Wãween ko Kwõmaroñ Kõm̦m̦ani ilo Iien Katak an Baam̦le eo ak Ippam̦ Make
ILO kar jinoin 2009 eo, Ri Kõnnaan ro an Jeova ipel̦aakin lal̦ in rar kõm̦m̦an oktak ilo raan in kweilo̦k ko aer. Kar m̦okta rekõn kweilo̦k jilu alen ilo juon wiik ak kiiõ kar ukote bwe en ruo wõt alen ilo juon wiik. Kõn men in, rej kõjerbale raan eo juon me rekõn kar kweilo̦k ie ñan katak ippãn baam̦le ko aer ak ippãer make. Kwõj ke kortokjãn im l̦oor karõk in ekããl? Kwõj ke lo tokjãn ko rem̦m̦an kõn am̦ kõm̦m̦ane men in?
Jet rar kajjitõk kõn ta men ko remaroñ kõjerbali ilo iien aer katak ippãn baam̦le eo aer. Kumi eo Ej Tõl Ri Kõnnaan ro an Jeova ejjab letok juon laajrak me aolep rej aikuj l̦oore. Rejjab kõm̦m̦ane men in kõnke eoktak aikuj ko an kajjojo armej jãn doon. Ej kun̦aan ro rej bõran baam̦le eo ñan lale ta wãween eo em̦m̦antata remaroñ kõm̦m̦ane ilo iien aer katak ilo kajjojo wiik. Ãindein bareinwõt ñan ro rej make iaaer.
Jet rej kapoji katak ko ñan kweilo̦k ko. Bõtab, elõñ bar wãween ko jet jemaroñ kõm̦m̦ani ilo iien katak an baam̦le eo. Jet rej riiti Baibõl̦ eo, etale ippãn doon, im kõm̦m̦an tieta kõn bwebwenato ko ilo Baibõl̦. Men in el̦ap an em̦m̦an ñan ajri ro reddik. Ejjab menin aikuj ñan kõjerbali kajjitõk im uwaak ko aolep iien ãinwõt ad kõm̦m̦ane ilo im̦õn kweilo̦k eo. Iien katak eo ej aikuj juon iien me aolep rej m̦õn̦õn̦õ in bõk kun̦aaer im ejjel̦o̦k ej ãliklik ak mijak in kwal̦o̦k l̦õmn̦ak ko aer.
Juon jemen me ewõr jilu nejin, ear je naan kein: “Ekkã wõt amim kõm̦m̦ani men ko kõmar riit kaki ilo Baibõl̦. Kõmij make riiti jebta ko m̦oktal̦o̦k. Ajri ro rej kããlõt jet eoon im kappukot mel̦el̦e ko kaki. Innem ñe iien amim katak, rej kwal̦o̦k mel̦el̦e ko rar loi. Maikõl eo 7 an iiõ, ekkã an jiñaik juon pija ak je juon pãrokõrããp kõn bwebwenato eo ear riiti. Devid ej 13 an iiõ im Kaitlyn ej 15 an iiõ. Jet iien rej kõm̦m̦an ãinwõt ñe rej pãd ilo bwebwenato eo im rej jei men ko rej loi. Ñan waanjoñak, kõmar riiti jebta eo ej kwal̦o̦k kõn an Josep kõmel̦el̦eik ettõn̦ak ko an ri kõmat eo im ri ititõk eo an Pero. Kaitlyn ear je aolep men ko juon ri kalbuuj ear loi ilo bwebwenato in an Josep.”—Jenesis jebta 40.
Wãween ko ippãd ak aikuj ko ad rej oktak jãn doon. Jet katak remaroñ jejjet ñan juon armej ak baam̦le im emaroñ jab lukkuun jejjet ñan ro jet. Bo̦o̦k eo ilo peij eo tok juon ej kwal̦o̦k jet iaan wãween ko jemaroñ kõm̦m̦ani ilo iien katak an baam̦le eo ak ilo ad katak ippãd make. Emaroñ bar lõñ wãween ko jet me kom̦ maroñ kõm̦m̦ani.
[Kamelele in juõn pija ilo 6, 7]
Ñan ro ewõr nejier jodrikdrik:
• Riiti Baibõl̦ eo ippãn doon ãinwõt juon baam̦le. Bõlen l̦eo emaroñ riiti bwebwenato eo im lio pãleen im ajri ro nejierro remaroñ riiti ijoko jet ilo Baibõl̦ me armej ro rej kõnono ie. Ñe rej riit, ren anõke wãween an armej ro ilo bwebwenato eo kõnono im kalikkar eñjake ko aer ilo iien eo.
• Kõnono ippãer kõn mejãnkajjik ko rekõn̦aan kõttõpari kiiõ im ilo ilju im jekl̦aj.
• Alwõji pija ko jãn doulul in im bwebwenato ippãn doon kaki.
• Etale katak ko ilo Imõniaroñroñ eo me rej pãd ium̦win taitõl̦ eo etan “Ñan Jodrikdrik Ro.”
Ri pãlele ro im ejjel̦o̦k nejier:
• Kõnono ippãn doon kõn kõmel̦el̦e ko komiro ar loi ke komiro ar kõm̦m̦an etale ko jãn amiro kar riiti Baibõl̦ eo.
• Kapoje ippãn doon bok eo jej katak kake ilo kweilo̦k in Katak Baibõl̦ an Congregation eo ak Katak in Imõniaroñroñ eo.
• Kõnono ippãn doon kõn wãween ko komiro jim̦or maroñ kal̦apl̦o̦k ijo kun̦aamiro ilo jerbal in kwal̦o̦k naan.
Ro ejjel̦o̦k rejetaer im ro me rej make iaaer ilo m̦ool eo:
• Katak ippam̦ make kõn bok ko rekããl jaar bõki jãn kweilo̦k ko rel̦ap.
• Riiti Yearbook eo ekããl ak ko an iiõ ko l̦o̦k.
• Kappukot uwaak ko ñan kajjitõk ko ekkã an armej ro bõkm̦aantak ilo ijoko kwõj kwal̦o̦k naan ie.
• Kapojakl̦o̦k im̦aan kõn ta ko kwõnaaj ba ilo jerbal in kwal̦o̦k naan.
Ro me ewõr nejier ajri ro reddik:
• Kõm̦m̦an tieta ko kõn bwebwenato ko ilo Baibõl̦ eo.
• Etale ippãn doon katak ko ilo Imõniaroñroñ eo me rej pãd ium̦win taitõl̦ eo etan “Katakin Ajri ro Nejõm̦.”