Kõjerbal Men ko Jet Kar Kobaiki ilo Bok eo Katak ko Rem̦ool
Ñe eo jej katak ippãn ej mel̦el̦e kõn katak ko rem̦ool ilo Baibõl̦ im l̦oori ilo wãween an mour, enaaj jino kajoorl̦o̦k tõmak eo an im kõm̦m̦an wõnm̦aanl̦o̦k. (Sam 1:1-3) Jemaroñ jipañ ro jej katak ippãer ñan kõm̦m̦an wõnm̦aanl̦o̦k ilo ad kortokjãn men ko jet kar kobaiki ilo bok eo Katak ko Rem̦ool jãn Baibõl̦ Eo.
Kajjitõk in Ãlij ko ilo Jinoin Juon Katak: Kajjojo katak, ewõr kajjitõk ko ilo jinointata im uwaak ko aer repãd ilo katak eo. M̦okta jãn amiro rũkkatak eo am̦ jinoe, kwõmaroñ baj riitil̦o̦k wõt kajjitõk ko ñan kãitoklimoiki kõn katak eo komiro ej pojak in etale. Ak bõlen kwõmaroñ kõtl̦o̦k an uwaaki kajjitõk kein ekkar ñan mel̦el̦e eo an. Innem el̦aññe ebõd mel̦el̦e eo an, jejjab aikuj kajim̦we ilo iien eo wõt. Bõtab, uwaak eo an emaroñ jipañ kwe ñan jel̦ã boin ta ko me komiro naaj aikuj lukkuun etale ippãn doon bwe en mel̦el̦e.—JK. 16:23, UBS; 18:13, UBS.
Kõmel̦el̦e ko Jet ilo Jem̦l̦o̦kin Bok In: Ñe rũkkatak eo emel̦el̦e im ej tõmaki men ko komiro ar etali ilo katak eo, kwõmaroñ baj rõjañe wõt bwe en riit im etale ippãn make kõmel̦el̦e ko jet me katak eo ear jitõñl̦o̦k ñane. Im ñe kwõbar ro̦o̦ll̦o̦k bwe komiro en katak, kwõmaroñ jol̦o̦k jejjo minit ñan lale el̦aññe elukkuun mel̦el̦e. Ak el̦aññe kwõj loe bwe kõmel̦el̦e ko jet renaaj lukkuun jipañe, kwõj aikuj bõk iien ñan etale aolepen kõmel̦el̦e eo ak jet iaan pãrokõrããp ko ie ilo iien eo komiro ej katak. Riiti kajjojo iaan pãrokõrããp ko im kõjerbal kajjitõk ko em̦õj am̦ kar kõpooji l̦o̦k im̦aan.
Bo̦o̦k in Ãlij: Ilo jem̦l̦o̦kin kajjojo katak, ewõr juon bo̦o̦k me epãd uwaak ko ñan kajjitõk ko ilo jinoin juon katak. Kwõmaroñ etale bo̦o̦k in ippãn rũkkatak eo am̦ ñan lale ñe emel̦el̦e im ñe emaroñ make kõmel̦el̦eiki boin ko raorõk. Riiti kõmel̦el̦e ko im bar eoon ko. Innem kiiõ kajjitõk ñe emaroñ kajjioñ kõmel̦el̦eiki ewi wãween an uwaak eo errã ippãn eoon eo.—Jrb. 17:2, 3.