Juõn Letter Jen Governing Body Eo

KE JEJ bed ebak ñan ien eo enaj itok jukjuk im bed eo ekãl, eaorõk bwe jen kõtmene wõt kin Jehovah. (Zeph. 3:8, NW) Ri kanan eo Daniel ear ba “Anij . . . ej juõn Ri Kwalok kin men in ittino ko, im ear kwalok . . . men eo enaj walok ilo ran ko eliktata.” (Dan. 2:28, NW) Ej juõn jerammõn elap ñan mour ebak ñan ien en kar kanan kake im ñan melele kin men in ittino ko rekwojarjar me Jehovah ej kwaloki!

Ikijen “dri korijer e tiljek im meletlet,” Jehovah ear kwalok jidik kin jidik kin karõk eo an ñan aini juõn “jar elap” in ri kabuñ ro jen ailiñ ko otemjej ilo “ran [kein] eliktata” im renana. (Mat. 24:45; Rev. 7:9; 2 Tim. 3:1) Aiseia 2:2, 3 ej kwalok kin emmakit in ibelakin lal einwõt an walok ilo “ran ko eliktata.” Kajjojo yiõ, jerbal in ae in ej wõnmanlok wõt iumin bwok im kowadoñ ko me rej jededlok ilo lal in.

Ilo yiõ eo 2004, elaplok ad kar kile aikwij eo ñan bokake nan ko an Jesus: “Komin ekil . . . Komin bareinwõt pojõk.” (Mat. 24:42, 44) Emol, men eo ej walok ilo lal elap an wõr melelen ñan Ri Christian ro, me rej kile “kakõle ko ilo ien ko” im emmakit ilo ekkar. (Mat. 16:1-3) Ilo jejjet in kitien Nan eo an, Jehovah enaj wõnmanlok im bed ibben armij ro ear karõk bwe ren kõmanman jerbal eo an jekdon jabdewõt jumae ko remaroñ jelmaiki.

Jekdon jibadbad ko an jet ñan kautameik ak kabõjrak jerbal eo ñan keañ kin Ailiñ eo, ro jeid im jatid rej wõnmanlok wõt im konono kin mol eo im kwelok ibben don. (Jerbal 5:19, 20; Hib. 10:24, 25) Ilo Russia ilo June 2004, juõn mõn ekajet eutiej (court of appeals) ilo Moscow ear rejetak bebe eo an juõn mõn ekajet ettãlok ñan kabõjrak makitkit ko an Ri Kennan ro an Jehovah im ñan jolok dolul eo ilo jikin kwelok eo. Bõtab, brother ro rar jab ebwer; rej jelã ta eo Jehovah ekõnan bwe ren kõmmane, im rej bokake e einwõt Iroij im jab armij. (Jerbal 5:29) Jej liki bwe Jehovah enaj tel ri karejar ro an ilo air jelmae jumae in elap an kien.

Ilo Republic of Georgia ilo yiõ ko rej kab motlok, ro jeid im jatid rar iion abañ ko kin air bõk men ko mweieir, ri kowadoñ ro rar mõn ir, im rar tile book im magazine ko air. Ak ejelok jabdewõt kein tarinae emwij nawãwen nae ir ear lo tõbrak. (Ais. 54:17) Ilo 2004 yiõ in jerbal eo, kien eo ear bar kowãppen jerbal eo an Ri Kennan ro an Jehovah ilo Georgia. Rar kõmman kwelok ko relap ilo ejelok jumae, im book im magazine ko remaroñ deloñ ilo ailiñ eo. Rar report kin laplok ko relap in ri kwalok ro im oran ro rar bed ilo Kwojkwoj in Kememej eo.

Ilo Armenia, Eritrea, Republic of Korea, Rwanda, im Turkmenistan, rar kalbuji ro jeid im jatid kin tõmak eo air. Meñe enana wãwen air jerbal ñan ir, rej jelã kin un eo ekkar ñan Jeje ko unin melejoñ ko air, im men in ej jibañ ir ñan kejbãrok air tiljek ke rej reilok ñan Jehovah kin lomor.​—1 Pit. 1:6; 2 Pit. 2:9.

Ke kwoj etale 2004 Report in Yiõ in Jerbal eo ilo February 1, 2005, Imõniaroñroñ, kwonaj lañliñ kin lejokmen eo an Jehovah. (Sam 31:19; 65:11) Kimij kejatdikdik bwe report in enaj rejañ yuk ñan etetal wõt ilo ial eo me Anij ej buñburuen kake.​—1 Tess. 4:1.

Elap jibadbad ko rej wõnmanlok in kõmmani ñan jibadõk armij ro otemjej kin mol eo. Ñan wanjoñok, video ko, DVD ko, im men ko jet rar keboji ilo sign language im Braille ñan jibañ ro rej jaroñroñ im bilo ilo jitõb. Elõñ ri kwalok ro kin Ailiñ eo rar katak kajin ko an ruwamaejet ro me rej jokwe ilo territory eo air.

Bareinwõt, rar kajutak elõñ buki kumi ko ilo territory ko ebin jibadõki. Men in ej kwalok kin maroñ eo elap ñan kajutak elõñ congregation ko rekãl! Ijellokin men in, ian 16,760,607 ro rar bed ilo Kwojkwoj in Kememej eo ilo yiõ in jerbal eo lok, elõñlok jen 10 million rar jab Ri Kennan ro. Men in elap an kalikar bwe ewõr juõn jonikõn elap me rej aikwij madmõde.

Jej kamolol Jehovah kin kajerammõn eo an elap im kin wãwen eo eyokwe ej kejbãrok kij jen ran ñan ran. (Ken. 10:22; Mal. 3:10, NW; 1 Pit. 5:7) Ke jej emmakit manlok ilo burukuk ilo “ran ko eliktata,” jej liki wõt Jehovah. Jekdon ta abañ ko jej iioni, jen bõk ñan buruõd nan ko ilo unin tel in yiõ eo 2005: “Aõ jibõñ ej itok jen Jeova.” (Sam 121:2) Kwomaroñ liki kin yokwe eo am im jar ko am ilo etami.

Ro jeimi im jatimi,

Governing Body eo an Ri Kennan ro an Jehovah