Jehovah Ej Kakajur Eo Ej Mõk
“[Jehovah] ej lelok kajur ñan eo ej mõk; im eo ejelok an maroñ ej kõmman bwe en lap an maroñ.”—ISAIAH 40:29, New World Translation.
1. Kwalok wanjoñok eo kin kajur eo ej bed ilo men ko Anij ear kõmanmõni.
JEHOVAH ejelok joñan an kajur. Im kajur eo elap otem lap ej bed ilo men ko ear kõmanmõni! Men eo rej naetan atom im ekanuij dik—ej men eo ej ejaake men ko otemjelok—joñan an dik juõn biliñliñ in den ewõr ie juõn buki billion billion atom ko.a Mour otemjej ion lal in ad ej wawa ion kajur eo ej ejaak jen makitkit ko an atom ion al. Ak ewi joñan kajur eo jen al rej aikwiji ñan bõk mour ilal? Lal in ej bõk jidik wõt in mõttan kajur eo ej walok jen al. Mekarta, mõttan men dikdik ko otemjej in kajur eo an al im rej wõtlok ion lal rejjab maroñ joñi kin joñan air laplok jen aolepen kajur eo rej kajerbale ilo industry ko an lal in.
2. Ilo wãwenlok, ta eo Aiseia 40:26 ej ba kake kin kajur eo an Anij?
2 Meñe jej lemnak kin atom eo ak oktak im kalimjeklok belak in mejatoto laplap eo ijoko otemjelok ilañ im ilal, jej bwilõñ kin kajur eo ekabwilõñlõñ an Jehovah. Ejelok bwilõñ ear maroñ ba: “Komin reiliñlok, im lo wõn eo E ar kõmõnmõn men kein, eo Ej kadrioijlok ir kin orair; Ej añiñin ir otemjej; kin An kajur elap, im kin An bin ilo maroñ potata, ejelok juõn ej likjõp”! (Aiseia 40:26) Aet, Jehovah elap an “kajur,” im e ej Unjen “bin ilo maroñ potata” eo ear kajerbale ñan bõktok aolepen belak in mejatoto eo ijoko otemjelok bwe en walok im bed.
Elaplok Jen Baj Joñan Kajur eo wõt ej Menin Aikwij
3, 4. (a) Ta jet ian mol ko me remaroñ kamõk kij? (b) Ta kajitõk ko rej menin aikwij ñan lemnak kaki?
3 Ke Anij ejelok joñan kajur eo an, armij rej mõk. Ijoko jabdewõt jej etal ie lok, jej lo armij ro rej mõk. Rej rujtok ilo air mõk, ilok ñan jerbal ak school ilo air mõk, roltok ñan mweo remõk, im ilo air ilok ñan jikin babu eo rejjab mõk wõt ak relukkun ikkijelok. Jet rej kõnan bwe ren kar maroñ etal ñan jet jikin in bõk elap kakije eo rej aikwiji. Einwõt ro ri karejaran Jehovah, jej bareinwõt mõk, bwe mour in tiljek eo ad ñan Anij ej kir ñan kijejeto eo ewõr kate ie. (Mark 6:30, 31; Luk 13:24; 1 Timote 4:8) Im ebar wõr jet mol ko rej lutõklok kajur eo ad.
4 Meñe jej Christian, jejjab rõlok jen abañ ko armij rej ioni. (Job 14:1) Nañinmij, oktak in jerammõn ikijen money, ak men ko jet ekkã air bin ilo mour remaroñ kõmman menin ad ebwer, im jelet an mõjnolok. Kobatok ñan menin aitwerõk kein rej melejoñ ko ñan ro wõt rej bõk matõrtõr kin wõt tokjen kwojarjar. (2 Timote 3:12; 1 Piter 3:14) Kin ijjibed ko ran otemjej jen lal in im jumae eo ñan jerbal in kwalok nan eo ad kin Ailiñ eo, jet iad bõlen kin ad lukkun inebata jej eñjake ad kadikdiklok ilo jerbal eo an Jehovah. Bareinwõt, ilo juõn jibadbad ñan rupe tiljek eo ad ñan Anij, Satan Devil eo ej kajerbal jabdewõt wãwen ilo karõk eo an. Inem, ewi wãwen, ad maroñ bõk kajur eo ilo jitõb im ej menin aikwij ñan debij wõt ad jab mõk im bõjrak?
5. Etke kajur eo elaplok jen eo an armij ej menin aikwij ñan wõnmanlok wõt ilo jerbal in kwalok nan eo an Christian?
5 Ñan kajur ilo jitõb, jej aikwij atartar ion Jehovah, Ri Kõmanmõn eo an kajur-otemjelok. Ri jilek Paul ear kalikar bwe jerbal eo an Christian enaj kar aikwij elaplok jen baj joñan kajur eo an armij jab wãppen. Ear je: “A men in aurõk in ibem ej ilo jãbi brij ko, bwe maroñ eo e kanuij lap en jen Anij, im jab jen kim.” (2 Dri Korint 4:7) Christian ri kabit ro rej kõmmane “jerbal in kilajrõk” ibben rejetak eo an ro mõttair ro kejatdikdik eo air ej ñan lal in. (2 Dri Korint 5:18; Jon 10:16; Reveles̃õn 7:9) Ke kij armij jab wãppen jej kõmmane jerbal eo an Anij ilo jelmae matõrtõr, jejjab maroñ baj kõmmane wõt ilo kajur eo ad make. Jehovah ej jibañ kij ikijen jitõb kwojarjar eo an, im kin menin mõjno eo ad ej kalikar kajur eo an. Im jej bõk kainemõn ikijen menin kamol eo bwe “Jeova ej kejbãrok ro remõn”!—Sam 37:17.
‘Jehovah EJ Kajur Eo Ad Elap An Aorõk’
6. Ewi wãwen an Jeje ko kamol ñan kij bwe Jehovah ej Unjen kajur eo ad?
6 Jemed ilañ elap an “kajur” im emaroñ bidodo an kakajur kij. Ilo mol, rej jiroñ kij: “[Jehovah] Ej lelok kajur ñõn eo ej barõk; im ñõn eo ejelok an maroñ, Ej korlok kajur. Ro emõn ridtair re naj barõk im mõk, im likao ro re naj kijelok im buñ: a ro rej kõtare Jeova re naj kõkal air kajur; re naj jeblãliñlok kin peir einwõt igõl ko; re naj etõr im jab mõk; re naj etetal im jab barõk.” (Aiseia 40:29-31) Kin an laplok ijjibed ko, jet ien jemaroñ eñjake ad ikkijelok einwõt juõn ri aikwõj eo neen einwõt rejjab maroñ inek manlok wõt. Ak jemlokin lain eo ilo iaikwij eo ñan mour ej bed wõt iman, im jej aikwij jab ebwer. (2 Kronikel 29:11) Ri Jumae eo ad, Devil eo, ej kãto-kãtak einwõt “laiõn e rorror,” im ej kõnan kabõjrak kij. (1 Piter 5:8) Jen kememej bwe ‘Jehovah ej ad kajur im ad likepijñak,’ im emwij an kõmman elõñ menin letok ko ‘ñan lelok kajur ñan ro rej mõk.’—Sam 28:7.
7, 8. Ta menin kamol eo ewõr bwe Jehovah ear kakajurlok David, Habakkuk, im Paul?
7 Jehovah ear lelok ñan David kajur eo ear aikwiji ñan an jerbal manlok wõt ilo an jelmae kabañbañ ko relap. Kin an obrak kin tõmak im liki, kin menin David ear je: “Kin Anij kim naj beran in kõmõn: bwe E eo e naj juri ro rej kijirãte kim.” (Sam 60:12) Jehovah ear bareinwõt kakajur Habakkuk bwe en maroñ kar kadedelok jerbal eo an einwõt ri kanan. Habakkuk ej ba 3:19: “Iroij Bõtata eo Jehovah ej kajur eo aõ; im enaj kõmman bwe neiõ ej einwõt neen deer, im enaj likit iõ ion jikin ko reutiej bwe in etetal ie.” Bareinwõt lale joñok eo emõn an Paul, eo ear je: “I maroñ in kõmõn men otemjej ilo Eo [Anij] ej kakajur iõ.”—Dri Pilippai 4:13.
8 Einwõt David, Habakkuk, im Paul, jej aikwij jerbale tõmak ilo maroñ eo an Anij ñan kakajur kij im ilo kajur eo an ñan lomoren kij. Ad jelã bwe Kajur Bõtata eo Iroij Jehovah ej Unjen “kajur eo,” elap jen kiõ lemnak kin jet wãwen ko ñan bõk kajur eo ilo jitõb jen menin letok ko elap an lõñ an Anij kõmmani.
Menin Letok ko ilo Jitõb ñan Kakajur Kij
9. Ta jerbal eo book ko an Christian rej kõmmane ñan kij kin men in aikwij eo ñan mour im eddeklok?
9 Niknik ilo katak Jeje ko ibben jibañ eo ilo book ko an Christian emaroñ kakajur im kejbãrok kij. Ri jeje Sam ear al: “Emõnõnõ armij . . . [eo] ej lõñliñ ilo kien Jeova; im ej lemnok kin kien eo ran im boñ. E naj einwõt wijki eo emwij kallipe iturin river in dren, eo ej jebar leen ilo ien eo an; im bwilikõn e jamin mõrar; im e naj jerammõn kin men otemjej ej kõmõni.” (Sam 1:1-3) Ejja einwõt ad aikwij mõñã ñan debij wõt kajur eo an enbwinid, jej aikwij bõk ekan ko ilo jitõb Anij ej litok ikijen Nan eo an im book ko an Christian ñan debij wõt kajur eo ad ilo jitõb. Kin menin, katak im kalmenlokjen eo ewõr meleleir rej menin aikwij.
10. Ñããt eo jemaroñ lo ien ñan katak im kalmenlokjen?
10 Emol ej menin nawõnãn ñan kalmenlokjen kin “men ko re mũlõl an Anij.” (1 Dri Korint 2:10) Ak ñããt eo jemaroñ lo ien ñan kalmenlokjen? Abraham leo nejin Isaac “e ar drioijlok bwe en kalomõnlokjen ilo jikin kallip ke e jota.” (Jenesis 24:63-67) Ri jeje Sam David ‘ear kalmenlokjen kin Anij ke ej mmij ilo boñ.’ (Sam 63:6) Jemaroñ katak Nan in Anij im kalmenlokjen kake ilo jibboñ, ilo jota, ilo boñ—emol, ilo jabdewõt ien. Katak im kalmenlokjen rot in ej tellok ñan bar juõn menin letok an Jehovah nan kakajur eo ilo jitõb—jar.
11. Etke jej aikwij lelok aorõk eo elap ñan ekkeini jar?
11 Ekkeini jar ñan Anij ej jibañ kakajur kij. Kin menin jen “niknik ilo jar.” (Dri Rom 12:12) Jet ien, jej aikwij kõmmane juõn kajitõk kin meletlet im kajur eo ej menin aikwij ñan kamadmõde juõn melejoñ. (Jemes 1:5-8) Jen bareinwõt lemnak im wijtake Anij ñe jej lale an jerbal karõk ko an ak lo bwe ear kakajurlok kij ñan ad jerbal manlok wõt ilo jerbal eo ad. (Dri Pilippai 4:6, 7) Elañe jej bed ebake wõt Jehovah ilo jar, e jamin ellok jen kij. “Lo!” David ear al, “Anij aõ Dri jibõñ.”—Sam 54:4.
12. Etke jej aikwij kajitõk ibben Anij kin jitõb kwojarjar eo an?
12 Jemed ilañ ej kakajur kij im kabinlok kij ikijen jitõb kwojarjar eo an, ak kajur eo ej makitkit. Paul ear je: “Ij bukwelõlõ ñõn Jemer . . . bwe En lewoj ñõn kom, ekar ñõn mweien aibujuij eo An, bwe ilo maroñ komin kajurlok kin Jitõb eo An ilo ami.” (Dri Epesõs 3:14-16) Jej aikwij jar kin jitõb kwojarjar eo, liki bwe Jehovah enaj kajerammõn kij kake. Jesus ear kõmmanwa: Elañe juõn ajiri ej kajitõk kin juõn ek, juõn jemen eo ej yokwe en lelok ke ñan e juõn serpent? Bwebõta, eban. Eindein, ear kajemlok: “Inem elañe komeo dri nana, kom jela kijkan lelok men ko remõn ñõn ro nejimi; ta, e jamin lap an Jememiuij i lõñ lelok Jitõb Kwojarjar ñõn ro otemjej rej kajitõk iben ke!” (Luk 11:11-13) Jen jar kin liki rot in im ien otemjej kememej bwe ri karejar ro retiljek an Anij remaroñ “kajurlok” kin kajur eo ikijen jitõb eo an.
Congregation eo Juõn Jibañ in Kakajur
13. En ewi wãwen ad lemnak kin kwelok ko an Christian?
13 Jehovah ej kakajur kij ikijen kwelok ko an congregation eo an Christian. Jesus ear ba: “Bwe ijo ruo ak jilu rej kweloklok ilo eta, Ij ber iolapir.” (Matu 18:20) Ke Jesus ear kõmmane kallimur in, ear konono kin men ko rar menin aikwij ñan karilok ro rar tel ilo congregation eo. (Matu 18:15-19) Bõtab, nan ko an rej jerbal ñan aolep kwelok ko ad, assembly ko, im convention ko, ko rej bellok im kilek kin jar ilo etan. (Jon 14:14) Inem ej juõn jerammõn ñan bed ilo kuktok kein an Christian, meñe eiet rej bed ak thousand rej bed. Kin menin jen kwalok ad kamolol kin ien rot kein kar karõki ñan kakajurlok kij ilo jitõb im kõketak kij ñan yokwe im kõmman jerbal ko remõn.—Dri Hibru 10:24, 25.
14. Ta tokjen eo jej bõke jen jibadbad ko an Christian elder ro?
14 Christian elder ro rej letok jibañ eo ilo jitõb im kõketak. (1 Piter 5:2, 3) Paul ear jibañ im kõketak congregation ko ear jerbal ie, einwõt traveling overseer ro rej kõmmane rainin. Ilo mol, ear kõnan bed ibben ri tõmak ro mõttan bwe en maroñ wõr juõn kõketak eo ikõtair ñan don eo ej menin kalek. (Jerbal 14:19-22; Dri Rom 1:11, 12) Jen ien otemjej kwalok ad kamolol kin elder ro ad im Christian overseer ro jet, ro rej jerbale juõn mõttan eo elap ilo kakajurlok kij ilo jitõb.
15. Ewi wãwen an ri tõmak ro mõttad ilo congregation eo ad kamol bwe rej “juõn jibañ ñan kakajur”?
15 Ri tõmak ro mõttad ro rej ejaake congregation eo ad remaroñ “juõn jibañ ñan kakajur iõ.” (Colossians 4:10, 11, NW) Einwõt ro ‘jerad remol’ remaroñ jibañ kij ilo ien barõk. (Jabõn Kennan Ko 17:17) Ñan wanjoñok, ke 220 ro ri karejaran Anij rar bõk ir jen camp in kalbuj eo ilo Sachsenhausen iumin an Nazi waje ir ilo 1945, rar jelmae juõn ial eo 120-mile aetokin. Rar etal ilo juõn kumi, im ro rar kajur rar bwili ro rar mõjno ilo jejjo dieka ko redik. Tokjen eo? Ilo juõn maj in mij eo ear bõk mour an elõñlok jen 10,000 ri kalbuj ro mõttair ilo camp in kalbuj eo, ejelok juõn ian Ri Kennan ro an Jehovah ear mij. Bwebwenato rot in ear walok ilo Watch Tower book ko, ekoba Yearbook of Jehovah’s Witnesses im Jehovah’s Witnesses—Proclaimers of God’s Kingdom, ej kamol bwe Anij ej kakajur armij ro an, bwe ren jab ebwer.—Dri Galetia 6:9.b
Bõk Kakajur Ikijen Jerbal in Kwalok Nan eo Ad
16. Ekkeini bõk kunad ilo jerbal in kwalok nan eo ewi wãwen an kakajurlok kij ilo jitõb?
16 Ekkeini bõk kunad ilo jerbal in kwalok nan eo an Ailiñ eo ej kakajurlok kij ilo jitõb. Makitkit rot in ej jibañ kij reilok wõt ñan Ailiñ in Anij im ñan kejbãrok indio im lemnak kin jerammõn ko ej kajerammõn kij kaki. (Jud 20, 21) Kallimur eo ilo Jeje eo im jej konono kake ilo jerbal in kwalok nan eo ad ej letok ñan kij kejatdikdik im kõmman bwe jen einwõt beek ilo buruõd einwõt kar ri kanan Micah, eo ear ba: “Je . . . naj konono ilo etan Jehovah ad Anij ñan ien eo ejelok jemlokin, melelen ñan indio.”—Micah 4:5, NW.
17. Ta lemnak ko rej litok ikijen katak Bible ko ilo moko?
17 Kõtan eo ad make ibben Jehovah ej kakajurlok kij ke jej kalaplok ad kajerbal Jeje ko ilo katakin ro jet. Ñan wanjoñok, ñe jej kõmman katak Bible ilo moko kin jibañ eo ilo book eo Knowledge That Leads to Everlasting Life, ej menin meletlet ñan read im konono elõñ jeje ko rej jitõñlok ñani. Menin ej jibañ ri katak eo im kakajurlok jelãlokjen eo ad make ilo jitõb. Elañe juõn ri katak ewõr an abañ in melele juõn lemnak eo ilo Bible ak juõn wanjoñok, ien katak eo emaroñ lõñlok jen juõn alen ñan kitibuj juõn chapter ilo book eo Knowledge. Ej menin ad mõnõnõ ilo an emõn ad kebojak im kõmmane juõn jibadbad ñan jibañ ro jet bwe ren ruaklok ñan Anij!
18. Wanjoñok kin book eo Knowledge kin wãwen an keie kajerbale.
18 Kajjojo yiõ, book eo Knowledge rej kajerbale ilo wejepedik ñan jibañ thousand armij ro ñan erom ri karejar ro an Jehovah emwij air wujleplok, im menin ekoba elõñ ro ejelok air jelã kin Bible. Ñan wanjoñok, ke ear juõn ajiri, juõn emaan in Hindu ilo Sri Lanka ear roñ an juõn Ri Kennan konono kin Paradise. Jet yiõ ko tokelik ear kebaklok kõrã eo, im ejjabto tokelik leo ibben ear jino katak Bible ibben leo. Ilo mol, likao dikdik eo ear itok im katak Bible ran otemjej, im book eo Knowledge ear dedelok ilo juõn ien ekanuij in kadu. Ear jino bed ilo kwelok ko, kajenolok e jen kabuñ eo an mokta, im oktak im juõn ri kwalok nan an Ailiñ eo. Ke ear baptais, ededelok an kõmmane juõn katak Bible ilo meo imõn ibben juõn likao eo ejelã kajjen.
19. Ke jej bukõt mokta Ailiñ in Anij, ta eo jemaroñ liki kake?
19 Bukõt mokta Ailiñ eo ej bõktok ñan kij kakajur eo ekalañliñ. (Matu 6:33) Meñe jej ione elõñ wãwen melejoñ ko, jej etal wõt ilo mõnõnõ im kijejeto ilo keañ kin news eo emõn. (Taitõs 2:14) Elõñ iad jej tõbar menin aikwij eo ñan jerbal in full-time pioneer, im jet rej jerbal ijoko elaplok aikwij ie ñan ri evanjel. Elañe jej lañliñ ilo ad kalaplok tokjen ko an Ailiñ eo ilo wãwen kein ak wãwen ko jet, jej liki bwe Jehovah ejamin meloklok jerbal eo ad im yokwe eo jej kwalok kin etan.—Dri Hibru 6:10-12.
Jerbal Manlok Wõt ilo Kakajur eo An Jehovah
20. Ewi wãwen ad maroñ kalikar bwe jej reilok ñan Jehovah ñan bõk kajur?
20 Ilo mõnõnõ im kin aolepen buruõd, jen kalikar bwe jej kejatdikdik ilo Jehovah im reilok ñan e ñan bõk kajur. Jemaroñ kõmman eindein ikijen ad kobrak kij make kin menin letok ko otemjej ilo jitõb ej kõmmani ikijen ‘ri karejar eo an etiljek.’ (Matu 24:45) Katak eo an juõn armij make im congregation eo kin Nan in Anij ibben jibañ eo jen book ko an Christian, jar eo jen eñjake in buru, jibañ eo ilo jitõb jen elder ro, joñok ko remõn an ri tõmak ro mõttad retiljek, im ekkeini ad bõk kunad ilo jerbal in kwalok nan eo rej ibwiljin menin letok ko rej kakajurlok kõtan eo ad ibben Jehovah im kamaroñ kij ñan ad jerbal manlok wõt ilo jerbal eo an ekwojarjar.
21. Ewi wãwen an kar ri jilek Peter im Paul kwalok aikwij eo ñan kajur eo letok in Anij?
21 Meñe ewõr mõjno ko ad einwõt armij, Jehovah enaj kakajurlok kij ñan ad kõmanmõn ankilan elañe jej atartar ion ñan jibañ. Ilo an jelã kin aikwij eo ñan jibañ rot in, ri jilek Piter ear je: “Elañe jabdewõt armij ej ri jerbal in kwalok nan, en kwalok nan einwõt an atartar ion kajur eo Anij ej letok.” (1 Peter 4:11, NW) Im Paul ear kwalok an atartar ion kajur eo Anij ear letok ke ear ba: “Inem ebuñburuõ ilo mõjino ko, ilo jorran ko, ilo aikwij ko, ilo matõrtõr ko, ilo iñtan ko kin Kraist: bwe ña imõjino, inem I kajur.” (2 Dri Korint 12:10) Jen kalikar ejja tõmak rot in wõt im bõktok aibujuij ñan Kajur Bõtata eo Iroij Jehovah, eo ej kakajur ro rej mõk.—Aiseia 12:2.
[Kamelele ko itulal]
a Oran in, ilo wãwen lebwinbwin eo an U.S., ej joñan in 1 im ilokantok 20 wao ko.
b Jeje in Watchtower Bible im Tract Society in New York, Inc.
Ewi Wãwen Am Naj Kar Uak?
• Etke armij ro an Jehovah rej aikwij elaplok kajur jen joñan eo ibbeir?
• Ta menin kamol eo ewõr ilo Jeje ko bwe Anij ej kakajur ro ri karejaran?
• Ta jet ian menin letok ko ilo jitõb Jehovah ear kõmmani ñan kakajur kij?
• Ewi wãwen ad maroñ kwalok bwe jej reilok ñan Anij ñan bõk kajur?
[Pija]
Kõtan eo ad make ibben Jehovah ej kakajurlok kij ke jej kajerbal Bible eo ñan katakin ro jet