Jehovah Ej Lelok Kajur
1 Ta lemnak eo am kin ri jilek Paul? Ñe jej read book in Jerbal, jej kile joñan an kar kijejeto ilo jerbal eo an Jehovah. Ewi wãwen Paul ear kõtõbrak aolep men ko ear kõmmani? Ear ba: “I maroñ in kõmõn men otemjej ilo Eo ej kakajur iõ.” (Pil. 4:13) Kij bareinwõt jemaroñ bõk tokjen jen kajur eo Jehovah ej letoke. Ewi wãwen? Ilo ad kortokjen men in letok ko jiljino ear litoki ñan kakajurlok kij ilo jitõb.
2 Nan in Anij: Einwõt jej aikwij bõk kijed mõñã ñan kejbãrok kajur eo ad ilo enbwinid, jej aikwij bareinwõt najidik kij make kin Nan eo an Anij bwe jen mour wõt ilo jitõb. (Mat. 4:4) Bible eo ej letok kajur eo ñan kejbãrok kij. Ñan kõmman bwe jen kijejeto wõt kin mol eo, jej aikwij bõk ien ñan katak ibbed make im ñan kalmenlokjen, ran otemjej elañe emaroñ.—Sam 1:2, 3.
3 Jar: Eaorõk bwe jen ruaklok ñan Jehovah, elaptata ilo ien ko ñe jej bed ilo aikwij. Ikijen jitõb eo an, ej lelok kajur ñan ro rej kajitõk ibben kake ilo jar. (Luk 11:13; Ep. 3:16) Jeje ko rej rejañ kij ñan “niknik ilo jar.” (Rom 12:12) Kwoj kõmmane ke?
4 Congregation eo: Jej bareinwõt bõk kakajur im rejañ jen kwelok ko an congregation eo im jen kamao ko remãnãn jej lañliñ kake ijo ibben ro jeid im jatid maan im kõrã. (Hib. 10:24, 25) Ñe jej inebata, rej kõketak kij im ilo yokwe rej jibañ kij.—Ken. 17:17; Ekkl. 4:10.
5 Jerbal in Kwalok Nan: Keini ad bõk kunad ilo jerbal in kwalok nan ej jibañ kij ñan kalimjek wõt Ailiñ eo im jerammõn ko an. Jej mõnõnõ ñe jej jibañ ro jet katak kin Jehovah. (Jerbal 20:35) Ejjab aolep remaroñ emmakit ñan bar juõn jikin ñan jerbal ijo rej aikwiji jibañ ie ak ñan bõk jerbal in kwalok nan full-time, ak jemaroñ bõk kunad ilo joñan ad maroñ ilo jerbal ko jet.—Hib. 6:10-12.
6 Chriatian Overseer ro: Jej bõk tokjen jen rejañ eo im jibañ eo me elder ro rej letoke. Jehovah ear jitõñ ir ñan shepherd e bwijin Anij ej bed ibbeir. (1 Pit. 5:2) Overseer ro rej ito-itak rej kõketak aolep congregation ko rej jerbal ie, einwõt Paul ear kõmmane ilo ran eo an.—Rom 1:11, 12.
7 Joñok kin Ro Retiljek: Ej juõn men in kõketak ñan lemnak kin joñok ko remõn an ri jerbal ro mõttad retiljek, ilo ien ko etto im kiõ. (Hib. 12:1) Ñe kwoj aikwij bõk kõketak, etke kwojjab read juõn ian bwebwenato ko ilo magazine ko ad kin mour ko an armij, juõn report ekõketak ilo Yearbook eo, ak jet bwebwenato ko rekairujruj ilo bwebwenato eo an Ri Kennan ro an Jehovah rej walok ilo Proclaimers book eo?
8 Juõn brother, eo ej kiõ 90 jima an yiõ, ear bõk mol eo ke ear juõn likao jidikdik. Ke ear dik wõt, tõmak eo an ear bed ilo melejoñ. Mokta, jet ro rar kijejeto ilo congregation eo rar ilok jen dolul eo an Jehovah. Inem kar wõr jerbal eo jen em ñan em, eo ear bin ñan e. Bõtab, ien otemjej ear liki wõt Jehovah. Ejjabto ear mõnõnõ kin jerbal in kwalok nan. Im rainin? Meñe ejjab lukkun emõn ejmour eo an, ej juõn uan wõt family in Bethel ilo Brooklyn, im jerbal ilo Governing Body eo. Ejjab ajlok kin an kar eddeb wõt ñan dolul eo an Jehovah.
9 Juõn sister eo ej juõn uan family in Bethel eo ilo Britain ear baptais ke ear 13 yiõ dettan. Ear jino pioneer ibben likao eo jein ilo yiõ eo tok juõn, im yiõ eo tok elikin, jemen ear bed ilo kalbuj kinke ear jab kõnan bõk kunan ilo tarinae ilo Bata eo an Lal kein karuo. Ear atartar wõt ion Jehovah ñan bõk kajur, im ear wõnmanlok im karejar ñan Anij eo emol. Tokelik, ear belele ibben juõn brother etiljek, im rar wõnmanlok wõt ibben don im kõmanmõn ankil an Jehovah. Elikin 35 yiõ ko in airro belele, leo belen ear mij ilo jidimkij. Bar juõn alen ear bõk kajur jen Jehovah, im ear wõnmanlok im karejar ñan Jehovah ñan rainin, im ej reimanlok ñan jerbal ñan indio einwõt juõn uan family eo an Jehovah ijin ion lal.
10 Jehovah ej jibañ im kakajurlok ri karejar ro an retiljek. “Ej lelok kajur ñõn eo ej barõk; im ñõn eo ejelok an maroñ, Ej korlok kajur.” Jemaroñ bõk jen unjen kajur in eo ejelok joñan ilo ad kortokjen aolep men in letok ko jiljino kar kwaloki ilõñ. Kememej: “Ro rej kõtare Jeova re naj kõkal air kajur. . . . Re naj etõr im jab mõk; re naj etetal im jab barõk.” (Ais. 40:29-31) Paul elap an kar atartar ion Jehovah ñan bõk kajur, im jej aikwij kõmman eindein bareinwõt.