Noah im Ibwijleplep eo Juõn Bwebwenato Emol, Jab Juõn Inoñ Bajjek
KWÕJ kijoror ke kin juõn lal emõnlok—juõn lal ijo armij ro ie rej mour ilo ainemõn ibben don? juõn lal me ejelok tarinae, ejelok kõtõrãi kien, ejelok kowadoñ? Elañe aet, kwomaroñ bõk rejañ jen juõn bwebwenato me elap am jelã kake. Ej bwebwenato eo kin Noah, juõn emaan elap an emõn im ear kalek juõn wa ñan lomoren e im family eo an jen juõn ibwijleplep ilal me ear kokkure ro renana.
Ewõr jet wõt bwebwenato me rebuñbuñ ibelakin lal. Lokbook in men ko rar walok ñan Noah rej walok ilo book in Bible eo ilo Jenesis, chapter 6 ñan 9, im ej bareinwõt walok ilo Koran eo (juõn book ekwojarjar me kabuñ eo an Islam ej bedbed ion) im ilo bwebwenato ko an elõñ armij ro ibelakin lal in. Ibwijleplep eo ear ke lukkun walok, ak ej ke baj juõn bwebwenato in kõkkar ñan rejañ armij ñan kõmmane men eo emõn? Ro rej ekkatak kin kabuñ im scientist ro rar kõbauwe kin kajitõk in iumin buki yiõ ko. Bõtab, Bible eo, Nan eo an Anij, ej kalikar bwe—bwebwenato eo kin Noah ej mol, im ejjab juõn inoñ. Lemnak kin men kein:
Bwebwenato eo ilo Jenesis ej kwalok ñan kij jejjet in yiõ, alliñ, im ran eo Ibwijleplep eo ear ijjino, ñããt im ia eo wa eo ear eotõk ie, im ñããt eo lal in ear mõrã. Tibdikdik in kamelele ko kin wa eo rar bareinwõt jejjet—jekjekin, joñan kilepen, im men ko kõbwebweien rej aikwiji ñan kalek wa eo. Ñe keidi, inoñ ko ekkã an jab alikar air kameleleik men ko.
Ruo ian bwebwenato in menmenbwij ko ilo Bible rej kamol bwe Noah ear lukkun juõn armij. (1 Kronikel 1:4; Luk 3:36) Ezra im Luk jimor, ro me rar aini im karõki menmenbwij ko, rar ri etale ro retiljek. Luk ear etale wãwen menmenbwij eo an Jesus liklok ñan Noah.
Ri Kanan ro Isaiah im Ezekiel im bareinwõt Ri jilek Paul im Peter rar konono kin Noah ak ibwijleplep eo.—Aiseia 54:9; Ezekiel 14:14, 20; Dri Hibru 11:7; 1 Piter 3:19, 20; 2 Piter 2:5.
Jesus Christ ear jitõñlok ñan Ibwijleplep eo, ilo an ba: “Im einwõt ilo ran ko an Noa, e naj ein drein bareinwõt ilo ran ko an Nejin armij. R’ar mõña, r’ar irak, r’ar belek lio beleir, r’ar lelok bwe ren belele, ñõn ran eo Noa e ar uwe ion wa eo, im ibij liplip e ar itok, im mõn ir otemjej.” (Luk 17:26, 27) Elañe Ibwijleplep eo ear jab walok, inem nan ko an Jesus kin “ran ko an Nejin armij” enaj kar ejelok melelen.
Ri jilek Peter ear kanan bwe enaj wõr “ri kajirere” ro me renaj kajekdon ta eo Bible eo ej ba. Peter ear je, “Bwe rej kõnan, meloklok men in bwe . . . e kar ilo ien eo an [Noah] ke den ej kalibubu e, e ar joko.” Jej aikwij ke meloklok mol in? Jaab ñan jidik! Piter ear wõnmanlok: “A lõñ ko kiõ im lõl, kin nan eo, kejbãroki ñõn kijeek ilo ran in ekajet im kokkure armij renana.”—2 Piter 3:3-7.
Bar juõn alen, Anij enaj kokkure ro renana, im bar juõn alen, enaj wõr ro renaj ellã im mour. Ilo ad lor wãwen mour eo an Noah, jemaroñ bed ibwiljin ro rewãnik me renaj ellã ñan loan juõn lal emõnlok.