“Nan in Tõmak ko Re Naj Najirik Yuk”
1 Jibadõk juõn wãwen mour ilo jerbal in Anij ej aikwij ad lukkun kate kij. (1 Tim. 4:7-10) Ilo kajur eo ad make, ejjabto jenaj mõk im buñ ke jej kajeoñ in lor juõn ial rot in. (Ais. 40:29-31) Juõn wãwen jemaroñ bõk kajur jen Jehovah ej ilo ad kõmman bwe “nan in tõmak ko [ren najidik kij].”—1 Tim. 4:6.
2 Ekan ko Relap Ilo Jitõb: Ikijen Nan eo an im “dri korijer e tiljek im meletlet” Jehovah ej letok ekan ko relap ilo jitõb. (Mat. 24:45) Jej kõmmane ke ijo kunad ñan bõk tokjen jene? Jej konono ke Bible ran otemjej? Jej karõk ke ien ñan katak ibbed make im ñan kalmenlokjen? (Sam 1:2, 3) Mõñã rot kein rej kejmour ilo jitõb rej kakajur im kejbãrok kij jen kilan ko rej kamõjno an lal in an Satan. (1 Jon 5:19) Elañe jej kobrak lemnak eo ad kin men ko remõn im jerbali ilo mour ko ad, Jehovah enaj bed ibbed.—Pil. 4:8, 9.
3 Jehovah ej bareinwõt kakajur kij ikijen kwelok ko an congregation eo. (Hib. 10:24, 25) Nan in jiroñ ko kin men ko lor jitõb im kamao ko remõn jej bõki jen kuktok kein rej kakajur kij ñan jutak bin meñe jej jelmae melejoñ ko. (1 Pit. 5:9, 10) Juõn Christian jodikdik ear ba: “Ij bed ilo school juõn ran eyu, im ej kabwerer. Ak kwelok ko rej einwõt juõn oasis (jikin eo elõñ den ie), ilo ene jemaden eo, ijo ij bõk kakajur bwe in maroñ ellã ilo bar juõn ran in school.” Elap ad bõk jerammõn kin jibadbad ko jej kõmmani ñan bed ilo kwelok ko!
4 Keañ kin Mol eo: Kwalok nan ñan ro jet ear einwõt mõñã ñan Jesus. Ear kakajur e. (Jon 4:32-34) Eindein, ñe jej konono ibben ro jet kin kallimur ko raibujuij an Anij, jej eñjake ad kajurlok. Ñe jej boub ilo jerbal in kwalok nan ej bareinwõt kõmman bwe buruõd im lemnak eo ad en kalimjek wõt Ailiñ eo im kin jerammõn ko me ejjabto renaj itok. Men in emol an kemourur kij.—Mat. 11:28-30.
5 Elap ad jerammõn bwe jej bõk tokjen jen mõñã ko lor jitõb me Jehovah ej litoki ñan armij ro an rainin! Jen wõnmanlok im al kin lañliñ ñan nebar eo an.—Ais. 65:13, 14.