Kwal̦o̦k ilo Ejjel̦o̦k Pere

1 Tessalonika 1:5

ILO TUKADU: Kaalikkar am̦ lukkuun lõke im tõmak bwe katak ko kwõj kwal̦o̦ki rem̦ool im el̦ap aer aorõk.

KILEN AM̦ KÕM̦M̦ANE:

• En lõt am̦ kõppojakl̦o̦k im̦aan. Liñõri katak eo m̦ae iien kwõlukkuun mel̦el̦e kõn boin ko raorõk ie im wãween an Baibõl̦ kaalikkar bwe relukkuun m̦ool. Ilo am̦ naaj kaalikkare boin kein raorõk, kajjioñ in kõjerbal jejjo naan im en pidodo ñan mel̦el̦e. L̦õmn̦ak kõn ewi wãween an naaj katak eo jipañ armej ro. Im jar ñan Jeova im kajjitõk kõn jetõb kwõjarjar eo an.

• Kõjerbal naan ko rej kaalikkar bwe ejjel̦o̦k am̦ pere. Ijello̦kun am̦ ãliji ejja naan ko wõt jãn bok eo kwõj kõjerbale, em̦m̦anl̦o̦k ñe kwõj kõjerbal naan ko am̦ make. Kõjerbal naan ko rej kaalikkar am̦ lukkuun tõmak bwe em̦ool men ko kwõj kwal̦o̦k kaki.

• Kõnono jãn bũruom̦ im ilo juon wãween ej kaalikkar am̦ tõmak. Ej aikuj em̦m̦an joñan ainikiõm̦ ñe kwõj kõnono. Ñe eban kal̦õkatip armej ro, em̦m̦an ñe kwõj reilo̦k ñan er ñe kwõj kõnono.