Paradise Ej Ebak!

Men ko renana rej walok ion lal kiõ rej kwalok bwe Paradise eo ebak. Bible eo ej ba bwe jenaj lo ien ko renana mokta wõt jen an Paradise eo itok. Jej mour ilo ien rot kein kiõ! Erkein jet ian men ko Bible eo ear ba bwe renaj walok:

Tarinae ko relap. “Dri ailiñ ko renaj jutõk mae dri ailiñ, ailiñ in kiñ mae ailiñ in kiñ.” (Matu 24:7) Nan in kanan in ear jejjet kitien. Jen yiõ eo 1914, kar wõr ruo tarinae ko ibelakin lal im elõñ tarinae ko redik. Elõñ million armij rar mij kin tarinae kein.

Nañinmij ko rejededlok. Enaj wõr “nañinmij ko relap” ijoko otemjej. (Luk 21:11) Men in ear jejjet kitien ke? Aet. Cancer, nañinmij in menono, tuberculosis, malaria, AIDS, im nañinmij ko jet rar urõte elõñ million armij ro.

Ejabwe mõñã. Ibelakin lal elõñ armij ejabwe kijeir ñan mõñã. Elõñ million armij rej mij kin jabwe mõñã yiõ otemjej. Eñin bar juõn kakõlle bwe mõttan wõt jidik Paradise eo enaj itok. Bible eo ej ba: “E naj or ñitta.”​—Mark 13:8.

Makitkit lal. “E naj or . . . makõtkit lõl ilo jet ene.” (Matu 24:7) Men in ear walok bareinwõt ilo ran kein ad. Elõñlok jen juõn million armij rar mij kin makitkit lal ko jen 1914.

Armij ro renana. Armij ro renaj “arõk mõnni” im “yokwe ir make.” Renaj “yokwe men in kamõnõnõ ko im jab yokwe Anij.” Ajiri ro renaj “kiblia ñõn jemeir im jineir.” (2 Timothy 3:1-5, New World Translation) Kwojjab errã ke bwe elõñ armij rej eindein rainin? Ejelok air kautiej Anij, im rej kabañ ro rekõnan katak kin Anij.

Kowadoñ. Bareinwõt enaj laplok “nana.” (Matu 24:12) Bõlen kwonaj errã bwe kowadoñ ej laplok kiõ jen yiõ ko mokta. Armij ro ijoko otemjej rej bed ilo kauwatata bwe rej kwot jen ir ak kajorrãn ir.

Men kein otemjej rej kwalok bwe Ailiñ eo an Anij ej ebak. Bible eo ej ba: “Ñe komij lo men kein re walok, komin jela bwe ailiñ in Anij ebak.” (Luk 21:31) Ta in Ailiñ in Anij? Ej kien eo an Anij ilañ eo enaj bõktok Paradise eo ñan lal in. Ailiñ eo an Anij enaj bõk jikin kien ko an armij.​—Daniel 2:44, NW.