Katak 6

Ta in Ailiñ eo an Anij?

Ailiñ eo an Anij ej bed ia? (1)

Wõn eo ej King eo an? (2)

Ewor ke ro jet renaj iroij ibben King eo? Elañe aet, jete orair? (3)

Ta eo ej kamol bwe jej bed ilo ran ko eliktata? (4)

Ta eo Ailiñ eo an Anij enaj kõmmõn kin armij ro ilo ran ko renaj itok? (5-7)

1. Ke ear bed ion lõl, Jesus ear katakin ro ri kaloran kin Ailiñ eo an Anij. Juõn ailiñ ej juõn kien im juõn king ej iroij ion. Ailiñ eo an Anij ej juõn kien ejej uan. Kar jutak ilõñ im enaj iroij ion lõl. Enaj karreoik, ak kokwojarjar, ãt eo etan Anij. Enaj kõmõnmõn ankil an Anij ion lõl einwõt ear kõmmõne ilõñ.​—Matthew 6:9, 10.

2. Anij ear kallimur bwe Jesus enaj kar erom King ilo Ailiñ eo An. (Luke 1:30-33) Ke Jesus ear bed ion lõl, ear kamol bwe enaj kar erom juõn Iroij ejoij, wãnik, im wãppen. Ke ear jeblak ñõn lõñ, ear jab erom King ilo Ailiñ eo an Anij ilo mõkaj. (Hebrew 10:12, 13) Ilo 1914, Jehovah ear lelok ñõn Jesus maroñ eo ear kallimur ñõn e. Jen ien eo im mantak, Jesus ear iroij ilõñ einwõt King eo emwij an Jehovah kãlete.​—Daniel 7:13, 14.

3. Jehovah ear bareinwõt kãlet jet lõmaro im limaro retiljek jen lõl ñõn etal ñõn lõñ. Renaj iroij ibben Jesus einwõt king ro, ri ekajet ro, im priest ro ion armij. (Luke 22:28-30; Revelation 5:9, 10) Jesus ear naetan iroij ro mõttan ilo Ailiñ eo an einwõt juõn “bwij edik.” Rej 144,000 orair.​—Luke 12:32; Revelation 14:1-3.

4. Ke Jesus ear erom King, ear jolõltak Satan im enjel ro an renana jen lõñ ñõn lõl. Eñin unin wãwen ko ion lõl rekanuij nana jen 1914 ñõn kiõ. (Revelation 12:9, 12) Tarinae ko, ñitta, nañinmij, laplok kowadoñ​​—abañ kein aolep rej mõttan juõn “kakõlle” ej kalikar bwe Jesus ej iroij im bwe jukjuk im bed in ej bed ilo ran ko eliktata.​​—Matthew 24:3, 7, 8, 12; Luke 21:10, 11; 2 Timothy 3:1-5.

5. Mõttan jidik Jesus enaj ekajete armij ro, im kijibel ir einwõt juõn shepherd ej kijibel sheep jen goat ko. Ro rej einwõt “sheep” rar kamol ir make einwõt ro retiljek. Renaj bõk mour indio ion lõl. Ro rej einwõt “goat” renaj karmijetek Ailiñ eo an Anij. (Matthew 25:31-34, 46) Ilo ien ko rebak, Jesus enaj kokkure ro rej einwõt goat. (2 Tessalonika 1:6-9) Elañe kwokõnan erom juõn ian “sheep” ro an Jesus, kwoj aikwij roñjake ennan eo an Ailiñ eo im jerbal ekkar ñõn men ko kwoj katak kaki.​—Matthew 24:14.

6. Kiõ lõl in emwij an ajej ñõn elõñ ailiñ ko. Ewor kien ko air make. Ailiñ kein ekkã air tarinaek don. Ak Ailiñ eo an Anij enaj bõk jikin ailiñ kein aolep. Enaj iroij einwõt juõn wõt kien ibelakin lõl in. (Daniel 2:44) Inem enaj ejelok tarinae, kowadoñ, im mõn don. Armij otemjej renaj mour ibben don ilo ainemõn im burukuk.​—Micah 4:3, 4.

7. Ilo ien Iroij eo an Jesus iumin Juõn Thousand Yiõ ko, armij ro retiljek renaj wãppen, im aolepen lõl in enaj erom juõn paradise. Ilo jemlokin juõn thousand yiõ ko, Jesus enaj mwij an kõmmõn men otemjej Anij ear kõnan bwe en kõmmõne. Inem enaj karollok Ailiñ eo ñõn Jemen. (1 Korint 15:24) Etke kwojjab jiroñ ro jeram im ro am jitenburu kin ta eo Ailiñ eo an Anij enaj kõmmõne?

[Pija eo ilo peij 13]

Iumin iroij eo an Jesus, enaj ejelok kijirat ak kalijeklok