Bo̦o̦k in Kajjitõk

◼ Ewi aitokõn ad katak ippãn ri katak ro im rej kõm̦m̦an wõnm̦aanl̦o̦k ko?

Em̦m̦antata el̦aññe kwõj wõnm̦aanl̦o̦k im katak ippãn ri katak eo m̦ae iien eddedel̦o̦k bok eo Ta eo Baibel Ej Lukkun Katakin? im “Bed Wõt ilo Yokwe eo An Anij” (“Keep Yourselves in God’s Love”). Meñe ri katak eo em̦õj an peptaij, kwõmaroñ wõnm̦aanl̦o̦k wõt im katak ippãn m̦ae iien eddedel̦o̦k bok in. Ãlikin an peptaij, ñe kwõj katak ippãn kwõmaroñ kanne awa ko am̦, im kadel̦o̦ñe ilo report ko ad ãinwõt juon ri katak ak bar jepl̦aak. El̦aññe bar juon ri kwal̦o̦k ej iwõj ippam̦, emaroñ bar bwine ippãn awa ko.

Elukkuun aorõk bwe ro rekããl ren ejaake juon pedped eo epen kõn m̦ool eo m̦okta jãn aer jutak make iaaer. Rej aikuj lukkuun mel̦el̦e kõn aolep katak ko an Jijej im “pen ilo tõmak” bwe ren maroñ jutak pen n̦ae mãlejjoñ ko renaaj jelm̦aik. (Kol. 2:6, 7; 2 Ti. 3:12; 1 Pi. 5:8, 9) Bareinwõt, bwe en maroñ in jim̦we aer katakin ro jet, rej aikuj “jel̦ã m̦ool” eo. (1 Ti. 2:4) Ilo ad kadedel̦o̦k bok in ippãn ri katak ro, jej jipañ er bwe ren maroñ etetal ilo “ial̦ eo ej tõl l̦o̦k ñan mour.”—Matu 7:14.

M̦okta jãn an juon peptaij, elder ro rej aikuj etale el̦aññe emel̦el̦e kõn katak ko jãn Baibõl̦ eo im ej mour ekkar ñan katak kein. Elder ro rej aikuj lukkuun etale ri katak eo el̦aptata el̦aññe ejañin kadedel̦o̦k bok in. El̦aññe ri katak eo ejjab pojak ñan peptaij, elder ro rej aikuj jipañe kõn men ko ej aikuj jel̦ã bwe en maroñ pojak tokãlik.—Lale bok eo Pojak ñan Kõm̦anm̦an Ankilaan Jeova (Oganized to Do Jehovah’s Will), peij 217-218.

[Naan ko ilo peij 2]

Elukkuun aorõk bwe ro rekããl ren ejaake juon pedped eo epen kõn m̦ool eo