Keememej ñan Jar kõn Ro Jet

1. Ewi wãween ad jel̦ã bwe jar ko ad raorõk ippãn Jeova?

JAR ej juon menin letok el̦ap an kabwilõñlõñ. Baj l̦õmn̦ak m̦õk kõn men in: Jeova ear lel̦o̦k jet jerbal ko ñan enjel̦ ro. (Sam 91:11) Ear bareinwõt lel̦o̦k eddo ko rel̦l̦ap ñan eo Nejin. (Matu 28:18) Meñe ãindein, ak wõn eo ear jitõñe ñan eo̦roñ jar ko ad? Ejjel̦o̦k. Ej juon men me Jeova ear kããlõt ñan make kõm̦m̦ane. Jeova ej “roñjake jar” ko, im em̦õn̦õn̦õ in roñjake kõj.—Sam 65:2.

2. Ta joñak eo rijjilõk Paul ear likũt ñan kõj ikijjeen an kar jar kõn ro jet?

² Meñe jemaroñ jar ñan Jeova kõn jabdewõt men jej inepata kaki, ak jej aikuj in bar jar kõn ro jet. Eñin men eo rijjilõk Paul ear kõm̦m̦ane. Ñan waanjoñak, ear jejel̦o̦k ñan eklejia eo ilo Epesõs im ba: “Ejjab jem̦l̦o̦k aõ likũt kom̦ ilo jar ko aõ.” (Eps. 1:16) Paul ear jab baj jar wõt kõn kumi in armej ro ak ear bareinwõt jar kõn armej ro kajjojo ilo an kitibuj etaer. Ñan waanjoñak, ear ba ñan Timote: “Ij kam̦m̦oolol Anij, . . . joñan ejjab jem̦l̦o̦k aõ keememej eok ilo aõ jar im akwel̦ap raan im boñ.” (2 Tim. 1:3) Elõñ apañ ko Paul ear iiooni me ear aikuj jar kaki. (2 Kor. 11:23; 12:​7, 8) Meñe ãindein, ak ear kõm̦m̦an iien ñan jar kõn ro jet.

3. Etke jemaroñ mel̦o̦kl̦o̦k in jar kõn ro jet?

³ Jet iien jemaroñ mel̦o̦kl̦o̦k in jar kõn ro jet. Etke? Juon jeid im jatid kõrã etan Sabrinaa ej kwal̦o̦k juon un unin an men in wal̦o̦k. Ej ba: “Kõn ad mour ilo jukjukun pãd in, elukkuun l̦ap poub. Jet iien, kõn ad lukkuun m̦ad kõn apañ ko jej iiooni, jej jar wõt kõn aikuj ko ad make.” Kwõnañin ke lo am̦ kõm̦m̦ane men in? El̦aññe aet, katak in emaroñ jipañ kwe. Enaaj (1) kõmel̦el̦e etke eaorõk ñan jar kõn ro jet im (2) letok jet naanin jipañ ko kõn wãween am̦ maroñ kõm̦m̦ane men in.

ETKE JEJ AIKUJ JAR KÕN RO JET?

4-5. Ewi wãween an jar ko ad ‘kanooj in kajoor im l̦ap tokjãer’? (Jemes 5:16)

⁴ Ñe jej jar kõn ro jet, men in “ekanooj in kajoor im l̦ap tokjãn.” (Riit Jemes 5:16.) M̦ool ke bwe jar ko ad remaroñ jipañ ro jet? Aet, remaroñ. Ñan waanjoñak, Jesus ear jel̦ã bwe rijjilõk Piter enaaj ketake tokãlik. Kõn men in, ear ba: “Iar akwel̦ap ñan Anij kõn kwe bwe en jab m̦õjn̦o̦l̦o̦k tõmak n̦e am̦.” (Luk 22:32) Paul ear bareinwõt jel̦ã bwe jar emaroñ jipañ ro jet. Ke kar kalbuuji ilo Rom meñe ejjel̦o̦k ruõn, ear jeje ñan Pailimõn im ba: “Ij kõjatdikdik bwe ikijjeen jar kan̦e am̦, naaj bar kõjepl̦aakwaj ña ñan ippam̦.” (Pai. 22) Im eñin men eo ear wal̦o̦k. Paul ear rõl̦o̦k jãn kalbuuj im ear maroñ wõnm̦aanl̦o̦k wõt im kwal̦o̦k naan.

⁵ Meñe ãindein, ak ejjab mel̦el̦ein bwe ñe jej jar jej iuuni Jeova ñan kõm̦m̦ane men eo jej jar kake. Ej kile joñan an ri-karejar ro an kaorõk men ko rej jar kaki, im ewõr iien ko ej kããlõt ñan uwaake jar kein aer. Ad jel̦ã men in emaroñ jipañ kõj ñan lukkuun jar ñan Jeova kõn wãween eo jej iioone innem lõke bwe enaaj kõm̦adm̦õde ilo wãween eo em̦m̦antata.—Sam 37:​5, UBS; 2 Kor. 1:11.

6. Ñe jej jar kõn ro jet, ewi wãween an men in jelõt wãween ad eñjake kõn er? (1 Piter 3:8)

⁶ Ñe jej jar kõn ro jet, men in ej jipañ kõj ñan jel̦ãl̦o̦k “kwal̦o̦k tũriam̦o.” (Riit 1 Piter 3:8.) Juon eo etũriam̦o ej kile an ro jet iioon apañ im ebar kõn̦aan jol̦o̦k aer apañ. (Mark 1:​40, 41) Juon jeid im jatid em̦m̦aan me ej lale eklejia etan Michael ej ba: “Ñe ij jar kõn ro jet kõn men ko rej aikuji, men in ej jipañ eõ bwe en l̦apl̦o̦k aõ mel̦el̦e kõn apañ ko rej iiooni im ej kam̦wilal̦l̦o̦k yokwe eo aõ ñan er. Ij kile aõ epaakel̦o̦k er, meñe remaroñ jab kile men in.” Juon jeid im jatid em̦m̦aan me ej lale eklejia etan Richard ej kwal̦o̦k bar juon men em̦m̦an ej wal̦o̦k itok jãn ad jar kõn ro jet. Ej ba: “Ñe jej jar kõn juon armej, el̦apl̦o̦k ad kõn̦aan jipañe.” Ej wõnm̦aanl̦o̦k wõt im ba: “Ñe jej jipañ armej eo ilo wãween ko jemaroñ, ej ãinwõt ñe jej jipañ uwaaki jar ko ad kõn e.”

7. Ñe jej jar kõn ro jet, ewi wãween an men in jipañ kõj ñan bõk l̦õmn̦ak eo ejim̦we kõn apañ ko jej iiooni? (Pilippai 2:​3, 4) (Bar lale pija ko.)

⁷ Ñe jej jar kõn ro jet, men in ej jipañ kõj ñan bõk l̦õmn̦ak eo ejim̦we kõn apañ ko jej iiooni. (Riit Pilippai 2:​3, 4.) Kõj kajjojo jej iioon wãween ko reppen itok jãn ad mour ilo juon lal̦ me ej pãd ium̦win maroñ eo an Setan. (1 Jon 5:19; Rev. 12:12) Ñe jej kõm̦m̦an bwe en juon ad imminene ñan jar kõn ro jet, men in ej jipañ kõj ñan keememej bwe “erkein ejja men ko wõt ro [jeid im jatid] ipel̦aakin lal̦ in rej eñtaan kaki.” (1 Pit. 5:9) Juon bainier etan Katherine ej ba: “Ñe ij jar kõn ro jet, men in ej kakeememej eõ bwe ewõr ro jet rej bar jelm̦ae mãlejjoñ ko. Men in ej jipañ eõ bwe en jab l̦ap wõt aõ l̦õmn̦ak kõn apañ ko aõ make.”

REJ AIKUJI JAR KO AD

8. Kwal̦o̦k waanjoñak kõn wõn ro jemaroñ kitibuj ilo jar ko ad.

⁸ Wõn ro jemaroñ kitibuj ilo jar ko ad? Jemaroñ jar kake juon kumi in armej—ñan waanjoñak, ro me ejjab em̦m̦an ãjmour ko aer, ajri im jo̦dikdik ro me rej jelm̦ae kajjirere ak ijjiped jãn ro jet ilo jikuul̦, ak ro rej iioon apañ ko kõn aer rũttol̦o̦k. Elõñ iaan ro jeid im jatid rej iioon jum̦ae, emaroñ jãn ro uwaan baam̦le ko aer ak kien ko. (Matu 10:​18, 36; Jrb. 12:5) Im jet iaan ro jeid im jatid rar aikuj ko jãn m̦õko im̦weer kõn wõt an l̦ap poktak ilo kien. Ro jet rej iioon apañ kõn l̦añ ko rel̦l̦ap ak men ko ãierl̦o̦kwõt. Em̦ool bwe jemaroñ jab jel̦ã kajjien rein jeid im jatid. Bõtab ñe jej jar kõn er, jej kaalikkar bwe jej pokake naanin jiroñ eo an Jesus ñan “yokwe doon.”—Jon 13:34.

9. Etke jej aikuj jar kõn em̦m̦aan ro rej tõl ilo doulul in an Jeova ekoba kõrã ro pãleer?

⁹ Jemaroñ bareinwõt jar kõn em̦m̦aan ro jeid im jatid me rej tõl ilo doulul in an Jeova. Men in ekitibuj Kumi eo Ej Lale Aolep Eklejia Ko im rijjipañ ro aer, Em̦m̦aan ro Rej Lale Ra Ko, em̦m̦aan ro rej loloodjake jerbal ko ilo ra ko, em̦m̦aan ro rej lol̦o̦k eklejia, em̦m̦aan ro rej lale eklejia, im rijjipañ ro ilo eklejia ko. Elõñ iaan em̦m̦aan im likao rein jeid im jatid ewõr men ko rej inepata kaki meñe rej kate er ñan jerbal ñan kõj. (2 Kor. 12:15) Ñan waanjoñak, juon jeid im jatid em̦m̦aan me ej lol̦o̦k eklejia ko etan Mark ej ba: “Juon iaan men ko repentata ñan ña ej aõ ettol̦o̦k jãn rũtto ro jinõ im jema. Erro jim̦or im lukkuun nañinmej. Meñe elukkuun em̦m̦an an kõrã eo jeiũ im l̦eo pãleen lale erro, ak elukkuun pen ñan ña kõnke ijjab maroñ pãd turin rũtto ro jinõ im jema im lukkuun jipañ erro.” Meñe jemaroñ jab jel̦ã kõn aolep men ko me em̦m̦aan rein jeid im jatid rej inepata kaki, ak ej juon men em̦m̦an ñe jenãj jar kake er. (1 Tes. 5:​12, 13) Jemaroñ bar jar kõn kõrã ro pãleen em̦m̦aan rein jeid im jatid kõnke jipañ ko aer rel̦l̦ap rej kõmaroñ l̦õm̦arein pãleer ñan wõnm̦aanl̦o̦k wõt im jerbal ñan eklejia eo.

10-11. Jeova ej ke buñbũruon ippãd ñe jej jar kõn ro jeid im jatid ãinwõt juon kumi in armej? Jouj im kõmel̦el̦e.

¹⁰ Ãinwõt ad kar etale, ekkã ad jar kõn ro jeid im jatid ãinwõt juon kumi in armej. Ñan waanjoñak, meñe jejjab l̦õmn̦ak kõn etan juon armej ñe jej jar, ak jemaroñ kajjitõk ippãn Jeova bwe en jipañ ro rej pãd ilo kalbuuj ak bwe en kaenõm̦m̦an ro me rar luuji ro rejitõnbõro ippãer ilo mej. Juon em̦m̦aan me ej lale eklejia etan Donald ej ba, “Kõnke elukkuun lõñ ro jeid im jatid me rej iioon wãween ko reppen, jet iien jej jar kõn aolep ro rej iioon ejja wãween eo wõt bwe jen maroñ jar kõn er aolep.”

¹¹ Ej ke buñbũruon Jeova ñe jej jar ilo wãween in? Aet! Kõnke ilo m̦ool, jejjab jel̦ã kõn aolep aikuj ko an ro jeid im jatid. Innem ejjel̦o̦k jorrããn ñe jej jar kõn ro jeid im jatid ãinwõt juon kumi in armej. (Jon 17:20; Eps. 6:18) Ad jar kõn er ej kam̦ool bwe jej “yokwe aolep ro jeid im jatid ilo tõmak.”—1 Pit. 2:17.

ÑE JEJ JAR KÕN JUON ARMEJ

12. Ñe jej lale ta ko ro jeid im jatid rej iiooni, ewi wãween an men in maroñ jipañ kõj jel̦ã ta ko jen jar kaki kõn juon armej?

¹² Lale ta ko ro jeim̦ im jatũm̦ rej iiooni. Kobal̦o̦k ippãn ad jar kõn ro jeid im jatid ãinwõt juon kumi in armej, ebar ekkar bwe jen jar kõn kajjojo iaaer im kõjerbal etaer. Ewõr ke en̦ ilo eklejia eo ad me ej tarin̦ae juon nañinmej el̦ap? Ewõr ke juon jo̦dikdik me elukkuun bũrom̦õj, bõlen kõnke ej iioon ijjiped ilo jikuul̦? Ewõr ke juon jinen ak jemãn me ejjel̦o̦k pãleen ej iioon apañ ilo an katakin im kõkkaajiririik ajri eo nejin “ilo kauwe im kõn naanin kakapilõk ko an Jeova”? (Eps. 6:4) Ilo ad lale ta ko ro jeid im jatid rej iiooni, jej kam̦wilal̦l̦o̦k yokwe eo ad ñan er, im men in enaaj kal̦apl̦o̦k ad kõn̦aan jar kõn er.b—Rom 12:15.

13. Ewi wãween jemaroñ jar kõn ro jejjab jel̦a kajjier?

¹³ Kitibuj etan ro jeid im jatid ilo jar ko ad. Jemaroñ kõm̦m̦ane men in meñe jejjab jel̦ã kajjier. Ñan waanjoñak, l̦õmn̦ak kõn ro jeid im jatid me rej kalbuuj ilo ãne ko ãinwõt Crimea, Eritrea, Russia, im Singapore. Ilo jw.org, kwõmaroñ lo etan ro rej pãd ilo kalbuuj.c Juon jeid im jatid em̦m̦aan me ej lol̦o̦k eklejia ko etan Brian, ej ba: “Ij kile bwe il̦ak je etan juon rũttõmak me ej kalbuuj innem ij kwal̦o̦k ainikiõ im ba etan, men in ej jipañ ña ñan keememej armej in innem kitibuj etan ilo jar ko aõ.”

14-15. Ewi wãween jemaroñ kaalikkar ta ko jej jar kaki kõn ro jeid im jatid?

¹⁴ Kaalikkar ta ko kokõn̦aan jar kaki kõn er. Michael, eo jaar kõnono kake m̦oktal̦o̦k, ej ba: “Ñe ij riit kõn ta ko rej wal̦o̦k ñan ro jeid im jatid ilo kalbuuj ilo jw.org, ij kajjioñ pijaikl̦o̦k en kar ewi wãween aõ eñjake ñe en kar ña eo. Ijel̦ã in kar inepata kõn kõrã eo ippa, im in kar kõn̦aan lale bwe en wõr ippãn aolep aikuj ko an. Aõ kõm̦m̦ane men in, ej jipañ ña ñan jel̦ã ta ko in jar kaki kõn em̦m̦aan ro jeid im jatid me er ri-m̦are.”—Hib. 13:​3, ftn.

¹⁵ Ñe jej kajjioñ pijaikl̦o̦k wãween mour ko an ro jeid im jatid kajjojo raan ilo jikin kalbuuj, men in ej jipañ kõj ñan jel̦ã ta ko jet jemaroñ jar kaki kõn er. Ñan waanjoñak, jemaroñ jar bwe ri-waj ro an jikin kalbuuj eo ren jouj ñan ro jeid im jatid im bwe ri-utiej ro ilo kien ren kõtl̦o̦k bwe ro jeid im jatid ren anemkwõj ilo aer kabuñ. (1 Tim. 2:​1, 2) Jemaroñ jar bwe ro ilo eklejia eo an ro rej pãd ilo kalbuuj ren bõk kõketak jãn joñak kein aer rem̦m̦an, ak bwe ro rejjab rũttõmak ren kile m̦wil ko rem̦m̦an an rein ilo kalbuuj im kõn̦aan roñjake ennaan eo ad. (1 Pit. 2:12) Alikkar bwe jemaroñ bar ãindein ñe jej jar kõn ro jeid im jatid me rej kijenmej ium̦win apañ ko jet. Ñe jenaaj lale ta ko ro jeid im jatid rej iiooni, kitibuj etaer ilo jar ko ad, im kaalikkar ta ko jej jar kaki kõn er, jej kwal̦o̦k bwe el̦ap “yokwe eo [ad] ñan doon.”—1 Tes. 3:12.

JEN BÕK L̦ÕMN̦AK EO EJIM̦WE KÕN JAR KO AD

16. Ewi wãween jemaroñ bõk l̦õmn̦ak eo ejim̦we kõn jar ko ad? (Matu 6:8)

¹⁶ Ãinwõt ad kar etale, ñe jej jar kõn juon armej, jar ko ad remaroñ jipañ bwe en em̦m̦anl̦o̦k wãween eo ej iioone. Ijoke, jej aikuj bõk l̦õmn̦ak eo ejim̦we kõn jar ko ad. Ñe jej jar, jejjab kwal̦o̦k ñan Jeova kõn juon men ejjab jel̦ã kake, im jejjab aikuj ba ñane kõl ta eo em̦m̦antata ñan kõm̦adm̦õde juon apañ. Jeova ejel̦ã ta ko ro ri-karejeran rej aikuji m̦okta jãn aer—ak jãn ad—jel̦ã kake. (Riit Matu 6:8.) Innem etke jej aikuj jar kõn ro jet? Kobal̦o̦k ippãn mel̦el̦e ko em̦õj ad etali ilo katak in, unin ej kõnke eñin men eo ro el̦ap yokwe ippãer rej kõm̦m̦ane. Im Jeova ej lañlõñ ñe ej loe an ri-karejar ro an anõke yokwe eo an.

17-18. Kwal̦o̦k juon waanjoñak me ej kõmel̦el̦e kõn aorõkin ad jar kõn rũttõmak ro m̦õttad.

¹⁷ Meñe emaroñ ãinwõt ñe jar ko ad rejjab jipañ bwe en em̦m̦anl̦o̦k wãween ko ro jeid im jatid rej iiooni, ak jar ko ad rej kaalikkar yokwe eo ad ñan ro jeid im jatid, im Jeova ej lo men in. Jemaroñ kõjerbal juon waanjoñak ñan kaalikkar boin in: Pijaikl̦o̦k juon baam̦le me ewõr nejier ruo ajri jiddik—juon l̦addik im juon leddik. L̦adik eo ej babu ioon peet eo an kõn an nañinmej. Im ledik eo ej akwel̦ap ñan jemãn im ba: “Jouj im jipañ jeiũ. Elukkuun nañinmej!” Jemãn ej lale kadede l̦adik eo kõnke ej yokwe l̦adik eo nejin im elukkuun em̦m̦an an lale. Ijoke, ejjel̦o̦k pere elukkuun m̦õn̦õn̦õ in lo an ledik eo nejin lukkuun kea kõn l̦adik eo jein, joñan ej akwel̦ap ñan jemãn bwe en lale l̦adik eo.

¹⁸ Eñin men eo Jeova ej rõjañ kõj ñan kõm̦m̦ane—ñan yokwe doon im jar kake doon. Ilo ad ãindein, jar ko ad renaaj kaalikkar joñan ad yokwe doon im l̦õmn̦ak kõn doon, im Jeova ej kile men in. (2 Tes. 1:3; Hib. 6:10) Bareinwõt, ãinwõt ad kar etale, jet iien jar ko ad remaroñ jipañ bwe en em̦m̦anl̦o̦k wãween eo armej eo jej jar kake ej iioone. Kõn men in, jen kate kõj ñan keememej in jar kõn doon.