Katak 4

Wõn Devil eo?

Satan Devil eo​—ear itok jen ia? (1, 2)

Ewi Wãwen Satan ej mone armij? (3-7)

Etke kwoj aikwij jumae Devil eo? (7)

1. Nan eo “devil” ej melelen juõn eo ej kariap bar juõn armij. “Satan” ej melelen ri kijirat ak ri jumae. Title kein kar tellokin ri kijirat eo elaptata an Anij. Ilo jinoin, ear juõn enjel ewãppen ilõñ ibben Anij. Bõtab, tokelik ear lemnak kin emake elã jen joñan im kõnan bõk kabuñ eo ear tellokin wõt Anij.​—Matthew 4:8-10.

2. Enjel in, Satan, ear konono ibben Eve ikijen juõn serpent. Ilo an riap ñõn e, ear kabo e bwe en jab bokake Anij. Satan ear jumae “wãwen iroij” eo an Anij, ak jikin eo an Anij Eo Eutiejtata. Satan ear kajitõk ilo bere elañe Anij ear iroij ilo jimwe im emõntata ñõn armij ro An. Bareinwõt Satan ear kajitõk elañe jabdewõt armij enaj kar tiljek ñõn Anij. Ilo an kõmõne men in, Satan ear kõmmõn emake einwõt ri kijirat eo an Anij. Eñin unin kar naetan Satan Devil eo.​—Genesis 3:1-5; Job 1:8-11; Revelation 12:9.

3. Satan ej kajeoñ in mone armij ro bwe ren kabuñ ñõn e. (2 Korint 11:3, 14) Juõn wãwen ej mone armij ro ej ikijen kabuñ wan. Elañe juõn kabuñ ej katakin armij ro kin katak ko rejjab mol kin Anij, emol ej karejar ñõn Satan. (John 8:44) Ro uan kabuñ ko rewan remaroñ tõmak kin aolepen buruir bwe rej kabuñ ñõn Anij eo emol. Ak ilo mol rej kabuñ ñõn Satan. Ej ‘anij in lõl in.’​—2 Korint 4:4.

4. Anijnij ej bar juõn wãwen Satan ej kajur ion armij. Remaroñ kir jitõb ro ñõn kejbarok ir, kajorrãn ro jet, kõjela kin ilju eo air, ak ñõn kõmmõne men in bwilõñ ko. Satan ej jitõb eo enana ilikin aolep jerbal kein. Ñõn kabuñburuen Anij, jej aikwij kejbarok kij jen anijnij.​—Deuteronomy 18:10-12; Jerbal 19:18, 19.

5. Bareinwõt Satan ej mone armij ro ikijen kautiej ailiñ ko air im kabuñ ñõn dolul in kien ko. Jet armij rej lemnak bwe emõnlok ailiñ eo air ak kil ko kilir jen ailiñ ko im kil ko jet kilin armij. Ak ejjab mol men in. (Jerbal 10:34, 35) Armij ro jet rej atartar ion dolul in kien ko ñõn namejelan abañ ko an armij. Ilo air kõmmõne men in, rej karmijetek Ailiñ eo an Anij. Ej make wõt mejelan abañ ko ad.​—Daniel 2:44.

6. Bar juõn wãwen Satan ej mone armij ro ej ilo an kabo ir kin kõnan ko renana. Jehovah ej jiroñ kij bwe jen kejbarok kij jen kõmmõn ko renana kinke ej jelã bwe men kein renaj kajorrãn kij. (Galetia 6:7, 8) Jet armij ro rekõnan bwe kwon kobalok ibbeir ilo manit kein renana. Bõtab, kememej wõt bwe, Satan ekõnan bwe kwon kõmmõne men kein.​—1 Korint 6:9, 10; 15:33.

7. Satan emaroñ kajerbal matõrtõr ak jumae bwe kwon illok jen Jehovah. Jet ian ro rejitenburu ibbem remaroñ illu ibbem kin am katak Bible eo. Ro jet remaroñ kajirere kake yuk. Ak ñõn wõn kwoj muri kin mour eo am? Satan ekõnan kalelñoñ yuk bwe kwon bõjrak jen am katak kin Jehovah. Kwon jab kõtlok bwe Satan en bõk anjo! (Matthew 10:34-39; 1 Peter 5:8, 9) Ilo am jumae Devil, kwomaroñ kamõnõnõik Jehovah im kautiej wãwen iroij eo An.​​—Jabõn Kennan 27:11.

[Pija ko ilo peij 9]

Kabuñ wan, anijnij, im kabuñ ñõn ailiñ ko air rej mone armij ro

[Pija eo ilo peij 9]

Jumae Satan ilo ad katak kin Jehovah