KATAK 04
Wõn Anij?
Jãn iien ko etto tok ñan raan kein, armej rar kabuñ ñan elõñ anij ko. Ijoke, Baibõl̦ eo ej kõnono kõn juon Anij me “el̦ap jãn anij otemjej.” (2 Kronikel 2:5) Wõn in? Im etke eutiejl̦o̦k jãn aolep anij ko jet me armej rej kabuñ ñani? Ilo katak in, kwõnaaj katak kõn wãween an Anij in kwal̦o̦k kajjien ñan kwe.
1. Etan Anij, im etke jemaroñ lõke im tõmak bwe ekõn̦aan bwe jen jel̦ã etan?
Ilo Baibõl̦ eo, Anij ej kwal̦o̦k kajjien ñan kõj. Ej ba: ‘Ña Jeova im eñin Eta.’ (Riit Aiseia 42:5, 8.) Ekkar ñan elõñ rimmãlõtlõt ro, rej ba bwe ukok in ãt in “Jeova” ilo kajin Hibru ej mel̦el̦ein “Ej Kõm̦m̦an bwe en Erom.” Jeova ekõn̦aan bwe jen jel̦ã etan. (Exodus 3:15) Etke jemaroñ lõke im tõmak men in? Kõnke ear likũt ãt eo etan ilo Baibõl̦ elõñl̦o̦k jãn 7,000 alen!a Ãt in Jeova ej etan “Anij eo wõt em̦ool” me ej Anij in lañ im ioon lal̦.—Jon 17:3
2. Ta eo Baibõl̦ ej kaalikkar kõn Jeova?
Baibõl̦ ej ba bwe iaan aolep anij ko armej ro rej kabuñ ñani, Jeova ej Anij eo wõt em̦ool. Etke? Eokwe, ewõr jet un ko. Ejjel̦o̦k juon en̦ el̦apl̦o̦k an maroñ jãn Jeova, im e wõt “eutiejtata ioon aolepen lal̦ in.” (Riit Sam 83:18.) E eo “Ekajoor Bõtata,” mel̦el̦ein bwe ewõr ippãn kajoor im maroñ ñan kõm̦m̦an jabdewõt men ekõn̦aan. Ear “kõm̦anm̦an men otemjej”—aolep men ko ilañ im ilal̦. (Revelesõn 4:8, 11) Jeova eoktak jãn kõj aolep kõnke ejjel̦o̦k jinoin, im enaaj pãd ñan indeeo.—Sam 90:2.
KAM̦WILAL̦L̦O̦K AM̦ MEL̦EL̦E
Etale oktak eo ikõtaan taitõl̦ ko an Anij im ãt eo etan ejejuwaan. Innem katak ewi wãween an kar kwal̦o̦k kõn ãt eo etan ñan kwe im etke ear kõm̦m̦ane men in.
3. Elõñ taitõl̦ ko an Anij, bõtab juon wõt etan
Ñan lale oktak eo ikõtaan taitõl̦ ko an juon armej im ãt eo etan, kõjo̦e PIJAIN ALWÕJ eo, innem bwebwenato kake kajjitõk in:
Ta oktak eo ikõtaan juon taitõl̦, ãinwõt “Irooj,” im juon ãt?
Baibõl̦ eo ej kwal̦o̦k bwe armej rej kabuñ ñan elõñ anij ko im irooj ro. Riit Sam 136:1-3, innem bwebwenato kake kajjitõk in:
Wõn “Anij in anij ran̦” im “Irooj in irooj ran̦”?
4. Jeova ekõn̦aan bwe kwõn jel̦ã etan im kõjerbale
Ta eo ej kaalikkar bwe Jeova ekõn̦aan bwe kwõn jel̦ã etan? Kõjo̦e PIJAIN ALWÕJ eo, innem bwebwenato kake kajjitõk kein:
Kwõl̦ak lale Jeova ekõn̦aan ke bwe armej ro ren jel̦ã etan? Etke?
Jeova ekõn̦aan bwe armej ro ren kõjerbale etan. Riit Rom 10:13, innem bwebwenato kake kajjitõk kein:
Ewi joñan an aorõk ñan kõjerbale etan Anij, Jeova?
Ewi wãween am̦ eñjake ñe juon ej keememej ãt eo etam im ej kõjerbale?
Kwõl̦ak lale ewi wãween an Jeova eñjake ñe kwõj kõjerbale etan?
5. Jeova ekõn̦aan bwe en l̦apl̦o̦k am̦ epaake e
Juon kõrã jãn Cambodia etan Soten ear ba bwe ilo an kar katak kõn ãt eo etan Anij, el̦apl̦o̦k an m̦õn̦õn̦õ ilo mour eo an. Kõjo̦e PIJAIN ALWÕJ eo, innem bwebwenato kake kajjitõk in:
Ilo pija eo, ke Soten ear katak kõn etan Anij, ewi wãween an kar men in jelõte?
M̦okta jãn am̦ m̦õttãiki juon armej, ekkã am̦ aikuj jel̦ã kõn etan. Riit Jemes 4:8a, innem bwebwenato kake kajjitõk kein:
Ta eo Jeova ej kũr eok ñan am̦ kõm̦m̦ane?
Ilo am̦ jel̦ã kõn etan Anij im kõjerbale, ewi wãween an men in maroñ jipañ eok ñan eñjake am̦ epaakel̦o̦k e?
JET ARMEJ REJ BA: “Juon wõt Anij, innem ejjab aorõk ãt ta eo kwõj kõjerbale.”
Kwõj ke tõmak bwe Jeova ej etan Anij?
En kar ewi wãween am̦ kõmel̦el̦e bwe Anij ekõn̦aan bwe jen kõjerbale etan?
TARLEP IN KATAK EO ILO TUKADU
Jeova ej etan Anij eo wõt em̦ool. Ekõn̦aan bwe jen jel̦ã im kõjerbale etan bwe jen maroñ epaake l̦o̦k e.
Ãlij
Ewi wãween an Jeova oktak jãn aolep anij ko jet me armej rej kabuñ ñan er?
Etke jej aikuj kõjerbale etan Anij?
Ta ko rej kaalikkar bwe Jeova ekõn̦aan bwe kwõn epaake wõt e?
KAL̦APL̦O̦K AM̦ MEL̦EL̦E
Etale l̦alem un ko me rej kam̦ool bwe Anij ej pãd im mour.
Etke ekkar im jim̦we ñan tõmak bwe Anij ear baj pãd wõt im mour.
Katak kõn unin ad aikuj kõjerbale etan Anij, meñe jejjab lukkuun jel̦ã wãween kar ba ilo iien ko etto.
Eaorõk ke taitõl̦ ak ãt ta eo jej kõjerbale ñan ãñinñini Anij? Katak im lale etke jemaroñ ba bwe juon wõt etan Anij.