Jemaroñ Lelok ñan Jehovah
1 Kwar jelã ke bwe armij ro remaroñ lelok men ko ñan Anij? Abel ear katok kin jet ian menin mour ko an raorõk ñan Jehovah, im Noah im Job rar kõmman menin katok ko reinlok wõt. (Jen. 4:4; 8:20; Job 1:5) Emol, menin katok kein rar jab kamweieik Anij ilo jabdewõt wãwen, kinke men otemjej rej an. Ak menin katok ko rar kwalok yokwe eo emũlal an lõmarein retiljek ñan Anij. Rainin, jemaroñ kajerbal ien, kajur, im mweiuk ko mweied ilo ad lelok ñan Jehovah “[juõn] katok . . . kin wijtak ien otemjej.”—Hib. 13:15.
2 Ien: Ej juõn menin nebar ñan “wiaik ien” jen men ko rejjab lukkun aorõk ñan kalaplok ijo kunad ilo jerbal in kwalok nan! (Ep. 5:15, 16) Bõlen jemaroñ kõmman oktak ilo schedule eo ad bwe jen auxiliary pioneer juõn ak elõñlok alliñ ko ilo juõn yiõ. Ak bõlen jemaroñ kaetoklok ien ad bed ilo jerbal in kwalok nan jen ien eo me jaar karõke. Ad bed ilo jerbal in kwalok nan bar 30 minute ko ilo kajjojo week enaj kar kalaplok ien jerbal in kwalok nan eo ad ñan joñan in ruo awa ilo juõn alliñ!
3 Kajur: Ñan an bwe joñan kajur eo ad ñan kwalok nan jej aikwij bõprae menin kamõnõnõ ko im jerbal ko me rej kõmman ad mõk im jab maroñ lelok aolepen ad maroñ ñan Jehovah. Bareinwõt jej aikwij jab le jen joñan ad inebata kin men ko me remaroñ kar kõmman bwe burued en “kokmwil” kij im bõk kajur ko ad me jemaroñ kar kajerbali ilo ad karejar ñan Anij. (Ken. 12:25) Meñe ewõr juõn men jej lukkun inebata kake, emõnlok ñan ad ‘jolok inek eo ad ion Jeova’!—Sam 55:22; Pil. 4:6, 7.
4 Mweiuk ko: Jemaroñ bareinwõt lelok mweiuk ko mweied ñan rejetak jerbal in kwalok nan. Paul ear rejañ Ri Christian ro mõttan ñan keini air “kejenolok jet money” bwe en wõr jet men ko ñan lelok ñan ro rej bed ilo aikwij. (1 Kor. 16:1, 2) Ilo ejja wãwen in, jemaroñ kajenolok jet money ak mweiuk ko ibbed ñan ad jabawõt kaki ñan aikwij ko an congregation eo ilo bukwon eo im bareinwõt ñan jerbal eo ibelakin lal. Jehovah ej kamolol kin men ko jej liloki jen buruõd, meñe redik wõt.—Luk 21:1-4.
5 Jehovah ear letok elõñ men ko ñan kij. (Jem. 1:17) Jej kwalok ad kamolol ikijen ad lelok ien, kajur, im mweiuk ko jet mweied ñan karejar ñan e. Ilo ad kõmmane men in jej kabuñburuen Jehovah, “bwe Anij ej yokwe eo e mõnõnõ in lelok.”—2 Kor. 9:7.