Kejbãrok Wõt “To eo Jilu Idren” ilo Mour in Mare Eo
“To eo jilu idren ebin timi.”—EKK. 4:12, UBS.
1. Wõn eo ear kõmareik armij ro moktata?
ELIKIN an kar kõmanman menin eddek im menin mour ko, Jehovah ear kõmanmane armij eo moktata, Adam. Tokelik, Anij ear kakikiik Adam im kajerbal juõn dii jen katin ñan kõmmane juõn an ri jibañ ewãppen. Elak lo lio, Adam ear ba: “E in kiõ drin driõ, im kõniekin kõniekiõ.” (Jen. 1:27; 2:18, 21-23) Jehovah ear kwalok an buñburuen kin an kar kõmmane lio, im ear kõmareik im kajerammõn erro.—Jen. 1:28; 2:24.
2. Ewi wãwen Satan ear rupe bed eo ikõtan Adam im Eve?
2 Buromõj bwe tokelik kar jumaik karõk eo an Anij kin mare. Ewi wãwen? Juõn jitõb enana naetan Satan, ear mone Eve bwe en mõñã jen wijki eo emwij kamoik air mõñã jene. Ejjabto tokelik, Adam ear errã ibben lio belen ilo an jumae maroñ im tel eo an Anij emõn. (Jen. 3:1-7) Ke Jehovah ear kajitõk ibben Adam im Eve kin men eo rar kõmmane, ealikar bwe emwij an rup bed eo air. Adam ear naruõn lio belen, ke ear ba: “Kõra eo Kwar letok bwe en ber iba, e ar letok ñõn iõ jen wijki eo, im I ar mõñã.”—Jen. 3:11-13.
3. Ta lemnak ko rebwid jet Ri Jew ro rar bõki?
3 Jen ien eo liktak, Satan ear kajerbal elõñ kain kõl ko retao ñan kokkure kõtan ko an ri belele ro. Ñan wanjoñok, jet ien ear kajerbal ri tel in kabuñ ro ñan kowõnmanlok lemnak ko rejjab bedbed ion Bible kin mour in mare. Jet ri tel ro an Ri Jew ro rar kajettokjen kien ko an Anij im kamelim an leo jolok lio belen kin men ko ejelok unir, einwõt kin an lap an kar lio salt e mõñã ko. Ak Jesus ear ba: “Jabrewõt eo e naj jolok lio belen, elañe e jab kin lũñ, im e naj belek bar juõn, ej lũñ: im eo ej beleik lio ar jolok e ej lũñ.”—Mat. 19:9.
4. Ilo wãwen et emwij kajeoñ rupe karõk eo an Anij kin mour mare rainin?
4 Ñan kiõ elap an Satan boub ilo an kajeoñ im rupe bed ko ikõtan ri belele ro. Ñan kamol bwe elap tõbrak ibben, rainin emelim an emaan ñan emaan im kõrã ñan kõrã mare. Bareinwõt emelim an ro rejañin mare jokwe ibben don kap ebidodo an armij jebel. (Read Dri Hibru 13:4.) Ta eo jemaroñ kõmmane einwõt Ri Christian ro, bwe jen jab bo ilo lemnak ko rebwid kin mour in mare? Jen etale jet wãwen ko rej kalikar juõn mour in mare elemõnõnõ im elap tõbrak ie.
Jehovah En Bedwõt ilo Mour in Mare Eo
5. Ta melelen nan in kõkkar in “to eo jilu idren” ikijen mour in mare?
5 Enaj aikwij wõr kunan Jehovah bwe mour in mare eo en jerammõn. Nan ko an rej ba: “To eo jilu idren ebin timi.” (Ekk. 4:12, UBS) “To eo jilu idren” ej juõn nan in kõkkar. Ñe jej kajerbal wanjoñok in ikijen mour in mare, leo im lio rej einwõt to ko ruo emwij ilele ibben to eo iolap, eo ej Jehovah Anij. Air juõn wõt ibben Anij ej kamaroñ ri belele ro bwe ren jelã kilen wõnmaik abañ ko kin air kajur ilo jitõb. Men in ej key eo eaorõk ñan bõk mõnõnõ eo elap ilo mour in mare eo air.
6, 7. (a) Ñan kamol bwe Anij ej bed ilo mour in mare eo air, ri belele ro ren kar et? (b) Ta eo juõn sister ej kaorõke kin leo belen?
6 Ñan kamol bwe mour in mare eo air ej einwõt juõn to me jilu iden, ri belele ro ren kar et? Ri jeje sam, David ear al: “I lõñliñ in kõmõnmõn ankil Am, O aõ Anij, aet kiõm ej ber iloan buruõ.” (Sam 40:8) Eindein, yokwe eo ad ñan Anij en kar kamakit kij ñan karejar ñan e kin juõn buru eyu. Inem, leo im lio jimor rej aikwij kaddeklok juõn kõtan ebak ibben Jehovah im lo mõnõnõ ilo air kõmanman ankilan. Ri belele ro ren kate im kakajur yokwe eo an eo rejetair ñan Anij.—Ken. 27:17.
7 Elañe emol bwe kien Anij ej bed iloan buruõd, jenaj kwalok kadkad kein einwõt tõmak, kejatdikdik, im yokwe. Men kein renaj jibañ ñan kakajurlok lukluk in mare eo. (1 Kor. 13:13) Juõn Ri Christian etan Sandra, im 50 yiõ ko in an mare, ej ba: “Men ko raorõktata ibba kin leo beleiõ rej nan in tel im kakabilek ko ilo jitõb ej litok ñan ña. Bareinwõt yokwe eo an ñan Jehovah me ekajurlok jen yokwe eo an ñan iõ.” Lõmaro, emaroñ ke eindein air ba kin kom?
8. Ñan bõk ‘juõn wõnan emõn,’ ta menin aikwij eo ilo juõn mour in mare?
8 Kom ri belele ro, kõtan eo ami ibben Jehovah im makitkit ko an Ri Christian ro, rej ke moktata ilo ami mour? Bareinwõt, emol ke am watõk beleõm einwõt eo mõttam ilo amiro karejar ñan Jehovah? (Jen. 2:24) Ri meletlet eo King Solomon, ear je: “Ruo remõnlok jen juõn; bwe ibeir emõn wõnan jerbal eo air.” (Ekk. 4:9) Emol, ri belele ro rej aikwij in lukkun kate ir im jerbal bwe ren bõk ‘juõn wõnan emõn,’ eñin air juõn wõt ibben Anij ilo yokwe ñan indio.
9. (a) Ta eddo ko an lõmaro? (b) Ta eo Bible ej ba ikijen wãwen an leo jerbal ibben lio belen?
9 An leo im lio kate wõt im mour ekkar ñan kien ko an Anij, men in ej kalikar bwe Anij ej bed ilo mour in mare eo air. Eddo eo elap ej bed ibben lõmaro ñan kabwe aikwij ko an family eo ilo kanniek im ilo jitõb jimor. (1 Tim. 5:8) Bareinwõt, rej aikwij in lemnak kin aikwij ko an limaro beleir ikijen eñjake ko air. Jej read: “Lõma, komin yokwe limaro belemi, im jab jememe ñõn ir.” (Kol. 3:19) Juõn ri meletlet im ri etale Bible eo ear kamelele bwe nan eo “jememe” ak illulu ej kitibuj air ba nan ko rekõmetak im air jab kwalok yokwe ak kea kin limaro. Ebar kitibuj air jab jibañ im kejbãrok ir im jab kabwe aikwij ko air. Alikar, kadkad rot kein renana rejõkkar ñan juõn family in Ri Christian. Ñe leo ej jerbale maroñ in tel eo an ilo yokwe, lio enaj mõnõnõ in kõttãik e ñan tel eo an.
10. Kain lemnak rot limaro rej aikwij kwaloke?
10 Limaro me rekõnan bwe Jehovah en bed ilo mour in mare eo air, ir bareinwõt rej aikwij mour ekkar ñan kien ko an Anij. Ri jilek Paul ear je: “Kõra ro, komin kõtãik kom ñõn lõmaro belemi, einwõt ñõn Iroij. Bwe leo e bõran lio belen, einwõt Kraist e bõran eklisia.” (Ep. 5:22, 23) Satan ear mone Eve, im ear kowõnmanlok nan in riap eo bwe jenolok jen Anij enaj bõktok mõnõnõ ñan indio. Ilo ran kein, jej lo ejja jitõbõn jenolok in ibben elõñ ri belele ro. Bõtab, ibben limaro im rej mijak Anij ej juõn men emõn bwe ren kõttãik ir ñan bõr eo bõrair ejoij. Rej kememej bwe Jehovah ear kãlet Eve bwe en “rajitan” leo belen, juõn jerbal eaorõk ibben Anij. (Jen. 2:18) An lio mõnõnõ in bõk jerbal in jen Anij men in ej kamol bwe ej “rojen bõran leo belen.”—Ken. 12:4.
11. Ta eo juõn brother ej ba bwe ear jibañ mour in mare eo an?
11 An ri belele ro katak Nan in Anij ibben don ej bar juõn wãwen ñan jibañ ir bwe Anij en bedwõt ilo mour in mare eo air. Juõn brother etan Gerald, ear lo mõnõnõ ilo mour in mare eo an iumin 55 yiõ, ej ba: “Read im katak Bible ibben don ej men eo eaorõktata ilo mour in mare eo me ewõr tõbrak ie. Bareinwõt kõmmani men ko ibben don, elaptata men ko lor jitõb, rej karuaklok ri belele ro ñan don im ñan Jehovah.” Katak Bible ibben don ej jibañ leo im lio ñan debij kien ko an Jehovah im kakajurlok kõtan ko air Ibben. Ej bar jibañ ir bwe ren wõnmanlok wõt ilo jitõb.
12, 13. (a) Etke elap an aorõk bwe ri belele ro ren jar ibben don? (b) Ta makitkit ko jet ilo jitõb renaj kakajurlok mour in mare eo?
12 Ri belele ro rej lo mõnõnõ rej bareinwõt jar ibben don. Ñe leo ej ‘kwalok buruen’ ikijen kajitõk ko me rejejjet im ekkar ñan wãwen airro bed, ilo jemlokin enaj kabin lukluk in mare eo air. (Sam 62:8) Ñan wanjoñok, enaj bidodolok ñan kamadmõd jabdewõt abañ ikõtan leo im lio elikin airro kajitõk tel ibben Eo Ekajur Bõtata! (Mat. 6:14, 15) Ñan jerbale jar eo airro, ekkar bwe leo im lio ren beek ilo burueir bwe ren jibañ don im “meamiwõr ñõn dron, im jeorilok nana jen dron.” (Kol. 3:13) Kememej wõt bwe am jar ej kalikar am atartar ion Anij. King David ear ba: “Mejeir otemjej rej kõtar Yuk.” (Sam 145:15) Ñe jej atartar ion Anij ikijen jar, enaj diklok inebata ko ad, kin ad jelã bwe ‘Ej ierki kij.’—1 Pit. 5:7.
13 Bar juõn wãwen eaorõk bwe Jehovah en bedwõt ilo mour in mare eo ej ilo ad keini ien kwelok ko an congregation eo im kwalok nan ibben don. Ilo kwelok ko ad, ri belele ro rej katak kilen jumae “etao ko” an Satan me ej kajerbali ñan kejebel family ko. (Ep. 6:11) Bareinwõt leo im lio me rej ekkeini air kwalok nan ibben don rej katak kilen “jutak bin im jab ebbwer.”—1 Kor. 15:58.
Ñe Abañ ko Rej Walok
14. Ta men ko remaroñ kõmman bwe en wõr abañ ko ilo mour in mare?
14 Emol, nan in kakabilek ko rej walok ilõñ remaroñ jab kãl ibbam. Bõtab etke kwojjab bwebwenato kaki men kein ibben eo beleõm? Lale ñe kwoj aikwij in kõmman kajimwe ko bwe kwon lukkun jerbali jet ian nan in kakabilek kein ilo mour in mare eo am. Bible eo ej make kwalok bwe meñe Anij ej bed ilo mour in mare eo an ri belele ro “e naj eor [wõt] iñtan ibeir ilo kõniek.” (1 Kor. 7:28) Ilo mour in mare ko an ri karejar ro retiljek an Anij renaj bareinwõt iion abañ ko. Ej eindein kinke rejjab wãppen im kinke rej jelmaik kareelel ko renana an lal in im aujid ko an Devil eo. (2 Kor. 2:11) Ak Jehovah ej kakajur kij ñan kijenmij wõt iumin abañ rot kein. Aet, jemaroñ lo tõbrak. Job ear juõn armij etiljek bõtab ear luji menin mour ko an, ri karejar ro an im ajiri ro nejin. Bible eo ej ba: “Meñe men kein otemjej rar walok ñan Job, ak ear jab jerawiwi im notaik Anij.”—Job 1:13-22.
15. Ewi wãwen inebata ko remaroñ jelet armij ro im ewi kõl eo emõntata ñan an ri belele ro kamadmõde abañ kein?
15 Ñe keidi Job ñan lio belen, lio ear ba ñan e: “Kwoj kejbãrok wõt am wãnik ke? kwon karmijete Anij im mij.” (Job 2:9) Aet, ilo mol ñe jerata im wãwen ko jet rebin rej walok, inebata ko remaroñ kõmman bwe juõn armij en iten bwebwe. Ri meletlet eo ear kile: “Koaroñ ej kõmõn bwe juõn dri meletlet en einwõt dri bwebwe.” (Ekk. 7:7) Elañe “koaroñ” ak iñtan rot in ej kamakit eo beleõm bwe en eddo an konono ñan yuk, kwon ainemõn wõt. Am ukõt nana kin nana emaroñ kamakit juõn iamiro ak komro jimor ñan kalaplok biuktak eo. (Read Sam 37:8.) Inem, jab watõk jabdewõt ‘nan in jajelokjen’ ko remaroñ walok kin an juõn illu ak ebwer.—Job 6:3.
16. (a) Ewi wãwen nan ko an Jesus ilo Matu 7:1-5 ej jerbal ñan mour in mare? (b) Etke elap an aorõk ñan jokkin wõt juõn ilo mour in mare?
16 Ri belele ro en mol men ko rej kõtmene kaki jen don. Leo ak lio remaroñ kile jet iminene ko an eo beleir im baj lemnak, ‘Imaroñ ukõte.’ Ilo am kwalok yokwe im meanwõd, kwomaroñ jibañ eo beleõm jidik kin jidik ñan kõmman oktak ko. Bõtab, jab meloklok bwe Jesus ear keidi juõn armij ej lale wõt likjap ko redik an bar juõn ñan eo ej kalimjek “belok” eo iloan mejen jein im jatin ak ejjab kalimjek “wijki”eo ilo mejen. Jesus ej rejañ kij: “Komin jab ekajet bwe en jab ekajet kom.” (Read Matu 7:1-5.) Ejjab melelen bwe leo im lio ren kajekdon likjap ko relap. Robert, eo enañin 40 yiõ in an mare, ear ba: “Ñe ri belele ro rejjab ãliklik in kwalok burueir ñan don im mõnõnõ in bõk kajimwe ko kin bwid ko rej loi, men in emaroñ kitibuj air kõmman oktak ko ilo air mour.” Inem kwon jokkin wõt juõn. Emõn kwon kalaplok am kamolol im lañliñ kin kadkad ko remõn an eo beleõm jen am lemnak kin kadkad ko ejelok ibben kiõ.—Ekk. 9:9.
17, 18. Ñe abañ ko rej laplok wõt, ia eo jemaroñ bõk jibañ jene?
17 Melejoñ ko remaroñ walok ñe wãwen ko ilo mour rej oktak. Ri belele ro remaroñ jelmaiki melejoñ ko ñe ewõr nejiir ajiri. Bõlen eo beleõm ak ajiri eo nejõm emaroñ bõk juõn nañinmij elap. Ritto ro jemõm im jinõm remaroñ aikwij jibañ kin air bwijwõlã. Ro nejõm reritto remaroñ emmakit ñan juõn jikin etolok. Oktak ko jet remaroñ itok jen ad bõk jerammõn ko im eddo ko relaplok ilo congregation eo. Aolep oktak kein remaroñ kõmman bwe en wõr inebata ko ikõtan ri belele ro.
18 Ta eo kwomaroñ kõmmane elañe abañ ko ilo mour in mare eo am rej kõmman bwe en iten maat am maroñ? (Ken. 24:10) Kwon jab ebwer! Satan ekõnan bwe ro ri karejaran Anij ren illok jen kabuñ eo erreo. Enaj laplok an Satan mõnõnõ elañe ri belele ro rej kõmman eindein. Kin men in, kwon kamaat joñan wõt am maroñ bwe mour in mare eo am en wõnmanlok wõt einwõt juõn to jilu iden. Elõñ bwebwenato ko ilo Bible kin ro rar debiji air tiljek iumin iñtan ko relap. Ñan wanjoñok, ilo juõn ien, David ear kwalok buruen ñan Jehovah im ba: “Kwon tiriamokake iõ, O Anij, bwe armij eo e . . . matõrtõr iõ.” (Sam 56:1) Kwonañin ke kar bõk matõrtõr jen “armij”? Jekdon ia abañ eo ej itok jene, meñe jen juõn eo kwojjab ebake ak jen juõn kwoj ebake, kememej bwe David ear bõk kajur im kijenmij wõt, im bar kwe kwomaroñ. David ear ba, “I ar kabukot Jeova, im E ar uak iõ, im E ar lomor iõ jen aõ mijõk otemjej.”—Sam 34:4.
Jerammõn ko Jet
19. Ewi wãwen jemaroñ kejbãrok bwe jen jab bo ilo aujid ko an Satan?
19 Ilo ien kein eliktata, ri belele ro rej aikwij wõnmanlok wõt im “kainemõne dron, im kalek dron.” (1 Tes. 5:11) Jab meloklok, Satan ejamin bõjrak an ba bwe tiljek eo ad ñan Jehovah ej bedbed ion ad kibbon. Enaj kajerbal jabdewõt men, ekoba kajorrãn mour in mare eo ñan an kokkure tiljek eo ad. Bwe jen jab bo ilo aujid ko an Satan, jej aikwij in liki Jehovah kin aolepen buruõd. (Ken. 3:5, 6) Paul ear je: “I maroñ in kõmõn men otemjej ilo Eo ej kakajur iõ.”—Pil. 4:13.
20. Ta jerammõn ko rej itok jen an juõn kõmman bwe Anij en bedwõt ilo mour in mare eo an?
20 Elõñ jerammõn ko rej itok jen ad likit Anij ilo mour in mare eo ad. Men in ear mol ibben Joel im lio belen me 51 yiõ in airro mare. Lein ej ba: “Ekkã aõ kamolol Jehovah kin lio beleiõ im jimjera eo amro ekamõnõnõ. Elukkun emõn lio beleiõ.” Ta men eo ear kabin mour in mare eo airro? Ej wõnmanlok im ba: “Aolep ien kimij kate kim ñan kwalok joij, meanwõd, im yokwe ñan don.” Kin ad jab wãppen ejelok juõn iad enaj maroñ kajejjet men in ilo jukjuk im bed in. Ak, jen kate wõt kij ñan jerbali nan in kaiñi ko ilo Bible im kõmman bwe Jehovah en bedwõt ilo mour in mare eo ad. Elañe jej kõmman eindein, inem mour in mare eo ad enaj einwõt “to eo jilu idren ebin timi.”—Ekk. 4:12, UBS.
Kwoj Kememej Ke?
• Ta melelen an ba bwe Jehovah en bedwõt ilo mour in mare eo?
• Ri belele ro ren kar et ñe abañ ko rebin rej walok?
• Ewi wãwen ad jelã ñe Anij ej bedwõt ilo mour in mare eo?
[Pija ko ilo peij 18]
An ri belele ro jar ibben don ej jibañ ir ñan jelmae abañ ko rebin