Aolepen Lal Ear Jako!

Kwon lale lal eo ibelakõm, koba jikin kwelok ko an, manit ko an, tõbrak ko an kin science, elõñ billion armij ro an. Ebidodo ñan kile bwe ej juõn jikin ej bedwõt ñan indio ejjab ke? Kwoj lemnak ke bwe juõn ran lal in emaroñ jako otem jako? Emaroñ bin ad lo men in. Bõtab, kwonañin jelã ke bwe ekkar ñan juõn ennan emol, ear wõr bar juõn lal mokta jen lal in im ear jako otem jako?

KIMIJ jab konono kin juõn lal kin bwijin armij ro etto im jaje manit. Lal eo ear jako rar jelã manit, kar wõr jikin kwelok ko ie, tõbrak ko kin kabel ko air, im jelãlokjen kin science. Ak, Bible eo ej jiroñ kij bwe ilo idiñ, ilo ran eo kein ka 17 ilo alliñ eo kein ka 2, 352 yiõ ko mokta jen an Abraham kar lotak, juõn ibwjileplep ear kokkure aolepen lal.a

Bwebwenato in ear mol ke? Men in ear lukkun walok ke? Kar wõr ke juõn lal etto mokta jen lal in eo ear lap tõrak ko ie inem ear jako tokelik? Elañe aet, etke ear jako? Ta abañ eo ear walok? Im ewõr ke jabdewõt men jemaroñ katak kake jen kokkure eo an?

Juõn Lal Etto Ear Lukkun Jako Ke?

Kain jorrãn rot in ekabwilõñlõñ, elañe ear lukkun walok, ejjab juõn men ebidodo ñan meloklok e. Kin men in, ilo elõñ ailiñ ko ewõr men ko ñan kakememej kij kin jorrãn eo. Ñan wanjoñok, lale ran eo ejejjet ear jeje kake ilo Bible eo. Alliñ eo kein ka ruo ilo calendar eo etto ear ijjino jen tu-iolapen-October ñan tu-iolapen-November. Inem ran eo kein ka 17 ej ran eo kein kajuõn in November. Ejjab juõn men ej jirilok im walok, bwe ilo elõñ ene ko, rej kõmman kwojkwoj ko ñan ro remij ilo tõre eo.

Kein kamol ko jet kin Ibwijleplep eo rej bed ilo manit ko an armij ro. Enañin aolep jar in armij ro etto kar wõr juõn inoñ ibbeir bwe ro nukiir mokta rar ellã im mour jen juõn ibwijleplep ibelakin lal. Armij ro einwõt, Ri Africa Pygmy, Ri Europe Celt ro, Ri Inca ro ilo South America​​—⁠aolep kar wõr inoñ ko einlok wõt in, im kar eindein armij ro ilo Alaska, Australia, China, India, Lithuania, Mexico, Micronesia, New Zealand, im jet jikin ko ilo North America, ñan kwalok kin jejjo wõt armij.

Emol, tokelik, rar kalaplap inoñ ko, ak ir aolep rar kakobaik jet tibdik ko rej kalikar juon wõt lemnak: Anij ear illu kin nana eo an armij. Ear bõktok juõn ibwijleplep. Armij ro rar mij. Bõtab, jejjo wõt armij rewãnik rar ellã im mour. Rar jeke juõn wa ijo armij im men in mour ko jimor rar lomor jen ibwijleplep eo. Tokelik, rar kõtlok bao ko bwe ren ekkãki im kabukõt ene ko remõrã. Eliktata, wa eo ear jok ion juõn tol. Ke rar to jen wa eo, armij ro rar katok juõn men in katok.

Ta eo men in ej kamole? Eñin bwe men kein rejjab jirilok im walok wõt. Ñe jej koba aolep men in kamol ko kin inoñ kein rej rejetak bwebwenato eo an Bible eo bwe armij otemjej rar itok jen ro rar ellã im mour jen juõn ibwijleplep eo ear kokkure juõn lal in armij. Eñin unin, jejjab aikwij atartar ion inoñ ko ñan jelã ta eo ear walok. Ewõr ibbed jeje ko an Bible ilo kajin Hebrew rar kejbãroki.​​—⁠Jenesis, chapter ko 6-8.

Ewõr ilo Bible eo juõn lokbook in bwebwenato eo emwij kakõrmole ear kwalok bwebwenato ko jen jinoin mour an armij. Bõtab, men in kamol ko rej kamoli bwe ej juõn men elaplok jen juõn book in bwebwenato wõt. Nan in kanan eo ejelok likjap ie im meletlet eo emũlal rej kabin ta eo ej ba​​—⁠wãwen an Anij konono ñan kij. Jab einwõt inoñ ko, ewõr ãt ko etan armij im ran ko rejejjet ilo Bible eo im ewõr lajrak in family ko im tibdik ko kin jikin ko ekkar ñan bwebwenato ko. Ej kwalok juõn pija kin ta eo mour ear einwõt mokta jen ien Ibwijleplep eo im kalikar kin etke juõn lal in armij eyu ear jako ilo jidimkij.

[Kamelele eo itulal]

[Chart ilo page 4]

(Ñan lale pija eo, jouj im lale ilo bok eo.)

Inoñ Ko kin Ibwijleplep eo Ibelakin Lal