Juon Lõta Jãn Kumi eo Ej Tõl
Yokwe Aolep ro M̦õttam̦ im Rej Karejar ñan Jeova:
Jej lukkuun lañlõñ kõnke jej pãd ilo juon iien ekairujruj im kam̦õn̦õn̦õ! Elap am m̦õn̦õn̦õ bwe kõmij jerbal ippemi ro jeim im jatim ilo ad “juon wõt bõro,” im bõk kun̦aad ilo jerbal eo elap ñan kwal̦o̦k kõn Jemed ilañ, Jeova.—Zep. 3:9; Jon 14:12.
Kõnke jej lañlõñ ilo ad karejar ñan Jeova, men in ejjab mel̦el̦ein bwe jejjab iion apañ ko. Ilo kar iiõ eo l̦o̦k, jet iaami rar iion wãween ko repen kõn an kar wõr m̦akũtkũt lal̦, ibwijleplep, taibuun, im lañ ko jet rekauwatata. (Matu 24:7) Elõñ iaami rej kijenmej raan otemjej kõn aer nañinmej im m̦õjn̦o̦l̦o̦k kõn aer rũtto. Kõj aolep jej kate wõt meñe “eñtaan ko” rej lapl̦o̦k wõt. (Matu 24:8) Ilo elõñ aelõñ ko ãinwõt Armenia, Eritrea, im South Korea, rar kalbuuji elõñ iaan ro jeid im jatid kõn tõmak eo aer.—Matu 24:9.
Ta eo ear jipañ kõj ñan jab ebbeer meñe jej iion apañ kein repen? Unin tõl eo an iiõ eo ilo 2010 ear kakeememej kõj kõn juon un eaorõk. Ej ba: ‘Yokwe ej kijenmej ilo men otemjej. Yokwe e jamin jako.’ (1 Kor. 13:7, 8) Aet, ad yokwe doon im bareinwõt ad yokwe Jeova ej kakajoor kõj ñan kijenmej im jab ebbeer.
Elõñ armej ro rej ba rej Kũrjin rej bwilõñ kõn ad kijejeto im bõrokuk ilo ad kõm̦m̦ane jerbal in kwal̦o̦k naan ipel̦aakin lal̦. Meñe rejjab errã kõn tõmak eo ad im katak ko ad, jet rar nõbar kõj im ba, ‘Komij kõm̦m̦ane jerbale eo kõmij aikuj in bar kõm̦m̦ane!’ Ta eo ej kõm̦akũt Ri Kõnnaan ro an Jeova ñan wõnm̦aanl̦o̦k wõt im kwal̦o̦k naan aolep raan? Ej yokwe. Ãinwõt Jemed ilañ, jejjab kõn̦aan bwe jabdewõt armej en jako. (2 Pit. 3:9) An lapl̦o̦k oran ri kwal̦o̦k naan ro ñan joñan in 7,508,050 ilo iiõ in kwal̦o̦k naan eo ej kab jem̦l̦o̦k ej kalikkar kõn joñan ad kõn̦aan bwe aolep armej ren ukel̦o̦k. Ewõr ke bar juon doulul in kabuñ ijello̦kun doulul in im armej ro ie rej m̦õn̦õn̦õ in bõk kun̦aaer ilo jerbal in kwal̦o̦k naan?
Jen m̦õn̦õn̦õ kõnke jej maroñ lo an jejjet kitien kanaan eo Aiseia ear je: ‘Ilo raan ko ãliktata, tol̦ in im̦õn Jeova naaj kabin e ilo jabõn tol̦ ko, im naaj kautiej e ilõñin tol̦ ko re dik; im ro ri aelõñ ko re naaj ibweptok ñan e.’ (Ais. 2:2-4) Oran ro im rar peptaij ilo iiõ in jerbal in kwal̦o̦k naan eo l̦o̦k ej 294,368. Rein rej pãd ibwiljin juon jarlepju in armej ro im rej ibweplok ñan im̦õn Jeova. Jej karwaineneik rein rejitenburu ñan doulul eo ad. Yokwe eo ad ñan Kũrjin ro m̦õttad en kõm̦akũt kõj ñan jipañ rein bwe ren jutak pen nae mãlejjoñ ko jãn ri kõjdat eo ad, Setan Tepil̦ eo.—1 Pit. 5:8, 9.
Ewõr joñan in 18,706,895 oran ro rar pãd ilo Kwõjkwõj in Keememej eo ilo kar Juje, M̦aaj 30, 2010. Ej juon joñan elap im ejañin kar wal̦o̦k m̦okta. Men in ej kalikkar bwe ej lõñ wõt million armej ro im remaroñ kobatok ippãd im kabuñ ñan Jeova. Elap ad m̦õn̦õn̦õ bwe Jeova ejañin bõktok jem̦l̦o̦kin jukjuk im pãd in enana! M̦ae tõre in, yokwe eo ad enaaj jipañ kõj bwe jen wõnm̦aanl̦o̦k wõt im kijenmej.—2 Tes. 3:5.
Juon iaan etan kweilo̦k ko rel̦ap im rar wal̦o̦k ipel̦aakin lal̦ in ilo 2010 ej “Pãd Epaake Jeova!” Kweilo̦k in elap ear lukkuun kakajoor kõtaan eo ad ippãn eo Jemed ilañ, Jeova. Ekanuij m̦ool naan ko an ri jeje sam in, ke ear ba: “E m̦õn̦õn̦õ ro ri aelõñ ñe aer Anij Jeova!” (Sam 144:15) Jekdo̦o̦n ta eo enaaj wal̦o̦k ilju im jekl̦aj, jejel̦ã bwe el̦aññe jej pãd epaake wõt Jeova, jejamin mijak jabdewõt men enana enaaj wal̦o̦k. (Sam 23:4) M̦õttan jidik Jeova enaaj kajerbal Nejin bwe en “ko̦kkure jerbal ko an tepil̦.” (1 Jon 3:8) Em̦ool, elap ad kijoororetok iien in! Bõtab m̦ae iien in, ej lõñ wõt men ko jej aikuj poub wõt kaki ilo jerbal eo an Irooj.—1 Kor. 15:58.
Jab mel̦o̦kl̦o̦k bwe ‘e jab jokwõd am ba kõn kom̦’ ilo jar ko am. (Rom 1:9) Komin wõnm̦aanl̦o̦k im “bed wõt ilo yokwe eo an Anij, ilo ami kõttar ad Iroij Jesus Christ, bwe kin tiriamokake eo an, enaj lewõj mour indrio.”—Jud 21, UBS.
Kõmij yokwe kom̦ aolep!
Ro nukumi ilo tõmak,
Kumi eo Ej Tõl Ri Kõnnaan ro an Jeova