Wãween Juon Emaroñ Bõjrak jãn An Iukkure kõn E Make ilo Jekkar

Anij ejjab m̦õn̦õn̦õ ñe juon armej ej iukkure kõn m̦õttan ko ilo ãnbwinnin. M̦anit in ej ko̦kkure l̦õmn̦ak ko an armej im ej kõm̦m̦an bwe ren l̦õmn̦ak wõt kõn kõn̦aan ko aer make. Juon eo ej kõm̦m̦ane men in ej jino an l̦õmn̦ak kõn armej ro jet ãinwõt jet men bajjek kein an babu ak pãd ippãer. Armej in ej jino an l̦õmn̦ak bwe ñe ruo armej rej babu ak pãd ippãn doon, ejjab mel̦el̦ein bwe rej yokwe doon. Unin aer ãindein ej kõnke rejjab maroñ dãpiji kõn̦aan ko aer. Armej in ej l̦õmn̦ak wõt kõn kõn̦aan in me ej jidik wõt kitien. Ilo m̦ool, ñe juon ej iukkure kõn m̦õttan ko ilo ãnbwinnin, ej kõm̦m̦an bwe en l̦apl̦o̦k wõt kõn̦aan ko an ñan “nana m̦wilin, l̦õñ, m̦õm̦ [ko renana] an kanniõk.”​—Kolosse 3:5, UBS.

Rijjelõk Paul ear ba: “Ro jera jitõnbõro . . . jen karreoik kõj make jãn men otemjej rej kattoon ãnbwinnid . . . im jen kanooj kate kõj ñan kwõjarjar ilo ad mour in kautiej Anij.” (2 Korint 7:1, UBS) El̦aññe kwõj make kile bwe epen am̦ l̦oore naan kein, jouj im jab ebbeer. Jeova ej pojak aolep iien im ‘e kõn̦aan jol̦o̦k bõd’ ko ad im jipañ kõj. (Sam 86:5; Luk 11:9-13) Kõnke kwõj make kile bwe ebõd men in im kwõj kate eok ñan bõjrak jãne, men in ej kaalikkar bwe kokõn̦aan kõm̦m̦an bwe kwõn erreo im̦aan mejãn Anij. Jab ebbeer meñe jet iien kwõnaaj bar jirilo̦k im kõm̦m̦ane men in. Keememej bwe “Anij el̦ap jãn bũruod, im ejel̦ã men otemjel̦o̦k.” (1 Jon 3:20) Meñe Anij ej loe jerawiwi ko jej kõm̦m̦ani, bõtab ebar jel̦ã ta ko ilo bũruod im ej tũriam̦okake kõj im roñjake kõj el̦aññe jej kajjitõk jipañ ippãn. Kõn men in, jouj im jab bõjrak jãn am̦ jar im kwal̦o̦k bũruom̦ ñan Anij, ãinwõt an juon ajri kajjitõk jipañ ippãn jemen ñe ej pãd ilo jorrããn. Jeova enaaj jipañ eok im karreoik bũruom̦ im l̦õmn̦ak ko am̦. (Sam 51:1-12, 17; Aiseia 1:18) Bõtab, bwe en maroñ ãindein, kwõj aikuj jerbali jar ko am̦. Ñan waanjoñak, ñe kwõj kajjitõk jipañ jãn Anij, kwõj aikuj kate eok bwe kwõn jab alwõji jabdewõt kain pija ko rettoon im kobal̦o̦k ippãn armej ro me remaroñ kapo eok.a

El̦aññe apañ in am̦ ej wõnm̦aanl̦o̦k wõt, jouj im bwebwenato kake ippãn jinõm ak jemam̦ el̦aññe rej pãd ilo eklejia eo, ak ippãn juon m̦õttam̦ me ekajoor tõmak eo an.b​—Jabõn Kõnnaan 1:8, 9; 1 Tessalonika 5:14; Taitõs 2:3-5.