Kajjitõk ko Jãn Ro Rej Riit

Ekkar ke bwe juon Kũrjin en wõr juon an bu bwe en maroñ kõjparok e make jãn armej ro jet?

Kũrjin ro rej l̦oori naanin kakapilõklõk ko jãn Baibõl̦ ñe rej kããlõt wãween aer naaj kõjparok er make jãn men ko rekauwõtata. Naanin kakapilõklõk kein rej kaalikkar bwe ejjab jim̦we an Kũrjin ro kõjerbali men ko ãinwõt bu ko ñan kõjparok er make jãn ro jet. L̦õmn̦ak kõn wãween kein:

Mour elukkuun aorõk ippãn Jeova. Ri jeje Sam Devid ear je kõn Jeova im ba: “Kwõj unin mour an men otemjej.” (Sam 36:9, UBS) Kõn men in, el̦aññe juon Kũrjin ej pepe bwe en kõjparok e make ak jikin jokwe eo an, ej aikuj kate joñan wõt an maroñ bwe en jab wõr ruon kõn kato̦o̦rl̦o̦k bõtõktõk, ak bõk mour eo an juon armej.​—Dt. 22:8, UBS; Sam 51:14.

Em̦ool bwe jabdewõt men juon armej emaroñ kõjerbale ñan kõjparok e make, emaroñ kõm̦m̦an bwe en wõr ruon kõn kato̦o̦rl̦o̦k bõtõktõk. Bõtab, bu ko rej kõm̦m̦an bwe en pidodo ñan bõk mour eo an juon armej, emaroñ ilo jirilo̦k ak ilo wãween eo kar pepe in kõjerbale bu eo.a (Lale kõmel̦el̦e itulal̦.) Bareinwõt, ñe juon rinana me ej pojak in kõm̦m̦ane juon men enana im ej loe juon bu, emaroñ kõm̦m̦an bwe en m̦õkaj an wõr jorrããn im juon emaroñ luuji mour eo an.

Ilo boñõn eo m̦okta jãn an kar Jijej mej, ear jiroñ rũkal̦oor ro an bwe ren bõk jãje ko, ak ejjab mel̦el̦ein bwe ear jiroñ er bwe ren kõjparok er make. (Luk 22:36, 38, UBS) Jijej ear kõn̦aan katakin er kõn juon men eaorõk: Rũkal̦oor ro an ren jab kõjerbale wãween ko relãj, meñe remaroñ iioone kumi in armej ro me ewõr kein ko̦kkure ko ippãer. (Luk 22:52, UBS) Ãlikin an kar Piter kõjerbal jãje eo an im m̦wijit lo̦jilñin rijerbal eo an bũrij eo el̦ap, Jijej ear ba ñan Piter: “Kwõn bar likũt am̦ jãje n̦a ilo nien.” Innem Jijej ear kwal̦o̦k juon naanin kakapilõklõk me ej bar jerbal ñan Kũrjin ro rainin. Ear ba: “Ro otemjej rej bõk jãje, renaaj mej kõn jãje.”​—Matu 26:51, 52.

Ãinwõt an kar Maika 4:3 kanaan, armej ro an Anij rej “noe jãje ko aer bwe ren kein poktak bwidej, im m̦ade ko aer bwe ren kein jeke raan wõjke ko.” Jejel̦ã kajjien Kũrjin ro rem̦ool kõn aenõm̦m̦an eo ippãer. Rej pokake kien eo Anij ear kõm̦akũt Paul bwe en je, ke ear ba: “El̦aññe ewõr en̦ ej kõm̦m̦an nana ñan kom̦, kom̦win jab ukotl̦o̦k kõn nana,” im “mour ilo aenõm̦m̦an ippãn armej otemjej joñan wõt ami maroñ.” (Rom 12:17, 18, UBS) Paul ear l̦oore kien in meñe ear iiooni wãween ko reppen, ãinwõt kauwõtata ko ear iiooni jãn ‘rukowadoñ ro.’ Paul ejjãmin kar kõm̦m̦ane juon men me ej n̦ae naanin kakapilõklõk ko ilo Baibõl̦, ñan kõjparok e make jãn men ko rekauwõtata. (2 Ko. 11:26) Ijello̦kun, ear lõke Anij im ear tõmak ilo Naanin Anij bwe “el̦apl̦o̦k tokjãn mãlõtlõt jãn kein tarin̦ae ko.”​—Ekl. 9:18, UBS.

Ippãn Kũrjin ro, mour el̦apl̦o̦k an aorõk jãn m̦weiuk. Jejel̦ã bwe “mour eo em̦ool an juon armej ejjab wal̦o̦k jãn men ko m̦weien.” (Luk 12:15, UBS) Innem, el̦aññe jej kajjioñ kabõjrak juon rũko̦o̦t me ewõr bu ippãn, im jej kõnnaan ñan e ilo juon wãween emera im ejjel̦o̦k tõprak, jekõn̦aan l̦oore naanin tõl eo an Jijej ke ear ba: “Kom̦win jab jum̦ae eo ej nana.” Emaroñ mel̦el̦ein bwe jej aikuj lel̦o̦k ñan e jabdewõt men eo ekõn̦aan. (Matu 5:39, 40; Luk 6:29, UBS)b (Lale kõmel̦el̦e itulal̦.) Ejjel̦o̦k pere bwe jejjab kõn̦aan bwe men kein ren wal̦o̦k ñan kõj. Innem eaorõk bwe jen kajjioñ in bõbrae an men kein wal̦o̦k. El̦aññe jej l̦oore naanin kakapilõklõk ko ilo Baibõl̦ im jab kõmjãje kõn “men otemjej an lal̦ in ko rej menin kautiej bũruon armej,” men in emaroñ bõbrae ad iioon jorrããn. (1 Jon 2:16, UBS) Bareinwõt, ñe armej ro jet im ro rej jokwe iturid rejel̦ã bwe jej Ri Kõnnaan ro an Jeova, im kõn aenõm̦m̦an eo me ewõr ippãd, wãween in ej juon kein kõjparok ñan kõj.​—JK. 18:10.

Kũrjin ro rej kautiej l̦õmn̦ak ko an ro jet. (Rom 14:21) Jet jeid im jatid remaroñ bwilõñ ak l̦õkatip el̦aññe rejel̦ã bwe ewõr an juon iaan ro jeier im jatier bu ñan kõjparok er make jãn armej ro jet. Emaroñ wõr ad maroñ ekkar ñan kien bwe en wõr bu ippãd, bõtab kõnke jej yokwe ro jeid im jatid, jeban kõm̦m̦an jabdewõt men me emaroñ kal̦õkatip er.​—1 Ko. 10:32, 33, UBS; 13:4, 5, UBS.

Kũrjin ro rekõn̦aan kõm̦m̦ane juon joñak em̦m̦an ñan ro jet. (2 Ko. 4:2; 1 Pi. 5:2, 3, UBS) El̦aññe ewõr an juon Kũrjin bu ñan an kõjparok e make jãn armej ro jet, em̦m̦aan ro rej lale eklejia renaaj lel̦o̦k naanin kajim̦we jãn Baibõl̦ ñan e. El̦aññe armej in ej pepe bwe en likũt wõt bu eo an ippãn, armej in ejjab juon joñak em̦m̦an ñan ro jet. Kõn men in, ejjab maroñ bõk jet jeraam̦m̦an im eddo ko ilo eklejia eo. Men in ej bar jelõt Kũrjin ro me rej aikuj illik bu ippãer ilo jikin jerbal ko aer. Enaaj em̦m̦anl̦o̦k el̦aññe rej bar pukot juon aer jerbal.c​—Lale kõmel̦el̦e eo itulal̦.

Juon Kũrjin ej aikuj make kõm̦m̦ani pepe ko an kõn ewi wãween enaaj kõjparok e, baam̦le eo an, men ko m̦weien, ekoba ia eo enaaj jerbal ie. Bõtab, pepe kein an rej aikuj pedped ioon naanin kakapilõklõk ko ilo Baibõl̦. Anij eo ad me el̦ap an mãlõtlõt, ej litok naanin kakapilõklõk kein kõnke ej yokwe kõj. Eñin unin Kũrjin ro me ekajoor kõtaan eo aer ippãn Jeova, renaaj kããlõt bwe en ejjel̦o̦k aer bu ñan kõjparok er make jãn armej ro jet. Rejel̦ã bwe ilo aer lõke Anij im l̦oori wõt naanin kakapilõklõk ko ilo Baibõl̦ ilo mour ko aer, renaaj jokwane ñan indeeo.​—Sam 97:10; JK 1:33, UBS; 2:6, 7, UBS.