Bebe ko Am Rej Errã Ke Iben Karõk eo an Anij?

JUÕN bao etan Clark’s nutcracker me emõn ainiken im unokan ej einwõt ubaj, ej kãto-ketak ibulen wijki ko ilo jet ailiñ ko ilo Amerika. Kajuju yiõ ej ain joñõn in 33,000 inen wijki ko, im ej kalbwini ilo enañin 2,500 jikin ko ñõn keboji ñõn ien añõneañ. Ilo mol, bao in e “kanuij meletlet” ilo an kõmõn jortoklik ko ñõn ilju eo an.​—Jabõn Kennan Ko 30:24.

Eor iben armij maroñ eo ejejuan. Ian aolep menin kõmõnmõn ko an Jeova ion lõl, eor iben armij maroñ eo eutiejlok ñõn katak jen wãwen ko rar walok mokta ñõn jibõñ ir beek ilju eo air. “Elõñ lemnok ilo buruen armij,” leo emeletlet King Solomon ear ba.​—Jabõn Kennan Ko 19:21.

Meñe eindein, ekkã an armij ro kõmõn bwe bebe ko air ren wawa ion ta eo rej baj lemnok wõt enaj walok ilju im jeklaj. Ñõn wanjoñok, kwoj kõmõn bebe kin makõtkit ko am ilju im kõtmene bwe al enaj tak im kwonaj mour wõt. Alikar, jej tõmak bwe al enaj tak ak ejjab alikar elañe jenaj mour manlok ak jab. Ilo mol, dri jeje Baibel eo Jemes ear kamole men in ilo an ba: “Kom jaje ta eo e naj walok ilju.”​—Jemes 4:​13, 14.

Ejjab wãwen dein iben Jeova Anij. Ejela “jemlokõn jen jinoin.” Ejelok bere bwe men eo ear karõke enaj jejit wõt kitien. “Aõ bebe e naj jutõk,” ej ba, “im I naj kõmõn aolepen kõnan ko Aõ.” (Aiseia 46:10) Bõtab, ta eo enaj walok ñe bebe ko an armij rej idaptõk iben karõk ko an Anij?

Ñe Bebe ko an Armij Rej Kajekdon Karõk eo an Anij

Ilo 4,000 yiõ ko remotlok, ro rar kalek Imõn Bar eo Eutiej ilo Babel rar bebe bwe armij ro ren jab jebliklok. Im rar ba: “Itok, jen kalek ar jikin kwelok, im juõn imõn bar eutiej ñõn lõñ, im jen kabuñbuñ etar; bwe jen jab jibliklik ion mejen aolepen lõl.”​—Jenesis 11:4.

Bõtab, karõk eo an Anij kin lõl in ear oktõk. Ear kakien Noa im lõmaro nejin: “[Komin] orlok, im bar kobrõk lõl.” (Jenesis 9:1) Ewi wãwen an kar Anij kamadmõde jibadbad ko an dri jumae ro ilo Babel? Ear bukwõj kajin ko air bwe ren jab maroñ konono iben dron. Ta eo ear walok? “Ein drein Jeova e ar kijibliklik ir jen ijo ion aolepen mejen lõl.” (Jenesis 11:​5-8) Ro rar kalek Babel rar aikwij bõk juõn katak eaorõk. Ñe ej oktak bebe eo an armij jen karõk eo an Anij, “bebe [eo] an Jeova e naj bin wõt.” (Jabõn Kennan Ko 19:21) Kwoj kõtlok ke bwe katak ko rar walok ilo ien ko mokta ren tel mour eo am?

Emaan eo Emweie Ebwebwe

Kwomaroñ jab bebe ñõn kalek juõn im eutiej, ak rainin elõñ rej bebe ñõn korlok jããn im mweiuk ko ibeir bwe ñe renaj ridto im bwijrõk air jerbal remaroñ bõk juõn mour elukkun emõn. Eñin ej biktokin armij ro ñõn lañliñ kin leen jerbal ko air. Solomon ear je, “Jabrewõt armij en mõña im irak, im lõñliñ ilo tokjen aolepen jerbal eo an, eñin men in lelok jen Anij.”​—Ekklisiastis 3:​13.

Jej aikwij uak ñõn Jeova kin ewi wãwen jej kajerbal menin letok in. Enañin 2,000 yiõ ko remotlok, Jisõs ear kalikar point in ñõn dri kalor ro an kin melelen parable eo. Ear ba: “Im Ej konono parebõl ñõn ir, im ba, Jikin kallip ko an juõn armij emweie elõñ air jebar leen: Im ej bebe ilo buruen im ba, Ta eo I naj kõmõne, bwe ejelok jikin ijo ij aini leen ko aõ? Im e ba, I naj kõmõn men in; I naj jelate mo ko imõn ekõn eo aõ, im kalek ko jet relaplok; im ilo ir I naj aini aõ korn im mweiõ otemjej. Im I naj ba ñõn aõ, Aõ, elõñ mweiuk ko mweiõm emwij pojõk ñõn elõñ yiõ; kwon kakije, mõña, irak im lõñliñ.” (Luk 12:16-​19) Kõtõbar eo an dri mweie eo ear ke juõn men emeletlet? Einwõt bao eo kar konono kake moktalok, Clark’s nutcracker, emaan eo ilo parable in ear keboj e ñõn ilju eo an.

Bõtab ear bwir lemnok eo an leo. Jisõs ear wõnmanlok im ba: “A Anij e ba ñõn e, Kwo bwebwe, boñinin naj kajitõk ibõm kin am; inem e naj an wõn men ko kw’ar kapoji?” (Luk 12:20) Jisõs ear ke kabwir lemnok eo an Solomon bwe leen jerbal ko im men ko remõn rej menin letok jen Anij? Jaab. Ta point eo an Jisõs? “Ein drein eo ej likit mweiuk ko mweien ñõn e wõt, im e jab mweie ñõn Anij.”​—Luk 12:21.

Jisõs ear katakin dri roñjake ro an bwe Jeova ekõnan bwe jen likit e ilo bebe ko ar. Leo emweie emaroñ kar mweie iman mejen Jeova ilo an bukõt wãwen ko ñõn edreklok ilo kwojarjar, meletlet, im yokwe. Nan ko an leo ear kalikar an ejelok an itoklimo kin men kein, bareinwõt ear jab kõnan jibõñ dri jeramel ro ñõn jidrik, im lelok menin lelok ko ñõn Jeova. Jibarbar ko ilo jitõb im emmakit ilo ettã buru ear ejelok iben lein emweie. Bebe ko an kar ñõn kõtõbrak kõnan ko im jokane eo an mõke.

Kwonañin ke kar lo bwe iben armij ro rainin eor men ko rej likit moktata ilo mour eo air einwõt dri mweie eo Jisõs ear kemelele kake? Meñe jej mweie ak jeramel, ebiruru ar naj buñ ñe jej arõk mweiuk, im kajekdone kõtan eo ar iben Jeova kinke elap ar mad kin aikwij im kõnan ko ar ilo aolepen ar mour. Ta eo jemaroñ kõmõne ñõn bõprae aujir in?

Karõk juõn Mour “Emõn”

Jab einwõt dri mweie eo ilo parable eo an Jisõs, kwomaroñ iion abañ ko kin mweiuk. Mekarta, elañe emwij am mare, ejelok bere bwe kwoj bebe ñõn am kabwe aikwij ko kin mour in baamle eo am, im ñe eor am maroñ, kwonaj kõmõn bwe ajiri ro nejõm ren bõk jelãlokjen eo emõn. Elañe kwoj mõke iam, bebe ko am ekkã an kitibuj ñõn kabuk juõn jerbal ak ber wõt ilo jerbal eo am, bwe ro jet ren jab eddodo kake yuk. Mejenkajjik kein rej ñõn jidik wõt ien.​—2 Dri Tessalonika 3:​10-​12; 1 Timote 5:8.

Meñe eindein, jerbal, mõña, im irak, rej men ko me jej watõki einwõt menin aikwij ko ñõn mour bõtab remaroñ kautameik kij jen ar kõmanmõn ankilan Anij. Ewi wãwen men in emaroñ walok? Jisõs ear ba: “Im einwõt ran ko an Noa, e naj ein drein an Nejin armij itok. Bwe einwõt ilo ran ko mokta jen ibij liplip eo, r’ar mõña im irak, r’ar belele im lelok bwe ren belele, ñõn ran eo Noa e ar dreloñ iloan wa eo. Im re jaje ñõn ter eo ibij liplip ej itok, im bõklok ir otemjej; e naj ein drein an Nejin armij itok.”​—Matu 24:37-​39.

Mokta jen Ibwijleplep eo, ekkã an armij ro kar lañliñ kin mour eo me rar lemnok emõn. Bõtab, likjap eo air in bwe rar kejekron karõk eo an Anij bwe enaj kajeebeplok lõl eo enana ikijen juõn ibwijleplep. Ejelok bere rar lemnok bwe wãwen mour eo an Noa ear jab jimwe. Bõtab, ke Ibwijleplep eo ear itok, men in ear kamol bwe wãwen mour eo an Noa im baamle eo an ear lukkun jimwe.

Rainin, aolep kakkõle ko rej walok rej kalikar bwe jej mour ilo ran ko eliktata. (Matu 24:​3-​12; 2 Timote 3:​1-5) Ejjabto, Ailiñ eo an Anij enaj “kejebeblok” jukjuk im bed in. (Daniel 2:​44) Iomin Ailiñ in, lõl in enaj erom juõn paradise, im enaj jolok aolep nañinmij im mij. (Aiseia 33:24; Reveles̃õn 21:​3-5) Aolep menin kõmanman ko ilo lõl in renaj mour ilo burukuk im rejamin bar kwuli.​—Sam 72:16; Aiseia 11:​6-9.

Bõtab, mokta jen an kõmõne men in, Jeova ear karõk bwe news eo emõn kin Ailiñ eo an en walok “ñõn ailiñ otemjelok.” (Matu 24:14) Ñõn kajejjet karõk in an Anij, Dri Kennan ro an Jeova enañin joñõn in jiljilimjuõn million rej kwalok nan kin news in emõn ilo 236 ailiñ ko im ilo elõñlok jen ãbuki kajin ko.

Ilo jet wãwen ko, armij ro rejjab melele kin wãwen an Dri Kennan ro an Jeova mour. Remaroñ watõke einwõt menin bwebwe bareinwõt. (2 Piter 3:​3, 4) Enañin aolep armij ro rainin rej mad kin menin aikwij ko air ñõn mour ien otemjej einwõt kar armij ro ilo ien ko an Noa. Elañe juõn ejjab mour ekkar ñõn wãwen lõl in, remaroñ watõke einwõt dri bwebwe. Bõtab, ñõn ro rej tõmak ilo kallimur ko an Anij, karejar ñõn Anij ej bedbedin mour eo elukkun jokkin wõt juõn.

Kin men in, meñe kwo mweie ak jeramel, emenin meletlet ñõn am etale bebe ko am jen ien ñõn ien kin ran ko rej bedotok. Elañe kwoj kõmõne men in, inem kwon kajitõkin yuk mõke, ‘Bebe ko aõ rej errã ke iben karõk eo an Anij?’

[Pija eo ilo peij 11]

Elañe armij ro rejjab errã kin karõk eo an Anij, nan in kakabilek ko an Jeova rej wõnmanlok wõt im bin

[Pija eo ilo peij 12]

Ke ear kõmõn bebe ko an, dri mweie eo ilo parable eo an Jisõs ear likjõp in lemnok kin karõk eo an Anij