rej ekkãke. Ej aikuj ke jenliklik in kajjitõk jipañ kõn an jook kõnke ejebwãbwe ak ear kõm̦m̦ane juon bõd? Alikkar jaab! Ejja ãindeinl̦o̦k wõt, meñe ewõr iien ko jej jebwãbwe ak jaar kõm̦m̦an jerawiwi, jejjab aikuj jenliklik in jar ñan Jeova.—Sam 119:​25, 176.

MEN KO KWÕMAROÑ KÕM̦M̦ANI BWE KWÕN JAR JÃN BŨRUOM̦

6-7. Ñe jej kõl̦mãnl̦o̦kjen̦ kõn kadkad ko an Jeova, ewi wãween an men in maroñ jipañ kõj ñan jar jãn bũruod? Kwal̦o̦k juon waanjoñak. (Bar lale footnote eo.)

⁶ Ñe jej lukkuun kwal̦o̦k ñan Jeova ta ko jej l̦õmn̦ak kaki im kõn eñjake ko ad, men in enaaj jipañ bwe jen maroñ jar jãn bũruod. Kõn men in, ta ko jemaroñ kõm̦m̦ani bwe jen maroñ kakõm̦anm̦anl̦o̦k wãween ad jar jãn bũruod?

⁷ Kõl̦mãnl̦o̦kjen̦ kõn kadkad ko an Jeova.a Ñe el̦apl̦o̦k ad kõl̦mãnl̦o̦kjen̦ kõn kadkad ko an Jeova, enaaj pidodol̦o̦k ad kwal̦o̦k l̦õmn̦ak ko ad ñane. (Sam 145:​8, 9, 18) L̦õmn̦ak kõn joñak eo an juon jeid im jatid kõrã etan Kristine, eo me jemãn ear juon eo elãj. Ej ba: “Aõ kõnono ñan Jeova ãinwõt juon Jemãn, ear jab pidodo ñan ña. Iar l̦õmn̦ak bwe elukkuun l̦ap aõ likjab im men in enaaj kõm̦m̦an bwe Jeova en kõjoole eõ.” Ta eo ear jipañe? Ej ba: “El̦ap aõ kar kõl̦mãnl̦o̦kjen̦ kõn yokwe eo an Jeova im an tiljek, im men in ear jipañ eõ ñan tõmak bwe Jeova ej yokwe ña. Ijel̦ã bwe eban kõtl̦o̦k peiũ. Meñe inaaj tũbbo̦k, ak ilo yokwe, enaaj kotake eõ. Men in ej jipañ eõ ñan kwal̦o̦k ñan Jeova men ko ij lañlõñ kaki ekoba men ko rej kabũrom̦õj eõ.”

8-9. Etke em̦m̦an ñan l̦õmn̦ak kõn ta ko kwõnaaj ba m̦okta jãn am̦ jar? Kwal̦o̦k juon waanjoñak.

⁸ L̦õmn̦ak kõn ta ko kwõnaaj ba. M̦okta jãn am̦ jar, kwõmaroñ kajjitõk ippam̦ make jet kajjitõk ko. Ãinwõt: ‘Ta apañ ko ij iiooni kiiõ? Ewõr ke en̦ ij aikuj jol̦o̦k an bõd? Ij ke jelm̦ae juon apañ ekããl me ij aikuji jipañ eo an Jeova ñan anjo̦ ioon?’ (2 Kñ. 19:​15-19) Jemaroñ bareinwõt anõke jenkwan neen Jesus ilo ad kõl̦mãnl̦o̦kjen̦ kõn men ko jemaroñ kajjitõk ippãn Jeova ilo jar ikijjeen ãt eo Etan, Aelõñ eo An, im Ankilaan.—Matu 6:​9, 10.

⁹ Ke kar ba ñan juon jeid im jatid kõrã etan Aliska bwe eban to an l̦eo ippãn mour kõn an bõk nañinmejin kããnjer ilo kõmãlij eo an, ear lukkuun pen an Aliska jar. Ej ba: “Joñan aõ kar lukkuun bũrom̦õj, ear pen aõ kõl̦mãnl̦o̦kjen̦ im iar jaje ta eo in ba ilo jar.” Ta eo ear jipañe tok ñan kiiõ? Ej ba: “Ij jol̦o̦k jidik iien m̦okta jãn aõ jar im l̦õmn̦ak kõn ta ko inaaj jar kaki. Men in ej jipañ eõ ñan kõjparok bwe en jab l̦ap wõt aõ kõnono kõn ña make. Ilo aõ ãindein, ej jipañ ña ñan lo aenõm̦m̦an im bwe en em̦m̦an kõl̦mãnl̦o̦kjen̦ e aõ ñe ij jar.”

10. Etke em̦m̦an ñan bõk ad iien ñe jej jar? (Bar lale pija ko.)

¹⁰ Bõk am̦ iien ñe kwõj jar. Meñe jemaroñ jar jãn bũruod ilo tukadu, ak ñe jej bõk ad iien ñe jej jar elõñl̦o̦k men ko jemaroñ kwal̦o̦k jãn bũruod ñan Jeova.b L̦eo pãleen Aliska etan Elijah ej ba: “Ilowaan juon raan, ij kajjioñ jar elõñ alen ñan Jeova im ij kile bwe ij epaakel̦o̦k E ñe ij bõk aõ iien ñe ij jar ñane. Jeova ejjab kõn̦aan bwe in ekkaiuriur im kam̦õj aõ jar, kõn men in imaroñ bõk aõ iien.” Kajjioñ kõm̦m̦ane men in: Pukot juon iien im juon jikin me ejjel̦o̦k kein kõm̦ad eok bwe kwõn maroñ bõk am̦ iien ñe kwõj jar, im bõlen kwõmaroñ bar kwal̦o̦k ainikiem ilo am̦ jar. Im kate eok ñan ekkeini am̦ kõm̦m̦ane men in.

KÕL̦MÃNL̦O̦KJEN̦ KÕN JAR KO AN RI-KAREJAR RO AN JEOVA ILO BAIBÕL̦

11. Ewi wãween ad bõk tokjãn jãn ad kõl̦mãnl̦o̦kjen̦ jãn jar ko an ri-karejar ro an Jeova ilo Baibõl̦? (Bar lale bo̦o̦k eo etan “Kwõmel̦el̦e Ke kõn Wãween Kein Rar Iiooni?”)

¹¹ Emaroñ juon menin jipañ ñe kwõj kõl̦mãnl̦o̦kjen̦ kõn jar ko an ri-karejar ro an Jeova, ekoba al ko ak sam ko me rej pãd ilo Baibõl̦. Ilo am̦ lale wãween an kar ri-karejar ro an Anij lutõkl̦o̦k bũrueer ñane, men in emaroñ kõm̦akũt eok ñan kõpel̦l̦o̦k bũruom̦ ñan Jeova. Kwõmaroñ bareinwõt lo naanin nõbar ko rekããl me kwõmaroñ bar kitibuji ilo jar ko am̦. Im kwõmaroñ lo jar ko me rej ekkejell̦o̦k ñan men ko kokõn̦aan jar kaki kõn wãween eo kwõj iioone.

12. Ta kajjitõk ko jemaroñ kajjitõk ippãd make ñe jej kõl̦mãnl̦o̦kjen̦ kõn juon jar me jaar riiti ilo Baibõl̦?

¹² Ilo am̦ etale juon jar ilo Baibõl̦, kajjitõk ippam̦ make: ‘Wõn eo ear ba naan kein im ta ko rar wal̦o̦k ilo mour eo an ilo tõre in? Imel̦el̦e ke kõn eñjake kein ej bũki? Ta ko imaroñ katak jãn jar in an?’ Kwõmaroñ nãj aikuj kõm̦m̦ani etale ko jet bwe kwõn maroñ lo uwaakin kajjitõk kein. Meñe ãindein, ak kwõnaaj lo bwe el̦ap tokjãn am̦ kar pukot uwaak ko. L̦õmn̦ak kõn jet waanjoñak ko.

13. Ta eo jemaroñ katak kõn jar jãn joñak eo an Hanna? (1 Samuel 1:​10, 11) (Bar lale pija eo.)

¹³ Riit 1 Samuel 1:​10, 11. Ke Hanna ear ba jar in, ear iioon ruo apañ ko rel̦l̦ap. Juon, ear jab maroñ wõr nejin. Im ruo, kõrã eo pãleen l̦eo ippãn ear kakũtõtõiki im kaeñtaane. (1 Sa. 1:​4-7) Ñe kwõj iioon juon apañ me ejjañin bõjrak, ta eo kwõmaroñ katak jãn jar eo an Hanna? Ear lo aenõm̦m̦an ilo an kar bõk an iien ke ear jar im ilo an kar lutõkl̦o̦k bũruon ñan Jeova. (1 Sa. 1:​12, 18) Kõj bareinwõt jemaroñ lo aenõm̦m̦an ñe jenaaj “jol̦o̦k menin eddo ko [ad] ioon Jeova” ikijjeen ad kõmel̦el̦e ñane wãween ad eñjake kõn apañ ko jej iiooni.—Sam 55:22.

14. (1) Ta eo juon jej katak jãn joñak eo an Hanna? (2) Ewi wãween ad maroñ kakõm̦anm̦anl̦o̦k jar ko ad ikijjeen ad kõl̦mãnl̦o̦kjen̦ kõn eoon ko ilo Baibõl̦? (Lale footnote eo.)

¹⁴ Jejjo iiõ ãlikin an kar l̦otak l̦adik eo nejin etan Samuel, Hanna ear bõkl̦o̦ke ñan ippãn Bũrij L̦apl̦ap Ilai. (1 Sa. 1:​24-28) Hanna ear jar jãn bũruon im kwal̦o̦k an lõke bwe Jeova ej kõjparok im kea kõn ri-karejar ro an retiljek.c (1 Sa. 2:​1, 8, 9) Meñe ear jab jako apañ ko Hanna ear iiooni ilo m̦weo im̦õn, ak ear l̦õmn̦ak wõt kõn wãween an kar Jeova kõjeraam̦m̦ane. Ta eo jej katak jãn joñak in an? Enãj pidodol̦o̦k ad kijenmej wõt ium̦win apañ ko jej iiooni ñe jej l̦õmn̦ak wõt kõn wãween an kar Jeova jipañ kõj tok ñan kiiõ.

15. Ñe jej iioon wãween ko rejjab jim̦we, ta eo jemaroñ katak jãn jar eo an ri-kanaan Jeremaia? (Jeremaia 12:1)

¹⁵ Riit Jeremaia 12:1. Juon iien, ri-kanaan Jeremaia ear lukkuun inepata ke ear lo an ro renana jeraam̦m̦an. Ear bareinwõt ebbweer ke ear nana an ri-Israel ro jet kõm̦m̦an ñane. (Jrm. 20:​7, 8) Jemaroñ mel̦el̦e kõn eñjake kein an kõnke em̦õj ad bar lo an ro renana jeraam̦m̦an im an ro jet kajjirere kake kõj. Meñe Jeremaia ear kwal̦o̦k an inepata ñan Jeova, ak ear jab pere ekajet jim̦we eo an Jeova. Ke ear lo wãween an Jeova kajeik armej ro An me rar jum̦aik E, ejjel̦o̦k pere bwe ear l̦apl̦o̦k an Jeremaia lõke ekajet jim̦we eo an Jeova. (Jrm. 32:19) Kõj bareinwõt jemaroñ kwal̦o̦k inepata ko ad ñan Jeova im lõke bwe Jeova enaaj kõm̦adm̦õde wãween ko rejjab jim̦we jej iiooni ilo iien eo ejejjet me em̦õj an karõke.

16. Ñe ewõr men ko jejjab maroñ kõm̦m̦ani kõn wõt wãween eo jej iioone, ta eo jemaroñ katak jãn ri-Livai eo ear jipo̦kwe? (Sam 42:​1-4) (Bar lale pija ko.)

¹⁶ Riit Sam 42:​1-4. Armej eo ear je al in ear juon ri-Livai me ear jipo̦kwe im ear jab maroñ kobal̦o̦k ippãn rũttõmak ro m̦õttan. Sam in an ej kwal̦o̦k wãween an kar eñjake. Ñe jejjab maroñ diwõj jãn m̦weo im̦õd kõn ad nañinmej ak jej pãd ilo kalbuuj kõn wõt tõmak eo ad, jemaroñ mel̦el̦e kõn eñjake kein an ri-jeje sam in. Jet iien jemaroñ m̦õn̦õn̦õ im ewõr iien ko jet jemaroñ ebbweer, ak aolep iien em̦m̦an ñan kwal̦o̦k eñjake kein ad ñan Jeova ilo jar. Ilo ad ãindein, men in emaroñ jipañ kõj ñan etale l̦õmn̦ak ko ad im bõk l̦õmn̦ak eo ejim̦we kõn wãween eo jej iioone. Ñan waanjoñak, ri-Livai eo ear kile bwe enaaj wõr iien ko repel̦l̦o̦k ñan an nãj nõbar Jeova. (Sam 42:​5, UBS) Ear bareinwõt kõl̦mãnl̦o̦kjen̦ kõn wãween an kar Jeova lale im kõjparok e. (Sam 42:​8, UBS) Ñe jej lukkuun jar jãn bũruod, men in emaroñ jipañ kõj ñan mel̦el̦e kõn eñjake ko ad, bar lo aenõm̦m̦an, im bõk kõkajoor bwe jen maroñ kijenmej wõt.

17. (1) Ta eo jemaroñ katak jãn jar eo an ri-kanaan Jona? (Jona 2:​1, 2) (2) Ewi wãween an jet iaan eoon ko ilo bokin Sam maroñ jipañ kõj ñe jej iioon wãween ko reppen? (Bar lale footnote eo.)

¹⁷ Riit Jona 2:​1, 2. Ri-kanaan Jona ear ba jar in ke ear pãd ilowaan lo̦jien juon ek kileplep. Meñe Jona ear jab pokake Jeova, ak ear lõke bwe Anij enaaj eo̦roñ an jar. Ilo jar eo an, elõñ iaan naan ko ear kõjerbali rar itok jãn bokin Sam.d Ejjel̦o̦k pere Jona ear lukkuun kiili sam kein. Ilo an kar kõl̦mãnl̦o̦kjen̦ kaki, ear lõke bwe Jeova enaaj jipañe. Ejja ãindeinl̦o̦k wõt, ñe jej kiili jet iaan eoon ko ilo Baibõl̦, jemaroñ keememejtok eoon kein im remaroñ kaenõm̦m̦an kõj ñe jej jar ñan Jeova ilo iien ko reppen.

RUWAAKL̦O̦K WÕT ÑAN JEOVA IKIJJEEN AM̦ JAR ÑANE

18-19. Ñe epen ad kõmel̦el̦e wãween ad eñjake ilo jar, ewi wãween ad maroñ bõk kaenõm̦m̦an jãn Rom 8:​26, 27? Kwal̦o̦k juon waanjoñak.

¹⁸ Riit Rom 8:​26, 27. Emaroñ wõr iien ko elukkuun eddodo bũruod kõn an l̦ap ad inepata, joñan epen ad kõmel̦el̦e wãween ad eñjake. Ñe ej wal̦o̦k men in, ewõr ad rijjipañ. Ilo iien rot kein, jetõb kwõjarjar eo an Anij ej “akwel̦ap” kõn kõj. Ewi wãween? Ikijjeen jetõb kwõjarjar eo an, Jeova ear kõm̦akũt elõñ iaan ri-jeje Baibõl̦ ro ñan je elõñ jar ko ilo Baibõl̦. Ilo iien ko epen ad kõmel̦el̦e wãween ad eñjake, Jeova emaroñ kõjerbal jet iaan naan ko ilo jar kein im watõke ãinwõt naan ko jej kajjioñ in ba ilo jar ko ad, im emaroñ uwaaki jar ko ad.

¹⁹ Mel̦el̦e in ear jipañ juon jeid im jatid kõrã jãn Russia etan Yelena. Kar kalbuuji kõn an kar jar ñan Jeova im riiti Baibõl̦ eo. Joñan an kar Yelena lukkuun inepata, ear pen an jar. Ej ba: “Iar keememej bwe ñe el̦ap aõ eddodo im ijaje ta eo in jar kake, Jeova enaaj kõjerbale jar ko an ri-karejar ro an ilo etto . . . im watõki ãinwõt men ko ij kajjioñ jar kaki. . . . El̦ap an kar men in kaenõm̦m̦an eõ ilo juon tõre ear lukkuun pen ñan ña.”

20. Ewi wãween jemaroñ kõpooj l̦õmn̦ak eo ad m̦okta jãn ad jar ñe el̦ap ad inepata?

²⁰ Ñe el̦ap ad inepata, emaroñ pidodo ad m̦ad ñe jej jar kõn wõt ad l̦õmn̦ak kõn men ko jet. Ñan kõpooj l̦õmn̦ak eo ad, jemaroñ roñjake rekoot in eoon ko ilo bokin Sam. Jemaroñ bareinwõt kajjioñ je men ko rej pãd ilo bũruod, ãinwõt an kar Kiiñ Devid kõm̦m̦ane. (Sam 18, 34, 142; lale kõmel̦el̦e eo itulõñin jebta kein.) Alikkar bwe ejjel̦o̦k kakien kõn wãween ad aikuj kõpooj l̦õmn̦ak eo ad m̦okta jãn ad jar. (Sam 141:2) Kwõn kõm̦m̦ane men eo enaaj jipañ kwe.

21. Etke jemaroñ jar kõn aolepen bũruod?

²¹ El̦ap ad bõk kaenõm̦m̦an ilo ad jel̦ã bwe Jeova emel̦el̦e kadede kõn eñjake ko ad m̦okta jãn ad kwal̦o̦k bũruod. (Sam 139:​4, UBS) Meñe ãindein, ak el̦ap an m̦õn̦õn̦õ in roñ ad kwal̦o̦k eñjake ko ad im joñan ad lõke E. Kõn men in, jen jab jenliklik in jar ñan Jemãdwõj ilañ. Pukot jar ko ilo Baibõl̦ me rem̦m̦an ippam̦ im kõjerbali naan ko aer ilo jar ko am̦. Jar kõn aolepen bũruom̦. Im jar kõn men ko rej kõm̦m̦an am̦ m̦õn̦õn̦õ im men ko rej kabũrom̦õj eok. Ãinwõt eo Jeram̦ em̦ool, aolep iien Jeova ej pojakin jipañ eok!