Timote—Dri Jibañ Eo Ekãl An Paul

LIKAO eo kwoj lo ijin iben dri jilik Paul ej Timote. Timote ej jokwe iben famili eo an ilo Lis’tra. Etan jinen ej Eu’nis im lio jibwin ej Lo’is.

Eñin ej alen eo ken ka jilu in an Paul lolok Lis’tra. Tarrin juõn yiõ lok man, Paul im Bar’ne-bas r’ar itok ñõn ijin ilo juõn tirep in kwalok nan. Im kiõ Paul e ar jeblak iben Sailas, leo jeran.

Kwo jela ke ta eo Paul ej ba ñõn Timote? Ej kajitõk im ba, ‘Kwon mõnõnõ ke in kobatok ibõmro Sailas? Kimro naj mõnõnõ in kajerbal yuk ilo amro kwalok nan ñõn armij ro ijoko retolok.’

‘Aet,’ Timote ej uak, ‘I naj mõnõnõ in iwõj.’ Inem ejjab to tokelik, Timote ej likit famili eo an im ilok iben Paul im Sailas. Ak mokta jen ar katak kin tirep eo air, jen lale ta men ko r’ar walok ñõn Paul. Emotlok kiõ tarrin 17 yiõ jen ke Jisõs e ar weaktok ñõn e ilo ial eo ñõn Damaskõs.

Kememij, Paul e ar itok ñõn Damaskõs bwe en kokkure ro dri kaloran Jisõs, ak kiõ emwij an mõke erõm juõn dri kalor! Tokelik jet ian ro an dri kijirat r’ar kine juõn wãwen air mõn Paul kinke rejjab kõnan bwe en katakin ro jet kin Jisõs. Ak dri kalor ro rej jibañ Paul bwe en ko. Rej likit e ilo juõn ieb im dror lõllok e inabwij in worwor in jikin kwelok eo.

Tokelik Paul ej ilok ñõn Antiok bwe en kwalok nan. Ijin rej kap jino naetan ro dri kaloran Jisõs dri Kristin ro. Inem rej jilkinlok Paul im Bar’ne-bas jen Antiok ñõn ailiñ ko retolok bwe ren kwalok nan ie. Juõn ian jikin kwelok ko rej lolok e ej Lis’tra, ijo jikin Timote.

Kiõ, tarrin juõn yiõ elikin ien in, Paul ej bar ber ilo Lis’tra ilo tirep eo an ken ka ruo. Ke Timote e ar ilok iben Paul im Sailas, kwo jela ke ia eo r’ar ilok ielok? Lale mõk map in, im jen katak kin jet ian jikin ko r’ar ber ie.

Mokta, r’ar ilok ñõn Ai-ko’ni-õm, inem ñõn bar juõn jikin kwelok etan Antiok. Elikin men in rej waneañeañ lok ñõn Tro’as, inem ñõn Pi-lip’pai, Tesa-lo-nai’ka im Be-ri’a. Kwoj lo ke Atens ilo map eo? Paul ej kwalok nan ijin. Tokelik rej jolok tarrin juõn yiõ jimõttõn im kwalok nan ilo Korint. Eliktata rej bwijrak jirik ilo Ep’e-sõs. Inem rej jerak ilo juõn wa im jeblak ñõn Ses-e-ri’a, im waneañeañ lok ñõn Antiok, ijo Paul ej berwõt ie.

Inem Timote ej itoitak iomin elõñ buki mail ilo an jibañ Paul bwe en kwalok “nuj emõn” eo im jino ejaake elõñ congregesõn ko an dri Kristin ro. Ñe kwoj ridtolok, kwon juõn dri korijeran Anij e tiljek einwõt Timote ke?