Ajri ro Nejõm̦ Repojak Ke?
1. Etke ej menin aikuj bwe ajri ro ren pojak ñan iien jikuul̦?
1 Epaaktok iien eo bwe en bar jino juon iiõ ekããl in jikuul̦. Kwõjel̦ã bwe ajri ro nejõm̦ renaaj iion elõñ apañ ko im rejañin kar iioni m̦okta. Bõtab, enaaj bar pel̦l̦o̦k iien bwe ren “kõnnaan kõn m̦ool” eo. (Jon 18:37) Ajri ro nejõm̦ repojak ke ñan kõm̦m̦ane men in?
2. Bwe ren maroñ pojak, ta eo ajri ro nejõm̦ rej aikuj jel̦ã?
2 Ajri ro nejõm̦ rej ke mel̦el̦e kõn ta ko armej ro rej kõm̦m̦ani ilo raan ko rel̦ap an kien im holiday ko? Rej ke mel̦el̦e kõn unin ad jab bõk kun̦aad ilo men kein? Repojak ke ñan ijjibed ko renaaj iioni bwe ren jibadek jikuul̦ ko re utiejlok? Ak ijjibed ko bwe ren jerã, kadek, kõbaatat im betel nut? Renaaj ke baj ba bwe men kein rej n̦ae kabuñ eo aer? Ak rejel̦ã ke kilen kõmel̦el̦eiki tõmak eo aer?—1 Pit. 3:15.
3. Ewi wãween jemen im jinen ajri ro remaroñ kõjerbale jotenin kabuñ eo an baam̦le eo ñan kapoje ajri ro nejier?
3 Kõjerbale Raan in Kabuñ Eo An Baam̦le Eo: Kwõj aikuj kõnono ippãn ajri ro nejõm̦ aolep iien el̦aññe enaaj menin aikuj. Bõtab, el̦aññe kwõj jijet im kõnono ippãer kõn men kein m̦okta jãn aer jino bar jikuul̦, men in enaaj em̦m̦anl̦o̦k. Etke kwõj jab kõjerbale juon ak ruo iaan raan ilo iien kabuñ eo an baam̦le eo ñan kõm̦m̦ane men in? Kwõmaroñ kajjitõk ippãer kõn men ko rej kainepataik er ke ej epaaktok iien aer jepl̦aak ñan jikuul̦. Ilo wãween in, kwõnaaj jel̦ã ta ko kwõn kõnono kaki ippãer kaki. Kwõmaroñ bar ãliji men ko me kwaar kõnono ippãer ilo kar iiõ in jikuul̦ ko m̦oktal̦o̦k. (Sam 119:95) Kwõmaroñ kõm̦m̦an iien kõmmãlmel ko im tarrin ke kwõj juon ri kaki, counselor, ak juon ri jikuul̦. Katakin ajri ro nejim kilen uwaak jãn Baibõl̦ eo. Juon rũtto ear kapoje ajri ro nejin ñan kepaake ri kaki ro aer aolep iien ñe ej bar jino iien jikuul̦ im kwal̦o̦k bwe rej Ri Kõnnaan ro an Jeova.—Jouj im lale Imõniaroñroñ eo an Tijemba 15,2010, peij 3-5.
4. Ta eo ro jemen im jinen rej aikuj kõm̦m̦ane?
4 Raan kein, el̦apl̦o̦k im penl̦o̦k apañ ko jodrikdrik ro rej jelm̦aiki. (2 Timote 3:1) Ro jemen im jinen rej aikuj kapoje ajri ro nejier m̦okta jãn an men kein wal̦o̦k ñan er. (Jabõn Kõnnaan 22:3) Kwõn kate eok ñan jipañ ajri ro nejõm̦ bwe ren pojak m̦okta jãn aer ilo̦k im bar jikuul̦.