Kilen bwe En Em̦m̦anl̦o̦k Wõt Ad Kwal̦o̦k Naan—Jel̦ã Uwaake Armej ro El̦aññe Rejjab Kõn̦aan Roñjake

Unin An Aorõk Kõl In: Jen ba bwe kwõjel̦ã bwe ej pojak in wal̦o̦k juon taibuun ak l̦añ ilo jikin eo kwõj jokwe ie. Kwõbar jel̦ã bwe armej ro renaaj mej el̦aññe rejjab ko ñan jikin kone ko. Kwõl̦ak etal im kakkõl armej eo ilo iturin m̦weo im̦õm̦, ejjab kõn̦aan roñjake kõnke ej ba bwe epoub. Kwõn kar ke kajju etal jãne? Kwõban kar! Elõñ ro jej kwal̦o̦k naan ñan er rejjab kõn̦aan roñjake kõj, im rejjab kile bwe ennaan eo jej bõkl̦o̦k ñan er enaaj lo̦mo̦o̦ren er. Jel̦ak etal im kwal̦o̦k naan ñan er, rejjab kõn̦aan roñjake kõnke repoub. (Matu 24:37-39) Ro jet rejjab kõn̦aan roñjake kõj kõn wõt an ro jet kananaik kõj im ba men ko rejjab m̦ool kõn kõj. (Matu 11:18, 19) Bõlen armej rein rej l̦õmn̦ak bwe jej ãinwõt kabuñ ko jet me reriab im nana. (2 Pi. 2:1, 2) El̦aññe armej eo jej kwal̦o̦k naan ñane ejjab kõn̦aan roñjake kõj, jen jab m̦õkaj im ebbeer.

Kilen Kõm̦m̦ane:

M̦okta jãn am̦ kwal̦o̦k naan jãn em̦ ñan em̦, kwõn bõk jidik iien im l̦õmn̦ak kõn ta ko armej ro remaroñ ba el̦aññe rejjab kõn̦aan roñjake. Kwõn bar l̦õmn̦ak kõn ta ko kwõmaroñ ba ñan uwaake armej rein.
El̦aññe kwõj iioone juon armej im ej kabõjrak eok jãn am̦ kõnnaan ñane, kwõn kajjioñ wõnm̦aanl̦o̦k im bwebwenato ippãn. Juon wãween kwõmaroñ kõm̦m̦ane men in ej ilo am̦ nõbare. Ñan waanjoñak, el̦aññe ej ba bwe ewõr an make kabuñ, kwõmaroñ ba, “Elukkuun em̦m̦an kõnke iar kõn̦aan iioone ro me rem̦õn̦õn̦õ in bwebwenato kõn Baibõl̦, ãinwõt kwe.” Jet iien, ñe jej kajjioñ mel̦el̦e kõn eñjake ko an armej eo im wãween ko ej iiooni, emaroñ kõtl̦o̦k ad kwal̦o̦k naan ñane. Ñan waanjoñak, el̦aññe ej ba bwe epoub, kwõmaroñ ba, “Imel̦el̦e. Ak m̦okta jãn aõ etal, imaroñ ke lewaj men in?” Ak ta el̦aññe kwõj iioone juon armej me ej ba bwe ejjab kõn̦aan bwebwenato ippãd? Eokwe, kwõmaroñ ba, “Ta n̦e kwõjjab kõn̦aan bwebwenato kake, Baibõl̦ ke ak kabuñ?”
Kwal̦o̦k lol̦o̦kjen̦. Keememej bwe Jeova ejjab iuuni armej ro ñan roñjake. (Dt. 30:19, UBS) Jeova ej kõtmãne bwe kajjojo armej ren kõm̦m̦an pepe ñan er make im renaaj make lo leen pepe ko aer. (Ga. 6:5) El̦aññe armej eo ej wõnm̦aanl̦o̦k wõt im jab kõn̦aan roñjake, em̦m̦an ñe jej etal jãn ijo. Ñe jej kwal̦o̦k ad kautiej eñjake ko an armej eo, emaroñ m̦õn̦õn̦õ in roñjake tokãlik ñe bar juon ri kwal̦o̦k naan ej iioone.—1 Pi. 3:15.

Kõm̦m̦ane Men in Ilo Allõñ In:

Ãlikin am̦ kõnnaan ippãn juon eo me ejjab kõn̦aan roñjake, komiro ri kwal̦o̦k eo m̦õttam̦ en bwebwenato kõn ta ko rem̦m̦anl̦o̦k me kwõn kar ba ñan armej eo.