‘Jeova Ej Letok ñan Kõj Ial̦ in Lo̦mo̦o̦r’

¹ Jet iien jej iion mãlejjoñ ñe ej itok ñan kautiej aelõñ ko jej jokwe ie. Ñe jej pãd ibwiljin armej ro me el̦ap aer kautiej aelõñ ko aer, men in emaroñ kareel kõj ñan bõk kun̦aad. Ta eo jej aikuj kõm̦m̦ane ñe jej iion wãween in? Ta eoon ko jãn Baibõl̦ eo remaroñ jipañ kõj ñan kabuñ im kautieje wõt Anij im jab aelõñ ko me jej jokwe ie?

² ‘Kwõn Jab Badikdik im Kabuñ ñan Jabdewõt Ekjab’: Jekjek ak kabuñ ñan bõl̦eak ej wãween an armej ro kwal̦o̦k bwe el̦ap aer kautiej aelõñ eo aer. Ilo bõl̦eak ko ekkã an wõr pija in men ko ilañ ãinwõt iju ko im pija in men ko ioon lal̦. Bõtab ejim̦we ke ñan jekjek ak badikdik ñan men kein? Eokwe, Anij ej kwal̦o̦k l̦õmn̦ak eo an kõn men in. Ej ba: “Kwon jab kõmmõn ñõn yuk ekjab in jabdrewõt men ko ion lõl ak ilo lõñ, ak ilo dren iumin lõl. Kwon jab badrikdrik im kabuñ ñõn jabdrewõt ekjab, kinke ña ij Iroij am Anij, im ijjab kõnan bwe kwon kabuñ ñõn jabdrewõt men ijellokũ.”​​—Exodus 20:​4, 5, UBS.

³ El̦aññe juon armej ej jekjek ñan bõl̦eak eo an aelõñ eo ej jokwe ie, m̦ool ke bwe ej kabuñ ñan bõl̦eak eo im jab kabuñ ñan Jeova Anij? Eokwe l̦õmn̦ak kõn men in, bõl̦eak eo ej jutak kõn ta? Ekkar ñan juon ri jeje bok ear ba: “Men eo im ej jutak ikijjeen juon aelõñ ej bõl̦eak eo, im eñin ej men eo im el̦ap an armej ro kautieje.” Juon bok etan Encyclopedia Americana ej ba: “Bõl̦eak eo an juon aelõñ ekwõjarjar ãinwõt an debwããl eo ekwõjarjar.” Bõl̦eak eo ej jutak kõn aelõñ eo. Innem el̦aññe juon ej kabuñ ñan juon bõl̦eak, ej kabuñ ñan aelõñ eo. Ñe armej ro rej kõm̦m̦ane men in rej kalikkar bwe aelõñ eo aer enaaj kõjparok ak lo̦mo̦o̦ren er im ejjab Anij. Bareinwõt ñe rej kõm̦m̦ane men in rej n̦ae ta eo Baibõl̦ ej ba kõn kabuñ ñan ekjab.

⁴ Baibõl̦ eo ej ba bwe ‘Jeova ej letok ñan kõj ial̦ in lo̦mo̦o̦r.’ (Sam 3:​8, UBS) Aelõñ ko an lal̦ kab bõl̦eak ko aer reban letok ñan kõj ial̦ in lo̦mo̦o̦r. Rijjelõk Paul ear rõjañ ri tõmak ro m̦õttan: “Ro jera jitenburu, lale bwe komin jab kabuñ ñõn ekjab.” (1 Korint 10:​14, UBS) Kũrjin ro jinoin rar jab kõm̦m̦an jabdewõt men ñan kautiej ak kabuñ ñan aelõñ eo me rar jokwe ie. Ilo juon bok ej kõmel̦el̦e bwe ilo iien ko etto, el̦ap an kar armej ro reil̦o̦k ñan ri tõl ro an Rom im ãinwõt ñe rej kabuñ ñan er. Bõtab, Kũrjin ro ilo to̦re in rar jab ãinwõt armej rein. Rar m̦akoko in kabuñ ñan ri tõl ro an Rom. Ejjel̦o̦k oktak jãn ro im rem̦akoko in jekjek im kabuñ ñan bõl̦eak ko ilo raan kein. Ãindein l̦o̦k wõt ippãn Kũrjin ro rem̦ool rainin, rejjab jekjek ñan bõl̦eak eo kõnke ej ãinwõt ñe rej kabuñ ñane. Unin aer m̦akoko in jekjek ñan bõl̦eak eo ej kõnke rej kabuñ ñan Jeova wõt im ejjel̦o̦k bar jabdewõt men. Ilo aer ãindein, rej kwal̦o̦k bwe rej l̦õmn̦ak m̦oktata kõn Anij meñe rej kõttãik er ñan “ri utiej” ak ri tõl ro an kien. (Rom 13:​1-7) Ak ta ikijjeen al kõn al eo an aelõñ eo? Ta eo Baibõl̦ ej ba kõn men in?

⁵ Al eo an Aelõñ eo Ej Jutak kõn Ta?: Bok eo etan Encyclopedia Americana ej ba: “Al eo an aelõñ eo ej kalikkar kõn joñan an armej ro kautiej aelõñ ko aer im l̦õmn̦ak bwe eutiejl̦o̦k aelõñ eo aer jãn aelõñ ko jet. Im ilo al eo ekkã aer kajjitõk bwe Anij en tõl er im kõjparok er im ri tõl ro aer.” Ilo m̦ool, al eo an aelõñ eo ej ãinwõt juon al in kabuñ ak jar kõn aelõñ eo. Naan ko ilo al eo rej kajjitõk bwe aelõñ eo en to an pãd im bwe en jeraam̦m̦an. Innem, ejim̦we ke an ro rem̦ool in Kũrjin kobal̦o̦k ippãn ro im rej al?

⁶ Ri kanaan eo Jeremaia ear jokwe ibwiljin armej ro me rar ba bwe rar karejar ñan Anij. Bõtab, Jeova ear jiroñ e im ba: “Kwõn jab jar kõn armej rein, im kwõn jab akwel̦ap im kajjitõk kõn er, . . . bwe I ban eo̦roñ eok.” (Jeremaia 7:16; 11:14; 14:​11) Etke Jeova ear ba naan kein ñan Jeremaia? Kõnke armej ro el̦ap aer kar ko̦o̦t, m̦anm̦an armej, l̦õñ, riab im kabuñ ñan ekjab.​​—Jeremaia 7:⁠9.

⁷ Jijej ear ba: “I jab jar kõn lal̦, a kõn ro kwaar letok ñan eõ, bwe er am̦.” (Jon 17:⁠9) Bareinwõt Baibõl̦ eo ej ba bwe “aolepen lal̦ ej pãd wõt ilo ri nana eo” im ej “jakol̦o̦k.” (1 Jon 2:17; 5:​19) Kõn men in, Kũrjin ro rem̦ool rejjab jar kõn aelõñ eo rej jokwe ie bwe en jeraam̦m̦anl̦o̦k im to an pãd.

⁸ Naan ko ilo al eo an aelõñ eo rej kwal̦o̦k kõn an armej ro utiej bũrueer kõn aelõñ ko aer. Im kwal̦o̦k aer l̦õmn̦ak bwe aelõñ eo aer eutiejl̦o̦k jãn aelõñ ko jet. L̦õmn̦ak rot kein rej n̦ae ta eo Baibõl̦ ej ba. Rijjelõk Paul ear ba: “[Jeova Anij] ear kõmõnmõn ri ailiñ ko otemjelok jen juõn wõt armij, im likit ir iaoleben lõl.” (Jerbal 17:​26, UBS) Im rijjelõk Piter ear ba: “Anij e jab l̦õmn̦ak kõn okõtan armej, A ilo aelõñ otemjej eo ej mijak E, im jerbale kwõjarjar, ej kabuñbũruon.”​​—Jerbal 10:​34, 35.

⁹ Ro im rej mel̦el̦e Baibõl̦ eo rej m̦akoko in kabuñ ñan bõl̦eak eo ak bõk kun̦aaer al kõn al eo an aelõñ eo. Ak ta eo rej kõm̦m̦ane ñe rej pãd ilo iien ko me armej ro rej al kõn al eo im kabuñ ñan bõl̦eak eo?

¹⁰ Rejjab Bõk Kun̦aaer: Kiiñ eo an Babilon etan Nebukadnezar ear kõn̦aan kabõrokuk aolep aelõñ ko me ear irooj iooer. Kõn men in, ear kõm̦m̦an juon ekjab kileplep kõm̦m̦an jãn gold ilo jikin eo etan Dura, im ãlikin ear kũrtok aolep ri utiej ro jãn aelõñ eo bwe ren kobatok ilo iien aje ekjab eo. Ke ear jo kõjañjañ ko aolep rar aikuj buñpedo ñan ekjab eo im kabuñ ñane. Shadrak, Meshak im Abednego rar pãd ilo iien in. Ak rar ke bõk kun̦aaer im kabuñ ñan ekjab eo? Jaab. Ke ear jo kõjañjañ eo erjil ar jab buñpedo iaan aolep armej ro ijo.​​—Daniel 3:​1-12.

¹¹ Rainin, wãween an armej ro kabuñ ñan bõl̦eak eo ej ilo aer likũt peir ioon ubeer ak ioon dam̦aer. Ak ro jet eoktak wãween aer kõm̦m̦ane. Ilo jet aelõñ ajri ro rej aikuj bukwelõlõ im mejenmaik bõl̦eak eo. Ñe Kũrjin ro rej jutak wõt im jab arin armej ro, rej kalikkar bwe rejjab bõk kun̦aaer. Im aer kõm̦m̦ane men in ej ilo wãween eo ejouj.

¹² Ak ta el̦aññe armej ro rej kabuñ ñan bõl̦eak eo ilo juon wãween me ewõr kun̦aan aolep ro me rej jutak? Ñan waanjoñak, jet iien ilo jikuul̦ rej kajjitõk ippãn juon iaan ri jikuul̦ ro bwe en etal ñan nabõj im jutak turin bõl̦eak eo im kabuñ ñane. Ke ej kõm̦m̦ane men in, ri jikuul̦ ro jet rej aikuj jutak ippãn doon ñan kalikkar bwe rej errã ippãn eo me ej kabuñ ñan bõl̦eak eo. Ilo wãween in, rein me rej jutak rej bar bõk kun̦aaer im kabuñ ñan bõl̦eak eo. Kõn men in, ro im rejjab kõn̦aan bõk kun̦aaer renaaj jijet wõt im jab keroro. Bõtab, ta el̦aññe kwe im aolep ri jikuul̦ ro jet kom̦ ar jutak kadede m̦oktal̦o̦k jãn an armej eo jino kabuñ ñan bõl̦eak eo? Eokwe, ejjab mel̦el̦ein bwe kwõj bõk kun̦aam̦ ilo kabuñ ñan bõl̦eak eo.

¹³ Ta eo kwõnaaj kõm̦m̦ane el̦aññe rej kajjitõk ippam̦ bwe kwõn baj jibwe wõt bõl̦eak eo ilo iien m̦aaj ak ilo iien jikuul̦ bwe ro jet ren kabuñ ñan bõl̦eak eo? Baibõl̦ eo ej ba bwe jen jab kabuñ ñan ekjab. Innem el̦aññe jej pãd ilo ijin im jibwe bõl̦eak eo ej ãinl̦o̦k wõt ñe jej bõk kun̦aad im kabuñ ñan bõl̦eak eo. Bareinwõt jejjab m̦aaj ippãer ilo raan in kautiej aelõñ ko aer. Taunin? Kõnke ñe rej kõm̦m̦ane men in, rej kabuñ ñan aelõñ eo. Innem, ñe jej bõk kun̦aad ippãer jej bar kabuñ ñan aelõñ eo.

¹⁴ Ñe rej al kõn al in aelõñ eo, ekkã an armej ro bõk kun̦aaer ilo aer jutak ilo iien eo me rej al. Ilo iien kein, Kũrjin ro rem̦ool rej aikuj jijet wõt. Bõtab, ñe rar baj jutak wõt im em̦õj an jino al eo, ejjab menin aikuj ñan aer kajju jijet. Im ñe rein rej jutak wõt ejjab mel̦el̦ein bwe rej jutak bwe ren bõk kun̦aaer ilo al eo. Im ñe rej kajjitõk bwe juon kumi in armej ren jutak im al im kwõj pãd ilo kumi in, kwõmaroñ jutak ippãer bõtab kwõn jab al ippãer. Ilo wãween in kwõjjab bõk kun̦aam̦ ilo al eo.

¹⁵ Kabuñbũruon Jeova: Ri jeje sam ear kõmel̦el̦e bwe ejjel̦o̦k tokjãn ekjab ko me armej ro rar kabuñ ñani. Ãlikin an kar kõmel̦el̦e kake ekjab ko ear wõnm̦aanl̦o̦k wõt im ba: ‘Ro rej eiki ekjab kein kab ro rej tõmaki renaaj ãinwõt ekjab kein!’ (Sam 115:​4-8) Alikkar bwe ejjab ekkar ñan an juon ri karejaran Jeova jerbal ilo juon jikin jerbal me ej kõm̦m̦an ekjab im bõl̦eak. (1 Jon 5:​21) Bar juon, ilo jikin jerbal enaaj wõr iien ko me jej aikuj kwal̦o̦k ñan ri jerbal ro jet bwe Jeova wõt jej kautieje im kabuñ ñan e im jab ñan bõl̦eak eo im aelõñ eo.

¹⁶ Ñan waanjoñak, ilo jikin jerbal eo am̦ remaroñ kajjitõk ippam̦ bwe kwõn lelal̦l̦o̦k bõl̦eak eo. Ta eo kwõnaaj kõm̦m̦ane? Eokwe ej wawa ioon ta unin aer kõn̦aan bwe kwõn kõm̦m̦ane men in. El̦aññe un eo ej kõnke aolep ren kuktok ñan aer kabuñ ñan bõl̦eak eo, eokwe ñe jej kõm̦m̦ane men in alikkar bwe jej bõk kun̦aad im kabuñ ñan bõl̦eak eo.

¹⁷ Ak ta el̦aññe ej eddo eo am̦ ilo jikin jerbal eo ñan lale bwe kejam ko im wũntõ ko ren kilik im bar lelal̦l̦o̦k bõl̦eak eo ñan am̦ kakon̦e ilo jo jikin, enana ke men in? Eokwe el̦aññe ejjab ilo iien aer kabuñ ñan bõl̦eak eo, ejjab mel̦el̦ein bwe kwõj bõk kun̦aam̦ ilo kabuñ ñan bõl̦eak eo. Ilo iien in, bõl̦eak eo ej baj kakõl̦l̦en aelõñ eo. Im ñe eñin ej eddo eo am̦ ilo jikin jerbal eo, men in ej am̦ make pepe ekkar ñan am̦ mel̦el̦e kõn Baibõl̦ eo. (Galetia 6:⁠5) Juon emaroñ peek im ba bwe ejjab kõn̦aan lelal̦l̦o̦k bõl̦eak eo. Innem emaroñ kajjitõk ippãn bo̦o̦j eo an ñan lel̦o̦k jerbal in ñan bar juon ri jerbal. Bõtab eo juon emaroñ peek im ba bwe ejjab nana ñan kõm̦m̦ane men in kõnke ejjab ilo iien an ro jet kabuñ ñan bõl̦eak eo. Jekdo̦o̦n ta pepe eo kõj kajjojo jej kõm̦m̦ane, jekõn̦aan kõm̦m̦ane men eo ej kabuñbũruon Jeova.​​—1 Piter 3:⁠16.

¹⁸ Ejjel̦o̦k ilo Baibõl̦ eo im ej ba bwe jejjab aikuj pãd ak jerbal ilo jikin ko me ewõr bõl̦eak ko ie. Annañin bõl̦eak ko rej bar likũti ilo jitaam̦ ko, l̦aijen in wa ko ak men ko rej an juon kien. Meñe jej kõjerbali men kein ejjab mel̦el̦ein bwe jej kabuñ ak kautiej aelõñ eo. Wãween eo me juon ej kalikkar bwe ej kabuñ ñan bõl̦eak eo ej ilo wãween eo ej kõjerbale.

¹⁹ Armej ro rej likũti bõl̦eak ko ilo wũntõ ko, kejam ko, wa ko waaer, tebõl̦ ko ak men ko ãierl̦o̦kwõt. Rej bareinwõt wia nuknuk ko im ewõr pija in bõl̦eak eo ie. Ilo jet jikin emo kõkõn̦ak nuknuk rot kein. Bõtab, ilo aelõñ eo kwõj jokwe ie emaroñ jab mo ñan kõm̦m̦ane men in. Ak ñe kwõj kõn̦ak juon nuknuk me ewõr annañin bõl̦eak ie, armej ro renaaj ke l̦õmn̦ak bwe kwõj kautiej bõl̦eak eo im aelõñ eo me ej jutak kake? Jijej ear ba naan kein kõn ro im rej l̦oore: “Re jab jãn lal̦, ãinwõt ña i jab jãn lal̦.” (Jon 17:​16) Jej aikuj bar keememej bwe kõm̦m̦an ko ad rej bar jelõt ri tõmak ro m̦õttad. Men eo jej kõm̦m̦ane enaaj ke kal̦õkatip er im kam̦õjn̦o̦ik er? Paul ear ba ñan Kũrjin ro: ‘Kom̦win kããlõt men ko rem̦m̦antata’ bwe kom̦win ‘jab kõm̦m̦an jabdewõt men jeõm ak jatim̦ enaaj tibñil kake.’​​—Pilippai 1:​10, UBS; Rom 14:​13, UBS.

²⁰ ‘Jen Jouj ñan Armej Otemjej’: Ke lal̦ in ej nanal̦o̦k wõt ilo ‘raan kein ãliktata’ el̦apl̦o̦k an armej ro kautiej aelõñ ko aer make im l̦õmn̦ak bwe aelõñ ko aer rem̦m̦anl̦o̦k jãn aelõñ ko jet. (2 Timote 3:⁠1) Ro ri karejaran Anij ren jab mel̦o̦kl̦o̦k bwe Jeova wõt ej letok ial̦ in lo̦mo̦o̦r im ejjab aelõñ ko rej jokwe ie. Ej tõllo̦kũn wõt Jeova bwe jen kautiej e im kabuñ wõt ñan e. Ke rar kajjitõk ippãn ri kal̦oor ro an Jijej bwe ren kõm̦m̦ane men eo me ear n̦ae ankilaan Jeova, rar ba: “Em̦m̦an jen pokake Anij el̦ap jãn armej.”​​—Jerbal 5:⁠29.

²¹ Rijjelõk Paul ear ba: “Ri karijeran Irooj, en jab akwããl, a en jouj ñan armej otemjej im pojak in katakin armej, en meanwõd.” (2 Timote 2:​24) Kõn men in, ñe ro doon Jeova rej jab bõk kun̦aaer ilo men ko im rej n̦ae kõtaan eo aer ippãn Jeova, ren kõm̦m̦ane ilo juon wãween rej kwal̦o̦k ineem̦m̦an, im jouj.