Juõn Letter Jen Governing Body Eo

“JOIJ ñõn kom, im ainemõn jen Anij Jemer, im Iroij Jisõs Kraist.” Nan in yokyokwe in ekkã an Paul kajerbale ilo elõñ letter ko an ñan congregation ko. Emõn an kwalok kin lemnak eo am kin kom.—Ep. 1:2.

Elap ad kamolol kin joij eo an Jehovah ikijen katok in binmour eo an Jesus Christ! Ikijen binmour eo, emaroñ wõr ibbed juõn jutak ewãppen iman Anij. Jejjab maroñ bõk men in ikijen jibadbad ko ad make, jekdon ewi joñan an tiljek ad katak Bible, kwalok kin news eo emõn, ak kõmman jerbal ko jet remõn. Ej jeorlok ad bwid im letok ñan kij mour indio, jab einwõt wõnãn jibadbad ko ad, ak einwõt men in letok ko rej kwalok joij eo an Jehovah ikijen Jesus Christ.—Rom. 11:6.

Paul ear jeje ñan ri tõmak ro mõttan: “Kim . . . akwelap ñõn kom bwe en jab jitokjen ami bõk joij an Anij, (Bwe Ej ba, Ilo ien ekar I ar eoroñ yuk, im ilo ran in lomor I ar jibõñ yuk; lo, kiõ ien emõn; lo, kiõ ran in lomor).” Ear wõr juõn “ien emõn” mokta jen jeebeplok eo an Jerusalem ilo ebeben eo kein kajuõn. Armij ro emol burueir me rar yokwe Jehovah rar bõk lomor ilo jitõb. Men in ear tellok ñan air bõk lomor ilo kanniek ke aolep ro retiljek rar ko jen Jerusalem mokta jen an itok jorrãn eo ilo 70 C.E.—2 Kor. 6:1, 2.

Rainin, bareinwõt, jej mour ilo juõn “ien emõn” im juõn “ran in lomor.” Ro me Jehovah ej bõk ir einwõt ri karejar ro an im rej bõk lomor ilo jitõb ewõr ibbeir kejatdikdik eo bwe ren ellã im mour jen “ran eo elab an Iroij” eo ebak.—Zeph. 1:14.

Itok eo kin ran eo an Jehovah ej likit iod juõn eddo elap. Jej aikwij jimor kakkõl armij kake im ñan jibañ ro emol burueir bwe ren bõk tokjen jen joij eo an Jehovah bwe ir bareinwõt ren maroñ bõk lomor. Paul ear kile aorõkin eddo in. Ear je: “Wo ñõn iõ elañe Ij jab kwalok gospel!” Ear bareinwõt kwalok eñjake eo an ilo nan kein: “Ñõn ro re meletlet im ñõn ro re jab meletlet. Ein drein, einwõt aõ maroñ, I pojõk bwe in kwalok gospel ñõn komeo komij ber i Rom.”—1 Kor. 9:16; Rom. 1:14, 15.

Jehovah enaj naruõd elañe jej kajekdon jerbal in eaorõk ñan kakkõl armij. Jej jelã ta eo Jehovah ear ba ñan Ezekiel: “Kwe armij drien mij, ij likit yuk bwe kwon juõn ri waj ñõn ailiñ in Israel. Nan in kakkõl ko ij liwõj ñõn yuk kwon kwaloki ñõn ir. Elañe inaj kejjelã ke juõn ri nana enaj mij, ak kwojjab kakkõl e bwe en ukõt mour eo an bwe en jab mij, innem enaj mij kin jerawiwi ko an; bõtab inaj naruõm kin mij eo an.”—Ezek. 3:17, 18.

Ebin mour ilo ran kein eliktata. Ejjab bidodo ñan kõmman bwe men ko an family eo, makitkit ko ilo jikin jerbal eo, makitkit ko ilo congregation eo, im jerbal in kwalok nan ren jokkin wõt juõn. Bareinwõt, elõñ rej aikwij jelmae ak kijenmij kin nañinmij, buromõj, air ritto, im an armij jumae ir. Elõñ iami komij “jerbal im ban.” Kimij kõnan kwalok am tiriamokake kom, ilo errã ibben ta eo Jesus ear ba: “Komin itok ñõn iba, kom otemjej rej jerbal im ban, im I naj kakijeik kom.” (Mat. 11:28) Kimij kõnan nebar komeo komij kate kom ñan karejar wõt ñan Jehovah ilo tiljek meñe komij iion aitwerõk ko relap im redik.

Tokjen am kijejeto ilo jerbal in kwalok nan im katakin armij im kin kajerammõn eo an Jehovah, ibelakin lal enañin 4,762 armij ro rej baptais kajjojo week. Ilo yiõ in jerbal eo lok, ear jutak 1,375 congregation ko rekãl. Kimij kejatdikdik bwe book eo ekãl What Does the Bible Really Teach? (Ta eo Bible eo Ej Katakin?), eo emwij kõmmane ilo 120 kajin ko, enaj jibañ elõñ million armij ro ñan bõk tokjen jen joij im kainemõn eo an Jehovah ilo “ran in lomor” eo an.

Kom maroñ liki bwe Kumi Eo Ej Tel Dolul in (ak Governing Body eo) ej yokwe kom im kimij jar kin kom. Kimij bareinwõt kamolol kom kin ami jar kin kim.

Ro jeim im jatim,

Kumi Eo Ej Tel Ri Kennan ro an Jehovah