Jejañin Ebwer Meñe Jemõk
“Jeova, dri kõmõnmõn jabõn ko jabõn lõl, . . . ej lelok kajur ñõn eo ej barõk; im ñõn eo ejelok an maroñ, Ej korlok kajur.”—Aiseia 40:28, 29.
1, 2. (a) Ta nan in kir eo emõn ej bellok ñan aolep ro rekõnan kabuñ ilo erreo? (b) Ta eo emaroñ juõn men ekauwatata ñan mour in jitõb eo ad?
EINWÕT ri kalor ro an Jesus, jelukkun jelã kin nan in eowor eo an: “Komin itok ñõn iba, kom otemjej rej jerbal im ban, im I naj kakijeik kom.” (Matu 11:28-30) Ri Christian ro bareinwõt remaroñ bõk “ien aimlolo ko jen iman mejen Iroij [Jehovah].” (Jerbal 3:19) Emol bwe emwij am make bõk aemololo ko jen am katak mol eo jen Bible eo, ewõr juõn kejatdikdik emõn kin ilju im jeklaj, im ilo am jerbale kien ko an Jehovah ilo mour eo am.
2 Ak, jet ri kabuñ ro an Jehovah rej mõk ilo eñjake jen ien ñan ien. Jet ien emaroñ jab aetok air buromõj. Ilo ien ko jet emaroñ aetok ien air buromõj. Tokelik, jet remaroñ watõk bwe jerbal ko einwõt Christian rej ine ko reddo im jab juõn ine emera im aemololo einwõt an kar Jesus kallimur kake. Eñjake rot kein remaroñ bõktok juõn kauwatata ñan kõtan eo an juõn Christian ibben Jehovah.
3. Etke Jesus ear letok nan in kakabilek eo ilo Jon 14:1?
3 Mokta wõt jen an kar kalbuj im mij, Jesus ear jiroñ ri kalor ro an: “En jab biuk buruemi, komin liki Anij, komin bareinwõt liki Iõ.” (Jon 14:1) Jesus ear ba nan kein kinke ri jilek ro rej bojak in jelmae melejoñ ko rekauwatata. Matõrtõr enaj kar walok elikin. Jesus ear jelã bwe ri jilek ro an remaroñ buñ jen wõt air buromõj. (Jon 16:1) Elañe rar jab kejbãrok ir, buromõj eo air emaroñ kar kamõjnoik ri jilek ro im kamakit ir bwe ren luji liki eo air ilo Jehovah. Men in emol bareinwõt ñan Ri Christian ro ilo ran kein. Ñe etto an buromõj bed, men in emaroñ kainebata kij, im buruõd enaj eddo. (Jeremiah 8:18, NW) Armij eo iloa emaroñ mõjno. Iumin melejoñ in, jenaj einwõt ñe jemij ilo eñjake im jitõb, im elaptata jemaroñ luji kõnan eo ad ñan kabuñ ñan Jehovah.
4. Ta eo emaroñ jibañ kij ñan kejbãrok buru in kõkkar eo ad bwe en jab mõk?
4 Ej juõn nan in kakabilek ekkar an Bible: “Kwon kanuij kejbãrok buruõm elap jen men otemjej, bwe jen e ej walok men ko men in mour.” (Jabõn Kennan Ko 4:23) Bible eo ej letok nan in kakabilek eo ekeie ñan kejbãrok buruõd jen buromõj im mõk ilo jitõb. Bõtab, moktata, jej aikwij kile ta unin ad barõk.
Kabuñ eo an Christian Ejjab Juõn Kabuñ Eddo
5. Ta lemnak eo ej idaptõk ibben jerbal in kõmman ri kalor eo an Christ?
5 Emol bwe, ñan erom juõn Ri Christian jej aikwij kate wõt kij. (Luk 13:24) Jesus ear ba bareinwõt: “Jabrewõt eo e jab bõk an alal in eñtan im lor iõ ejjab maroñ ri kalora.” (Luke 14:27, NW) Ilo jinoin ñe jej lo nan kein jemaroñ lemnak bwe rej jumae nan eo an Jesus ke ear ba bwe ine eo an emera im ej kaemololoik kij, ak ilo mol rej errã ibben don.
6, 7. Etke jemaroñ ba bwe wãwen kabuñ eo ad ejjab kamõk kij?
6 Ad kate kij im boub ilo jerbal, meñe jemaroñ mõk, emaroñ kajuburuõd im kaemololo ñe jej jerbal kin juõn un emõn. (Ekklisiastis 3:13, 22) Im bar ta wãwen eo emõnlok ijellokin ad kwalok nan kin katak ko remol im aibujuij ibben ro ri turud? Bareinwõt, melejoñ ko jej jelmae ñe jej kate wõt ñan mour ekkar ñan kien ko reutiej an Anij redik ñe jej keidi ibben tokjen ko jej lañliñ kaki kin ad kõmmane men in. (Jabõn Kennan Ko 2:10-20) Elaptata ñe jej bõk matõrtõr, jej watõke einwõt juõn kautiej im nebar ñan bõk eñtan kin Ailiñ eo an Anij.—1 Piter 4:14.
7 Emol bwe ine eo an Jesus ej kaemololoik armij, elaptata ñe jej keidi ibben marok ilo jitõb eo me ro rej bed ilo kabuñ wan rej bed iumin. Anij ej yokwe kij im ejjab iun kij bwe jen kõmman men ko jejjab maroñ kõmmani. “Kien ko an [Jehovah] re jab erro.” (1 Jon 5:3) Kabuñ in Christian eo emol, ekkar ñan Jeje ko ilo Bible, ejjab lej. Alikar, wãwen kabuñ eo ad ejjab kamõk im kaburomõj kij.
“Jolok Men Otemjej Rerro”
8. Ta eo ekkã an kamõk armij ilo jitõb?
8 Jabdewõt wãwen mõk ilo jitõb jej loe ej waloktok jen men ko reddo rej itok jen jukjuk im bed in enana. Kinke “aolepen lõl ej berwõt ilo dri nana eo,” men in kareelel ko renana rej kabol kij remaroñ kamõk kij im kokkure ad jokkin wõt juõn einwõt juõn Ri Christian. (1 Jon 5:19) Jibadbad ko ejelok tokjeir rej bwokõj im kamad kij jen ad debij juõn lajrak in makitkit ko an Christian. Eddo kein remaroñ kamad kij im kokkure jitõb eo ad kin men ko ilo jitõb. Kin men in, Bible eo ej rejañ im kakkõl kij bwe jen “jolok men otemjej rerro.”—Dri Hibru 12:1-3.
9. Ewi wãwen an jibadõk mweiuk ko maroñ kabwer kij?
9 Ñan wanjoñok, wãwen an lal in boub ñan jibadõk juõn ãt eutiej, korlok money, kabukõt men in kamõnõnõ ko, ñan jambo im mõnõnõ wõt, im jibadbad ko eirlok wõt remaroñ karel lemnak ko ad. (1 Jon 2:15-17) Jet Ri Christian ro ilo ebeben eo kein kajuõn rar bwokõj mour ko air ilo air jibadõk mweie. Ri jilek Paul ear kamelele: “A ro re kanuij kõnan bwe ren dri mweie, re buñ ilo kabo im oujir im elõñ mõm ko re bwebwe im nana, rej kamaloñ armij im kokkure ir ilo jikin joko. Bwe arõk mõnni ej okran nana otemjej, eo ke jet r’ar arõk r’ar jebwãbwe jen tõmak im mõke wie ir kin elõñ men in kaburomõj.”—1 Timote 6:9, 10.
10. Ta eo jemaroñ katak kin arõk mweiuk jen wanjoñok eo an Jesus kin ri kallip eo?
10 Ñe jej mõk im ebwer ilo jerbal eo ad ñan Anij, emaroñ ke bwe kõnan eo ñan jibadõk mweiuk ko rej kautameik mour eo ad ilo jitõb? Men in emaroñ lukkun mol, einwõt an kar Jesus kwalok ilo wanjoñok eo an kin ri kallip eo. Jesus ear keidi “inebata ko an lõl in, im mon an mweiuk ko, im mõmkake men ko jet” ñan kãliklik ko “rej dreloñ im koutameik,” inen nan in Anij ilo buruõd. (Mark 4:18, 19) Kin men in, Bible eo ej kakabilek kij im ba: “Komin jab arõk dala; komin jokõne kin men ko ami: bwe E ar ba, I jamin likit yuk, im I jamin illok jen kwe in drio.”—Dri Hibru 13:5.
11. Ewi wãwen ad maroñ jolok men ko rej kabwer kij?
11 Jet ien men eo ej kautameik mour eo ad ej, jab ad jibadõk elõñlok mweiuk ko, ak ej ta eo jej kõmmane kin mweiuk ko ad. Jet remaroñ barõk ilo eñjake kinke rej jelmae abañ ko kin ejmour, rar luji jitenburu ro air, ak kar wõr inebata ko jet. Rar lo aikwij eo ñan ukõt wãwen mour eo air jen ien ñan ien. Juõn leo im lio ri belele rar bebe bwe ren jolok jet ian men in kamõnõnõ ko im jerbal ko air jidik wõt tokjeir. Rar etale mweiuk ko mweieir im lukkun aine aolep men ko rar kõmmani im kakoni ilo box ko. Jen ien ñan ien, jemaroñ lo tokjen elañe jej etale makitkit im mweiuk ko ad, jolok jabdewõt eddo ejelok tokjeir bwe jen jab mõk im ebwer.
Kõmmanwa im Inemõn Rej Men in Aikwij
12. Ta eo jej aikwij kile kin bwid ko ad make?
12 Bwid ko ad make, meñe rej dik wõt, jidik kin jidik remaroñ kautameik mour eo ad. Elap an mol nan ko an David: “Bwe bwid ko aõ r’ar kijone bõra. Einwõt inek erro rerrolok jen ña.” (Sam 38:4) Ekkã an walok bwe, elañe jej kõmman jet oktak ko rekeie, remaroñ kameraik erro ko ad.
13. Ewi wãwen kõmmanwa emaroñ jibañ kij ñan bõk juõn lemnak ejokkin wõt juõn kin jerbal in kwalok nan?
13 Bible eo ej rejañ kij bwe jen kaddek “juõn lemnak emõn im lemnok jime.” (Jabõn Kennan Ko 3:21, 22) “Meletlet jen lõñ ej . . . kõmmanwa,” Bible ej ba. (Jemes 3:17) Jet armij rar bed iumin juõn ijjibed ñan jerbal joñan wõt ro jet ilo Christian jerbal in kwalok nan. Bõtab, Bible eo ej kakabilek kij: “Jabrewõt armij en mõke melejoñ jerbal eo an, inem e naj or unin kimjãje ilo e mõke, im jab ilo dri turin. Bwe jabrewõt armij e naj mõke inek kwonan.” (Dri Galetia 6:4, 5) Emol bwe, joñok eo emõn an Ri Christian ro mõttad remaroñ rejañ kij ñan karejar ñan Jehovah kin aolepen buruõd, ak meletlet eo ekeie im kõmmanwa enaj jibañ kij ñan likit mejenkajjik ko rekkar ñan wãwen im maroñ ko ad.
14, 15. Ewi wãwen ad maroñ kwalok meletlet eo ekeie ñe jej kabwe aikwij ko ad ilo kanniek im eñjake?
14 Kwalok kõmmanwa ilo wãwen ko rejjab kanuij aorõk emaroñ kejbãrok kij jen ad mõk. Ñan wanjoñok, jej kaddek ke manit ko remõn im jokkair wõt juõn ñan debij ejmour eo emõn ilo kanniek? Lemnak kin joñok eo an ri belele leo im lio ilo juõn ian office ko an Ri Kennan ro an Jehovah. Rar lo tokjen eo ekeie ñan air kejbãrok ir jen mõk. Lio ej ba: “Jekdon ewi joñan an lap amro jerbal, kimij kate wõt im kiki ejja awa eo wõt boñin otemjej. Bareinwõt kimij keini amro kamineneik enbwinõm. Men in ear lukkun jibañ kimro. Kim ar katak im jelã joñan maroñ ko amro, im kimij jerbal ilo ekkar. Kimij jab keidi maroñ ko amro ibben ro me einwõt rej kajur ñan ejelok joñan.” Jej keini ke ad mõñã ekan ko reũn kibdeir im ebwe ke ien ad kiki? Ad lale ilo kõmmanwa ejmour eo ad ilo kanniek enaj kadiklok eñjake ko kin ad mõk ilo eñjake im jitõb.
15 Jet iad jej aikwiji men ko ejej uair. Ñan wanjoñok, juõn Ri Christian kõrã ear kwalok nan full-time ilo territory ko ebin jerbal ie. Ear bõk nañinmij ko rekauwatata, ekoba cancer. Ta eo ej jibañ ej ñan kijenmij iumin melejoñ kein? Ej ba: “Eaorõk ñan ña bwe in bõk ien ñan aõ makelok iaõ im bed ilo juõn jikin ejelok keroro ie. Ñe elaplok aõ inebata im mõk, ij aikwij kalaplok ien ñan makelok iaõ bwe in read im kakije.” Meletlet eo emõn im jelãlokjen rej jibañ kij ñan kile im kabwe aikwij ko ad im bõprae ad barõk ilo jitõb.
Jehovah Anij Ej Kakajur Kij
16, 17. (a) Etke kejbãrok ejmour eo ad ilo jitõb elap an aorõk? (b) Ta eo jej aikwij kobaiktok ilo karõk eo ad ñan mour jen ran ñan ran?
16 Emol bwe, kejbãrok mour eo ad ilo jitõb, ej juõn men elap an aorõk. Ñe jej bed ebak ñan Jehovah Anij, jemaroñ mõk ilo kanniek, ak jejamin mõk in kabuñ ñan e. Jehovah “Ej lelok kajur ñõn eo ej barõk; im ñõn eo ejelok an maroñ, Ej korlok kajur.” (Aiseia 40:28, 29) Ri jilek Paul, eo ear lo mol in nan kein, ear je: “Kin men in kim jab ebwer; a meñe enbwinem e lotlok, ijoke kõkal am ran otemjej.”—2 Dri Korint 4:16.
17 Lale mõk nan eo “ran otemjej.” Ej melelen bwe jej aikwij bõk men in letok ko Jehovah ej letok ñan kij ran otemjej. Juõn missionary ear jerbal ilo tiljek iumin 43 yiõ im ear bed ilo ien ko emaroñ kar mõk im buromõj. Ak ear jab mõk im ebwer. Ej ba: “Iar kõmman bwe en juõn manit ibba bwe In ruj ilo rantak bwe mokta jen aõ jino jerbal, In bõk ien ñan jar ñan Jehovah im read Nan eo an. Karõk in ilo kajjojo ran kar jibañ iõ bwe In kijenmij mae kiõ.” Emol bwe jemaroñ atartar ion kajur eo an Jehovah elañe jej ekkeini, aet “jen ran ñan ran,” ad jar ñan e im kalmenlokjen kin kadkad ko reutiej kadkadin im kallimur ko an.
18. Ta nan in kainemõn eo Bible eo ej lelok ñan ro retiljek im rebwijwõlã ak renañinmij?
18 Elaptata an men in jibañ ro reburomõj kin air bwijwõlã im kin air nañinmij. Armij rein remaroñ buromõj, jab kinke rej keidi ir make ñan ro jet, ak kin air keidi ta eo rej kõmmani kiõ ibba men ko rar kõmmani mokta. Emol ej juõn men in kainemõn elap ñan jelã bwe Jehovah ej kautiej ro rej bwijwõlã! Bible ej ba: “Uõn in juõn armij ej belin aibujuij, elañe rej loe ilo wãnik.” (Jabõn Kennan Ko 16:31) Jehovah ej jelã kin joñan maroñ ko ad im elap an kaorõk wãwen ad kabuñ ñan e kin aolepen buruõd meñe jejjab wãppen. Im jerbal ko remõn emwij ad kõmmani Anij ejamin meloklok kaki. Jeje ko ilo Bible rej kallimur bwe: “Anij e wãnik wõt, im E jamin meloklok ami jerbal im yokwe, eo kom ar kwalok kin etan, kin ami jibõñ ro remõn mokta im kiõ.” (Dri Hibru 6:10) Elap ad mõnõnõ bwe ewõr ibwiljid ro rej tiljek ñan Jehovah iumin elõñ yiõ ko!
Jab Ebwer
19. Ewi wãwen ad maroñ bõk tokjen jen ad boub in kõmman emõn?
19 Elõñ rej tõmak bwe elañe rej keini air jerbal ilo kijejeto men in emaroñ kadiklok air mõk. Ilo ejja wãwen in lok wõt, keini ad jerbal ilo kijejeto emaroñ kadiklok ad mõk ilo eñjake im jitõb. Bible eo ej ba: “Jen jab mõk ilo kõmõn emõn bwe ilo ien ekar je naj marmir elañe je jab barõk. Inem, einwõt eor ien iber, jen jerbale emõn ñõn armij otemjej, im elaplok ñõn ro rej ber ilo nukin tõmak.” (Dri Galetia 6:9, 10) Lale mõk kin nan kein “kõmõn emõn” im “jerbale emõn.” Nan kein rej kalikar bwe jen jerbal. Kõmman emõn ñan ro jet emaroñ kejbãrok kij jen ad mõk im bõjrak ilo ad jerbal ñan Jehovah.
20. Ñan jumae ebwer, jej aikwij kejbãrok kij jen kain kamao rot?
20 Ak, kamao im jerbal ibben armij ro rej kajettokjen kien ko an Anij emaroñ kamõk kij. Bible eo ej kakkõl kij im ba: “E erro juõn dreka, bareinwõt bok; a illu an dri bwebwe errolok jeni.” (Jabõn Kennan Ko 27:3) Ñan bõprae kij jen buromõj im barõk, jej aikwij kejbãrok kij jen ro me enana lemnak ko air im rekeini kananaik im notaik ro jet.
21. Ewi wãwen ad maroñ rejañ ro jet ilo ien kwelok ko an Christian?
21 Kwelok ko an Christian rej men in letok eo jen Jehovah remaroñ kakajur kij ilo jitõb. Ilo kwelok ko jej rejañ don kin nan in jiroñ ko im kamao ko remõn. (Dri Hibru 10:25) Aolep ilo congregation eo rej kate ir ñan kalek don ñe rej uak ilo kwelok ko ak ñe rej kwalok katak ko im men ko eirlok wõt ilo program in kwelok ko. Ro rej tel einwõt ri katakin ro ej eddo eo air ñan rejañ ro jet. (Aiseia 32:1, 2) Elaptata ñe rej aikwij kakabilek, ak kauweik armij, wãwen air kakabilek armij rej aikwij kaemololoik ir. (Dri Galetia 6:1, 2) Emol bwe ad yokwe ro jet enaj jibañ kij ñan karejar ñan Jehovah im jab mõk.—Sam 133:1; Jon 13:35.
22. Meñe jejjab wãppen, etke jemaroñ beran wõt?
22 Kabuñ ñan Jehovah ilo ien jemlokin ej kitibuj jerbal. Im mõk ilo lemnak, metak ilo eñjake, im inebata ko jet rej jelet Ri Christian ro bareinwõt. Wãwen mour eo ad ejjab wãppen ebidodo an jorrãn, einwõt jãbi bũdej ak clay. Ak, Bible eo ej ba: “A men in aurõk in ibem ej ilo jãbi bwij ko, bwe maroñ eo e kanuij lap en jen Anij, im jab jen kim.” (2 Dri Korint 4:7) Aet, jenaj mõk, ak jejamin ebwer ak bwõjrak. Jen men in, jen “beran im ba, Jehovah ej aõ ri jibañ.”—Dri Hibru 13:6.
Eliji ilo Tukaduin
• Ta jet ian eddo ko jej aikwij wutiki?
• Ewi wãwen ad maroñ bõk kunad ilo jerbal eo “ñan kõmõn emõn” ñan Ri Christian ro mõttad?
• Ewi wãwen an Jehovah kejbãrok kij ñe jej ebwer ak buromõj?
[Pija eo ilo peij 17]
Jesus ear jelã bwe buromõj eaetok remaroñ kar kabañ ri jilek ro
[Pija eo ilo peij 18]
Jet armij rar jolok jet men in kamõnõnõ ko im jerbal ko ejelok tokjeir
[Pija eo ilo peij 20]
Meñe ewõr joñan maroñ ko ad, Jehovah elap an kaorõk wãwen ad kabuñ ñan e kin aolepen buruõd