Mour Erreo eo Ilo Bible Emõntata ke?

“JUKJUK IM BED EO ej aikwiji juõn jerbal eo ej bedbed ion men ko raorõk im ej lelok ñan ro uan jokane im ialin tel.” Eindein an kar juõn Ri Germany ba im lein ej ri jeje im ri konono ilo television im ewõr an iminene. Emol menin emõn melelen. Ak ñan an jukjuk im bed eo an armij etal in wõt juõn im jerammõn, armij ro ej aikwij in wõr juõn air bedbed eo ebin in kien ko remõn ibben armij im rej kalikar ta eo ejimwe ak ebwid, emõn ak nana. Kajitõk eo ej eñin: Ta kien ko remõntata, ñan jukjuk im bed eo im armij ro ie jimor?

Elañe aorõk in mour erreo ko ilo Bible rej kien ko rej bõki, rej aikwij jibañ kajjojo armij ñan tel ilo jokkin wõt juõn, mour ko rekamõnõnõ. Menin ilo an eraklok, enaj kõmman bwe juõn jukjuk im bed in armij ro rej lale aorõk kein ej laplok air mõnõnõ im laplok air jokkin wõt juõn. Eñin ke wãwen eo? Jen etale ta eo Bible ej ba kake kin ruo menin konono ko elap tokjeir: tiljek ilo mour in belele im ilo mour eo emol ran otemjej.

Eddeb ñan Ri Belele eo Rejetõm

Ri Kõmanman eo ad ear kõmanman Adam inem kõmmane Eve bwe en rejetan. Ibben don eo airro kar belele eo jinointata ilo bwebwenato im enaj kar juõn kõtan eo ewõr kijenmij ie. Anij ear ba: “Kin men in leo e naj likit jemen im jinen, im edrep na iben lio belen.” Jet 4,000 yiõ ko tokelik, Jesus Christ ear eliji kien belele in ñan aolep ri kalor ro an. Bareinwõt, ear kananaik mour in ãjãj ilikin mour in family eo.​—Jenesis 1:​27, 28; 2:​24; Matu 5:​27-​30; 19:5.

Ekkar ñan Bible, key ko ruo elap tokjeir ñan juõn belele eo elemõnõnõ rej yokwe im kautiej eo an ri belele ro jimor ñan don. Leo, eo ej jeban mweo, ej aikwij kwalok yokwe eo ejjab kibbon ilo an bukõt tokjen ko remõn ñan lio belen. En jokwe ibben “kin jelalokjen” im ej aikwij jab “jememe” ñan e. Lio en kõmman ñan leo belen kin “mũlal in kautiej.” Elañe ri belele ro rejetan don rej lor nan in kaiñi kein, men ko elap air bin ilo belele eo remaroñ bõpraiki ak ellã ioir. Leo enaj kõnan eddeb ñan lio belen im lio ñan leo belen.​—1 Piter 3:​1-7; Dri Kolosse 3:​18, 19; Ephesians 5:​22-​33, New World Translation.

Kien eo ilo Bible kin tiljek ilo eddeb ñan eo juõn rejetan ewõr ke kunan ñan juõn belele eo ekamõnõnõ? Eokwe, lemnak kin tokjen ko jen juõn etale eo rar kõmmane ilo Germany. Rar kajitõkin armij ro kin ta men ko elap tokjeir ñan juõn belele eo emõn. Juõn ian men ko elaptata tokjen rar kwalok kake kar tiljek eo an ruo armij ñan don. Kwo jamin kar errã ke bwe armij ro ri belele elaplok air mõnõnõ ñe rej jelã bwe eo juõn mõttair ej tiljek?

Ak Ta Elañe ej Walok Abañ ko?

Ak, ta, elañe juõn emaan im lio belen elap men ko rejjab errã ibben don kaki? Ta elañe yokwe eo air ej mejkunlok? Ejjab men eo emõntata in ke ñan kajemlok belele eo iumin wãwen ko einwõt in? Ak kien eo ilo Bible kin tiljek ilo eddeb wõt ñan eo juõn rejetan ej men eo emõn in ke ñan kõmmane?

Ri jeje Bible ro rar kile bwe ri belele ro otemjej enaj wõr air abañ einwõt juõn tokjen eo kin armij jab wãppen. (1 Dri Korint 7:​28) Ak, ri belele ro rej lale kien mour erreo ko ilo Bible rej kajeoñ jolok bwid ko an don im kamadmõdi abañ ko air ibben don. Bwebõta, elõñ wãwen ko​—einwõt lejen ak kokkure enbwin​—ñe juõn Christian emaroñ ilo jejjet lemnak in jenolok ak jebel. (Matu 5:​32; 19:9) Ak ilo mõkaj kajemlok belele eo ilo ejelok lukkun un ak ñan an bar bõk juõn rejetan menin ej kalikar an jab lemnak kin ro jet. Emol ejjab bõktok jokkin wõt juõn ak mõnõnõ ñan mour eo an juõn. Jen bõk juõn wanjoñok.

Peter ear lemnak bwe belele eo an ear luji lañliñ eo juõn ien ear wõr ie.a Kin menin, ear ilok jen ibben lio belen im emmakit lok ñan ibben Monika, eo ear jolok leo belen. Ewi wãwen an kar wãwen ko jerbal? Iloan wõt jejjo alliñ ko, Peter ear kamol bwe jokwe ibben Monika “ear jab kanuij bidodo einwõt aõ kar kõtmene bwe enaj kar.” Etke ear jab bidodo? Likjap ko an armij einwõt an alikar ibben eo mõttan ekãl einwõt kar ibben eo mokta. Ñan kõmman an nanalok wãwen ko, bebe eo an enana im kibbon ear kõmman menin an lap an abañ ikijen money. Bareinwõt ajiri ro nejin Monika, rar eñjake air jorrãn kin bedbed in oktak eo ilo mour in family eo air.

Einwõt an bwebwenato in kameleleiki, ñe juõn belele ej ion abañ jebel ekkã an jab uak eo in. Ilo wãwen eo juõn, ilo jelmae juõn lañ, mour ekkar ñan aorõk in mour erreo eo ilo Nan in Anij, Bible eo, ekkã an maroñ kejbãrok juõn belele bwe en ebbebe wõt im bõktok ñan loan den ko relae. Eñin kar wãwen eo ibben Thomas im Doris.

Thomas im Doris rar belele iumin elõñlok jen 30 yiõ ko ke Thomas ear jino lap an idak den in kadõk. Doris ear bed ilo an inebata, im erro ar konono ñan jebel. Doris ear kwalok abañ eo ñan juõn ian Ri Kennan ro an Jehovah. Ri Kennan eo ear kwalok ñan Doris kin ta eo Bible ej ba kake kin belele, im ear kakajur e ñan an jab mõkaj in jebel ak mokta en jerbal ibben leo belen ñan an kajeoñ in bukõt juõn mejelan. Eñin men eo Doris ear kõmmane. Iloan wõt jejjo alliñ, ear jako air lemnak in jebel. Thomas im Doris rar jerbale abañ eo ibben don. Air lor nan in kakabilek eo ilo Bible ear kakajurlok belele eo air im lelok ien air bukõt mejelan abañ ko air.

Tiljek Ilo Men Otemjej

Eddeb ilo tõmak ñan juõn ri belele eo rejetan ej aikwij kajur ilo kadkadin mour erreo im yokwe nan in kaiñi eo. Ejja kadkad kein wõt rej menin aikwij ñan bed wõt ilo mol ilo juõn lal eo ejjab mol. Elap ijo Bible ej ba kake kin mol. Ri jilek Paul ear jeje ñan Christian ro ilo Judea ilo ebeben eo kein kajuõn: “Kim kõnan bwe am kõmõn en jime ilo men ko otemjej.” (Dri Hibru 13:18) Ta melelen menin?

Juõn armij eo emol ej tiljek im ej anemkwoj jen riap. Emõn an jerbal ibben ro jet​—ejimwe manlok, ej kautiej, jab etao ak telbilo. Bareinwõt, juõn armij eo emol ej juõn eo etiljek eo ejjab kwote armij ro rejetan. Armij ro remol ewõr kunair ñan juõn mejatoto in liki, eo ej tellok ñan lemnak ko rejmour im kalaplok kõtan eo ekajur an armij.

Armij ro remol rej mõnõnõ ke? Eokwe, ewõr unin ñan air mõnõnõ. Meñe ej jededlok nana im kwot​—ak bõlen kin wõt menin​—armij ro remol ro jet rej nebar ir. Ekkar ñan etale eo rar kõmmane ibwiljin jodikdik ro, mol ej juõn mour erreo eo ear lap ibben 70 percent in ro rar uak. Bareinwõt, jabdewõt joñan ritto eo ad, mol ej juõn menin aikwij elap tokjen ibben ro jej watõk ir einwõt ro jerad.

Christine rar katakini ñan an kwot jen ien eo ke ear 12 yiõ dettan. Iumin yiõ ko ear oktak im juõn ri kabel ilo kwot. “Ear wõr ran ko ke I ar bõktok ñan mweo joñan in DM 5,000 [$2,200, U.S.] ilo cash,” kõrã eo ej kamelele. Ak Christine rar jibwe ilo elõñ ien ko, im ekkã an kin mour ilo kauwatata eo ñan air jilkinlok e ñan jikin kalbuj. Ke Ri Kennan ro an Jehovah rar kamelele ñan e kin ta eo Bible ej ba kake kin mol, Christine ear reel ñan kien mour erreo ko ilo Bible. E ar katak ñan bokake nan in kakabilek in: “Eo e ar kwot en jab bar kwot.”​—Dri Epesõs 4:​28.

Tok ñan ien eo Christine ear baptais einwõt juõn ian Ri Kennan ro an Jehovah, ear jako an juõn ri kwot. Ear kate ñan an mol ilo men otemjej, ke Ri Kennan ro rej likit tokjen eo elap ion mol im kadkad ko jet kadkadin Christian. Newspaper eo Lausitzer Rundschau ej report: “Kajin ko kajin mour erreo einwõt mol, jokane, im yokwe ro ri turud rej joñi bwe elap air lap ilo tõmak eo an Ri Kennan ro.” Ewi wãwen an Christine eñjake kin oktak eo ilo mour eo an? “Elaplok aõ mõnõnõ kiõ bwe emwij aõ bõjrak jen aõ kwot. Ij eñjake bwe ña ej juõn uan eo ewõr kautieje ilo jukjuk im bed eo.”

Aolepen Jukjuk im Bed eo ej Bõk Tokjen

Armij ro rej tiljek ñan ro rejetair im ro rej mol ejjab laplok wõt air make mõnõnõ wõt ak ebar wõr tokjeir ñan jukjuk im bed eo. Armij ro rej jerbal ñan ir elaplok air kõnan ri jerbal ro rejjab kwot. Kij aolep jej kõnan bwe en wõr ri turid ro emol air tiljek, im jej kõnan kaikujkuj ilo imõn wia ko an ri business ro remol. Jejjab kautiej ri kien ro, policeman ro, im ri ekajet ro rej ellok jen nana ke? Bukwon eo elap an bõk tokjen ñe ro uan rej kõmanman mwiliir ilo mol einwõt juõn wãwen kien, im jab baj wõt ñe ewõr tokjen ñan air kõmmane.

Bareinwõt, ri belele ro retiljek rej bedbedin family ko jokkair wõt juõn. Im elõñ wõt armij renaj errã ibben ri kien in Europe eo ear keañ: “Family in [manit] eo ej bed wõt ñan rainin ej jikin kone eo elap tokjen ñan jokane im karõk eo an armij.” Ainemõn eo an family eo eburukuk ej ijo ien eo emõntata ñan ritto ro im ajiri ro ñan air bõk eñjake in jokane. Ro rej tiljek ilo belele ilo wãwen in rej jibañ ñan ejaake juõn jukjuk im bed eo jokkin wõt juõn.

Lemnak kin joñan eo jabdewõt armij ej bõk tokjen jene elañe ear ejelok rejetan ro rej ilok jen ir, jebel ilo jikin ekajet, ak case ko kin wõn eo en bõk eddon ajiri eo. Im ta elañe ear etal em ejelok ri kwot ro rej kwot jen armij im ilo jikin kaikujkuj ko, ro rej kwot money, ri kien ro renana, ak scientist ro rej riab ilo air jerbal? Menin ej baj einwõt ainikien juõn ettõnak bajjek wõt ke? Ejjab ñan ro rej bõk juõn itoklimo eo emol ilo Bible im ta eo ej ba kin ilju eo ad. Nan eo an Anij ej kallimur bwe Ailiñ in Messiah eo an Jehovah ejjabto enaj bõk kien eo ion aolep jukjuk im bed eo ion lal. Iumin Ailiñ in aolep armij ro an naj katakin ir ñan mour ekkar ñan mour erreo ko ilo Bible. Ilo ien en, “ro remõn re naj jolit ene eo, im jokwe iloan ñõn in drio.”​—Sam 37:29.

Mour Erreo eo ilo Bible ej Mour Erreo eo Emõntata

Million armij ro emwij air etale Jeje ko rekwojarjar rej kamolol bwe nan in kakabilek eo ilo Bible ej bedbed ion meletlet eo an Anij, eo elaplok an kajur jen lemnak an armij. Armij rein rej lemnak kin Bible einwõt tellokin liki im ekkar ñan mour ilo lal in ad rainin. Rejelã bwe ej tokjen ko remõntata ñan ir ej ñan eoroñ nan in kakabilek eo ilo Nan in Anij.

Eindein, armij rot in rej bõk ñan burueir nan in kakabilek in ilo Bible: “Kwon liki Jeova kin aolepen buruõm, im kwon jab atartar ion jelalokjen eo am. Kwon kwalok E ilo ial ko am otemjelok, inem E naj bakajen ial ko am.” (Jabõn Kennan 3:​5, 6) Air kõmman eindein, elaplok air kõmanmõnlok mour ko air make, im bareinwõt ro ibelakiir rej bõk tokjen. Im rej ejaake juõn liki eo ebin “ilo mour . . . eo ej itok,” ñe mour erreo eo ilo Bible armij otemjej rej lore.​—1 Timote 4:⁠8.

[Kamelele eo itulal]

[Pija]

Ilo jelmae juõn lañ in belele, mour ekkar ñan kien ko ilo Bible emaroñ ekkã an kejbãrok juõn belele bwe en ebbebe wõt im bõktok ñan loan den ko relae

[Pija]

Meñe nana ej jededlok wõt​—ak bõlen kin wõt nana​—armij ro remol ro jet rej nebar ir