Mour Ibben Kauwatata Ko

“Ejelok jabdewõt men kwomaroñ kõmmane ilo mour eo ran otemjej​—ekoba kiki​—emaroñ wõr kauwatata ie im ej men eo eliktata kwonaj kõmmane ilo mour eo am.”​—Discover magazine.

MOUR rej keidi ibben etetal ilo juõn melaj in bakutañ, bwe kinejnej ak mij remaroñ walok jabdewõt ien, ilo an ekkã an ejelok kejelã. Men ko rekauwatata reoktak jen don jen ailiñ ñan ailiñ. Rekoba lanwõtwõt ko an wan ettõr ko ilo ial, civil war ko (tarinae ikõtan armij in juõn ailiñ ñan don), ñitta, nañinmij in AID ko, cancer, nañinmij in menono, im ebar lõñ men ko jet. Ilo sub-​Saharan Africa, ñan wanjoñok, nañinmij in AID ko emwij an erom number juõn ilo mõnmõn armij, ilo juõn yiõ eo ilo ran kein ear “bõk mour an 2.2 million armij ro, 10 alen an laplok jen tarlep in mij ko rar walok jen civil war ko ilo Africa,” U.S.News & World Report ej ba.

Ilo ejja ien in wõt, lal in ej kajerbal elõñ billion dollar ñan kaetoklok ien mour im kadiklok kauwatata in nañinmij im mõjno. Elõñ wõt ian lemnak kein rej kakajurlok men kein einwõt mantin mõñã im idak im kakajur enbwin kin makitkit, men kein remaroñ kwalok jet tokjen ko remõn. Bõtab, ewõr juõn unjen melele eo ewõr tokjen ñan liki kin men otemjej elap aorõkiir ilo mour im remaroñ jibañ yuk ñan lañliñ kin juõn mour eo elaplok an emõn im jokane. Unjen in ej Bible eo. Ebed ie ial in tel ko ñan jerbale juõn men in lemnak ko elap jetñakiir im rej jelet ejmour im emõn eo ad. Bwebõta, Bible eo ejjab jerbal ibben abañ ko otemjej ilo tibdikiir. Ak, ej letok nan in kaiñi ko remõn ñan tel kij ilo men kein einwõt mantin mõñã, kakajur enbwin, kalmenlokjen, mour in likao im jiroñ, kajerbal alcohol, tobacco, im men eo naetan kamõnõnõ in unokan kadõk ko rekajur, im ebar lõñ men ko jet.

Ibben elõñ mour ej bareinwõt eddo kin air jab jelã kin joñan maroñ eo air ikijen money. Ijin bareinwõt, Bible eo ej jibañ kij. Ejjab kakajur wõt kij kin juõn lemnak eo emeletlet kin money im wãwen kajerbale ak ej bareinwõt kwalok wãwen eo ñan juõn ri jerbal ak juõn eo ewõr an ri jerbal en emõnlok. Ñan baj ba wõt kake, Bible eo ej juõn ial in tel eo emõn, ejjab ñan jokane eo wõt ikijen money im ejmour eo an enbwin, ak mour eo make. Kwon kõnan ke lo wãwen an Bible eo maroñ emõn rainin? Inem joij im konono manlok wõt.