Naan in Tõl ko ilo Baibõl̦ Rejejjet ñan Raan Kein
“Am̦ in naan e lamp ñan neõ, im meram ñan aõ ial̦.”—SAM 119:105.
EWI WÃWEEN AN BAIBÕL̦ EO OKTAK? Jet bok remaroñ lukkuun em̦m̦an, ak rejjab letok naan in tõl ko im remaroñ jipañ kõj ilo mour ko ad. Im bok ko ilo raan kein me rej letok naan in tõl ko ñan jel̦ã ta eo jen kõm̦m̦ane, enañin aolep iien rej kõkããle mel̦el̦e ko ie. Bõtab, eoktak Baibõl̦ kõnke ej ba bwe “jabdewõt men ko ar jeje m̦okta, ar jeje kein katakin kõj.”—Rom 15:4.
JUON WAANJOÑAK: Meñe Baibõl̦ eo ejjab juon bok in taktõ, ak ewõr naan in tõl ko ie ñan jipañ kõj bwe en em̦m̦an ãjmour eo ad im jen jab bũrom̦õj im inepata. Ñan waanjoñak, ej ba bwe “bõro eo eaenõm̦m̦an ej kõm̦m̦an bwe ãnbwin eo en ãjmour.” (Jabõn Kõnnaan 14:30, UBS) Im Baibõl̦ eo ej kakkõl kõj: “Eo ej makel̦o̦k iaan, ej kappukot kõn̦aan eo an wõt; im ej abwin eo̦roñ naan in mãlõtlõt.” (Jabõn Kõnnaan 18:1) Ak, Baibõl̦ eo ej bareinwõt ba bwe “el̦apl̦o̦k m̦õn̦õn̦õ ilo lel̦o̦k jãn bõk.”—Jerbal 20:35, UBS.
MEN KO RI ETALE RO RAR LOI: El̦aññe kwõj aenõm̦m̦an, jouj, im ewõr ro jeram̦ kwõj epaake er, men kein renaaj kakõm̦m̦anm̦anl̦o̦k ãjmour eo am̦. Juon nuujpeba etan The Journal of the American Medical Association ej ba: “Em̦m̦aan ro me rej bũroñ ñe rej illu epidodol̦o̦k aer bõk nañinmej in stroke jãn em̦m̦aan ro me rejel̦ã dãpij aer illu.” Ilo Aujtõrõlia, rar ekkatak ium̦win joñoul iiõ im lo bwe ñe rũtto ro rej “kõnono im bwebwenato ippãn ro m̦õttaer im ro jet me remaroñ kwal̦o̦k bũrueer ñan er,” men in ej kõm̦m̦an bwe en tol̦o̦k aer mour. Im ilo 2008 eo, ri etale ro jãn Canada im Amedka rar ekkatak im lo bwe ñe juon “ej jake jepel eo im kõjerbal jããn ko an ñan jipañ ro jet, men in ej kõm̦m̦an bwe en l̦apl̦o̦k an m̦õn̦õn̦õ jãn ñe ej kõjerbali jããn ko an ñan e make.”
EWI WÃWEEN AM̦ L̦ÕMN̦AK? Ewõr ke bar juon bok ijello̦kun Baibõl̦ eo, me meñe enañin 2,000 iiõ in an pãd, ak kwõmaroñ lõke bwe naan in tõl ko ie renaaj jipañ kakõm̦anm̦anl̦o̦k ãjmour eo am̦?
[Blurb ilo peij 8]
“El̦ap aõ tõmak Baibõl̦ eo . . . kõnke ej letok naan in tõl ko rekanooj em̦m̦an im remaroñ jipañ kõn ãjmour ko ad.”—HOWARD KELLY, M.D., RI JERBAL IN JUON JIKUUL̦ IN TAKTÕ ETAN THE JOHNS HOPKINS UNIVERSITY SCHOOL OF MEDICINE