“Ej Lelok Kajur ñõn Eo Ej Barõk”
1 Kij aolep jej mõk jen ien ñan ien. Emaroñ walok ejjab jen jerbal ak wãwen makitkit ko jet in enbwinid wõt ak bareinwõt jen abañ ko jej jelmaiki ilo “ien ko renana re naj waloktok.” (2 Tim. 3:1) Einwõt ri karejar ro an Jehovah, ewi wãwen ad bõk kajur eo jej aikwiji einwõt juõn Christian bwe jen jab kadiklok ad jerbal in kwalok nan? Jej kõmman men in ilo ad atartar ion eo ej “bin ilo maroñ potata,” Jehovah. (Ais. 40:26) Ej jelã kin men in aikwij ko ad im ewõr an itoklimo emol ñan jibañ kij.—1 Pit. 5:7.
2 Kein Jibañ ko an Jehovah: Jehovah ej kakajur kij ikijen jitõb kwojarjar eo an, ejja kajur eo wõt elap me ekar kajerbale ñan kõmanman men in kõmanman ko ijoko otemjej ilañ im ilal. Jitõb eo an Anij ej jibañ kij ñan “kõkal [ad] kajur” elañe jej mõk. (Ais. 40:31) Kajitõkin yuk make, ‘Kar ñããt eo eliktata ikar jar ilo tibdik kin jitõb kwojarjar ñan kakajur iõ bwe in maroñ kajejjet eddo ko aõ in Christian?’—Luk 11:11-13.
3 Ikijen ad konono im kalmenlokjen kin Nan in kakõrmol eo an Anij ran otemjej im bõk kakajur kin men ko lor jitõb ilo ad keini ad katak book ak magazine ko ad in Christian, jenaj einwõt juõn “wijki eo emwij kallipe iturin river in dren, eo ej jebar leen ilo ien eo an; im bwilikõn e jamin mõrar.”—Sam. 1:2, 3.
4 Jehovah ej bar kajerbal ri tõmak ro mõttad, ro im “elap air jibañ” kij. (Kol. 4:10, 11) Elap air jibañ ak kakajur kij ilo kwelok ko an congregation ikijen bwebwenato ko, uak ko, im katak ko air rekõketak. (Jerb. 15:32) Ri Christian elder ro elaptata, rej letok kein jibañ ilo men ko lor jitõb im kõketak eo ej kakajur.—Ais. 32:1, 2.
5 Jerbal in Kwalok Nan: Elañe kwoj make eñjake bwe kwoj mõk, jab bõjrak in kwalok nan! Ilo an oktak jen elõñ makitkit ko jet, ekkeini in bõk kunad ilo jerbal in kwalok nan enaj kakajur kij. (Mat. 11:28-30) Jaketo-jaketak news eo emõn ej jibañ kij ñan kalimjeke Ailiñ eo an Anij im reimanlok kake ñan mour indio im kejatdikdik ko an rekanuij in emõn.
6 Elap jerbal jej aikwij in kõmman, mokta jen an naj kokkure jukjuk im bed in enana. Ewõr un emõn ñan jutak bin ilo ad jerbal, “kin kajur eo Anij ej lelok.” (1 Pit. 4:11) Kin jibañ jen Jehovah jenaj kamwijlok jerbal eo ad, kinke “ej lelok kajur ñõn eo ej barõk.”—Ais. 40:29.