Ellã Jen Lomalo Ekilmir

LALE mõk men eo ej walok! Moses ne im jokwon eo an e ar erlokwe ion Lomalo Ekilmir. Armij ro re mour iben rej ro dri Israel. Ak Per’o im aolepen jar in tõrinae eo an r’ar maloñ ilo lomalo eo. Jen lale wãwen an kar walok men in.

Einwõt j’ar katak, Per’o e ar jiroñ ro dri Israel bwe ren ilok jen Ijipt elikin men in kaiñtan eo ken ka joñoul Anij e ar bõktok ion ro dri Ijipt. Tarrin 600,000 man ro in Israel r’ar ilok, im elõñ kõra im ajiri ro. Bareinwõt, elõñ armij ro jet, ro im r’ar tõmak ilo Jeova, r’ar ilok iben ro dri Israel lok. Aolepeir r’ar bõk sip im goat im kau ko air ibeir.

Mokta jen air kar ilok, ro dri Israel r’ar kajitõk iben ro dri Ijipt kin nuknuk ko im men ko kõmõn jen gold im silver. Ro dri Ijipt r’ar kanuij mijõk, kin men in kaiñtan eo eliktata e ar buñõt ir. Inem r’ar lilok ñõn ro dri Israel men otemjej r’ar kajitõk.

Elikin jet ran, ro dri Israel r’ar itok ñõn Lomalo Ekilmir. Ijo r’ar kakije. Ilo ejja ien in wõt, Per’o im lõmaro mõttõn r’ar jino in buromõj bwe r’ar jilkinlok ro dri Israel jen ir. R’ar ba, ‘Emwij ar kotlok dri kamakoko ro ar!’

Inem Per’o e ar bar ukõt an lemnõk. E ar jab rumij im kaboj jariot im jar in tõrinae eo an. Inem e ar jino an kebel ro dri Israel kin 600 jariot ko me ejej uair, kap aolepen jariot ko jet ilo Ijipt.

Ke ro dri Israel r’ar lo an Per’o im jar in tõrinae eo an kebel ir, r’ar kanuij mijõk. E ar ejelok ial in air ko. R’ar ber iturin Lomalo Ekilmir, im ro dri Ijipt r’ar itok jen tu-rajit. Ak Jeova e ar likit juõn kõro ikõtan armij ro dron im ro dri Ijipt. Inem ro dri Ijipt r’ar jab maroñ lo dri Israel ro bwe ren tõrinaek ir.

Inem Jeova e ar jiroñ Moses bwe en erlokwe jokwon eo an ion Lomalo Ekilmir. Im ke e ar kõmõn men in, Jeova e ar bõktok juõn kõto ekajur jen rear. Dren ko dren in lomalo eo r’ar jibil, im dren ko r’ar worwor ir i anbijmaroñiir im i anmiñiir.

Inem ro dri Israel r’ar jino ilok ilujen lomalo eo ion ene e mõra. Kar aikwij jet auõ ko bwe million im million armij ro im men in mour ko air ren maroñ ilok ilujen lomalo eo ñõn ijo turajit. Ilo ien in, ro dri Ijipt r’ar bar maroñ lo dri Israel ro. Dri kamakoko ro air r’ar ko jen ir! Inem r’ar mõkaj im kebel ir ilujen lomalo eo.

Ke r’ar kõmõn men in, Anij e ar kõmõn bwe whil in jariot ko air ren wõtlok. Ro dri Ijipt r’ar lukkun lelñoñ im jino air lamij im ba: ‘Jeova ej iri ñõn Israel nae ro dri Ijipt. Jen ko jen mejen Israel!’ Ak re kaptata.

Eñin ien eo Jeova e ar jiroñ Moses bwe en erlokwe jokwon eo an ion Lomalo Ekilmir, einwõt am kar lo ilo pija eo. Im ke Moses e ar kõmõn men in, worwor ko worwor in dren ko r’ar jeblaktok im kaliburu ro dri Ijipt im jariot ko air. Aolepen jar in tõrinae eo e ar lorlok ro dri Israel ñõn loan lomalo eo. Im ejelok juõn ian ro dri Ijipt e ar ko im mour!

Ro dron Anij r’ar kanuij mõnõnõ bwe re mour! Lõmaro r’ar al juõn al in kamolol Jeova, im ba: ‘Jeova e ar bõk anjo elap. E ar jolok ors ko im dri uwe ioir na i lojit.’ Mir’i-am, lio jein Moses e ar bõk juõn timbrel ilo pein, im aolepen kõra ro r’ar lor e kin timbrel ko air. Im ke r’ar eep kin loñliñ, r’ar al ejja al eo wõt me lõmaro r’ar al im ba: ‘Jeova e ar bõk anjo elap. E ar jolok ors ko im dri uwe ioir na i lojit.’