Anij Ej Kajerbal Kajur eo an ñan Jiboñ Kij Jumae Kabo im Kijenmij Ilo Men ko Rej Kamõk im Kabwer Kij
“Kom naj bõk maroñ ñe emwij an [kajur eo an Anij] itok iomi.”—JERB. 1:8.
1, 2. Ta eo Jisõs ear kalimuri dri kalor ro an kake bwe enaj kar jibañ ir, im etke rar aikwiji?
JISÕS ear jelã bwe dri kalor ro an rar jab maroñ kõmmani aolep kakien ko an kin maroñ ko air make. Rar aikwiji kajur eo an Anij kinke ear lap jerbal in kwalok nan eo air, ear kajur dri kijirãt ro air, im kinke ir armij mõjno. Kin men in, mokta jen an Jisõs kar wõnliñlok ñan lañ, ear kalimuri dri kalor ro an im ba: “A kom naj bõk maroñ ñe emwij an [kajur eo an Anij] itok iomi: im kom naj Aõ dri kennan ilo Jerusalem, im i aolepen Judia, im i Sameria, im ñõn eneo etolok tata i lõl.”—Jerb. 1:8.
2 Ear jejit kitien kalimur in ilo ran in Pentekost eo ilo yiõ eo 33 ke kajur eo an Anij ear lutõklok ion dri kalor ro an Jisõs Kraist ñan kwalok nan iaolepen Jerusalem. Ejelok jumae ear maroñ kabwijrõk ir. (Jerb. 4:20) Dri kalor ro an Jisõs rar aikwiji kajur eo jen Anij “ien otemjej ñõn jemlokõn” im kij jej bar aikwiji ejja kajur in wõt.—Matu 28:20.
3. Ta eo kajur eo an Anij emaroñ jibañ kij ñan kõmmane?
3 Jisõs ear kalimuri dri kalor ro an bwe renaj ‘bõk maroñ ñe emwij an kajur eo an Anij itok ioir.’ Ealikar bwe kajur eo an Anij emaroñ kamakõt armij ro im kakajur ir. Emaroñ kamaroñ kij ñan kajejit wujleplok eo ad, im jibañ kij ñan jumae ijjibed ko me rej iun kij ñan kõmmani men ko rej nae men ko rej ankilan Anij.—Riit Maika 3:8, UBS; Dri Kolosse 1:29.
4. Ta eo jenaj etale ilo katak in, im etke?
4 Ewi wãwen ej alikar an kajur eo an Anij jibañ kij? Ta ko kajur eo an Anij emaroñ jibañ kij ñan kõmmani? Ke jej kate kij ñan tiljek ilo ad karejar ñan Anij, jej iion elõñ abañ ko jen Setan, jen jukjuk in bed in, im kin jab wãppen eo ad. Eaurõk bwe jen anjo ion abañ kein ñan ad maroñ wõnmanlok wõt im keini ad bõk kwonad ilo jerbal in kwalok nan, im drebij wõt kõtan eo ad ebak ibben Jeova. Kiõ jen etale ewi wãwen Anij ej kajerbal kajur eo an ñan jibañ kij jumae kabo ko im kijenmij iomin abañ ko rej kamõk im kabwer kij.
Jumae Kabo Ko
5. Ewi wãwen jar ej kakajur kij?
5 Jisõs ear katakin dri kalor ro an ñan jar: “Jab kadreloñ kim ilo kabo, a lomoren kim jen eo enana.” (Matu 6:13) Jeova ejamin kejekron dri karejar ro an retiljek im rej kajitõk kake men in. Bar juõn ien, Jisõs ear ba bwe ‘Jemeruij i lõñ enaj lelok kajur eo an ñan ro otemjej rej kajitõk ibben.’ (Luk 11:13) Elap an men in kõketak kinke Jeova ej kalimur bwe enaj letok kajur eo an ñan jibañ kij kõmmani men ko rejimwe. Ejjab melelen men in bwe Jeova enaj bõprae ad iion kabo ko. (1 Kor. 10:13) Bõtab ñe jej jelmae kabo ko, eñin ej ien eo im ej aikwij laplok ad jar.—Matu 26:42.
6. Uak ko an Jisõs ñan jumae kabo ko an Setan rar bedbed ion ta?
6 Jisõs ear kajerbal eon ko ñan uake Devil eo ke ear kajeoñ kabo e. Ealikar an kar Jisõs kememej nan in Anij ke ear uak im ba: “Ar jeje . . . Ar bar je . . . Kwon ilok, Setan: bwe ar je, Kwon kabuñ ñan Iroij am Anij, im kwon jerbal ñõn E wõt.” (Matu 4:1-10) An Jisõs yokwe Jeova im Nan in Anij ear kamakõt e ñan jumae kabo ko an dri nana eo. Setan ear ilok jen Jisõs elikin an Jisõs jumae kabo ko jen e elõñ alen.
7. Ewi wãwen Baibel eo ej jibañ kij ñan jumae kabo ko?
7 Elañe Jisõs ear atartar ion Jeje ko ñan jumae kabo ko an Setan, kij armij elaplok ad aikwij in bar kõmmane men in! Aet, bwe jen maroñ jumae Devil eo im ro mõtõn, jej aikwij mokta kate kij ñan jelã kin kien ko an Anij im lukkun edrep ñan kien ko an. Elõñ rar jino mour ekkar ñan Baibel eo elikin air katak Baibel im melele im kaurõk meletlet im wãnik eo an Anij. Emol, Nan in Anij elap an kajur im emaroñ “kili lemnok ko im bebe ko an buru.” (Hib. 4:12) Ñe ej laplok an juõn riit im kalomõnlokjen kin jeje ko ilo Baibel eo, enaj laplok an melele kin Jeova. (Ken. 2:4, 5) Kin men in, jej aikwij kalomõnlokjen kin eon ko ilo Baibel me rej ekkar ñan men eo jej mõjno kake.
8. Ta wãwen ko renaj jibañ kij ñan bõk kajur eo an Anij?
8 Jisõs ear maroñ jumae kabo ko jab kinke ear jelã kin Jeje ko wõt ak bareinwõt kinke ear ‘obrõk kin kajur eo an Anij.’ (Luk 4:1) Bwe en wor ejja maroñ im kajur in wõt ibbed ñan jumae kabo ko, jej aikwij druaklok ñan Jeova ikijen ad jerbali aolep wãwen ko ej litok ñan ad bõk kajur eo an, einwõt katak Baibel, jar, im kõmao ibben ro jeid im jatid ilo tõmak. (Jem. 4:7, 8) Elõñ rar lo tokjen air lore juõn lajrõk ñan kõmmani men kein me rej jibañ ir ñan lemnak wõt kin men ko rekõketak im rej kakajur kõtan eo air ibben Anij.
9, 10. (a) Ta kabo ko ekkã an dri Kristian ro jelmaiki? (b) Ta ko kwoj aikwij kalomõnlokjen im jar kaki ñan am maroñ jumae kabo ko meñe kwoj mõk im ebwer?
9 Ta kabo ko jej aikwij jumaiki? Kwonañin ke kar kajeoñ katoojoj ñan juõn eo ejjab beleõm? Elañe kwojañin mare, kwonañin ke kar kõnan jeraik juõn eo ejjab bed ilo tõmak? Ñe dri Kristian ro rej aluij TV im kajerbal Internet, ilo idriñ emaroñ walok juõn men enana im ej kareel ir ñan aluije juõn men etton. Elañe men in ear walok ñan yuk, ta eo kwar kõmmane? Ej menin meletlet ñan kalomõnlokjen kin ewi wãwen juõn bwir emaroñ tellok ñan bar juõn im tokelik kõmman juõn jerawiwi elap. (Jem. 1: 14, 15) Kalomõnlokjen kin wãwen kwonaj kõmetak buruen Jeova, ro ilo congregation eo im baamle eo am elañe kwoj kõmmane juõn bwid elap. Ijo turãjet, enaj erreo bõklikõt eo am elañe kwoj tiljek wõt im kejbãrok kien ko an Anij. (Riit Sam 119:37; Jabõn Kennan Ko 22:3.) Jabrewõt ien kwoj iion kabo kein, kwon niknik ilo am jar im kajitõk jibañ bwe kwon maroñ jumaik men kein.
10 Ebar wor juõn men jej aikwij kememej kake kin menin kabo ko an Devil eo. Setan ear wõnmae Jisõs elikin an jitlok iomin 40 ran ilo ene jemaren. Ejelok berre bwe Setan ear lemnak bwe ear “juõn ien” emmõn ñan an melejoñwe tiljek eo an Jisõs. (Luk 4:13) Eindrein, Setan ej bukot juõn ien emmõn ñan an melejoñwe tiljek eo ad. Kin men in, eaurõk bwe jen wõnmanlok wõt im kakajur kõtan eo ad ibben Anij. Ekkã an Setan kõjjeroroik armij ro ñe ej lo bwe remõjno. Kin men in, jabrewõt ien jej lo bwe jej mõk im ebwer, ej aikwij laplok ad eowore Jeova bwe en kajerbal kajur eo an ñan kejbãrok im kakajur kij.—2 Kor. 12:8-10.
Kijenmij Iomin Men ko Rej Kamõk im Kabwer Kij
11, 12. (a) Etke elõñ armij ilo ran kein rej ebwer? (b) Ta eo emaroñ kakajur kij ñan anjo ion men ko rej kabwer kij?
11 Kinke kij armij jab wãppen, elõñ ien jej ebwer. Elaplok an men in walok ilo ran kein ad kinke jej mour ilo juõn ien im elõñ men ko rej kainebataik kij. Jej bed ilo ien ko rekanuij bin me armij rejañin kar iione jen mokta. (2 Tim. 3:1-5) Ke Armagedõn ej ebaktok, ej binlok wõt mour, laplok an armij mõk im iion elõñlok ijjibed ko jet. Kin men in, jen jab bwilõñ ñe ebin an jet kajejit eddo ko air ñan lale im kabwe aikwij ko an baamle ko air. Joñan air mõk, ebwer im maat air maroñ, ejelok bar men remaroñ kõmmane. Elañe men in ej walok ñan yuk, ewi wãwen kwomaroñ kijenmij wõt?
12 Kememej bwe Jisõs ear kalimuri dri kalor ro an bwe enaj lelok juõn menin jibañ ñan ir, ej kajur eo an Anij. (Jon 14:16, 17, UBS) Eñin ej kajur eo ekajurtata ilañ im ion lõl. Ikijen kajur in, Jeova emaroñ kakajur im kamaroñ kij ñan kijenmij iomin jabrewõt abañ ko. (Ep. 3: 20) Ikijen ad atartar ion kajur eo an Jeova, dri jilik Paul ear ba bwe jenaj bõk “kajur eo eutiejtata ej an Anij” meñe ‘emmakijkij an inebata buñut kij.’ (2 Kor. 4: 7, 8, UBS) Jeova ejjab kalimur ñan jolok aolep inebata ko ad, ak ej kalimuri kij bwe enaj kajerbale kajur eo an ñan kakajur kij bwe jen kijenmij wõt.—Pil. 4: 13.
13. (a) Ta eo ear kakajur juõn jodrikdrik bwe en kijenmij ilo ien ko rebin? (b) Ewor ke bwebwenato einlok wõt in im kwojelã kake?
13 Jen etale wanjoñok eo an Stephanie, juõn regular pioneer im 19 an yiõ. Ke ear 12 yiõ drettan, ear stroke ak ear jab lukkun jelet e, bareinwõt ear edrek juõn tumor ilo kamelij eo an. Jen ien in ear aikwij mwijmwij ruo alen, bõk uno in mõn kij in cancer eo, im ear bar stroke ruo alen. Joñan an lap an kar stroke ear kõmman bwe en mij rãjetin enbwinin im tap mejen. Stephanie elap an kaurõke kwelok ko im kwalok nan. Eñin unin meñe enañinmij ak ej kate bwe en maroñ bõk kwonan ilo men kein. Bareinwõt, ej iñjake an Jeova jibañ e ilo elõñ wãwen ñan kijenmij wõt. Bwebwenato ko an dri Kristian ro jet ilo book ko rej bedbed ion Baibel eo rar lukkun kakajur e ñe ej buromõj im ebwer. Ro jeid im jatid elap air kakajur e ikijen air jeje letter ko ñan e ak konono ibben kin men ko rekõkãtõk mokta im elikin ien kwelok. Bareinwõt armij ro me rej katak Baibel ibben Stephanie rej mõnõnõ in etal ñan mweo imõn im katak ibben kinke rej mõnõnõ kin katak ko ej katakin ir kaki. Elap an Stephanie kamolol Jeova kin aolep men kein. Eon eo emmõntata ibben Stephanie ej Sam 41:3, kinke ej lo bwe elap an jejit ñan e.
14. Ta lemnak eo ebwir jej aikwij bõprae ñe jej mõk im inebata, im etke?
14 Ñe jej lukkun mõk ak inebata, jet ien jemaroñ lemnak bwe wãwen eo emaroñ jibañ kij jolok ad inebata ej ilo ad kadriklok ad kõmmani makõtkit ko an dri Kristian. Bõtab lemnak in ebwir. Etke? Kinke Jeova ej kakajur kij ikijen makõtkit ko einwõt katak Baibel ibbed make im ibben baamle ko ad, kwalok nan, im bed ilo kwelok ko. Makõtkit kein an dri Kristian elap air kaemololoik kij. (Riit Matu 11:28, 29.) Ekkã wõt an ro jeid im jatid mõk ñe rej itok ñan kwelok ko ak ñe rej jeblak jen kwelok ñan moko imweir rej bar kajur.
15. (a) Jeova ej ke kalimur bwe mour eo an juõn dri Kristian enaj bidrodro? Kemelele jen eon ko ilo Baibel. (b) Ta eo Anij ej kalimuri kij kake, im ta kajitõk eo jen kajitõkin kij make?
15 Ilo mol, mour in Kristian ejjab bidrodro. Ekitibuj air lukkun kate ir ñan tiljek wõt. (Matu 16:24-26; Luk 13:24) Mekarta, Jeova emaroñ kajerbale kajur eo an ñan kakajur eo ej mõk. Dri kanan Aiseia ear je nan kein: “Ro rej kõtare Jeova re naj kõkal air kajur; re naj jeblãliñlok kin peir einwõt igõl ko; re naj etõr im jab mõk; re naj etetal im jab barõk.” (Ais. 40:29-31) Kin men in, jen kajitõkin kij make, ta eo ej kõmman ad lemnak bwe makõtkit ko an Kristian rekamõkmõk?
16. Ewi wãwen jemaroñ karmijeteik men ko rejej tokjeir im rej kaddoik im kamõk kij?
16 Nan eo an Anij ej rejañ kij ñan “melejoñ men ko relijiklok,” ak raurõklok. (Pil. 1:10) Dri jilik Paul ear keidi mour in Kristian ñan juõn iaikwij eaitok. Kar kakõrmol e bwe en kwalok nan in rejañ in: “Jen bareinwõt jolok men otemjej rerro, . . . jen kijenmij im etõr ilo iaikuij eo emwij likit e imar.” (Hib. 12:1) Melele eo an ilo eon in ej bwe jen karmijeteik kõtõbar ko rejej tokjeir im men ko rej kaddoik kij im renaj kõmmõn ad mõk. Bwelen meñe jet iar jeboub kadede ak jej kõnan bar bõk jerbal ko jet. Kin men in, elañe ekkã am mõk im eddoro, kwon etale ewi joñan am jolok ien ko am ilo jikin jerbal, am itoitak ñan jikin ko jet ñan baj limo wõt, im am lukkun kõnan jibarek ikkure ko ak menin kamõnõnõ ko jet. Kamanwa im etã buru rej aikwij kamakõt kij ñan kile joñan maroñ ko ad im kadriklok makõtkit ko rejej tokjeir.
17. Etke jet rej ebwer, ak ta eo Jeova ej kalimuri kij kake kin men in?
17 Bwelen jet iar jej bar ebwer kinke ejañin itok jemlokõn jukjuk im bed in ilo ien eo jar kõtõmene bwe enaj kar itok ie. (Ken. 13:12) Bõtab, jabrewõt eo ej bõk lemnak rõt in, emaroñ bõk kainemõn jen nan ko ilo book in Habakkuk me ej ba: “Ejjañin ien ñan an jejjet kitieir. Bõtab ien eo ebaktok im men kein ij kwaloki ñan yuk renaj walok. Kwo maroñ lemnak renaj rumwij, ak kwon kõttar wõt; enaj jejjet kitieir ilo ien eo iar karõke, im ejjelok menin bõbraiki.” (Hab. 2:3, UBS) Jeova ej kalimuri kij bwe enaj itok jemlokõn jukjuk im bed in ilo ien eo emwij an karõke.
18. (a) Ta nan in kalimur ko an Anij rej kakajur yuk? (b) Ewi wãwen an katak in tok juõn ewor tokjen ñan kij?
18 Emol bwe aolep dri korijer ro retiljek an Jeova rej lukkun lipjerjeretok ran eo ñe enaj ejelok bar mõk im ebwer, im ñe aolep renaj ‘kajur einwõt juõn jodrikdrik.’ (Job 33:25, UBS) Rainin Anij ej kajerbal kajur eo an ñan kakajur kij ñe jej bõk kwonad ilo makõtkit ko an Kristian. (2 Kor. 4:16; Ep. 3:16) Jab kõtlok bwe men ko rej kamõk im kabwer yuk ren bõprae am bõk jerammõn ko rej ñan indrio. Jabrewõt abañ renaj jako meñe rej jen kabo ko, jen ad mõk ak ebwer, im meñe rejjab jako ilo mõkõj ak renaj jako ñan indrio ilo lõl eo ekãl an Anij. Ilo katak in tok juõn, jenaj etale ewi wãwen Anij ej kajerbal kajur eo an ñan kakajur dri Kristian ro bwe ren jutak bin nae matõrtõr, anjo ion ijjibed ko jen ro jet, im kijenmij iomin abañ ko jet.
Ewi Wãwen Kwonaj Uak?
• Ewi wãwen riit Baibel ej kakajur kij?
• Ewi wãwen jar im kalomõnlokjen rej kakajur kij?
• Ewi wãwen kwomaroñ karmijeteik men ko rejej tokjeir im rej kaddoik im kamõk yuk?
[Pija ilo peij 24]
Kwelok ko rej kakajurlok kõtan eo ad ibben Anij